26.

Mga Rekomend sa Templo

26.0

Pasiuna

Ang pagsulod sa balay sa Ginoo usa ka sagrado nga pribilehiyo. Ang mga lider sa ward ug sa stake moawhag sa tanang miyembro nga mahimong takos ug maghupot og balido nga rekomend sa templo bisan kon wala sila magpuyo duol sa templo.

Ang mga lider sa Simbahan mohimo sa tanang paningkamot sa pagseguro nga ang tanan nga mosulod sa balay sa Ginoo takos nga mobuhat niini (tan-awa sa Salmo 24:3–5). Ang awtorisado nga mga lider sa pagkapari mopahigayon og mga interbiyo sa rekomend sa templo ug mo-isyu og mga rekomend sa templo sa mga miyembro kinsa motubag sa mga pangutana sa interbiyo sa haom ug kinasingkasing nga paagi (tan-awa sa 26.3 Ang Ginoo nagsaad nga kon kadtong mosulod sa Iyang balay mga limpyo, ang Iyang presensya maanaa didto (tan-awa sa Doktrina ug mga Pakigsaad 97:15–16).

Ang mga miyembro nga nag-edad og 8 ug pataas kinahanglan nga adunay balido nga rekomend sa templo aron makasulod sa templo. Sila kinahanglan nga nabunyagan ug nakompirmahan aron mahimo nang makadawat og rekomend.

Ang mga bata nga ubos sa 8 anyos kinsa iselyo ngadto sa ilang mga ginikanan o moobserbar sa pagselyo sa ilang mga igsoon ngadto sa ilang mga ginikanan wala magkinahanglan og rekomend (tan-awa sa 27.4.1 ug 27.4.5). Hinuon, ang ilang mga ginikanan ang mosuta sa ilang impormasyon pinaagi sa Pagpangandam alang sa Ordinansa diha sa LCR (tan-awa sa 27.1.2).

Kini nga kapitulo naghatag og mga instruksiyon alang sa mga lider kinsa mo-isyu og mga rekomend sa templo. Ang bishop magpakitambag sa iyang presidente sa stake kon siya adunay mga pangutana kalabot sa mga rekomend sa templo nga wala matubag dinhi niini nga kapitulo. Ang presidente sa stake mahimong mokontak sa Buhatan sa Unang Kapangulohan kalabot sa mga pangutana.

26.1

Mga Matang sa mga Rekomend sa Templo

Ang usa ka balido nga rekomend nagtugot sa usa ka miyembro sa pagsulod sa tanang templo. Ang mga lider sa pagkapari moseguro nga ang mga miyembro nakadawat sa sakto nga rekomend alang sa ilang mga sirkumstansya. Adunay tulo ka matang sa mga rekomend:

1. Mga rekomend sa templo alang sa proxy nga mga bunyag ug mga kompirmasyon. Kini nga mga rekomend alang sa wala pa matugahi nga mga miyembro nga mopahigayon og proxy nga mga bunyag ug mga kompirmasyon. Kini iisyu ngadto sa miyembro pinaagi sa Leader and Clerk Resources (LCR). Ang miyembro mahimong mopili sa pagdawat og giprinta o mobile nga rekomend.

   Alang sa dugang nga impormasyon, tan-awa sa 26.3.1.

2. Rekomend sa templo alang sa natugahan nga mga miyembro. Kini nga mga rekomend mao ang alang sa mga miyembro kinsa natugahan na kaniadto. Nagtugot kini sa natugahan nga mga miyembro nga makaapil sa tanang ordinansa sa templo alang sa patay. Kini iisyu ngadto sa miyembro pinaagi sa LCR. Ang miyembro mahimong mopili sa pagdawat og giprinta o mobile nga rekomend.

   Alang sa dugang nga impormasyon, tan-awa sa 26.3.2.

3. Rekomend sa templo para sa mga ordinansa alang sa mga buhi. Kini nga mga rekomend alang sa mga miyembro nga modawat sa ilang kaugalingong pagtuga o iselyo ngadto sa kapikas, mga ginikanan, o mga anak. Kini iisyu sa digital nga paagi pinaagi sa Pagpangandam alang sa Ordinansa diha sa LCR. Ang mga lider sa pagkapari mogamit sa Pagpangandam alang sa Ordinansa sa pagsumiter sa nakompleto nga rekomend ngadto sa templo diin ipahigayon ang ordinansa.

