“25. Ko Hono Fakatahaʻi ʻo e Ngaahi Fāmilí ki he Taʻengatá ʻo fakafou ʻi he Ngāue Fakatemipalé mo e Hisitōlia Fakafāmilí,” Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalasi ʻo e Kau Māʻoniʻoni ʻi he Ngaahi ʻAho Kimui Ní (2025).
“25. Ko Hono Fakatahaʻi ʻo e Ngaahi Fāmilí ki he Taʻengatá ʻo fakafou ʻi he Ngāue Fakatemipalé mo e Hisitōlia Fakafāmilí,” Tohi Tuʻutuʻuni Fakakātoá.
25.
Ko Hono Fakatahaʻi ʻo e Ngaahi Fāmilí ki he Taʻengatá ʻo fakafou ʻi he Ngāue Fakatemipalé mo e Hisitōlia Fakafāmilí
25.0
Talateú
Ko e temipalé ko e fale ia ʻo e ʻEikí. ‘Oku tāpuekina ‘e he ngaahi ouau mo e ngaahi fuakava ʻo e temipalé ‘a e fānau ʻa e Tamai Hevani. ‘Oku fakaafeʻi ‘e he Tamai Hēvaní ʻa e kotoa ʻo ʻEne fānaú ke nau fakafeʻungaʻi kinautolu pea mo maʻu ʻa e ngaahi ouau ʻo e temipalé.
Ko hono fakatahaʻi ʻo e ngaahi fāmilí ki he taʻengatá ko ha konga ia ʻo e ngāue ʻa e ʻOtuá ki he fakamoʻuí mo e hakeakiʻí (vakai, 1.2). Ko e ngāue fakatemipalé mo e hisitōlia fakafāmilí ko e ongo founga ia ki hono fakatahaʻi mo silaʻi ʻo e ngaahi fāmilí ki he taʻengatá (vakai, Mātiu 16:19). ‘Oku kau ʻi he ngāué ni ʻa e:
-
Fakahoko ha ngaahi fuakava ʻi heʻetau maʻu hotau ngaahi ouau fakatemipalé (vakai, ʻĪsaia 55:3; Tokāteline mo e Ngaahi Fuakava 84:19–23).
-
Ko hano ‘ilo ‘etau ngaahi kui kuo pekiá pea mo fakahoko ʻa e ngaahi ouaú ma‘anautolu ʻi he temipalé ka nau lava ʻo fai e ngaahi fuakavá mo e ʻOtuá (vakai, Malakai 4:5–6; 1 Kolinitō 15:29; Tokāteline mo e Ngaahi Fuakava 128:15–18).
-
ʻAlu maʻu pē ki he fale ʻo e ʻEikí, ʻi he feituʻu ʻoku lava aí, ke moihū ki he ʻOtuá mo fakahoko ʻa e ngaahi ouau maʻa ʻetau ngaahi kuí (vakai, Luke 24:52–53; Tokāteline mo e Ngaahi Fuakava 109:13–14).
ʻOku ʻomi ʻe he kau atu ki he ngāué ni ha ngaahi tāpuaki maʻongoʻonga. ʻI hono fakahoko mo tauhi ʻe he kāingalotú ʻa e ngaahi fuakava toputapú, ʻoku nau maʻu ai ʻa e mālohi ʻo e ʻOtuá. ʻOku nau fiefia ʻi he ngāue ʻi he fale ʻo e ʻEikí maʻa ʻenau ngaahi kuí.
ʻOku fakahinohinoʻi ʻe he vahé ni ʻa e kau taki ʻo e Siasí mo e kāingalotú ki he founga ke kau ai ʻi hono fakatahaʻi ʻo e ngaahi fāmilí ki he taʻengatá ʻo fakafou ʻi he ngāue fakatemipalé mo e hisitōlia fakafāmilí. ʻOku maʻu ha fakamatala lahi ange ʻi he “Ngaahi Temipalé,” “Papitaiso Fakafofongá,” mo e “Hisitōlia Fakafāmilí” (Ngaahi Tefitó mo e Fehuʻí, Gospel Library).
25.1
Kau ʻa e Mēmipá mo e Takí ʻi Hono Fakatahaʻi ʻo e Ngaahi Fāmilí ki he Taʻengatá
‘Oku maʻu ‘e he kāingalotu ‘o e Siasí ʻa e faingamālie mo e fatongia ke tokoni ke fakatahataha‘i honau ngaahi familí ki he taʻengatá. ʻOku nau teuteu ke fakahoko ʻa e ngaahi fuakavá ʻi heʻenau maʻu ʻa e ngaahi ouau fakatemipalé. ʻOku nau feinga ke tauhi ʻa e ngaahi fuakava ko iá.
Te nau toe tokoniʻi foki e kau mēmipa ʻo e fāmilí ke mahino, maʻu, pea mo tauhi e ngaahi fuakava ʻo e temipalé. ʻOku ʻa e mātuʻá ʻa e tefitoʻi fatongia ke tokoniʻi ʻenau fānaú ke aʻusia ʻa e fiefia mo e ngaahi tāpuaki ʻo hono fakahoko ha ngaahi fuakava maʻanautolu pea mo hono fakahoko ha ngaahi ouau maʻa honau kāinga kuo pekiá (vakai, 2.1.3).
ʻOku poupouʻi ʻa e kāingalotu ʻo e Siasí ke nau kumi honau kāinga kuo pekiá ʻa ia naʻe teʻeki ke nau maʻu ʻa e ngaahi ouau ʻo e temipalé. ʻE fakahoko leva ʻe he kāingalotú ʻa e ngaahi ouaú ʻo fakafofongaʻi honau kāingá (vakai, Tokāteline mo e Ngaahi Fuakava 128:18). ʻE lava ke fili ʻa e niʻihi fakafoʻituituí ʻi he maama tataliʻanga ʻo e ngaahi laumālié, ke tali pe fakasītuʻaʻi ʻa e ngaahi ouau kuo fakahoko maʻanautolú.
ʻOku toe poupouʻi foki ʻa e kāingalotú ke nau fekumi ki he ngaahi talanoa ʻenau ngaahi kuí, ʻa ia te ne lava ʻo fakatupulaki ʻenau aʻusia ʻi hono fakahoko e ngaahi ouaú maʻa ʻenau ngaahi kuí. ʻOku fakaafeʻi ʻe he kāingalotú ha niʻihi kehe ke nau fai ʻa e meʻa tatau.
ʻOku lahi ha ngaahi meʻangāue ʻoku ʻatā ke tokoni ki he kāingalotú ʻi heʻenau ngāue fakatemipalé mo e hisitōlia fakafāmilí. ʻOku fakamatalaʻi ha niʻihi ʻo e ngaahi meʻá ni ʻi he 25.4.1 mo e 25.4.2.
25.1.1
Fatongia Fakafo‘ituitui ki he Moihū ʻi he Temipalé
ʻE fakakaukauʻi ʻe he kāingalotú ʻa e taimi mo e tuʻo lahi te nau moihū ai he temipalé. He ʻikai fokotuʻu ʻe he kau takí ha fika pau pe ko ha founga ke lipooti ai ʻa e moihū ʻi he temipalé.
ʻE lava ke ō ʻa e kāingalotu fakafoʻituitui mo e ngaahi fāmili ʻoku ʻi ai haʻanau lekomeni temipale ʻoku kei ʻaongá ki ha faʻahinga temipale pē ʻoku nau fie ʻalu ki ai. Te nau lava ʻo fakataimi-tēpileʻi ha ʻapoinimeni mo e temipalé. Vakai, temples.ChurchofJesusChrist.orgki he fakamatala fetuʻutaki ʻa e temipale takitaha.
25.1.2
ʻAlu ʻa e Uōtí mo e Siteikí ki he Temipalé
ʻOku vahe ʻa e ʻiuniti kotoa pē ʻi he Siasí ki ha vāhenga fakatemipale. ʻOku ʻikai poupouʻi ke fokotuʻutuʻu ha ʻaʻahi fakauooti pe fakasiteiki ki ha ngaahi temipale ʻoku mavahe mei honau vāhenga fakatemipalé.
