25. Cakacaka ni Valetabu kei na Tuva Kawa ena Tabanalevu kei na iTeki
“25. Cakacaka ni Valetabu kei na Tuva Kawa ena Tabanalevu kei na iTeki,” iVoladusidusi Raraba: Veiqaravi e Na Lotu i Jisu Karisito ni Yalododonu Edaidai (2020).
“25. Cakacaka ni Valetabu kei na Tuva Kawa ena Tabanalevu kei na iTeki,“ iVoladusidusi Raraba.
iVakatakilakila
valetabu
25.
Cakacaka ni Valetabu kei na Tuva Kawa ena Tabanalevu kei na iTeki
25.0
iVakamacala Taumada
Na vakaduavatataki ni matavuvale me tawamudu e tiki ni Nona cakacaka ni veivakabulai kei na bula vakacerecerei na Kalou (raica na 1.2). Na cakacaka ni valetabu kei na tuva kawa e sala ni veivakaduavatataki me vauci na matavuvale me tawamudu (raica na Maciu 16:19). Na cakacaka oqo e oka kina na:
Dau lako wasoma ki na valetabu, kevaka e rawa, mo sokalou vua na Kalou ka vakayacora na cakacaka vakalotu me baleti ira na noda qase e liu (raica na Luke 24:52–53; Vunau kei na Veiyalayalati 109:13–14).
Na valetabu e vale ni Turaga Na cakacaka vakalotu kei na veiyalayalati ni valetabu e vakalougatataki ira na luvena na Tamada Vakalomalagi. Sa sureti ira kece na luvena na Tamada Vakalomalagi me ra vakadonui ka ciqoma na cakacaka vakalotu ni valetabu.
Na iwase oqo e idusidusi vei ira na iliuliu ni Lotu kei ira na lewenilotu ena cakacaka ni valetabu kei na tuvakawa. E levu tale na itukutuku e tiko ena “Valetabu” kei na “Tuva Kawa” (Ulutaga Vakosipeli, topics.ChurchofJesusChrist.org).
25.1
Vakaitavi ni Lewenilotu kei na iLiuliu ena Valetabu kei na Cakacaka ni Tuva Kawa
Sa nodra na madigi kei na itavi na lewe ni Lotu me ra veivuke ena vakaduavatataki ni nodra matavuvale me tawamudu. Era na vakarautaki ira me ra vakayacora na veiyalayalati ni ra ciqoma na cakacaka vakalotu ni valetabu, ka ra saga matua me ra maroroya na veiyalayalati oqori. Era na vukei ira talega na lewe ni matavuvale me ra kila, ciqoma, ka saga me ra maroroya na veiyalayalati ni valetabu. Sa nodra itavi taumada na itubutubu me ra vukei ira na luvedra me ra vakila na veivakalougatataki ni veiqaravi ni valetabu kei na tuva kawa ena vukudra na lewe ni matavuvale era sa mate.
Era sa vakauqeti na lewe ni Lotu me ra kilai ira na wekadra era sa mate ka ra se bera ni ciqoma na cakacaka vakalotu ni valetabu. Era qai vakayacora na lewenilotu na cakacaka vakalotu ena vukudra na wekadra oqori (raica na Vunau kei na Veiyalayalati 128:18). Ena vuravura ni yalo, sa rawa ni ra digitaka na tamata era sa mate me ra ciqoma se vakasuka na cakacaka vakalotu sa vakayacori ena vukudra.
Era dau sureti ira talega na matavuvale kei na itokani na lewenilotu me ra vulica na veika me baleti ira na nodra qase e liu ka kunea na kedra italanoa.
Era tokoni ira na lewenilotu na iliuliu ni Lotu ena veisala eso oqo:
Vakavulica na bibi ni kena caka ka sagai me maroroi na veiyalayalati ni valetabu.
Vakayaloqaqataki ira na lewenilotu me ra vulica na veika me baleti ira na nodra qase e liu, kunea na kedra italanoa, ka vakayacora na cakacaka vakalotu ni valetabu ena vukudra.
Tokoni ira na itubutubu ena nodra vukei na luvedra me ra vakaitavi ena cakacaka ni valetabu kei na tuva kawa.
Vakayaloqaqataki ira na lewenilotu era sa vaka edaumeni oti me tiko na nodra ivolatara vakabau ni valetabu ka sokalou ena valetabu ena kena levu ga e rawa.
Vakayaloqaqataki ira na itabagone, lewenilotu vou, kei ira tale eso na uabula sega ni edaumeni me tiko na nodra ivolatara ni valetabu ka lako ki na valetabu me ra papitaiso ka vakadeitaki ena vukudra na mate.
Raica na wase e 26 me baleta na itukutuku ni ivolatara ni valetabu.
25.1.1
iTavi ni Tamata Yadua Me Baleta na Sikovi ni Valetabu
Era na vakatulewataka vakataki ira na lewenilotu na gauna kei na levu ni nodra na sokalou ena valetabu. Me ra kakua ni dau lavaka na iliuliu e dua na iwiliwili se ivakarau ni kena tukunikataki na tiko rawa ena valetabu.