   Aron makasulod sa templo, ang mga miyembro nga moedad og 12 o pataas sa kataposan sa tuig diin ang ordinansa mahitabo kinahanglan usab nga adunay usa sa laing duha ka matang sa mga rekomend agi og dugang sa rekomend para sa mga ordinansa alang sa mga buhi. Kon gikinahanglan, ang mga lider sa pagkapari mahimong moisyu og usa niadto nga mga rekomend ug rekomend para sa mga ordinansa alang sa mga buhi atol sa samang interbiyo. Alang sa dugang nga impormasyon, tan-awa sa 26.3.3.

   Alang sa dugang nga impormasyon mahitungod sa mga ordinansa sa templo alang sa mga buhi, tan-awa sa kapitulo 27.

26.2

Pag-amping sa mga Rekomend sa Templo

26.2.1

Mga Lider sa Pagkapari Nag-amping sa mga Rekomend sa Templo

Ang mga lider sa pagkapari kinsa awtorisado nga magbaton og mga libro sa rekomend sa templo kinahanglang moamping niini pag-ayo. Walay laing tawo nga mahimong mogamit niini. Kon ang Simbahan mo-update sa mga libro sa rekomend sa templo, ang mga lider mogisi sa dili na magamit nga mga libro.

Ang mga lider sa pagkapari mosiguro usab nga ang wala tugoti nga mga indibidwal dili maka-access sa impormasyon sa rekomend sa templo diha sa LCR.

26.2.2

Nawala o Gikawat nga mga Rekomend

Ang bishop mohangyo sa mga miyembro sa pagpahibalo kaniya sa labing dali nga mahimo kon ang ilang rekomend nawala o gikawat. Kon ang miyembro takos gihapon, ang bishop o ang gisangonan nga magtatambag o ang klerk mo-log in sa LCR aron sa pagprinta pag-usab sa rekomend. Ang bag-ong rekomend mo-expire sa samang petsa sa orihinal.

Usahay ang usa ka miyembro kansang rekomend nawala o gikawat wala na magsunod sa mga sumbanan sa katakos. Niini nga mga sitwasyon, ang bishop mokanselar sa rekomend dihadiha dayon (tan-awa sa 26.2.3).

26.2.3

Mga Naghupot og Rekomend Kinsa Wala Magsunod sa mga Sumbanan sa Katakos

Kon ang bishop mitino nga ang usa ka miyembro kinsa adunay balido nga rekomend wala magsunod sa mga sumbanan sa katakos (tan-awa sa 26.3), iyang gamiton ang LCR aron ikanselar ang rekomend. Kon wala kini nga sistema, ang bishop mokontak sa opisina sa templo aron ipakanselar ang rekomend. Kon ang miyembro adunay giprinta nga rekomend, pangayoon kini sa bishop gikan sa miyembro.

26.3

Kinatibuk-ang mga Lagda sa Pag-isyu og mga Rekomend sa Templo

Ang awtorisado nga mga lider sa pagkapari mopahigayon og mga interbiyo sa dili pa ang usa ka miyembro makadawat og rekomend sa templo. Ang mga instruksiyon anaa sa LCR. Ang mga lider sa pagkapari kinahanglang mo-isyu lamang og rekomend kon ang miyembro nakatubag sa mga pangutana sa rekomend sa templo sa tukma nga paagi.

Ang mga interbiyo sa rekomend sa templo nagtugot sa mga miyembro sa pagpakita nga aduna silay pagpamatuod ug naningkamot sa pagsunod sa mga sugo sa Dios ug pagsunod sa Iyang mga propeta. Ang mga lider sa pagkapari momatuod usab, pinaagi sa interbiyo, nga ang miyembro takos.

Tan-awa sa 26.4 alang sa impormasyon mahitungod sa pagpahigayon og mga interbiyo sa rekomend sa templo.

26.3.1

Pag-isyu og mga Rekomend sa Templo alang sa Proxy nga mga Bunyag ug mga Kompirmasyon

Ang mga rekomend sa templo alang sa proxy nga mga bunyag ug mga kompirmasyon motugot sa mga miyembro sa pag-apil diha sa mga bunyag ug mga kompirmasyon alang sa patay. Kini iisyu ngadto sa wala pa matugahi nga mga miyembro kinsa nabunyagan ug nakompirmahan na.

Ang mga miyembro nga natugahan na kaniadto wala maisyuhi og rekomend alang sa proxy nga mga bunyag ug mga kompirmasyon.

Ang mga miyembro mahimo nang makadawat niini nga mga rekomend sugod sa Enero sa tuig nga mag-edad sila og 12. Ang usa ka lalaki nga miyembro sa Simbahan kinahanglang i-orden ngadto sa usa ka katungdanan sa pagkapari sa dili pa siya makadawat og usa ka rekomend sa templo.