ʻOku totonu ke fakataimi-tēpileʻi ʻa e ngaahi ʻaʻahi fakauooti mo fakasiteiki kotoa pē ki he temipalé. Vakai, temples.ChurchofJesusChrist.orgki he fakamatala fetuʻutaki ʻa e temipale takitaha.
25.2
Kau Taki ʻi he Uōtí
25.2.1
Kau Pīsopelikí
ʻE fakafekauʻaki ʻe he kau pīsopelikí mo e kau palesitenisī ʻo e kōlomu ʻo e kaumātuʻá pea mo e kau palesitenisī ʻo e Fineʻofá ʻi heʻenau taki e ngāue fakatemipale mo e hisitōlia fakafāmili ʻa e uōtí, ʻa ia ʻoku tokoni ke fakatahaʻi ʻa e fāmilí ki he taʻengatá. ʻE fealēleaʻaki fakataha maʻu pē ʻa e kau taki ko ʻení.
ʻOku maʻu foki ʻe he kau pīsopelikí ʻa e toe ngaahi fatongia ko ʻení.
-
Toe vakaiʻi mo fakangofua ʻa e palani temipale mo e hisitōlia fakafāmili ʻa e uōtí (vakai, 25.2.6
-
Fakapapau‘i ʻoku fakafekauʻaki e ngāue fakatemipale mo e hisitōlia fakafāmili ʻa e uōtí ʻi he fakataha alēlea fakauōtí mo e ngaahi fakataha alēlea fakauooti ʻa e toʻu tupú.
-
Tokangaʻi hono fokotuʻutuʻu ʻo e ngaahi kalasi teuteu ki he temipalé (vakai, 25.2.8).
-
Foaki ʻo e ngaahi lekomeni temipalé (vakai, vahe 26).
ʻE feongoongoi ʻa e kau pīsopelikí mo e palesiteni fakasiteikí ke fakafuofuaʻi pe ʻe ui ha taki fakauooti ki he temipalé mo e hisitōlia fakafāmilí (vakai, 25.2.3 ki ha fakamatala lahi ange).
25.2.2
Kau Palesitenisī ʻo e Kōlomu ʻo e Kaumātuʻá mo e Fineʻofá
ʻE taki ʻe he kau palesitenisī ʻo e kōlomu ʻa e kaumātuʻá mo e kau palesitenisī ʻo e Fineʻofá ʻa e ngaahi ngāue fakaʻaho ki he temipalé mo e hisitōlia fakafāmilí ʻi he uōtí, ʻa ia ʻoku tokoni ke fakatahaʻi ʻa e ngaahi fāmilí ki he taʻengatá (vakai, 8.2.4 mo e 9.2.4 ʻE tataki ʻe he kau palesitenisī ʻo e kōlomu kaumātuʻá ʻa e ngaahi ngāue ko ʻení maʻá e kau mēmipa ʻo e kōlomu kaumātuʻá. ʻE tataki ʻe he kau palesitenisī ʻo e Fineʻofá ʻa e ngaahi ngāue maʻá e kau mēmipa ʻo e Fineʻofá. Te nau ngāue fakataha ke tataki ʻa e ngāue ko ʻení mo e fakataha alēlea fakauōtí, ʻi he malumalu hono fakafekauʻaki ʻe he pīsopé.
ʻOku ʻa e kau taki ko ʻení ʻa e ngaahi fatongia ko ʻení:
-
Tokoni‘i e fakataha alēlea fakauōtí ke nau faʻu mo fakahoko e palani ʻa e uōtí ki he temipalé mo e hisitōlia fakafāmilí (vakai, 25.2.6
-
Kole ki ha faifaleʻi fakauooti ki he temipalé mo e hisitōlia fakafāmilí ke tokoni ki ha kāingalotu pau ʻo e uōtí ʻi hono kumi mo teuteuʻi e hingoa ʻo ʻenau ngaahi kui kuo pekiá ki he ngaahi ouau fakatemipalé (vakai, 25.4.1). ʻOku fakatefito ʻa e ngaahi ngāue ko ʻení ʻo tautautefito kiate kinautolu ne toki maʻu honau uiuiʻi ngāue fakafaifekaú pea mo kinautolu kuo teʻeki maʻu ʻenitaumení.
-
Fakapapau‘i ʻoku palani mo lipooti e ngaahi ngāue fakatemipalé mo e hisitōlia fakafāmilí, ʻi he ngaahi fakataha alēlea fakauōtí mo e fakataha fakafekauʻaki ʻa e uōtí ki he temipalé mo e hisitōlia fakafāmilí.
-
Tataki e ngāue ʻa e taki fakauooti ki he temipalé mo e hisitōlia fakafāmilí. Kapau ʻoku ʻikai uiuiʻi ha taki peheni, ʻe fakahoko leva ʻe ha mēmipa ʻo e kau palesitenisī ʻo e kōlomu ʻo e kaumātuʻá ʻa e fatongia ko ʻení (vakai, 25.2.3
-
‘I he feituʻu ʻe lava aí, vahe ha kau faifaleʻi fakauooti ki he temipalé mo e hisitōlia fakafāmilí ke nau ngāue ʻi he senitā FamilySearch (vakai, 25.3.6).
ʻE takitaha vahe ʻe he palesiteni ʻo e kōlomu ʻo e kaumātuʻá mo e palesiteni ʻo e Fineʻofá ha mēmipa ʻo e kau palesitenisií ke tokoni ʻi hono taki ʻa e ngāue fakatemipalé mo e hisitōlia fakafāmilí ʻi he uōtí. ʻE ngāue fakataha ʻa e ongo mēmipa ko ʻeni ʻo e kau palesitenisií. Te nau fakapapauʻi ʻoku fakahoko ʻa e ngaahi fakataha fakafekauʻaki ʻa e temipalé mo e hisitōlia fakafāmilí ʻi he uōtí (vakai, 25.2.7
25.2.3
Taki Fakauooti ki he Temipalé mo e Hisitōlia Fakafāmilí
‘E feongoongoi ʻa e kau pīsopelikí mo e palesiteni fakasiteikí ke fakafuofuaʻi pe ʻe ui ha taki fakauooti ki he temipalé mo e hisitōlia fakafāmilí. Kapau te nau pehē ke fakahoko e uiuiʻi ko ʻení, ʻe feongoongoi ʻa e kau pīsopelikí mo e palesiteni e kōlomu ʻo e kaumātuʻá mo e palesiteni Fineʻofá ke fakakaukauʻi ʻa e taha ke uí. Ko e tokotahá ni ʻoku totonu ko ha taha maʻu Lakanga Taulaʻeiki Faka-Melekisēteki ia. Kapau ‘oku ʻikai ui ha taki peheni, ʻe fua ʻe ha mēmipa ʻo e kau palesitenisī ʻo e kōlomu kaumātuʻá ʻa e fatongia ko ʻení.
ʻOku poupouʻi ʻe he taki fakauooti ki he temipalé mo e hisitōlia fakafāmilí ʻa e kau palesitenisī ʻo e kōlomu ʻo e kaumātuʻá mo e kau palesitenisī ʻo e Fineʻofá ʻi honau ngaahi fatongia ki he temipalé mo e hisitōlia fakafāmilí. ʻOkú ne toe maʻu foki mo e ngaahi fatongia ko ʻení:
-
Fakafekau‘aki ʻa e ngaahi ngāue fakatemipalé mo e hisitōlia fakafāmilí mo e kau taki ʻo e ngaahi houalotu ʻi he uōtí, kau ai mo e kau palesitenisī fakakōlomu mo fakakalasi ʻa e toʻu tupú.