25.1.2
iLakolako ni Tabanalevu kei na iTeki ki Valetabu
Na tabana ni Lotu yadua e lesi ki na dua na tikina ni valetabu. Na tuvalaki ni veisiko ena valetabu ni tabanalevu se iteki ena taudaku ni valetabu digitaki ni tikina e sega ni vakauqeti.
Sa rawa ki na lewenilotu yadua kei na matavuvale me ra gole ki na dua ga na valetabu era gadreva.
25.2
Tuvalaki ni Cakacaka ni Valetabu kei na Tuva Kawa ena Tabanalevu
25.2.1
Matabisopi
Na matabisopi ena veitalanoa kei na mataveiliutaki ni kuoramu ni italatala qase kei na iSoqosoqo ni Veivukei ni ratou liutaka na sasaga ni tabanalevu ena cakacaka ni tuvakawa ni valetabu. Era na dau veivakasalataki vakawasoma na vei iliuliu oqo.
Sa ikoya talega oqo na itavi ni matabisopi me baleta na cakacaka ni valetabu kei na tuvakawa ena tabanalevu:
Vakayaloqaqataki ira na tamata yadua kei na matavuvale me ra vulica na ivunau kei na veivakalougatataki ni cakacaka ni valetabu kei na tuva kawa.
E ratou na vakadeitaka ni dau vakavulici ena veigauna ena lotu na ivunau kei na veivakalougatataki ni cakacaka ni valetabu kei na tuvakawa.
Vakadeitaka ni na semati na cakacaka ni valetabu kei na tuvakawa ena matabose ni tabanalevu kei na matabose ni itabagone ni tabanalevu.
Railesuva ka vakadonuya na ituvatuva ni cakacaka ni tuvakawa ni valetabu ena tabanalevu (raica na 25.2.6).
Raica raraba na tuvalaki ni vuli ni vakavakarau ki na valetabu (raica na 25.2.8).
Solia na ivolatara ni valetabu (raica na wase e 26).
Ena veivosaki na matabisopi kei na peresitedi ni iteki me navuci kina se me kacivi e dua na iliuliu ni cakacaka ni tuvakawa ni valetabu ena tabanalevu (raica na 25.2.3 me baleta na ikuri ni ivakamacala).
25.2.2
Mataveiliutaki ni Kuoramu ni iTalatala Qase kei na iSoqosoqo ni Veivukei
Sa nodratou itavi na mataveiliutaki ni kuoramu ni italatala qase kei na iSoqosoqo ni Veivukei me ratou na liutaka e veisiga na sasaga ni cakacaka ni tuvakawa ni valetabu ena tabanalevu (raica na 8.2.4 kei na 9.2.4). Ena liutaka na sasaga oqo na mataveiliutaki ni kuoramu ni italatala qase ena vukudra na lewe ni kuoramu ni italatala qase. Na mataveiliutaki ni iSoqosoqo ni Veivukei e liutaka na nodra sasaga na lewe ni iSoqosoqo ni Veivukei. Era na cakacaka vata me liutaki na sasaga oqo vata kei na matabose ni tabanalevu, ena veivakacokotaki nei bisopi.
Oqo na nodra itavi na iliuliu oqori:
Kerea e dua na daunivakasala ni valetabu kei na tuvakawa, me vukei ira na lewe ni tabanalevu era se qai ciqoma wale toka ga na veikacivi ni kaulotu mera vakasaqara ka vakarautaka na yacadra na nodra qase e liu era sa takali yani, me baleta na cakacaka vakalotu ni valetabu.
Vakayaloqaqataki ira na tamata yadua kei na matavuvale me ra vulica na ivunau kei na veivakalougatataki ni cakacaka ni valetabu kei na tuva kawa.
Raica me vakatavulici na ivakavuvuli kei na veivakalougataki ni valetabu kei na tuva kawa e valenilotu.
Vukei ira na lewenilotu ena nodra vakavakarau me ra ciqoma na cakacaka vakalotu ni valetabu kei na vakayacori ni veiyalayalati ni valetabu.
Vakayaloqaqataki ira na lewenilotu me ra sokalou ena valetabu ena kena levu ga e rawa.
Vakayaloqaqataki ira na lewenilotu me ra vulica na veika me baleti ira na nodra qase e liu ka vakayacora na cakacaka vakalotu ni valetabu ena vukudra.
Vukea na matabose ni tabanalevu me tarai cake ka vakayagataki na ituvatuva ni valetabu kei na tuva kawa ni tabanalevu (raica na 25.2.6).
Raica me tuvalaki ka ripotetaki na cakacaka ni valetabu kei na tuvakawa ena bose ni matabose ni tabanalevu kei na bose veicokonaki ni valetabu kei na tuvakawa.
Liutaka na cakacaka nei iliuliu ni cakacaka ni tuvakawa ni valetabu ena tabanalevu. Kevaka e sega ni kacivi na iliuliu oqo, ena qarava na itavi oqo e dua na lewe ni mataveiliutaki ni kuoramu ni italatala qase (raica na 25.2.3).