Sa usa ka ward, ang bishop o usa ka gisangonan nga magtatambag mointerbiyo sa mga miyembro nga wala matugahi alang sa mga rekomend sa templo alang sa proxy nga mga bunyag ug mga kompirmasyon. Sa usa ka branch, ang presidente sa branch lamang ang mopahigayon og mga interbiyo alang sa rekomend sa templo. (Alang sa eksepsiyon, tan-awa sa 23.6.1.)

Ang lider nga mopahigayon sa interbiyo mosunod sa mga lagda diha sa 26.4. Ang mga interbiyo sa rekomend sa templo kinahanglang dili dali-dalion. Kinahanglan kining pribado. Hinuon, ang tawo nga giinterbiyo mahimong modapit og usa ka ginikanan o laing hamtong sa pagtambong.

Ang lider moisyu sa rekomend pinaagi sa LCR kon ang miyembro takos. Kini nga mga rekomend nagkinahanglan lamang sa mga pirma sa miyembro ug sa usa ka sakop sa bishopric o sa presidente sa branch.

Ang mga rekomend alang sa mga proxy nga bunyag ug kompirmasyon ma-activate diha sa LCR pinaagi sa usa ka sakop sa bishopric o sa presidente sa branch.

Alang sa impormasyon mahitungod sa pag-isyu og mga rekomend ngadto sa mga miyembro nga nangandam aron madawat ang ilang pagtuga o maselyo ngadto sa kapikas, mga ginikanan, o mga anak, tan-awa sa 26.3.3.

26.3.2

Pag-isyu og mga Rekomend sa Templo alang sa Natugahan nga mga Miyembro

Ang mga rekomend sa templo alang sa natugahan nga mga miyembro nagtugot sa mga miyembro nga makaapil sa tanang ordinansa sa templo alang sa patay. Kini iisyu ngadto sa mga miyembro nga natugahan na kaniadto. (Alang sa mga miyembro nga modawat sa ilang kaugalingong pagtuga, tan-awa sa 26.3.3.)

Sa usa ka ward, ang bishop o usa ka gisangonan nga magtatambag mopahigayon sa mga interbiyo sa rekomend sa templo ug moisyu og mga rekomend. Sa usa ka branch, ang presidente sa branch lamang ang mopahigayon sa mga interbiyo sa rekomend sa templo ug mo-isyu og mga rekomend.

Ang lider nga mopahigayon sa interbiyo mosunod sa mga lagda diha sa 26.4. Ang mga interbiyo sa rekomend sa templo kinahanglang dili dali-dalion. Kinahanglan kining pribado. Hinoon, ang tawo nga giinterbiyo mahimong modapit sa kapikas, ginikanan, o laing hamtong sa pagtambong.

Ang lider moisyu sa rekomend pinaagi sa LCR kon ang miyembro takos.

Human sa interbiyo sa usa ka sakop sa bishopric o sa presidente sa branch, usa ka sakop sa kapangulohan sa stake mointerbiyo sa mga miyembro kinsa nagpuyo sulod sa stake. Siya mopirma sa mga rekomend niadtong mga takos. Usa ka sakop sa kapangulohan sa misyon mopahigayon sa ikaduhang interbiyo alang sa mga miyembro kinsa nagpuyo sa usa ka district. Siya usab mopirma sa mga rekomend niadtong mga takos. Ang usa ka presidente sa district dili mopahigayon og mga interbiyo sa rekomend sa templo gawas kon gitugotan sa Unang Kapangulohan.

Sa mga stake, ang usa ka sakop sa kapangulohan sa stake o klerk sa stake mo-activate sa rekomend sa templo diha sa LCR. Sa mga district, ang usa ka sakop sa kapangulohan sa misyon o mission clerk mo-activate sa rekomend.

Alang sa impormasyon mahitungod sa pag-isyu og mga rekomend sa templo ngadto sa mga miyembro nga nangandam sa pagtuga o maselyo ngadto sa kapikas, mga ginikanan, o mga anak, tan-awa sa 26.3.3.

26.3.3

Pag-isyu og mga Rekomend sa Templo para sa mga Ordinansa alang sa mga Buhi

Ang mga rekomend sa templo para sa mga ordinansa alang sa mga buhi iisyu kon ang mga miyembro nangandam aron:

• Modawat sa ilang kaugalingong pagtuga (tan-awa sa 27.2).

• Maselyo ngadto sa kapikas (tan-awa sa 27.3).

• Maselyo ngadto sa ilang mga ginikanan (tan-awa sa 27.4).