-
Tataki e ngaahi fakataha fakafekauʻaki ʻa e temipalé mo e hisitōlia fakafāmilí ʻi he uōtí (vakai, 25.2.7
-
Kau ki he ngaahi fakataha alēlea fakauōtí ʻo ka fakaafeʻi.
-
Tokoni‘i e fakataha alēlea fakauōtí ke nau faʻu mo fakahoko e palani ʻa e uōtí ki he temipalé mo e hisitōlia fakafāmilí (vakai, 25.2.6).
-
Fakahinohinoʻi ʻa e kau faifaleʻi fakauooti ki he temipalé mo e hisitōlia fakafāmilí. Fakafekauʻaki ʻenau ngaahi ngāue ke tokoniʻi ʻa e kāingalotú ke nau kumi ha ngaahi hingoa ʻo ʻenau ngaahi kuí mo fakahoko ʻa e ngaahi ouau fakatemipalé maʻanautolu.
-
Ngāue mo e taki ngāue fakafaifekau fakauōtí pea mo e kau faifekaú ke tokoniʻi ʻa kinautolu ʻoku nau ako ʻa e ongoongoleleí, kāingalotu foʻoú, mo e kāingalotu foki maí ke nau kau ʻi he ngāue fakatemipalé mo e hisitōlia fakafāmilí (vakai, 23.2 mo e 23.3).
25.2.4
Kau Faifaleʻi Fakauooti ki he Temipalé mo e Hisitōlia Fakafāmilí
ʻE ngāue ʻa e kau faifaleʻi fakauooti ki he temipalé mo e hisitōlia fakafāmilí ʻi he malumalu ʻo e fakahinohino ʻa e taki fakauooti ki he temipalé mo e hisitōlia fakafāmilí. ʻE ui ʻe he kau pīsopelikí ʻa e kāingalotu ko ʻení ke nau ngāue. ʻE lava ke uiuiʻi ha kakai lalahi mo ha toʻu tupu. ʻE lava ke fokotuʻu atu ʻe he kau palesiteni ʻo e kōlomu ʻo e kaumātuʻá, Fineʻofá, mo e Kau Finemuí pe ko hai ʻe lava ʻo ngāué.
ʻOku akoʻi ʻe he kau fai faleʻí ʻa e niʻihi kehé ʻi ha ngaahi founga faingofua ki he anga ʻenau kau ʻi he ngāue fakatemipalé mo e hisitōlia fakafāmilí, ʻa ia ʻokú ne fakatahaʻi ʻa e ngaahi fāmilí ki he taʻengatá. ʻOku fakatefito ʻenau tokangá ʻi he toʻu tupú, kāingalotu foʻou mo foki maí, pea mo e houʻeiki fafine mo e houʻeiki tangata kuo teʻeki maʻu ʻenitaumení. ʻOku ʻa e kau faifaleʻí ʻa e ngaahi fatongia ko ʻení:
-
Tokoni‘i ʻa e kāingalotú ke nau teuteu ke maʻu e ngaahi ouau fakatemipalé mo fakahoko e ngaahi fuakava fakatemipalé.
-
Tokoni ke aʻusia ʻe he kāingalotú ʻa e ngaahi tāpuaki ʻo hono ʻilo ʻenau ngaahi kuí mo hono fakahoko ʻo e ngaahi ouau fakatemipalé maʻanautolú.
-
Kau ʻi he ngaahi fakataha fakafekauʻaki ʻo e temipalé mo e hisitōlia fakafāmilí (vakai, 25.2.7
-
Ngāue ʻi ha senitā FamilySearch fakalotofonua ʻi hano vahe atu (vakai, 25.3.6).
ʻOku lisi atu ʻa e ngaahi maʻuʻanga tokoni ke tokoni ki he kau faifaleʻi ʻo e temipalé mo e hisitōlia fakafāmilí ʻi he 25.4.1 mo e 25.4.2.
25.2.5
Fakataha Alēlea Fakauōtí
ʻE faʻu pea mo fakahoko ʻe he kau mēmipa ʻo e fakataha alēlea fakauōtí ʻi he faʻa lotu, ʻa e palani fakauooti ki he temipalé mo e hisitōlia fakafāmilí. Ko e fakamatala fekauʻaki mo e palaní, vakai ki he 25.2.6.
ʻE lava ke fakaafeʻi ʻe he pīsopé ʻa e taki fakauooti ki he temipalé mo e hisitōlia fakafāmilí ke kau mai ki he ngaahi fakataha alēlea ʻa e uōtí.
ʻOku maʻu ʻe he kau mēmipa ʻo e fakataha alēlea ʻa e uōtí ʻa e ngaahi fatongia ko ʻení:
-
Tokoniʻi ʻa e kāingalotú fakafoʻituitui ke nau teuteu ke fai ha ngaahi fuakava mo e ʻOtuá ʻaki hono maʻu ʻa e ngaahi ouau fakatemipalé (vakai, 27.1).
-
Poupouʻi ʻa e toʻu tupu mo e kāingalotu lalahi kotoa pē, kau ai ʻa e kāingalotu foʻoú, ke ʻi ai haʻanau lekomeni temipale ʻoku kei ʻaongá (vakai, 26.0).
-
Poupouʻi ʻa e kāingalotú ke nau moihū ʻi he temipalé ʻi he lahi taha ʻe lava ʻi honau ngaahi tūkungá.
-
Fakaafeʻi ʻa e fakafoʻituituí mo e ngaahi fāmilí ke nau ako ʻa e tokāteline mo e ngaahi tāpuaki ʻo e kau ʻi he ngāue ʻo hono fakatahaʻi ʻo e ngaahi fāmilí ki he taʻengatá. ʻOku kau ʻi he ngāue ko ʻení ʻa e ako fekauʻaki mo e ngaahi kuí mo hono fakahoko ʻo e ngaahi ouau fakatemipalé maʻanautolú.
-
Poupouʻi ʻa e mātuʻá ʻi hono akoʻi ki heʻenau fānaú ʻa e tokāteline ʻo e ngāue ʻo hono fakatahaʻi ʻo e ngaahi fāmilí ki he taʻengatá. ʻOku kau heni ʻa e ngaahi tāpuaki ʻo e ngaahi fuakava mo e ngaahi ouau ʻo e temipalé pea mo hono fakahoko ʻo e ngaahi ouau fakatemipalé maʻa ʻenau ngaahi kui kuo pekiá.
-
Akoʻi maʻu pē ʻa e ngaahi tefitoʻi moʻoni ʻo e ngāué ni lolotonga e ngaahi fakatahaʻanga ʻa e Siasí.
Vakai ki he vahe 26ki he fakamatala fekauʻaki mo e ngaahi lekomeni temipalé.
25.2.6
Palani ʻa e Uōtí ki he Temipalé mo e Hisitōlia Fakafāmilí
ʻOku totonu ke ʻi ai ha palani faingofua ʻa e uooti takitaha ki he temipalé mo e hisitōlia fakafāmilí. ʻOku tokoni ʻa e palani ko ʻení ki he kāingalotu ʻo e uōtí, kau ai ʻa e fānaú mo e toʻu tupú, ke nau teuteu ke moihū ʻi he fale ʻo e ʻEikí mo kau ʻi he temipalé mo e ngāue hisitōlia fakafāmilí ʻi he lahi taha ʻe lava ʻi honau ngaahi tūkungá.
ʻE tokoni ʻa e ongo palesiteni ʻo e kōlomu kaumātuʻá mo e Fineʻofá ke faʻu ʻe he fakataha alēlea fakauōtí ʻa e palaní. ʻE toe tokoni foki ki ai ʻa e taki fakauooti ki he temipalé mo e hisitōlia fakafāmilí. ʻI hono faʻu ʻo e palaní, te nau:
-
Fakakaukauʻi ʻi he faʻa lotu ʻa e ngaahi fiemaʻu ʻa e kāingalotú mo e ngaahi maʻuʻanga tokoni ʻoku maʻú.