E rau na lesia na peresitedi ni kuoramu ni italatala qase kei peresitedi ni iSoqosoqo ni Veivukei e dua na lewe ni mataveiliutaki mai na nodrau dui soqosoqo me na veivuke ena liutaki ni cakacaka ni valetabu kei na tuva kawa ena tabanalevu. E rau na cakacaka vata na lewe ni mataveiliutaki e rua oqo. E rau na tiko ena bose ni veivakacokotaki ni valetabu kei na tuva kawa ni tabanalevu (raica na 25.2.7).
iLiuliu ni Valetabu kei na Tuva Kawa ena Tabanalevu
Ena veitalanoa o bisopi kei na peresitedi ni iteki me vakatulewataki kina se me kacivi e dua na iliuliu ni cakacaka ni tuvakawa ni valetabu ena tabanalevu. Kevaka era nanuma me ra vakayacora na veikacivi oqo, me ratou veitalanoa na matabisopi kei ira na peresitedi ni kuoramu ni italatala qase kei na iSoqosoqo ni Veivukei ena kena navuci o cei me kacivi. Na tamata oqo e dodonu me lewe ni Matabete i Melikiseteki. Kevaka e sega ni kacivi na iliuliu oqo, ena vakatawana na ilesilesi oqo e dua na lewe ni mataveiliutaki ni kuoramu ni italatala qase.
Na iliuliu ni cakacaka ni tuvakawa ni valetabu ena tabanalevu e tokoni iratou na mataveiliutaki ni kuoramu ni italatala qase kei na mataveiliutaki ni iSoqosoqo ni Veivukei ena nodratou itavi ni cakacaka ni tuvakawa ena valetabu. Sai koya talega oqo na nona ilesilesi:
Vakacokotaka na sasaga ni valetabu kei na tuvakawa kei ira na iliuliu ni mataisoqosoqo ena tabanalevu, oka kina na mataveiliutaki ni kuoramu ni itabagone kei na kalasi.
Liutaka na bose veicokonaki ni valetabu kei na tuvakawa ni tabanalevu (raica na 25.2.7).
Tiko ena bose ni matabose ni tabanalevu ke sureti.
Vukea na matabose ni tabanalevu me tarai cake ka vakayagataki na ituvatuva ni valetabu kei na tuva kawa ni tabanalevu (raica na 25.2.6).
Vakasalataki ira na daunivakasala ni valetabu kei na tuvakawa ena tabanalevu. Vakacokotaka na nodra sasaga me ra vukei kina na lewenilotu ena cakacaka ni valetabu kei na tuvakawa.
Cakacaka vata kei na iliuliu ni kaulotu ena tabanalevu kei rau na daukaulotu me vukei ira na vulica tiko na kosipeli, lewenilotu vou, kei ira na lewenilotu sa lesu tale tiko me ra vakaitavi ena cakacaka ni valetabu kei na tuva kawa.
Ena vanua e gadrevi kina, lesia na daunituvakawa ni valetabu ena tabanalevu me veiqaravi ena valenivolavola ni FamilySearch (raica na 25.3.6).
25.2.4
Daunivakasala ni Tuva Kawa kei na Valetabu ena Tabanalevu
Era na veiqaravi na daunivakasala ni tuvakawa ni valetabu ena ruku ni veidusimaki nei iliuliu ni cakacaka ni tuvakawa ni valetabu ena tabanalevu se o koya na lewe ni mataveiliutaki ni kuoramu ni italatala qase e qarava na itavi oqo. Eratou na kacivi ira na lewenilotu oqo na matabisopi me ra veiqaravi. Sa rawa mera kacivi na uabula kei na itabagone. E rawa ni ratou vakatura na peresitedi ni kuoramu ni italatala qase, iSoqosoqo ni Veivukei, kei na Goneyalewa o cei me veiqaravi.
Nodra itavi na daunivakasala:
Vukei ira na lewenilotu me ra sotava na veivakalougatataki ena nodra kunei ira na tubudra ka vakayacora na cakacaka vakalotu ni valetabu ena vukudra. Na veika sotavi oqo e bibi sara vei ira era vulica tiko na kosipeli, lewenilotu vou kei ira era sa lesu tale mai, kei ira era vakavakarau tiko me ra ciqoma e dua na ivolatara ni valetabu me baleta na papitaiso kei na veivakadeitaki veisosomitaki.
Vukei ira na lewenilotu ena nodra vakavakarau me ra ciqoma na cakacaka vakalotu ni valetabu ka cakava na veiyalayalati ni valetabu.
Vakaitavi ena soqoni cokovata ni valetabu kei na tuva kawa (raica na 25.2.7).
Veiqaravi ena dua na valenivolavola ni FamilySearch e nodra vanua ena gauna e lesi kina (raica na 25.3.6).
25.2.5
Matabose ni Tabanalevu
Era na tauyavutaka ka vakayacora ena masumasu na lewe ni matabose ni tabanalevu na ituvatuva ni valetabu kei na tuvakawa. Me baleta na itukutuku ni ituvatuva, raica na 25.2.6.
Sa rawa vei bisopi me sureti iliuliu ni cakacaka ni tuvakawa ni valetabu ena tabanalevu me tiko ena bose ni matabose ni tabanalevu.