• Maselyo ang ilang mga anak ngadto nila (tan-awa sa 27.4).

Aron makasulod sa templo, ang mga miyembro nga moedad og 12 o pataas sa kataposan sa tuig diin ang ordinansa mahitabo kinahanglan usab nga adunay rekomend alang sa proxy nga mga bunyag ug mga kompirmasyon o rekomend alang sa natugahan nga mga miyembro. Kon gikinahanglan, ang mga lider sa pagkapari mahimong moisyu og usa niadto nga mga rekomend ug rekomend para sa mga ordinansa alang sa mga buhi atol sa samang interbiyo.

Ang bishop o presidente sa branch ug presidente sa stake personal nga mointerbiyo sa mga miyembro nga nangandam sa pagdawat sa mga ordinansa sa templo.

Sa dinalian nga mga sitwasyon kon ang bishop o ang presidente sa stake wala diha, siya mahimong motugot sa iyang mga magtatambag sa pagpahigayon niini nga mga interbiyo. Sa usa ka branch, ang presidente sa branch lamang ang mahimong mopahigayon niini nga mga interbiyo.

Sa dagko nga mga ward ug mga stake sa mga young single adult, ang mga bishop ug mga presidente sa stake mahimong motugot og sinati nga mga magtatambag sa pagpahigayon niini nga mga interbiyo.

Sa usa ka district, ang presidente sa misyon o gisangonan nga magtatambag ang mopahigayon niini nga mga interbiyo. Ang mga presidente sa district dili mopahigayon niini nga mga interbiyo gawas kon ang Unang Kapangulohan mitugot nila sa pag-isyu og mga rekomend sa templo.

Ang lider nga mopahigayon sa interbiyo mosunod sa mga lagda diha sa 26.4. Ang mga interbiyo sa rekomend sa templo kinahanglang dili dali-dalion. Kinahanglan kining pribado. Hinoon, ang tawo nga giinterbiyo mahimong modapit sa kapikas, ginikanan, o laing hamtong sa pagtambong.

Sa dili pa moisyu og rekomend para sa mga ordinansa alang sa mga buhi, ang bishop o presidente sa branch morebyo sa rekord sa miyembro aron sa pagsuta nga wala kini maglakip og notasyon mahitungod sa mga restriksiyon sa pagkamiyembro sa Simbahan. Rebyohon usab niya ang impormasyon sa miyembro gamit ang Pagpangandam alang sa Ordinansa diha sa LCR. Pirmahan niya sa digital nga paagi ang rekomend para sa mga ordinansa alang sa mga buhi kon ang miyembro takos ug andam sa pagdawat sa mga ordinansa sa templo. Dayon isumiter niya kini ngadto sa presidente sa stake o sa misyon gamit ang Pagpangandam alang sa Ordinansa diha sa LCR.

Ang presidente sa stake o usa ka sakop sa kapangulohan sa misyon mointerbiyo dayon sa miyembro. Pirmahan niya sa digital nga paagi ang rekomend kon ang miyembro takos ug andam sa pagdawat sa mga ordinansa sa templo. Dayon isumiter niya kini ngadto sa templo gamit ang Pagpangandam alang sa Ordinansa diha sa LCR. Kon gikinahnaglan, pirmahan usab niya ang rekomend sa miyembro alang sa natugahan nga mga miyembro (tan-awa sa 26.3.2).

Alang sa impormasyon mahitungod sa mga miyembro nga nangandam sa pagdawat sa mga ordinansa sa templo, tan-awa sa 27.1.1 ug 27.1.2.

Alang sa impormasyon mahitungod sa mga miyembro nga nangandam sa pagdawat sa pagtuga, tan-awa sa 27.2.

Alang sa impormasyon mahitungod sa mga miyembro nga nangandam nga maselyo ngadto sa kapikas, tan-awa sa 27.3.

Alang sa impormasyon mahitungod sa mga miyembro nga nangandam nga maselyo ngadto sa mga ginikanan, tan-awa sa 27.4.

Tan-awa sa 27.4.5 ug 38.4.2 alang sa dugang nga mga palisiya sa pag-obserbar sa mga pagselyo ug sa pagkaselyo ngadto sa mga ginikanan.

26.3.4

Pag-isyu og mga Rekomend sa Templo ngadto sa mga Miyembro sa Layo nga mga Dapit

Ang ubang mga miyembro nagpuyo sa mga dapit nga magkinahanglan og mahal nga pagbiyahe o lisod kaayo nga makahimamat og usa ka sakop sa kapangulohan sa stake o misyon. Niini nga mga sitwasyon, ang usa ka sakop sa kapangulohan sa stake o misyon mahimong makigkita sa miyembro sa birtuwal nga paagi aron mopahigayon og interbiyo alang sa rekomend sa templo (tan-awa sa 31.4).