-
Fakapapauʻi e ngaahi ngāue ke fai he lolotonga ʻo e taʻú.
-
Fakapapau‘i ʻa e founga ke fakahoko ai e palaní mo vahe ʻa e ngāue ke faí ʻo fakatatau ki ai.
ʻOku lisi atu ʻi lalo ha sīpinga ʻo e ngaahi meʻa ʻe lava ʻo fakakau ʻi he palaní:
-
Tokoni ke mahino ki ha kāingalotu pau ʻa e ngaahi tāpuaki ʻo e moihū ʻi he fale ʻo e ʻEikí.
-
Tokoniʻi e kāingalotú ke nau teuteu ke maʻu e ngaahi tāpuaki ʻo e ngaahi ouau fakatemipalé.
-
Tokoniʻi e kāingalotú ke nau fakaʻaongaʻi e Ngaahi Ouau Kuo Māú ke ʻave e hingoa ʻo ha kui ki he temipalé (vakai, 25.4.1).
-
Tokoniʻi e kāingalotú ke nau fakaʻaongaʻi e uepisaiti pe polokalama FamilySearch ke tānaki ʻa e meʻa ʻoku nau ʻilo fekauʻaki mo e kāinga kuo pekia ʻoku nau fiemaʻu e ngaahi ouaú (vakai, 25.4.1).
-
Fakakau ‘a e kau mēmipa foʻoú mo e kāingalotu foki maí, toʻu tupú, mo e fānaú ʻi he ngāue fakatemipalé mo e hisitōlia fakafāmilí. Ko e Tokoni ki he Hingoa Fakafāmilí ko ha founga faingofua ia ki he kau takí ke tokoni ki he kāingalotu ko ʻení ʻi hono teuteuʻi ʻo e ngaahi hingoa fakafāmilí ke maʻu ʻa e ngaahi ouaú (vakai, 25.4.1).
-
Tokoniʻi e fānau Palaimelí ke nau teuteu ke maʻu ha lekomeni temipale pea moihū maʻu pē ʻi he fale ʻo e ʻEikí ʻi he feituʻu ʻe malava aí. ʻOku totonu ke fakahoko ʻe he kau palesitenisī ʻo e Palaimelí ha Fakataha Teuteu ki he Temipalé mo e Lakanga Fakataulaʻeikí ʻi he taʻu takitaha (vakai, 12.1.7 mo e 12.2.4).
ʻOku ʻikai totonu ke fokotuʻu ʻe he palani fakauooti ki he temipalé mo e hisitōlia fakafāmilí ha fika tukupau pe founga lipooti ʻo e moihū ʻi he temipalé (vakai, 25.1.1).
Ko e pīsopé te ne vakaiʻi mo fakaʻatā ʻa e palaní. ʻE takimuʻa ʻa e kau mēmipa ʻo e fakataha alēlea fakauōtí ʻi hono fakahoko iá. Te nau lipooti e fakalakalaká ʻi he ngaahi fakataha alēlea fakauōtí. Te nau fakatonutonu foki ʻa e palaní ʻi hano fie maʻu.
25.2.7
Ngaahi Fakataha Fakafekauʻaki ʻa e Temipalé mo e Hisitōlia Fakafāmilí ʻi he Uōtí
ʻE faʻa fakahoko maʻu pē ha ngaahi fakataha nounou ke fakafekauʻaki ʻa e temipalé mo e hisitōlia fakafāmilí ʻi he uōtí. ʻOku fakahoko ʻa e fakatahá ni ʻe he taki fakauooti ki he temipalé mo e hisitōlia fakafāmilí.
ʻOku kau ʻi he niʻihi kehe ʻoku fakaafeʻí ʻa e:
-
Kau mēmipa kuo vahe ʻo e kau palesitenisī ʻo e Fineʻofá, kōlomu ʻo e kaumātuʻá, mo e Palaimelí.
-
Ko ha ʻasisiteni ʻi he kōlomu ʻo e kau taulaʻeikí (pe palesiteni e kōlomu ʻo e kau akonakí pe tīkoní, kapau ʻoku ʻikai ke ʻi ai ha kau taulaʻeiki ʻi he uōtí).
-
Ko ha mēmipa ʻo e kau palesitenisī ʻo e kalasi lalahi taha ʻo e Kau Finemuí.
-
Kau faifaleʻi ʻi he temipalé mo e hisitōlia fakafāmilí.
Ko kinautolu kotoa ʻoku kau ki aí, kau ai ʻa e toʻu tupú, te nau fealēleaʻaki fakataha ko ha niʻihi tuʻunga tatau. ʻOku fakatefito ʻa e ngaahi fakataha ko ʻení ʻi he ngaahi fiemaʻu ʻa e fakafoʻituituí mo e founga ʻe lava ke faitāpuekina ai kinautolu ʻi heʻenau kau ʻi he ngāue fakatemipalé mo e hisitōlia fakafāmilí. ʻOku fakatefito ʻenau tokangá ʻi he toʻu tupú, kāingalotu foʻou mo foki maí, pea mo e houʻeiki fafine mo e houʻeiki tangata kuo teʻeki maʻu ʻenitaumení. ʻOku faʻa aleaʻi ʻe he ngaahi fakatahá ʻa e ngaahi tefito ko ʻení:
-
Founga ke fakahoko ai e palani fakauooti ki he temipalé mo e hisitōlia fakafāmilí (vakai, 25.2.6).
-
Founga ke tokoniʻi ʻaki ha kau mēmipa pau ʻo e uōtí ke nau teuteu ke maʻu ʻa e ngaahi ouau ʻo e temipalé.
-
Founga ke tokoniʻi ʻaki ha kau mēmipa pau ʻo e uōtí ʻi heʻenau ngāue fakatemipalé mo e hisitōlia fakafāmilí.
ʻE lava ke fakahoko fakahangatonu ʻa e ngaahi fakataha ko ʻení pe ʻi he ʻinitanetí. ʻE lava foki ke hoko ʻa e fakafekauʻakí ʻi ha ngaahi founga kehe, kau ai ʻa e tā-telefoní pe pōpoaki telefoní.
Feinga ke muimui ʻi he ngaahi tefitoʻi moʻoni ʻo e ngāué mo e haʻisiá ʻi he 4.4.5. ʻE lava ke vahe ha taha ʻi he fakatahá ke ne lekooti mo fakamanatu ki he kulupú ʻa e ngaahi ngāue naʻe palaní.
ʻE lava ke fili e fanga kiʻi kolo īkí ke fakahoko ʻenau fakafekauʻaki fakatemipalé mo e hisitōlia fakafāmilí ʻi he fakataha alēlea fakakoló.
25.2.8
Kalasi Teuteu ki he Temipalé
ʻI he malumalu ʻo e fakahinohino ʻa e pīsopé, ʻe lava ke fokotuʻu ha kalasi teuteu ki he temipalé ke tokoni ki he kāingalotú ke nau teuteu ke fakahoko e ngaahi fuakavá ʻi heʻenau maʻu ʻa e ngaahi ouau fakatemipalé. ʻOku fakahoko ʻa e ngaahi kalasi ko ʻení mavahe mei he ngaahi fakatahaʻanga angamaheni ʻo e Sāpaté, ʻi ha taimi ʻe lelei ki he kāingalotú. ʻE lava ke fakahoko ia ʻi ha ʻapisiasi pe ko ha ʻapi nofoʻanga.