25.2.6
iTuvatuva ni Valetabu kei na Tuva Kawa ena Tabanalevu
E dodonu me tiko ena tabanalevu yadua e dua na ituvatuva rawarawa ni valetabu kei na tuva kawa. Na ituvatuva oqo ena vukei ira na lewe ni tabanalevu, oka kina o ira na gonelalai kei na itabagone, me ra vakaitavi ena cakacaka ni tuvakawa ka vakavakarau me ra sokalou ena valetabu ena kena levu ga e rawa.
E rau na veivuke na peresitedi ni kuoramu ni italatala qase kei na iSoqosoqo ni Veivukei ki na matabose ni tabanalevu ena kena tarai cake na ituvatuva. Ena veivuke talega na iliuliu ni valetabu kei na tuvakawa ena tabanalevu. Ena kena vakatorocaketaki na ituvatuva, era na:
Vakasamataka na gagadre kei na ivurevure e tiko.
Vakatakila na cakacaka me vakayacori ena loma ni yabaki.
Vakatulewataka na sala me vakayagataki kina na ituvatuva ka veilesi me vakakina.
Na ivakaraitaki ni veika e rawa ni okati ena ituvatuva e sa tuvani toka e ra:
Vakaitavitaki ira na lewenilotu vou kei ira era sa lesu tale mai, itabagone, kei ira na gone ena cakacaka ni tuva kawa.
Vukei ira vakatabakidua na lewenilotu digitaki me ra vakavakarau me ra ciqoma na cakacaka vakalotu ni valetabu.
O bisopi ena railesuva ka vakadonuya na ituvatuva. Era na veiliutaki na lewe ni matabose ni tabanalevu ena kena vakayacori. Era na ripotetaka na toso ni veiqaravi ena bose ni matabose ni tabanalevu. Era na vakavouya talega na ituvatuva kevaka e gadrevi.
25.2.7
Bose ni Veivakacokotaki ni Matabose ni iLiuliu ni Valetabu kei na Tuva Kawa ena Tabanalevu
Me dau vakayacori vakawasoma na soqoni leleka ni veivakacokotaki ni cakacaka ni tuvakawa ni valetabu ni tabanalevu. Kevaka e kacivi e dua na iliuliu ni valetabu kei na tuvakawa ena tabanalevu, ena liutaka o koya na veisoqoni oqori. Kevaka e sega, na lewe ni mataveiliutaki ni kuoramu ni italatala qase e na liutaka.
Eso tale era sureti e oka kina na:
Lewe ni mataveiliutaki ni iSoqosoqo ni Veivukei kei na kuoramu ni italatala qase sa lesi.
E dua na ivukevuke ena kuoramu ni bete.
E dua na lewe ni mataveiliutaki ni kalasi ni Goneyalewa qase duadua.
Daunivakasala ni Valetabu kei na Tuva Kawa
O ira kece era tiko, oka kina o ira na itabagone, era na veivakasalataki vata me vaka nira vakaitavi vata tiko kina.
Na inaki ni veisoqoni oqo sa ikoya me:
Vakacokotaka na sasaga ni kena vakayagataki na ituvatuva ni valetabu kei na tuva kawa ni tabanalevu (raica na 25.2.6).
Tuvanaka na sala me ra vukei kina na lewe ni tabanalevu ena nodra cakacaka ni valetabu kei na tuvakawa kevaka e kerei.
Na veisoqoni oqo e rawa me vakayacori vakatamata se vakatikitiki. Na veivakacokotaki e rawa talega ni yaco ena veisala tale eso, oka kina na qiri ena talevoni, tex, kei na imeli.
25.2.8
Veituberi ni Vakavakarau ki na Valetabu
Ena nona veidusimaki na bisopi, e rawa ni tauyavutaki e dua na vuli ni vakavakarau ki na valetabu me vukei ira na lewenilotu ena nodra vakavakarau me ra vakayacora na nodra veiyalayalati ni ra ciqoma na nodra cakacaka vakalotu ni valetabu. Ena vakavulici na vuli oqo ena taudaku ni soqoni ena Sigatabu ena dua na gauna e ganiti ira na lewenilotu. E rawa ni ra vakayacori e valenilotu se e vale.
Era na digitaka ena yalomasumasu na lewe ni matabose ni tabanalevu na lewenilotu me ra sureti me ra vakaitavi ena vuli yadua. Na vuli oqo ena rawa ni veivuke sara vakalevu vei ira na tamata oqo:
Lewenilotu Vou
Lewenilotu ka ra vakavakarau tiko me ra ciqoma na nodra edaumeni se me ra vauci
Lewenilotu era sa lesu tale tiko mai ki Lotu
O ira na lewenilotu sa vaka edaumeni oti ka ra sa bera ni vakavouya na nodra ivolatara ni valetabu ena dua na gauna balavu
E ratou na kaciva na matabisopi e dua se sivia na qasenivuli ni vakavakarau ki na valetabu. Na lesoni kei na idusidusi ni tauyavutaki ni lesoni era sa tiko ena Vakalougatataki mai Lagi: iVolavakarau ni Qasenivuli ni Semina ena Vakavakarau ki Valetabu. E soli vei ira na vakaitavi na ilavelave ni Vakavakarau ki na Curu ki na Valetabu. Me baleta na ivurevure ni vuli yadua kei na lesoni, raica na temples.ChurchofJesusChrist.org.