Ang lider moisyu sa rekomend kon ang miyembro takos. Kon ang miyembro mohangyo og giprinta nga rekomend, usa ka sakop sa bishopric o presidente sa branch moprinta sa rekomend alang sa miyembro.

Kini nga palisiya magamit usab sa mga sakop sa militar kinsa anaa sa hilit nga mga dapit.

26.4

Pagpahigayon og Interbiyo sa Rekomend sa Templo

Ang templo mao ang balay sa Ginoo. Ang pagsulod sa templo ug pag-apil sa mga ordinansa usa ka sagrado nga pribilehiyo. Kini nga pribilehiyo gigahin alang niadtong kinsa andam sa espirituwal nga paagi ug naningkamot sa pagsunod sa mga sumbanan sa Ginoo, sama sa gitino sa awtorisado nga mga lider sa pagkapari.

Sa paghimo niini nga pagtino, ang mga lider sa pagkapari mointerbiyo sa miyembro gamit ang mga pangutana nga anaa sa ubos. Ang mga lider kinahanglang dili modugang o motangtang sa bisan unsa nga mga kinahanglanon. Hinoon, sila mahimong mopahiangay sa mga pangutana ngadto sa pangidaron ug mga sirkumstansiya sa miyembro.

Usahay ang mga miyembro adunay mga pangutana panahon sa interbiyo sa rekomend sa templo. Ang lider sa pagkapari mahimong mopasabot og sukaranang mga baroganan sa ebanghelyo. Mahimo usab siyang motabang sa mga miyembro nga makasabot sa mga pangutana sa rekomend sa templo kon gikinahanglan. Hinoon, dili niya i-presentar ang iyang personal nga mga tinuohan, mga gusto, o interpretasyon isip doktrina o palisiya sa Simbahan.

Ang mga interbiyo sa rekomend sa templo kinahanglang dili dali-dalion. Kinahanglan kining pribado. Hinoon, ang tawo nga giinterbiyo mahimong modapit sa kapikas, ginikanan, o laing hamtong sa pagtambong.

26.4.1

Mga Pangutana sa Interbiyo alang sa Rekomend sa Templo

1. Ikaw ba adunay pagtuo ug pagpamatuod sa Dios, ang Amahan sa Kahangtoran; sa Iyang Anak, si Jesukristo; ug sa Espiritu Santo?

2. Ikaw ba adunay pagpamatuod sa Pag-ula ni Jesukristo ug sa Iyang tahas isip imong Manluluwas ug Manunubos?

3. Ikaw ba adunay pagpamatuod sa Pagpahiuli sa ebanghelyo ni Jesukristo?

4. Ikaw ba nagpaluyo sa Presidente sa Ang Simbahan ni Jesukristo sa mga Santos sa Ulahing mga Adlaw isip propeta, manalagna, ug tigpadayag ug isip mao ang bugtong tawo sa yuta nga gitugotan sa pagdumala sa tanang yawe sa pagkapari?

   Ikaw ba nagpaluyo sa Unang Kapangulohan ug sa Korum sa Napulog Duha ka Apostoles isip mga propeta, mga manalagna, ug mga tigpadayag?

   Ikaw ba nagpaluyo sa ubang Kinatibuk-ang mga Awtoridad ug sa lokal nga mga lider sa Simbahan?

5. Ang Ginoo miingon nga ang tanang butang “himoon nga limpyo” sa Iyang atubangan (Doktrina ug mga Pakigsaad 42:41).

   Ikaw ba naningkamot alang sa moral nga kalimpyo sa imong mga hunahuna ug kinaiya?

   Ikaw ba nagsunod sa balaod sa kaputli?

6. Ikaw ba nagsunod sa mga pagtulon-an sa Simbahan ni Jesukristo diha sa imong pribado ug publiko nga kinaiya kauban sa mga sakop sa imong pamilya ug sa uban?

7. Ikaw ba nagsuporta o nag-awhag og bisan unsa nga mga pagtulon-an, mga binuhatan, o doktrina nga nahisupak niadtong gidawat sa Ang Simbahan ni Jesukristo sa mga Santos sa Ulahing mga Adlaw?

8. Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takos nga pag-ambit sa sakramento; ug sa pagpakabuhi subay sa mga balaod ug mga kasugoan sa ebanghelyo?