ʻE fili ʻe he kau mēmipa ʻo e fakataha alēlea fakauōtí, ʻi he faʻa lotu, ha kāingalotu ʻe fakaafeʻi ke nau kau ʻi he kalasi takitaha. ʻE mātuʻaki ʻaonga ʻa e ngaahi kalasi ko ʻení ki he kakai ko ʻení:
-
Kāingalotu foʻoú
-
Kāingalotu ʻoku teuteu ke maʻu honau ʻenitaumení pe teuteu ke silá
-
Kāingalotu ‘oku foki mai ʻo mālohi ‘i he Siasí
-
Kāingalotu kuo ʻosi maʻu ʻenitaumeni ka kuo fuʻu fuoloa hano ʻikai fakafoʻou ʻenau lekomeni temipalé
ʻE ui ʻe he kau pīsopelikí ha taha faifakahinohino ʻe toko taha pe tokolahi ange, ki he kalasi teuteu ki he temipalé. Ko e ngaahi lēsoni mo e ngaahi fakahinohino ki hono fokotuʻutuʻu ʻo e kalasí ʻoku maʻu ia ʻi he Fakakoloaʻi mei ʻOlungá: Tohi Lēsoni ʻa e Faiako ʻi he Seminā Teuteu ki he Temipalé. ‘E tufa ki he niʻihi ʻoku kau ki aí ha ngaahi tatau ʻo e Ko e Teuteu ke Hū ki he Temipale Māʻoniʻoní Ko e ngaahi maʻuʻanga tokoni ki he ako fakafoʻituituí mo e lēsoní, vakai, temples.ChurchofJesusChrist.org.
25.3
Kau Taki ʻi he Siteikí
25.3.1
Kau Palesitenisī Fakasiteikí
ʻOku maʻu ʻe he palesiteni fakasiteikí ʻa e ngaahi kī ki he ngāue ʻa e ʻOtuá ki he fakamoʻuí mo e hakeakiʻí ʻi he siteikí. ʻOkú ne maʻu mo hono ongo tokoní ʻa e ngaahi fatongia ko ʻení ke tokoni ki hono fakatahaʻi ʻo e ngaahi fāmilí ki he taʻengatá:
-
Tokoni‘i ʻa e kāingalotú ke nau teuteu ke fakahoko ʻa e ngaahi fuakava toputapú, ʻi heʻenau maʻu ʻa e ngaahi ouau fakatemipalé (vakai, 27.1
-
Poupouʻi ʻa e kāingalotu kotoa pē, tautautefito ki he houʻeiki fafine mo tangata tāutahá mo kinautolu ʻoku teʻeki maʻu ʻenitaumení, ke maʻu haʻanau lekomeni ʻoku ʻaongá pea mo moihū ʻi he fale ʻo e ʻEikí ʻi he lahi taha ʻe lava ʻi honau ngaahi tūkungá.
-
Fakapapauʻi ʻoku akoʻi maʻu pē ʻi he ngaahi fakataha fakasiteikí ʻa e tokāteline mo e ngaahi tāpuaki ʻo hono fakatahaʻi ʻo e ngaahi fāmilí ki he taʻengatá (hangē ko hono fakamatalaʻi ʻi he 1.2.4).
-
Poupou‘i ʻa e kāingalotú ke nau ako ki heʻenau ngaahi kuí mo fakahoko e ngaahi ouau fakatemipalé maʻanautolu.
-
Fakahoko e ngaahi ‘initaviu lekomeni temipalé (vakai, vahe 26
ʻI he fakataha angamaheni ha mēmipa ʻo e kau palesitenisī fakasiteikí mo e palesiteni ʻo e kōlomu kaumātuʻa takitaha, te ne aleaʻi ai ʻa e ngaahi ngāue ʻa e uōtí ke fakatahaʻi ʻa e ngaahi fāmilí ki he taʻengatá ʻo fakafou ʻi he ngāue fakatemipalé mo e hisitōlia fakafāmilí (vakai, 8.3.1). ʻE lava ke kau ʻi he fakatahá ʻa e ongo tokoni ʻi he kau palesitenisī ʻo e kōlomú ʻo e kaumātuʻá mo e aleaʻanga māʻolunga naʻe vahe ki he kōlomú.
25.3.2
Kōmiti Fakasiteiki ʻa e Kau Taki Kakai Lalahí
ʻOku kau ʻi he kōmiti fakasiteiki ʻa e kau taki kakai lalahí ʻa e:
-
Kau palesitenisī fakasiteikí.
-
Kau palesitenisī Fineʻofa he siteikí.
-
Kau aleaʻanga māʻolunga ne vahe ke ngāue mo e ngaahi kōlomu ʻo e kaumātuʻá.
ʻE fakahinohinoʻi mo poupouʻi ʻe he kau taki ko ʻení ʻa e kau palesitenisī ʻo e kōlomu ʻo e kaumātuʻá mo e Fineʻofá ʻi honau ngaahi fatongia ki he ngāue fakatemipalé mo e hisitōlia fakafāmilí (vakai, 25.2.2 ʻE lava ke fakahoko e fakahinohinó ʻi ha kulupu pe fakafoʻituitui. ʻE lava ke fakaafeʻi ʻa e kau taki fakauooti ki he temipalé mo e hisitōlia fakafāmilí ke nau maʻu e fakahinohino ko ʻení.
Ki ha fakamatala lahi ange fekau‘aki mo e ngaahi fakataha ʻa e kōmiti ko ‘ení, vakai, 29.3.8.
25.3.3
Kau Aleaʻanga Māʻolungá
ʻE lava ke vahe ʻe he kau palesitenisī fakasiteikí ha kau aleaʻanga māʻolunga ke nau fakahinohinoʻi mo poupouʻi ʻa e kakai ko ʻení ʻi heʻenau ngaahi ngāue ke fakatahaʻi ʻa e ngaahi fāmilí ki he taʻengatá ʻo fakafou ʻi he ngāue fakatemipalé mo e hisitōlia fakafāmilí:
-
Kau palesitenisī ʻo e kōlomu ʻo e kaumātuʻá
-
Kau taki fakauooti ʻi he temipalé mo e hisitōlia fakafāmilí
-
Kau faifaleʻi ʻo e temipalé mo e hisitōlia fakafāmilí he siteikí
-
Kau kouʻōtineita ʻo e senitā FamilySearch
ʻE lava ke vahe ha aleaʻanga māʻolunga ʻe toko taha pe tokolahi ange ke nau taki e ngaahi ngāue ko ʻení. Ka neongo ia, ʻoku maʻu ʻe he kau aleaʻanga māʻolunga kotoa pē ʻa e ngaahi fatongia ko ʻení ki he ngaahi uooti mo e ngaahi kōlomu ʻoku vahe kinautolu ki aí.
ʻE lava ke tokoni ʻa e kau aleaʻanga māʻolungá ki he kau palesitenisī ʻo e kōlomu ʻo e kaumātuʻá mo e kau taki fakauooti ʻi he temipalé mo e hisitōlia fakafāmilí ke fakahinohinoʻi e kau faifaleʻi fakauooti he temipalé mo e hisitōlia fakafāmilí. ʻE lava ke tokoniʻi e kau aleaʻanga māʻolungá ʻe he kau faifaleʻi fakasiteiki ʻi he temipalé mo e hisitōlia fakafāmilí.
ʻE lava ke vahe ʻe he kau palesitenisī fakasiteikí ha alēleaʻanga māʻolunga ke ne fakafekauʻaki ʻa e ngaahi ngāue ʻofa ʻa e siteikí ʻi he hisitōlia fakafāmilí (vakai, 25.4.3). ʻE lava ke vahe ki ai pe ko ha aleaʻanga māʻolunga kehe ke ne tokangaʻi ʻa e ngāue ʻi he ngaahi senitā FamilySearch (vakai, 25.3.6).
25.3.4
Kau Palesitenisī ʻo e Fineʻofá he Siteikí
Fakatatau mo e fakahinohino ‘a e palesiteni fakasiteikí, ʻe fakahinohino‘i mo poupouʻi ʻe he kau palesitenisī ʻo e Fineʻofá ʻi he siteikí ʻa e kau palesitenisī Fineʻofa ʻi he uōtí ʻi honau ngaahi fatongia ki he ngāue fakatemipalé mo e hisitōlia fakafāmilí (vakai, 9.2.4).