25.3
Tuvalaki ni Cakacaka ni Valetabu kei na Tuva Kawa ena iTeki
O ira na iliuliu ni iteki era tokoni ira na veiliutaki ni tabanalevu kei ira na lewenilotu ena nodra sasagataka na nodra cakacaka ni valetabu kei na tuvakawa.
25.3.1
Mataveiliutaki ena iTeki
E tiko vei peresitedi ni iteki na idola ni Nona cakacaka ni veivakabulai kei na bula vakacerecerei na Kalou ena iteki. O koya kei rau na nona daunivakasala e sa soli vei iratou na vei itavi oqo me baleta na cakacaka ni valetabu kei na tuva kawa:
Raica me vakatavulici vakawasoma na ivakavuvuli kei na veivakalougatataki ni valetabu kei na tuva kawa.
Vukei ira na lewenilotu me ra vakavakarau me ra vakayacora na nodra veiyalayalati tabu ni ra ciqoma na cakacaka vakalotu ni valetabu.
Vakayaloqaqataki ira na lewenilotu me ra vulica na vei ka me baleti ira na nodra qase e liu ka vakayacora na cakacaka vakalotu ni valetabu ena vukudra.
Vakayaloqaqataki ira na lewenilotu me ra sokalou ena valetabu ena kena levu ga e rawa.
Vakayacora na veivakatarogi ni ivolatara ni valetabu (raica na wase e 26).
Ena nona dau bose vata kei ira yadua na peresitedi ni kuoramu ni italatala qase, ena veitalanoataka e dua na lewe ni mataveiliutaki ni iteki na cakacaka ni valetabu kei na tuvakawa ena tabanalevu (raica na 8.3.1). E rawa ni rau tiko kina na daunivakasala ena mataveiliutaki ni kuoramu ni italatala qase kei na lewe ni matabose e cake e lesi ki na kuoramu.
25.3.2
Komiti ni Veiliutaki ni Qase ena iTeki
Na komiti ni veiliutaki ni qase ena iteki e oka kina na:
Na mataveiliutaki ni iteki.
Na mataveiliutaki ni iSoqosoqo ni Veivukei ena iteki.
Lewe ni matabose e cake e lesi me cakacaka vata kei ira na kuoramu ni italatala qase.
O ira na iliuliu oqo era dusimaki ka tokoni ira na mataveiliutaki ni kuoramu ni talatala qase kei na iSoqosoqo ni Veivukei ena nodra itavi me baleta na cakacaka ni tuvakawa ni valetabu (raica na 25.2.2). Na veidusimaki e rawa ni vakayacori ena dua na ituvaki vakailawalawa se tamata yadudua. E rawa ni ra sureti na iliuliu ni cakacaka ni tuvakawa ni valetabu ena tabanalevu me ra ciqoma na veidusimaki oqo.
Me so tale na ka baleta na veibose ni komiti oqo, raica na 29.3.9.
25.3.3
Lewe ni Matabose e Cake
Sa rawa ni na lesia na mataveiliutaki ni iteki na lewe ni matabose e cake me na veidusimaki ka tokoni ira na tamata oqo ena nodra itavi ni cakacaka ni valetabu kei na tuva kawa:
Mataveiliutaki ni kuoramu ni italatala qase
iLiuliu ni valetabu kei na tuva kawa ena tabanalevu
Daunivakasala ni tuva kawa kei na valetabu ena iteki
Sa rawa me lesi e dua se sivia na lewe ni matabose e cake me liutaka na sasaga oqo. Ia, o ira kece na lewe ni matabose e cake e sa tiko na nodra itavi ena tabanalevu kei na kuoramu ni italatala qase era sa lesi kina.
E rawa ni ra veivuke na lewe ni matabose e cake vei ira na iliuliu ni valetabu kei na tuvakawa ena tabanalevu me ra vakasalataki ira na daunivakasala ni valetabu kei na tuvakawa ena tabanalevu. E rawa ni ra vukei na lewe ni matabose e cake mai vei ira na daunivakasala ni valetabu kei na tuvakawa ena iteki.
E rawa ni ratou lesia na mataveiliutaki ni iteki e dua na lewe ni matabose e cake me raica na sasaga ni iteki ena tuvamatanivola (raica na 25.4.3). O koya se e dua tale na lewe ni matabose e cake e sa rawa ni lesi me raica raraba na cakacaka ena valenivolavola ni FamilySearch (raica na 25.3.6).
25.3.4
Mataveiliutaki ni iSoqosoqo ni Veivukei ena iTeki
Ena ruku ni veidusimaki ni peresitedi ni iteki, na mataveiliutaki ni iSoqosoqo ni Veivukei ena iteki e dusimaka ka tokoni ira na mataveiliutaki ni iSoqosoqo ni Veivukei ena tabanalevu ena nodra itavi me baleta na cakacaka ni valetabu kei na tuvakawa.
Daunivakasala ni Valetabu kei na Tuva Kawa ena iTeki
O ira na daunivakasala ni valetabu kei na tuva kawa ena iteki era tokona na cakacaka ni valetabu kei na tuvakawa ena loma ni iteki. Era veiqaravi ena ruku ni nodratou veidusimaki na mataveiliutaki ni iteki kei na dua se sivia na lewe ni matabose e cake e lesi ki na cakacaka ni valetabu kei na tuvakawa.