9. Ikaw ba naningkamot nga magmatinuoron sa tanan nimong gibuhat?

10. Ikaw ba hingpit nga tigbayad og eksakto nga ikapulo?

    Alang sa bag-ong mga miyembro nga nagtinguha og rekomend aron makapahigayon og proxy nga mga bunyag ug mga kompirmasyon: Andam ka ba nga mosunod sa sugo sa pagbayad sa ikapulo?

11. Ikaw ba nakasabot ug nagsunod sa Pulong sa Kaalam?

12. (Kini nga pangutana laktawan ra kon mag-interbiyo og usa ka bata o usa ka batan-on.) Ikaw ba adunay pinansyal o laing mga obligasyon ngadto sa kanhi asawa o mga anak?

    Kon oo, kasamtangan ba nimong natuman kadtong mga obligasyon?

13. (Kini nga pangutana laktawan ra kon mag-interbiyo og usa ka miyembro nga wala pa matugahi.) Gituman ba nimo ang mga pakigsaad nga imong gihimo sa templo?

14. (Kini nga pangutana laktawan ra kon mag-interbiyo og usa ka miyembro nga wala pa matugahi.) Imo bang gitahod ang imong sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory? (Basaha ang pamahayag bahin sa “Pagsul-ob sa Garment sa Templo” nga gilakip sa ubos ngadto sa matag miyembro.)

15. Aduna bay bug-at nga mga sala sa imong kinabuhi nga kinahanglang iresolbar uban sa mga awtoridad sa pagkapari isip kabahin sa imong paghinulsol?

16. Ikaw ba nagkonsiderar sa imong kaugalingon nga takos nga mosulod sa balay sa Ginoo ug moapil sa mga ordinansa sa templo?

26.4.2

Pagsul-ob sa Garment sa Templo

Ang Unang Kapangulohan mihatag sa mosunod nga giya bahin sa pagsul-ob sa garment:

“Ang garment sa balaan nga pagkapari nagpahinumdom kanato sa tabil diha sa templo, ug kana nga tabil nagsimbolo ni Jesukristo. Sa higayon nga imong isul-ob ang imong garment, imong gisul-ob ang usa ka sagrado nga simbolo ni Jesukristo. Ang pagsul-ob niini usa ka panggawas nga pagpahayag sa imong kinahiladman nga pasalig sa pagsunod Kaniya. Ang garment usa usab ka pahinumdom sa imong mga pakigsaad sa templo. Kinahanglan nimong isul-ob ang garment matag adlaw ug gabii sa tibuok nimong kinabuhi. Kon gikinahanglan kining huboon alang sa mga kalihokan nga dili makataronganon nga mabuhat samtang nagsul-ob sa garment, paninguha sa pagsul-ob og balik niini sa labing daling panahon. Samtang ikaw maghupot sa imong mga pakigsaad, lakip ang sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory, ikaw adunay mas dako nga akses sa kaluoy, proteksiyon, kalig-on, ug gahom sa Manluluwas.”

Kon ang mga miyembro adunay mga pangutana mahitungod sa pagsul-ob og garment, giyahi sila ngadto sa 38.5.

26.4.3

Dugang nga Direksyon

Ang lider sa pagkapari mopasabot pag-ayo ngadto sa miyembro sa panginahanglan sa pagpanalipod sa iyang rekomend. Kinahanglan nga dili gayod kini pahulaman ug kinahanglang i-report dayon ngadto sa nag-isyu kon mawala o gikawat.

26.5

Pag-isyu og mga Rekomend sa Templo diha sa Espesyal nga mga Sirkumstansya

26.5.1

Bag-ong Nabunyagan nga mga Miyembro

Ang bishop mointerbiyo sa bag-ong mga miyembro kinsa anaa sa igo nga pangedaron aron modawat og rekomend sa templo alang sa proxy nga mga bunyag ug mga kompirmasyon (tan-awa sa 26.3.1). Siya mopahigayon niini nga interbiyo dili madugay human sa kompirmasyon sa miyembro, kasagaran sulod sa usa ka semana. Alang sa mga lalaki, kini nga interbiyo mahimong mapahigayon isip kabahin sa interbiyo aron makadawat sa Aaronic nga Pagkapari. Ang bishop o presidente sa branch mahimong mosangon sa usa sa iyang mga magtatambag sa pagpahigayon niini nga interbiyo. Ang lalaki nga mga miyembro sa Simbahan kinahanglang i-orden ngadto sa usa ka katungdanan sa pagkapari sa dili pa makadawat og usa ka rekomend sa templo.