25.3.5
Kau Faifaleʻi Fakasiteiki ʻi he Temipalé mo e Hisitōlia Fakafāmilí
ʻE poupouʻi ʻe he kau faifaleʻi fakasiteiki ʻi he temipalé mo e hisitōlia fakafāmilí ʻa e ngaahi ngāue fakatemipale mo e hisitōlia fakafāmili kotoa ʻi he siteikí. ʻOku nau ngāue ʻi he malumalu ʻo e fakahinohino ʻa e kau palesitenisī fakasiteikí pea mo ha aleaʻanga māʻolunga ʻe toko taha pe tokolahi ange ne vahe ki he ngāue fakatemipalé mo e hisitōlia fakafāmilí.
ʻE poupouʻi ʻe he kau faifaleʻi ko ʻení ʻa e kau aleaʻanga māʻolungá mo e kau palesitenisī Fineʻofa ʻi he siteikí ʻi heʻenau feinga ke fakahinohinoʻi e kau taki fakauooti ʻi he ngāue fakatemipalé mo e hisitōlia fakafāmilí (vakai, 25.3.3 mo e 25.3.4). ʻE toe lava foki ke vahe ange kiate kinautolu ʻa e ngaahi ngāue ko ʻení:
25.3.6
Ngaahi Senitā FamilySearch
Kapau ‘oku maʻu ha ngaahi maʻuʻanga tokoni, ʻe lava ke fokotuʻu ʻe he siteikí ha senitā FamilySearch ʻe taha pe toe lahi ange. Ko e ngaahi senitā ko ʻení ke tokoni ki he kau ʻaʻahí ke nau ʻilo, tānaki ha fakamatala, mo fakatahaʻi ʻa e kau mēmipa ʻo e fāmilí ʻoku kei moʻuí mo e kāinga kuo pekiá ʻi he ngaahi ouau fakatemipalé. ʻOku talitali lelei ha taha pē ke ne fakaʻaongaʻi ʻa e ngaahi senitā ko ʻení.
ʻE ui ʻe he palesiteni fakasiteikí ha kouʻōtineita ʻo e senitā FamilySearch ke ne tokangaʻi ʻa e ngaahi ngāue ʻi he senitā FamilySearch takitaha. Ko e senitā takitaha ʻoku meimei ke ngāue ai ʻa e kau faifaleʻi fakasiteiki mo fakauooti ʻo e temipalé mo e hisitōlia fakafāmilí. ‘Oku totonu ke fakaava ʻa e ngaahi senitā FamilySearch ʻi he ngaahi taimi ʻoku faingamālié. ʻE lava ke liliu ʻe he ngaahi senitā FamilySearch ʻoku ofi ki he ngaahi temipalé ʻenau taimi-tēpilé ke fenāpasi mo e taimi-tēpile fakalotofonua ʻa e temipalé.
Ko e fakaʻatā makehé pē, ʻoku ʻi ai ha ngaahi senitā FamilySearch lalahi ʻoku tokangaʻi ʻe he Kau Palesitenisī Fakaʻēliá.
25.3.7
Kouʻōtineita ʻo e Senitā FamilySearch
ʻOku fokotuʻutuʻu ʻe he kouʻōtineita ʻo e senitā FamilySearch ʻa e ngaahi ngāue fakaʻaho ʻa e senitā FamilySearch. Te ne ngāue ʻi he malumalu ʻo e fakahinohino ʻa e palesiteni fakasiteikí pe ko ha alēleaʻanga māʻolunga naʻe vahe ki ai. ʻE lava ke kau ʻi he ngaahi fatongiá ʻa e ngaahi meʻa ʻoku hiki atu ʻi laló:
-
Tokoniʻi ʻa e kāingalotú ke teuteu ha ngaahi hingoa fakafāmili koeʻuhí ke nau lava ʻo fakahoko ʻa e ngaahi ouaú ʻi he fale ʻo e ʻEikí.
-
Fakafekauʻaki ʻa e ngaahi ʻekitivitī ʻa e senitaá ke tokoni ki he kāingalotu ʻo e Siasí mo e kau ʻaʻahi ki he koló ke ʻiloʻi ʻenau ngaahi kuí.
-
Ngāue mo e (1) alēleaʻanga māʻolunga ʻoku vahe ke ne poupouʻi ʻa e ngāue fakatemipalé mo e hisitōlia fakafāmilí pea (2) mo e mataotao fakatekinolosia ʻa e siteikí ke feau ʻa e ngaahi fiemaʻu ngāue ʻa e senitaá mo tauhi hono ngaahi maʻuʻanga tokoní.
ʻOku ʻomi ʻe he Fakahinohino ki Hono Fakalele ʻo e Senitā FamilySearch ha fakahinohino ki he founga hono fakalele ʻo ha senitā FamilySearch.
25.3.8
Kau ʻEtivaisa Fakaʻēlia ki he Temipalé mo e Hisitōlia Fakafāmilí
ʻE lava ke uiuiʻi ʻe he Kau Palesitenisī Fakaʻēliá ha kau ʻetivaisa fakaʻēlia ki he temipalé mo e hisitōlia fakafāmilí. Kapau ʻe fakaʻatā ʻe he ngaahi tūkungá, ʻe lava ke ui ha fakafoʻituitui pe ko ha ongomeʻa mali ki he fakataha alēlea fakafekauʻaki takitaha. ʻOku meimei ke ngāue ʻa e kau ʻetivaisá ʻi ha taʻu ʻe tolu ki he nima.
ʻE lava ke vahe ki ha ʻetivaisa fakaʻēlia fakafoʻituitui pe ongomātuʻa ke na poupouʻi ʻa e ngaahi ngāue ʻa e kau ʻetivaisa fakaʻēlia kehe kuo vahe ki he ngaahi fakataha alēlea fakafekauʻaki ʻi he ʻēliá.
ʻE lava ke vahe ʻe he Kau Palesitenisī Fakaʻēliá ha Kau Fitungofulu Fakaʻēlia ke nau fakafekauʻaki ʻa e ngāue ʻa e kau ʻetivaisa ko ʻení ʻi he ngaahi fakataha alēlea fakafekauʻakí. ʻOku totonu ke fenāpasi e ngāue ʻa e kau ʻetivaisá mo e meʻa ʻoku tokanga ki ai ʻa e ʻēliá.
Fakatatau mo e fakahinohino ʻa e Kau Palesitenisī Fakaʻēliá pe ko ha Fitungofulu Fakaʻēlia ne vahe ki ai, ʻe tokoni ʻa e kau ʻetivaisá ki he kau palesiteni fakasiteikí ke fakahoko honau ngaahi fatongia ke tokoni ki hono fakatahaʻi ʻo e ngaahi fāmilí ki he taʻengatá ʻo fakafou ʻi he ngāue fakatemipalé mo e hisitōlia fakafāmilí (vakai, 25.3.1). ʻE tokoni ʻa e kau ʻetivaisá ki he kau palesiteni fakasiteikí ʻi hono akoʻi ʻo e kakai ʻoku ngāue ʻi he ngaahi uiuiʻi ko ʻení fekauʻaki mo honau ngaahi fatongiá:
-
Kau aleaʻanga māʻolungá
-
Kau palesitenisī Fakasiteiki ʻo e Fineʻofá
-
Ngaahi kōmiti fakasiteiki fakatakimuʻa maʻá e kakai lalahí
-
Kau faifaleʻi ʻo e temipalé mo e hisitōlia fakafāmilí he siteikí
-
Kau kouʻōtineita ʻo e senitā FamilySearch
ʻE lava ke vahe ha kau ʻetivaisa ke nau tokoni ki he kau palesitenisī fakasiteikí ke teuteuʻi e kāingalotú ke nau moihū ʻi he ngaahi temipale foʻou ne toki fanongonongo ʻi he ʻēliá. ʻE lava ke kau ʻi he ngaahi fatongia kehé hono fakahinohinoʻi e kau taki fakasiteikí ʻi he ngaahi tefitoʻi moʻoni mo e ngaahi founga ngāue ʻo e ngāue fakatemipalé mo e hisitōlia fakafāmilí. ʻOku kau heni ʻa e:
-
Founga ke tokoniʻi ai ʻa e kāingalotú ʻi heʻenau fuofua aʻusia ʻi he papitaiso fakafofonga mo e hilifakinimá (vakai, 23.2).