O ira na daunivakasala oqo era tokoni ira na lewe ni matabose e cake kei na mataveiliutaki ni iSoqosoqo ni Veivukei ena iteki ena nodra sasaga me ra dusimaki ira eso ena cakacaka ni valetabu kei na tuvakawa (raica na 25.3.3 kei na 25.3.4). Sa rawa talega me soli vei ira na ilesilesi oqo:
Veivuke ena nodra vakavulici ka tokoni na lewenilotu ena veikacivi ni valetabu kei na tuvakawa ena tabanalevu.
Vukea na cokonaki ni sasaga ni tuva matanivola ni iteki ((25.4.3).
Veiqaravi ena valenivolavola ni FamilySearch (raica na 25.3.6).
Kevaka era tu na ivurevure, sa rawa ki na iteki me tauyavutaka e dua se sivia na valenivolavola ni FamilySearch. Na vei valenivolavola oqo me na vukei ira na vulagi me ra kunea, vakasokomuna na itukutuku eso, ka vakaduavatataka na lewe ni matavuvale era bula tiko kei ira era sa mate. E sa dola tu na valenivolavola ki vei ira kece era via vakayagataka.
Ena lesia o peresitedi ni iteki e dua na daunivakasala ni valetabu kei na tuvakawa me raica raraba na sasaga ena valenivolavola yadua ni FamilySearch. Na valenivolavola yadua, ena dau veiqaravi tiko kina edua na daunivakasala ni valetabu kei na tuva kawa ni iteki, e lesi kina. E dodonu me dau dolavi ena vei gauna veiganiti eso na valenivolavola ni FamilySearch.
Vakavo ga, eso na valenivolavola lelevu ni FamilySearch era raici raraba tiko mai na Mataveiliutaki ni iWasewase.
25.3.7
Daunivakasala ni Valetabu kei na Tuva Kawa ni iWasewase
Sa rawa vei iratou na Mataveiliutaki ni iWasewase me ratou kacivi ira na daunivakasala ni valetabu kei na tuvakawa ni iwasewase. Kevaka e vakatara na ituvaki, sa rawa me kacivi e dua na tamata se dua na veiwatini ki na matabose ni veivakacokotaki yadua. Era na dau veiqaravi tu na daunivakasala ena tolu ki na lima na yabaki.
Sa rawa vei iratou na Mataveiliutaki ni iWasewase me ratou lesi ira na Vitusagavulu ni iWasewase me ra raica na nodra cakacaka na daunivakasala oqo ena matabose ni veivakacokotaki. Na nodra cakacaka na dauvakasala e dodonu me salavata kei na vakanamata ni iwasewase.
Ena nodratou veidusimaki na Mataveiliutaki ni iWasewase kei na Vitusagavulu ni iWasewase, era na veivuke na dauvakasala vei ira na peresitedi ni iteki me ra vakayacora na nodra itavi ena cakacaka ni valetabu kei na tuvakawa. Era na veivuke na dauvakasala vei ira na peresitedi ni iteki ena nodra sasaga me ra vakavulici ira na lewe ni matabose e cake, mataveiliutaki ni iSoqosoqo ni Veivukei ena iteki, matabose ni veiliutaki ni uabula ena iteki, kei ira na daunivakasala ni valetabu kei na tuvakawa ena iteki me baleta na nodra itavi.
E rawa ni ra lesi na daunivakasala me ra vukei ira na mataveiliutaki ni iteki me ra vakarautaki ira na lewenilotu me ra sokalou ena veivaletabu kacivaki vou ena loma ni wasewase. Na itavi tale eso e rawa ni oka kina na nodra vakasalataki na iliuliu ni iteki ena ivakavuvuli kei na ivalavala ni cakacaka ni valetabu kei na tuva kawa. Oqo e oka kina na:
Na sala me tuvanaki kina na cakacaka ni valetabu kei na tuvakawa ena iteki kei na tabanalevu (raica na 25.3 kei na 25.2).
Na sala mera tokoni kina na mataveiliutaki ni kuoramu ni italatala qase kei na iSoqosoqo ni Veivukei ena nodra itavi (raica na 25.2.2).
Na sala e rawa ni vakalougatataki ira kina na gone kei na itabagone na cakacaka ni valetabu kei na tuva kawa (raica na 10.2.4, 11.2.4, kei na 12.2.4).
Na sala me vakayacori kina na bose ni veivakacokotaki ni valetabu kei na tuva kawa e vakayaco ka (raica na 25.2.7).
Na sala mera vukei kina na iliuliu ni tabanalevu mera tuvana ka biuta na takete (raica na 25.2.6).
Na sala me ra vukei kina na lewenilotu ena nodra vakavakarau me ra lako ki na valetabu (raica na 25.2.8).
Na sala mera vukei kina na lewenilotu era qai sotava ena imatai ni gauna na papitaiso veisosomitaki ena valetabu (raica na 23.2).
Noqu Matavuvale: iTalanoa Eso E Kauti Keitou Vata Mai
Noqu Matavuvale: iTalanoa Eso e Kauti Keda Vata Mai e vukei ira na tamata me ra kunei ira na wekadra kei na qase e liu ka sokumuna na kedra italanoa. Na ivolalailai oqo e rawa talega ni vukei ira na lewenilotu me ra tekivu vakarautaka na yaca ni matavuvale me baleta na cakacaka vakalotu ni valetabu.
