tamaitai talavou ma se palasa vai

20.

Gaoioiga

20.1

Faamoemoega

O gaoioiga a le Ekalesia e aumaia ai faatasi tagata o le Ekalesia ma isi o “nuu faatasi ma le au paia” (Efeso 2:19). O faamoemoega mo gaoioiga e mafai ona aofia ai mea nei:

• Fausia ai le faatuatua ia Iesu Keriso.

• E maua ai mea e fiafia ai ma atia’e ai le lotogatasi.

• E maua ai avanoa mo le tuputupu a’e faaletagata lava ia.

• Faamalolosia ai tagata taitoatasi ma aiga.

• Fesoasoani ai i tagata o le ekalesia e auai i le faatinoina o le galuega a le Atua mo le faaolataga ma le faaeaga (tagai i le 1.2).

O nisi o faataitaiga o gaoioiga a le Ekalesia e aofia ai:

• Galuega auauna atu e faamanuiaina ai isi ma fausia ai sootaga faalenuu.

• Galuega faafaifeautalai, galuega o le malumalu, ma le galuega o talafaasolopito o aiga.

• Avanoa e atia’e ai le ola tutoatasi ma tomai faaletaitai.

• Aotauina ma aoaoga faamasani faalematata.

• Gaoioiga i fafo mai o le fale.

• Avanoa e atiina ae ai taleni ma le talisapaia o faatufugaga faaleaganuu.

• Taaloga ma le malosi onomea.

• Samiga o aso faapitoa, e pei o aso malolo po o mea na tutupu i le talafaasolopito o le Ekalesia i le lotoifale.

E pei ona faaaogaina i lenei tusitaulima, o le faaupuga Gaoioiga a le Ekalesia e faasino i se gaoioiga e lagolagoina e se faalapotopotoga, se iunite, po o se korama a le Ekalesia.

20.2

Fuafuaina o Gaoioiga

A o le’i fuafuaina se gaoioiga, e iloiloina e taitai manaoga faaleagaga ma le faaletino o tagata o le au paia. E sailia e taitai le taitaiga a le Agaga pe a faia se tonu pe o le a le ituaiga o gaoioiga e ono fesoasoani e taulima ai na manaoga.

20.2.1

Tiutetauave mo le Fuafuaina o Gaoioiga

Mo faamatalaga e uiga i le fuafuaina o gaoioiga faalesiteki ma siteki tuufaatasi, tagai i le 20.3.

O gaoioiga faaleuarota e mafai ona fuafua i soo se tasi o auala nei, e faavae i luga o manaoga i le lotoifale:

• E mafai e le aufono a le uarota ona vaaia le fuafuaina.

• E mafai e le aufono a le uarota ona totofi ni faalapotopotoga patino e fesoasoani e fuafua se gaoioiga se tasi pe sili atu foi.

• Pe a manaomia ma i le mea e lava ai tagata o le au paia, e mafai e le au epikopo ona faatulaga se komiti mo gaoioiga a le uarota. E mafai ona tofia le autalavou o ni sui auai o le komiti. O lea komiti e galue i lalo o le taitaiga a le aufono a le uarota. E tofi e le aufono a le uarota se tasi o ona sui auai e fesootai e le aunoa ma sui auai o le komiti o gaoioiga.

Mo faamatalaga e uiga i le fuafuaina o gaoioiga a le autalavou o le uarota, tagai i le 10.2.1.3 ma le 11.2.1.3.

20.2.2

Valaauliaina o Tagata Uma e Auai

O i latou e fuafuaina ia gaoioiga, e tatau ona aapa atu i tagata uma, aemaise o tagata fou o le ekalesia, o tagata ua le toaaga mai, autalavou, au matutua nofofua, o i latou e i ai manaoga faapitoa, ma tagata o isi faatuatuaga. O i latou e fuafuaina e tatau ona nofouta i tulaga tapulaa faaletino o tagata e auai. E tatau foi ona latou nofouta i eseesega faaleaganuu ma gagana.