-
Founga ke tokoniʻi ai ʻa e kāingalotu ʻoku teuteu ke maʻu honau ʻenitaumení pe silá (vakai, 25.2.8, 27.2, 27.3, mo e 27.4).
-
Founga hono fokotuʻutuʻu ʻo e ngāue fakatemipalé mo e hisitōlia fakafāmilí ʻi he siteikí mo e ngaahi uōtí (vakai, 25.2).
-
Founga ke poupouʻi ai e kau palesitenisī ʻo e kōlomu e kaumātuʻá mo e Fineʻofá ʻi honau ngaahi fatongiá (vakai, 25.2.2
-
Founga ʻe lava ke faitāpuekina ai ʻe he kau ʻi he ngāue ko ʻení ʻa e fānaú mo e toʻu tupú (vakai, 10.2.4, 11.2.4, mo e 12.2.4).
-
Founga ke fakahoko ai ha ngaahi fakataha fakafekauʻaki leleí (vakai, 25.2.7).
-
Founga ke tokoni ai ki he kau taki fakauōtí ke fokotuʻu ha palani ngāue fakatemipale mo ha palani hisitōlia fakafāmili lelei ʻa e uōtí (vakai, 25.2.6).
Ki ha fakahinohino fekauʻaki mo e ngāué ni, vakai, Fakahinohino Fakatakimuʻa ki he Temipalé mo e Hisitōlia Fakafāmilí.
25.4
Ngaahi Maʻuʻanga Tokoni ki he Hisitōlia Fakafāmilí
25.4.1
Ngaahi Maʻuʻanga Tokoni ʻi he ʻInitanetí
ʻOku ʻomi ʻe he FamilySearch ha ngaahi maʻuʻanga tokoni ke tokoni ki he kāingalotú ke nau ʻiloʻi mo teuteu ha ngaahi hingoa fakafāmili koeʻuhí ke nau lava ʻo kau ʻi he ngaahi ouau maʻa ʻenau ngaahi kui kuo pekiá. ʻOku fakatahaʻi ʻe he ngaahi ouau ko ʻení ʻa e ngaahi fāmilí ke taʻengata. ʻOku kau ʻi he ngaahi maʻuʻanga tokoni ʻa e FamilySearch ʻa e ngaahi meʻá ni:
-
FamilySearch.org. Ko e uepisaiti ʻeni ʻa e Siasí ke tokoni ki he kāingalotú ʻi hono kumi mo teuteuʻi ʻa e hingoa ʻo ʻenau ngaahi kuí ki he ngaahi ouau fakatemipalé.
-
Polokalama ʻAkau Fakafāmilí. ʻOku lahi ha ngaahi tafaʻaki fakangāue ʻo e uepisaiti FamilySearch ʻoku ʻatā ke fakaʻaongaʻi ʻi he polokalama telefoni toʻotoʻo ko ʻení.
-
Ngaahi Ouau Kuo Māú. ʻOku ʻomi ʻe he meʻangāue ko ʻení ha founga faingofua ke maʻu ai ha fāmili pe ngaahi hingoa kehe ke ʻave ki he temipalé. ʻOku fakatou maʻu ia ʻi he FamilySearch.org pea ʻi he polokalama Fuʻu ʻAkau Fakafāmilí fakatouʻosi.
-
Tokoni ki he Hingoa Fakafāmilí. ʻE fakaʻaongaʻi ʻe he kau takí ʻa e meʻangāue ko ʻeni ʻi he ʻinitanetí ke tokoni ki he kāingalotu foʻoú mo kinautolu ʻoku foki maí, pea pehē ki he toʻu tupú, ke nau teuteuʻi mo paaki ha ngaahi kaati hingoa fakafāmili ki he papitaiso mo e hilifakinima fakafofongá.
-
App ki he Ngaahi Manatu Melié. ʻOku tokoni ʻa e polokalama telefoni toʻotoʻo ko ʻení ki he fakafoʻituituí mo e ngaahi fāmilí ke nau ʻiloʻi, vahevahe, mo tauhi ʻa e ngaahi talanoa mo e ngaahi tā ʻo ʻenau ngaahi kuí.
Vakai ki he ngaahi polokalama ʻi he FamilySearch ki he ngaahi polokalama kotoa pē ʻoku maʻú.
25.4.2
Ko Hoku Fāmilí: Ngaahi Talanoa ʻOkú Ne Fakatahatahaʻi Kimautolú
ʻOku tokoni ʻa e kiʻi tohi tufa ko ʻení Ko Hoku Fāmilí: Ngaahi Talanoa ʻOkú ne Fakatahatahaʻi Kitautolú ke tānaki mo tauhi ʻe he kakaí ʻa e ngaahi hingoa mo e ngaahi talanoa fakafāmilí. Te ne toe lava foki ʻo tokoniʻi ʻa e kāingalotú ke nau kamata teuteu ʻa e ngaahi hingoa fakafāmilí ki he ngaahi ouau fakatemipalé.
ʻE lava ke ʻota atu hano ngaahi tatau kuo ʻosi paaki ʻi he store.ChurchofJesusChrist.org.
25.4.3
Ngaahi ʻEkitivitī Ngāue Tokoni ki he Hisitōlia Fakafāmilí
ʻOku fakaʻatā ʻe he Get Involved app pe ko e menu Get Involved ʻi he FamilySearch.org ʻa e kau ngāue tokoní ke kau ʻi he ngaahi ʻekitivitī ko ʻení.
-
Ko e indexing, ko e founga ia hono fakahū ʻo e fakamatalá mei ha lekooti fakahisitōlia naʻe hiki tohinima, ki ha tānakiʻanga fakamatala fakaʻilekitulōnika ʻe lava ke fai ai ha fekumi ʻi he FamilySearch.org.
-
ʻOku tonu hono toe vakaiʻi ʻo e ngaahi lekōtí.
-
Fakaleleiʻi ʻa e tonu ʻo e Fuʻu ʻAkau Fakafāmilí.
ʻOku ʻai ʻe kinautolu ʻoku kau ʻi he ngaahi ʻekitivitī ko ʻení ke nau malava mo e niʻihi kehé ʻo ʻiloʻi ʻa ʻenau ngaahi kuí pea fakahoko ʻa e ngaahi ouau fakatemipalé maʻanautolu.
ʻE lava ke kau ha taha pē ʻi he ngaahi ʻekitivitī ngāue tokoní ʻaki hano fakaʻaongaʻi ʻa e Get Involved app pe ko e Get Involved menu ʻi he FamilySearch.org. ‘E lava ke hoko ʻeni ko ha aʻusia fakafiemālie maʻá e niʻihi ko ʻení:
-
Toʻu Tupú
-
Kakai lalahi kei talavoú
-
Kāingalotu ʻoku ʻikai ke nau lava ʻo maʻulotu maʻu pē ʻi he ngaahi houalotu ʻa e Siasí
-
Kāingalotu foʻoú
-
Kakaí fakalūkufua
ʻE lava ke vahe ʻe he kau palesitenisī fakasiteikí ki ha faifaleʻi ʻi he temipalé mo e hisitōlia fakafāmilí pe ko ha aleaʻanga māʻolunga ke ne fakafekauʻaki ʻa e ngāue ko ʻení.