Atol sa interbiyo, ang bishop mahimong motanyag nga gamiton ang Tabang sa Ngalan sa Pamilya [Family Name Assist] aron matabangan ang bag-ong miyembro sa pagprinta sa ngalan sa namatay na nga sakop sa pamilya kang kinsa ang miyembro mopahigayon sa mga ordinansa sa templo (tan-awa sa “Tabang sa Ngalan sa Pamilya [Family Name Assist]” diha sa 25.4.1).

Ang takos nga hamtong nga mga miyembro mahimong makadawat sa ilang kaugalingong pagtuga usa ka hingpit nga tuig human makompirmahan isip miyembro sa Simbahan (tan-awa sa 27.2.1.1). Ang mga lider sa Pagkapari moseguro nga ang petsa sa pagdawat sa miyembro sa pagtuga kinahanglang sa labing minos usa ka hingpit nga tuig human sa petsa sa iyang kompirmasyon, dili petsa sa bunyag. Ang Unang Kapangulohan lamang ang motugot sa mga eksepsiyon.

26.5.2

Batan-ong mga Misyonaryo nga Mipauli gikan sa Pagserbisyo nga Layo sa Panimalay

Sa dili pa ang usa ka batan-on nga misyonaryo nga nagserbisyo layo sa panimalay mokompleto sa iyang pagserbisyo, ang presidente sa misyon mopahigayon og interbiyo sa rekomend sa templo. Kon ang misyonaryo takos, moisyu siya og rekomend. Ang presidente sa misyon mobutang og petsa ug mo-activate sa rekomend aron nga kini mo-expire tulo ka bulan gikan sa petsa sa pagpauli sa misyonaryo.

Ang bishop mointerbiyo sa namauli nga mga misyonaryo aron sa pag-isyu og bag-o nga rekomend sa templo duol sa kataposan sa tulo ka bulan nga panahon sa pag-expire. Sa dinalian nga mga sitwasyon nga dili makahimo ang bishop, siya mahimong motugot sa usa sa iyang mga magtatambag sa pagpahigayon niini nga mga interbiyo.

Sa dagko nga mga ward sa mga young single adult, ang mga bishop mahimong motugot og sinati nga mga magtatambag sa pagpahigayon niini nga mga interbiyo.

Ang namauli nga mga misyonaryo makigkita dayon sa usa ka sakop sa kapangulohan sa stake alang sa interbiyo sa rekomend sa templo.

Niini nga mga interbiyo sa rekomend sa templo, ang bishop ug sakop sa kapangulohan sa stake morebyo usab sa tambag nga gihatag diha sa interbiyo sa pag-release sa misyonaryo (tan-awa sa 24.8.2). Ilang hisgotan ang pag-uswag sa mipauli nga misyonaryo, kahimtang, ug kasamtangan nga calling sa Simbahan. Sila usab moawhag kaniya sa pagpadayon diha sa tibuok kinabuhi nga dalan sa espirituwal nga paglambo ug pagserbisyo.

Kon ang mipauli nga misyonaryo walay calling sa Simbahan, ang bishop ug presidente sa stake moseguro nga adunay ikahatag nga calling. Ang mipauli na nga mga misyonaryo mahimong irekomendar nga moserbisyo isip mga temple worker kon adunay templo sa duol (tan-awa sa 25.5).

26.5.3

Mga Miyembro Nga Wala Magpuyo sa Samang Ward sulod sa Dili Mominos Usa ka Tuig

Kon ang usa ka miyembro wala magpadayon og puyo sa samang ward sulod sa dili mominos usa ka tuig, ang bishop morebyo sa rekord sa miyembro aron sa pagsuta nga wala kini maglakip og notasyon mahitungod sa mga restriksiyon sa pagkamiyembro sa Simbahan.

Ang bishop o usa ka gisangonan nga magtatambag mokontak sa kanhi bishop sa dili pa mopahigayon og interbiyo sa rekomend sa templo. Kon ang usa ka magtatambag masayod nga adunay kompidensiyal nga impormasyon, iyang taposon ang panag-istoryahanay. Siya mopahibalo sa iyang bishop sa pagkontak sa kanhi bishop sa dili pa ang interbiyo.

26.5.4

Human sa Diborsiyo, Panagbulag, o Pagpawalay Bili sa Kaminyoon [Annulment]

Ang bishop ug presidente sa stake mahimong dasigon sa pag-interbiyo sa usa ka miyembro kinsa diborsyado o legal nga nakigbulag o kansang kaminyoon napawalay bili sukad sa kataposang pagdawat og rekomend sa templo. Atol niini nga interbiyo sila motabang sa paglig-on sa miyembro sa espirituwal nga paagi. Sila usab mosuta sa padayong katakos sa miyembro alang sa templo.