FamilySearch.org e sa ikoya na mataveilawa ni Lotu me baleta na cakacaka ni valetabu kei na tuva kawa. E rawa ni vukei ira na dauvakayagataka:
Me ra tara cake na isema ni vunikau ni matavuvale kei na veiwekani.
Kunei ira na qase e liu kei na kedra italanoa.
Wasea ka maroroya na italanoa ni matavuvale, itaba, kei na itukutuku makawa.
Vakarautaka na yaca ni matavuvale me baleta na cakacaka vakalotu ni valetabu.
Na FamilySearch Tree app kei na FamilySearch Memories app e rawa kina vei ira na tamata me ra vakaitavi ena cakacaka ni valetabu kei na tuva kawa mai na veigacagaca vakalivaliva veikauyaki.
iVakatakilakila
sara itaba tiko na matavuvale
25.4.3
Tuvai vakamatanivola
Na tuvatuva vakamatanivola sa ikoya na iwalewale ni kena vakacurumi na itukutuku mai na dua na itukutuku makawa volai ena dua na kato ni itukutuku vakalivaliva ena FamilySearch.org. O ira era tuvatuva vakamatanivola era vakavuna me na rawa kina vei ira tale eso me ra kunei ira vakarawarawa na nodra qase e liu ka vakayacora na cakacaka vakalotu ni valetabu ena vukudra.
Sa rawa vua e dua me vakaitavi ena tuva matanivola. Oqo e rawa ni dua na gauna ni vakataucokotaki ni veika oqo:
iTabagone
iTabagone qase cake
O ira na lewenilotu era sega ni rawa ni tiko vakawasoma ena veisoqoni ni Lotu
Lewenilotu Vou
Lewenivanua raraba
E rawa ni ratou lesia na mataveiliutaki ni iteki e dua na daunivakasala ni valetabu kei na tuvakawa ena iteki se dua na lewe ni matabose e cake me qarava na cakacaka oqo.
Vakatututaki kei na Kacivi ni Liganicakacaka ni Valetabu
25.5.1
Vakaturi ni Liganicakacaka ni Valetabu
O ira na dau ni veiqaravi ena valetavu era na digitaki vaka oqo:
Lewenilotu e digitaki mai vua na bisopi se dua tale na iliuliu ni tabanalevu
Lewenilotu era vakaraitaka na nodra gagadre ni veiqaravi ki vua na bisopi
Lewenilotu era vakaturi mai vei peresitedi ni valetabu, metereni, se dua tale na iliuliu ni valetabu
O ira na lewenilotu era vakavakarau tiko se ra se qai lesu mai ena veiqaravi vakadaukaulotu (raica na wase e 24)
Na yacadra na dau veiqaravi ena valetabu sa vakatututaki me na vakau ena Vakatutu ni Tamata Cakacaka ni Valetabu. Na sala oqo esa vakarautaki tu vei ira na bisopi, peresitedi ni iteki, kei na mataveiliutaki ni valetabu. Na iwalewale ni kena vakau na yaca sa tuvai koto e ra.
Ni ratou sa raica rawa na mataveiliutaki ni dua na valetabu e dua ena rawa ni cakacaka ena valetabu, e ratou na vakauta na yacai koya na tamata oqori vua na bisopi ena vakayagataki ni iyaya ni Vakatutu ni Tamata Cakacaka ni Valetabu.
Ni sa vakatakila e dua na bisopi e dua me na liganicakacaka ni valetabu se me ciqoma e dua ka vakaturi mai vua e dua na peresitedi ni valetabu, ena veitalanoa vata kei na lewenilotu me baleta na madigi ni veiqaravi. Ena railesuva na veika e gadrevi me baleti ira na liganicakacaka vakalotu ni valetabu (raica na 25.5.2) se o ira na cakacaka sega ni saumi ni valetabu (raica na 25.5.3). Kevaka e rau nanuma ruarua na bisopi kei na lewenilotu ni na veiganiti na madigi, ena vakalewena ka vakauta na bisopi na vakatutu ena vakayagataki ni iyaya ni Recommend Temple Worker tool [Vakaturi na Liganicakacaka ni Valetabu]. E dodonu me kila tiko na lewenilotu ni vakatutu e sa vakau ena sega ni vakadeitaka ni na kacivi se lesi o koya me liganicakacaka ni valetabu.
Ena tarava yani na nona railesuva na peresitedi ni iteki me baleti ira na lewenilotu era tiko ena dua na iteki. Me baleti ira na lewenilotu era tiko ena dua na tikina, ena railesuva o peresitedi ni kaulotu. Kevaka e vakadonuya na peresitedi ni iteki se kaulotu na vakatutu, ena vakauta vua na peresitedi ni valetabu me railesuva ena nona vakayagataka na iyaya ni Vakaturi na Liganicakacaka ni Valetabu.