25.5
Ko Hono Fakaongoongoleleiʻi mo Uiuiʻi ʻo e Kau Ngāue Temipalé
25.5.1
Ko Hono Fakaongoongoleleiʻi ʻo e Kau Ngāue Temipalé
ʻOku ʻilo ʻa e niʻihi ʻe lava ʻo hoko ko ha kau ngāue temipalé ʻi he ngaahi founga ko ʻení:
-
Kāingalotu ʻe ʻilo ʻe he pīsopé pe ʻe ha takimuʻa kehe pē ʻi he uōtí
-
Kāingalotu ʻoku nau omi ki he pīsopé ke nau ngāue
-
Kāingalotu ne fakaongoongoleleiʻi ʻe he palesiteni temipalé, metuloní, pe ko ha takimuʻa kehe mei he temipalé
-
Kāingalotu ʻoku lolotonga teuteu ke ngāue pe toki foki mai mei he ngāue fakafaifekaú (vakai, vahe 24)
‘Oku fakahū ʻa e ngaahi hingoa ʻo e kakai ʻe ala ngāue temipalé ʻo fakaʻaongaʻi e Recommend Temple Worker tool. ‘Oku ʻatā ʻa e polokalamá ni ki he kau pīsopé, kau palesiteni fakasiteikí, mo e kau palesitenisī ʻo e temipalé. ʻOku fakamatalaʻi atu ʻi lalo ʻa e founga ki hono fakahū mai ʻo e ngaahi hingoá.
Ko e taimi ʻe ʻilo ai ʻe he kau palesitenisī ʻo e temipalé ha taha ʻe lava ʻo ngāue temipale, te nau fakahū e hingoa ʻo e tokotahá ki he pīsopé ʻo fakaʻaongaʻi e meʻangāue ki he Fakaongoongolelei ʻo e Taha Ngāue Temipalé.
Ko e taimi ʻe ʻilo ai ʻe ha pīsope ha taha ʻe lava ʻo hoko ko ha taha ngāue temipale pe maʻu ha fakaongoongolelei mei ha palesiteni temipale, te ne talanoa mo e mēmipá fekauʻaki mo e faingamālie ke ngāué. Te ne toe vakaiʻi ʻa e ngaahi fiemaʻu ki he kau ngāue temipalé (vakai, 25.5.2). Kapau ʻe fakatou ongoʻi ʻe he pīsopé mo e mēmipá ʻoku taau ʻa e faingamālié, ʻe fakafonu leva ʻe he pīsopé mo fakahū ʻa e fakaongoongoleleí ʻo fakaʻaongaʻi ʻa e meʻangāue Fakaongoongolelei ʻo e Taha Ngāue Temipalé. ‘Oku totonu ke mahino ki he mēmipá ʻoku ʻikai fakapapauʻi ʻe ha fakaongoongolelei kuo fakahū, ʻe ui pe ʻe vahe ia ko ha taha ngāue temipale.
ʻE vakaiʻi hoko e fakaongoongoleleí ʻe he palesiteni fakasiteikí. Kapau ʻe fakangofua ʻe he palesiteni fakasiteikí pe fakamisioná ʻa e fakaongoongoleleí, te ne fakahū ia ki he palesiteni temipalé ke toe vakaiʻi ʻo fakaʻaongaʻi ʻa e Recommend Temple Worker tool
Ko e kāingalotu ‘oku uiuiʻi pe vahe ko e kau ngāue temipalé, ʻoku angamaheni ʻaki ke nau tukupā ki ha taimi pau ke nau ngāue ai ʻi he temipalé ʻi he uike takitaha. ‘Oku totonu ke fakaʻehiʻehi ʻa e kau takí mei hano ʻoange ha toe ngaahi uiuiʻi kehe te ne uesia e malava ʻa e kāingalotú ke ngāue ʻi he temipalé.
ʻOku toe fakahā foki ʻe he Recommend Temple Worker tool ki he kau pīsopé mo e kau palesiteni fakasiteikí ha lisi ʻo e kāingalotu kotoa mei honau ngaahi uōtí pe siteikí ʻoku lolotonga ngāue ʻi he temipalé.
25.5.2
Ngaahi Fiemaʻu ki he Kau Ngāue Fakatemipalé
ʻOku tokoni ʻa e kau ngāue temipalé ki hono fakahoko ʻo e ngaahi ouaú pe tokoni ʻi he ngaahi ngāue ʻa e temipalé, hangē ko e ʻōfisí, falefoó, pe ngaahi ngāue ki hono tauhi ʻo e kelekelé. Ke fakaongoongoleleiʻi ha taha ke ngāue temipalé, kuo pau ke fakakakato ʻe he mēmipá ʻa e ngaahi fiemaʻu ko ʻení:
-
Nofo ʻi he vāhenga fakatemipale ʻo e temipale ʻe ngāue aí.
-
ʻOsi maʻu ʻenitaumeni, tauhi e ngaahi fuakava fakatemipalé, pea mo ʻi ai haʻane lekomeni temipale ʻoku kei ʻaonga.
-
Maʻu ha fakamoʻoni mālohi ki he ongoongolelei ʻo Sīsū Kalaisi kuo fakafoki maí.
-
Ke moʻui lelei fakatuʻasino ke fakahoko ʻene ngāue kuo vahe ange ʻi he temipalé. Kuo pau ke malava fakatuʻasino ʻe ha tokotaha ngāue ʻokú ne tokoniʻi ʻa e kau pataloní pe fakahoko ʻa e ngaahi ouaú, ʻo ʻikai ha toe tokoni.
-
Moʻui taau mo fakaʻapaʻapaʻi ʻi he Siasí pea mo e tukui koló.
-
Fengāueʻaki lelei mo e kakai kehé.
-
Falalaʻanga mo moʻui lelei.
-
ʻIkai ke lolotonga ʻi ai ha kiʻi fakamatala makehe ʻi hono lekooti mēmipasipí.
ʻIkai ngata ai, ʻe fakapapauʻi ʻe he pīsopé ʻa e ngaahi meʻa ko ʻení:
-
Kapau naʻe tuʻutuʻuni ke fakangatangata ha mēmipasipi ʻo ha taha, ʻe lava ke fakaongoongoleleiʻi ia ko ha tokotaha ngāue ouau ʻo ʻikai toe vave ange ʻi he taʻu ʻe nima hili hono toʻo ʻo e ngaahi fakangatangatá. (Vakai, 32.11.3mo e 32.16.1
-
Kapau naʻe toʻo ʻa e mēmipasipi ʻo ha taha naʻe teʻeki maʻu ʻenitaumeni, pe naʻe kole ʻe he tokotahá ke toʻo hono mēmipasipí, ʻe lava ke fakaongoongoleleiʻi ia ko ha tokotaha ngāue ouau ʻo ʻikai toe vave ange ʻi he taʻu ʻe nima hili hono fakafoki mai ia ki he Siasí. (Vakai, 32.11.432.14.932.16.1mo e 32.16.2
-
Kapau naʻe toʻo ʻa e mēmipasipi ʻo ha taha naʻe ʻosi maʻu ʻenitaumeni, pe kapau naʻe kole ʻe he tokotahá ke toʻo hono mēmipasipí, ʻe lava ke fakaongoongoleleiʻi ia ko ha tokotaha ngāue ouau ʻo ʻikai toe vave ange ʻi he taʻu ʻe nima hili hono fakafoki hono ngaahi tāpuakí. (Vakai 32.11.432.14.9mo e 32.17.2
25.5.3
Ko Hono Uiuiʻi mo Vaheʻi ʻo e Kau Ngāue Temipalé
Ka hili hano maʻu ʻe he palesiteni temipalé ha fakaongoongolelei ʻo ha taha ke ngāue ko ha taha ngāue temipale, ʻe ʻinitaviu ia ʻe ha mēmipa ʻo e kau palesitenisī ʻo e temipalé pe ko ha taha naʻá ne vahe ki ai. ʻE hanga ʻe he tokotaha te ne fakahoko ʻa e ʻinitaviú ʻo ui ʻa e niʻihi ʻe lava ke hoko ko e kau ngāue temipalé pea vaheʻi kinautolu.