O i latou e fuafuaina gaoioiga e vaavaai mo auala e faaaofia ai tagata auai. Mo se faataitaiga, e mafai ona latou valaaulia tagata o le ekalesia ma isi e faaaoga o latou tomai ma taleni i le gaoioiga.

E ui ina mafai ona avea le faapotopoto i gaoioiga o se faamanuiaga, ae e le tatau ona faia ia tagata o le au paia ia lagona faapea e tatau lava ona auai i gaoioiga uma. E le tatau ona avea gaoioiga ma mea e tuu atu ai ni avega e le tatau ai i luga o taitai ma tagata o le au paia.

20.2.3

Tulaga faatonuina

O gaoioiga a le Ekalesia e tatau ona faagaeetia ma faamamafa ai mea e “mama, matagofie, pe logoleleia, pe tauleleia” (Mataupu Faavae o le Faatuatua 1:13). E le tatau ona aofia i gaoioiga se mea e feteenai ma aoaoga a le Ekalesia. E le tatau ona aofia i gaoioiga ni faasalalauga po o isi faafiafiaga e foliga mai ai ua taliaina se mea e le talafeagai.

O mea e feteenai ma le Upu o le Poto e le faatagaina i gaoioiga a le Ekalesia po o nofoaga ma meatotino a le Ekalesia. O tagata o loo faasuā’avā i le ava malosi po o isi fualaau faasaina, e le tatau ona auai i gaoioiga a le Ekalesia. Afai e tulai mai se mea faapena, ia tali atu i ai taitai ma le agaalofa.

20.2.4

Paleni ma le Eseese

E fuafua e taitai se tulaga paleni o gaoioiga, e aofia ai galuega auauna atu, faatufugaga faaleaganuu, ma gaoioiga faaletino (tagai i le 20.1). E tatau ona maua e tagata ni avanoa e auai i gaoioiga e tosina i ai lo latou fiafia. E tatau foi ona latou lagolagoina isi i mea latou te fiafia i ai.

O vaega nei o loo tuuina atu ai ni faataitaiga o gaoioiga lelei.

20.2.4.1

Auauna atu

O gaoioiga auauna atu e maua ai avanoa e faaali atu ai le alofa mo isi, e lagona ai le olioli i le fesoasoani atu ia i latou, ma faaleleia ai nuu.

O nei gaoioiga e mafai ona aofia ai le asiasi atu i tagata o mama’i pe ua tuulafoaiina, faamatagofieina o fale ma lotoa o le Ekalesia, ma le auai i galuega faatino i nuu. I nofoaga e maua ai, o le JustServe.org o loo fautuaina mai ai ni avanoa mo auaunaga i nuu.

O gaoioiga auauna atu e tatau ona mulimulita’i i taiala mo le saogalemu (tagai i le 20.7.6.1

20.2.4.2

Faatufugaga Faaleaganuu

O faatufugaga faaleaganuu e maua ai avanoa mo tagata o le ekalesia e atiina ae ma fefaasoaai a latou taleni. O nei gaoioiga e faafailele ai foi le fatufatu mea fou, talitonu mautinoa, ma le galulue soosoo tau’au. E mafai ona latou faaaofia ai faaaliga o faatufugaga ma galuega taulima, faaaliga taleni, po o siva, musika, ma tala faatino. E mafai foi ona latou faaaofia ai le faamanatuina o aganuu, aso malolo, po o le talafaasolopito faalelotoifale o le Ekalesia.

tamaitai o loo suisui

20.2.4.3

Faafiafiaga, Soifua Maloloina, Malosi Onomea, ma Taaloga

I le avea ai ma tagata taitoatasi, aiga, ma vaega faale-Ekalesia, ua fautuaina tagata o le ekalesia ia auai i gaoioiga ia e saofaga i lo latou soifua maloloina ma le malosi. O nisi gaoioiga faafiafia faale-Ekalesia e mafai ona fuafuaina ina ia mafai ai ona auai faatasi ia tagata o le aiga i le faatinoina.