26.5.5

Mga Miyembro Kansang Suod nga mga Paryente Dayag nga Misupak sa Simbahan o Nahisakop sa mga Grupo nga Miapostasiya

Ang mga bishop ug ilang mga magtatambag kinahanglang sensitibo kon moisyu og mga rekomend ngadto sa mga miyembro kansang suod nga mga paryente dayag nga misupak sa Simbahan o nahisakop sa mga grupo nga miapostasiya. Ang mga miyembro niini nga mga sirkumstansiya kinahanglang dili mobati nga dili sila mahimo nga maghupot og rekomend sa templo tungod sa ilang mga kaabin nga pamilya. Sila kinahanglang awhagon nga magmentinar og mahigugmaon nga relasyon sa suod nga mga paryente. Mahimo silang isyuhan og rekomend sa templo kon ilang matubag ang mga pangutana sa rekomend sa templo sa haom ug kinasingkasing nga paagi.

26.5.6

Mga Indibidwal nga Mikonsiderar sa Ilang Kaugalingon isip Transgender

Ang mga ordinansa sa templo dawaton sumala sa biyolohikanhon nga sekso nga natawhan sa usa ka tawo. Ang takos nga mga miyembro nga wala mopadayon sa paghimo sa pagpaopera, medikal o sosyal nga kausaban sa iyang sekso nga natawhan mahimong makadawat og rekomend sa templo ug mga ordinansa sa templo. (Alang sa kahulogan sa sosyal nga kausaban, tan-awa sa 38.6.23.)

Ang mga miyembro nga nakahimo og mga lakang ngadto sa kausaban ug unya naghimo og kausaban balik ngadto sa ilang sekso nga natawhan ug takos ug mapasaligon nga mosunod sa mga sugo sa Dios mahimong makadawat og rekomend sa templo ug mga ordinansa sa templo.

Ang mga bishop makigtambag sa presidente sa stake aron sa pagtubag sa indibidwal nga mga sitwasyon uban sa kasensitibo ug Kristohanong gugma. Ang mga presidente sa stake ug misyon mangayo og tambag gikan sa Kapangulohan sa Area.

Alang sa dugang nga impormasyon, tan-awa sa 38.6.23

26.5.7

Mga Miyembro nga Nakabuhat og Seryoso nga Sala

Ang miyembro nga nakabuhat og seryoso nga sala dili makadawat og rekomend sa templo hangtud nga siya nakahinulsol (tan-awa sa 32.6). Ang gidugayon sa panahon tali sa sala ug sa pag-isyu og rekomend mag-agad sa diskresyon sa bishop ug presidente sa stake. Kinahanglan nga igo gayud ang pagtino nga ang tawo tinuod nga naghinulsol.

26.5.8

Mga Miyembro Kinsa Gidawat Pag-usab human sa Pagbakwi ug Pagluwat sa Pagkamiyembro diha sa Simbahan

26.5.8.1

Mga Miyembro nga Wala pa Matugahi

Human ang usa ka miyembro kinsa wala pa matugahi kaniadto gidawat pag-usab pinaagi sa bunyag ug kompirmasyon, ang bishop mahimong mointerbiyo kaniya aron makadawat og rekomend alang sa proxy nga mga bunyag ug mga kompirmasyon nga adunay limitasyon ang paggamit (tan-awa sa 26.4.2). Kini nga interbiyo kasagaran mahitabo sulod sa usa ka semana gikan sa kompirmasyon sa miyembro. Mga miyembro nga lalaki kinahanglan gayod nga ma-orden ngadto sa usa ka katungdanan sa pagkapari sa dili pa makadawat og rekomend sa templo.

Kining mga miyembro dili maisyuhan og mga rekomend sa pagdawat sa ilang kaugalingong tuga hangtod sa usa ka tuig human sa petsa sa pagkadawat nila pag-usab ngadto sa Simbahan pinaagi sa bunyag ug kompirmasyon.

26.5.8.2

Mga Miyembro nga Natugahan na Kaniadto

Ang mga miyembro kinsa natugahan na kaniadto dili makadawat og bisan unsang matang sa rekomend hangtod nga ang ilang mga panalangin sa templo napahiuli na pinaagi sa ordinansa sa pagpahiuli sa mga panalangin (tan-awa sa 32.17.2). Kon ang ilang mga panalangin gipahiuli, sila mahimong isyuhan og rekomend sa templo alang sa natugahan nga mga miyembro.