O ira na lewenilotu era kacivi se lesi me ra liganicakacaka ni valetabu era dau yalataka me ra dau veiqaravi vakawasoma ena valetabu ena veimacawa. Me ra kakua ni solia na iLiuliu eso tale na veikacivi ka na rawa ni vakataotaka na nodra veiqaravi na lewenilotu ena valetabu.
Na iyaya ni Vakaturi na Liganicakacaka ni Valetabu e vakaraitaka talega vei ira na bisopi kei na peresitedi ni iteki e dua na lisi ni lewenilotu mai na nodra tabanalevu se iteki era veiqaravi tiko e valetabu.
25.5.2
Na Veika e Gadrevi vei ira na Liganicakacaka Vakalotu ni Valetabu
Era veivuke na liganicakacaka vakalotu ni valetabu ena kena qaravi na cakacaka vakalotu ena valetabu. Me vakaturi me dua na liganicakacaka vakalotu, me na sotava e dua na lewenilotu na veika oqo:
Vakaitikotiko ena tikina ni valetabu era na veiqaravi kina.
Sa vakaedaumeni, bulataka na veiyalayalati ni valetabu, ka tiko e dua na nona ivolatara vakabau ni valetabu.
Me matua na nona ivakadinadina baleta na kosipeli vakalesui mai i Jisu Karisito.
Me kaukauwa vinaka vakayago me rawa ni qarava na cakacaka vakalotu ka sega ni vukei kina.
Me kilikili ka rokovi mai na Lotu kei na lewenivanua.
Cakacaka vinaka kei ira na tamata tale eso.
Me nuitaki ka bulabula vinaka.
Sega vakadua ni se bau vakatakilakilataki na nona ivolatukutuku vakalewenilotu.
Me kena ikuri, ena vakadeitaka o bisopi na veika oqo:
Kevaka e a yalani ka vakaivolataki na nona lewenilotu edua na tamata, e rawa ni vakaturi o koya me liganicakacaka vakalotu ni sa oti, me kua ni lailai, mai na lima na yabaki mai na gauna sa kau tani kina na vakatatabu. (Raica na 32.11.3 kei na 32.16.1.)
Kevaka e a vakasukai na nona lewenilotu e dua na tamata sega ni vakaedaumeni, se kevaka a vakacegui na nona lewenilotu, e rawa ni vakaturi o koya me dua na liganicakacaka vakalotu ni oti, ke lailai sara, e lima na yabaki mai na gauna e vakacurumi tale kina ki na Lotu. (Raica na 32.11.4, 32.14.9, 32.16.1, kei na 32.16.2.)
Kevaka e a vakasukai na nona lewenilotu e dua na lewenilotu sa edaumeni oti, se kevaka a vakacegui na nona lewenilotu, e rawa ni vakaturi o koya me liganicakacaka vakalotu ni oti, ke lailai sara, e lima na yabaki mai na gauna e ciqoma tale kina na vakalesui mai ni veivakalougatataki. (Raica na 32.11.4, 32.14.9, kei na 32.17.2.)
Kevaka e se bera ni oti e lima na yabaki mai na gauna ka yaco kina na veika ka vakaraitaki toka e cake, sa rawa ni vakaturi na lewenilotu me volodia ni valetabu kevaka e sotava o koya na veika e lavaki me baleta na ilesilesi oya.
25.5.3
Veika e Gadrevi Me Baleti Ira na Veiqaravibole ena Valetabu
O ira na veiqaravibole ni valetabu era veivuke ena cakacaka vakaveiliutaki ena valetabu, me vaka na veiqaravi ena valenivolavola se savaisulu. Me vakaturi me cakacaka veiqaravibole ni valetabu, sa dodonu me sotava na lewenilotu na veika oqo:
Vakaitikotiko ena tikina ni valetabu ena veiqaravi kina.
Sa vakaedaumeni, bulataka na veiyalayalati ni valetabu, ka tiko e dua na nona ivolatara vakabau ni valetabu.
Cakacaka vinaka kei ira na tamata tale eso.
Me nuitaki ka bulabula vinaka.
Sega ni dua na ivakatatao ni nona ivolatukutuku vakalewenilotu.
Vakavo ga na veika e lavaki oqo, o ira na lewenilotu era veiqaravibole ena taudaku ni valetabu e na sega ni gadrevi me ra vaka edaumeni. Na kena ivakaraitaki sa ikoya e dua na lewenilotu ka cakacaka ena rara ni valetabu.
25.5.4
Nodra Kacivi kei na Vakatikori na Liganicakacaka Vakalotu
Ni sa ciqoma oti o peresitedi ni valetabu na vakatutu me veiqaravi e dua vakaliga-ni-cakacaka vakalotu, e dua na lewe ni mataveiliutaki ni valetabu se dua e lesia ena vakataroga na tamata oya. Ni sa vakauqeti, o koya ka na vakayacora na veivakatarogi ena kacivi ira era na rawa ni veiqaravi vaka-liganicakacaka vakalotu ka vakatikori ira.
25.5.5
Nodra Lesi na Veiqaravibole
E rawa ni ra vakatarogi ka lesi na veiqaravi ni valetabu era voladia mai vua e dua na lewe ni mataveiliutaki ni valetabu se dua e lesia okoya. Era lesi na veiqaravibole ka sega ni kacivi. E sega ni gadrevi me ra vakatikori.