Mo faamatalaga e uiga i gaoioiga tau taaloga, tagai i le 20.5.9.

20.2.5

Faatulagaina o Gaoioiga

E tatau ona fuafua mamao ia gaoioiga faale-Ekalesia i le mea e talafeagai ai. E faailoa atu pea lava pea e taitai i matua ia gaoioiga mo tamaiti ma le autalavou.

E tatau ona faia gaoioiga i se itula talafeagai. E tatau ona lava le taimi e uma ai ina ia mafai ai ona malaga saogalemu tagata auai i le fale.

Afai o le a faia se gaoioiga i se falelotu po o se isi fale o le Ekalesia, ia vave faatonu le fale ina ia le feteenai ma isi fuafuaga ua faatulagaina.

Ua faasaosao lava po o Aso Gafua mo gaoioiga faaleaiga (tagai i le 20.5.3).

20.2.6

Faatupeina o Gaoioiga

O le tele o gaoioiga e tatau ona faigofie ma ia laitiiti le tupe pe leai foi se tupe e alu ai. E ao ona vave faamaonia e le au epikopo po o le au peresitene o le siteki soo se tupe faaalu.

E le tatau ona masani ona totogi e tagata o le au paia se tupe ina ia auai ai i gaoioiga. Mo aiaiga faavae ma taiala e uiga i le faatupeina o gaoioiga, tagai i le 20.6.

20.3

Gaoioiga a le Siteki, Siteki Tuufaatasi, ma le Eria

20.3.1

Taiala Lautele

O le tele lava o gaoioiga a le Ekalesia e faia i le tulaga faaleuarota. Ua fautuaina foi taitai ina ia faia ni gaoioiga faavaitaimi faalesiteki ma ni siteki tuufaatasi pe a fesoasoani na gaoioiga i le faataunuuina o faamoemoega o i le 20.1.

O gaoioiga faalesiteki ma ni siteki tuufaatasi e sili ona aoga mo le autalavou, tagata nofofua o le ekalesia, ma tamaitai, aemaise lava i eria e toaitiiti tagata o le au paia. O gaoioiga e fuafua lelei a le siteki ma siteki tuufaatasi e mafai ona maua ai e tagata o le au paia se li’o lautele o faigauo. E faailoa e taitai ia manaoga o i latou o loo latou tautuaina ma iloilo pe o le a aoga na gaoioiga e taulima ai na manaoga. Ona fautua atu lea e nei taitai ni gaoioiga i le au peresitene o le siteki.

20.3.2

Gaoioiga Faalesiteki

E amata e au peresitene o Alii Talavou, Tamaitai Talavou, Aualofa, ma le Peraimeri le faagasologa o le fuafuaina o gaoioiga faale-siteki mo a latou faalapotopotoga.

E amata e le komiti o talavou nofofua matutua a le siteki le faagasologa o le fuafuaina o gaoioiga faalesiteki mo talavou nofofua matutua.

Afai ua faatulaga se komiti a talavou matutua nofofua a le siteki, e amata e sui auai o le komiti le faagasologa o le fuafuaina o gaoioiga mo le au matutua nofofua.

Afai ua faatulaga se komiti o gaoioiga a le siteki, e mafai ona latou fuafuaina gaoioiga faale-sieki ma avea o se punaoa i faalapotopotoga a le siteki i le fuafuaina o a latou gaoioiga e pei ona faataoto atu i le 20.3.2.1.

O gaoioiga uma faale-siteki e manaomia ai le faamaoniga a le au peresitene o le siteki. E faamaopoopoina i fonotaga a aufono a le siteki.

E logo mamao atu e taitai o le siteki ia taitai o uarota e uiga i gaoioiga faalesiteki. Latou te faamautinoaina foi o gaoioiga a le siteki e faaopoopo i gaoioiga a uarota ae le faatautavā ma i latou.

20.3.2.1

Komiti o Gaoioiga a le Siteki

E mafai e le au peresitene o le siteki ona faatulaga se komiti o gaoioiga a le siteki e fesoasoani i le aufono a le siteki e fuafuaina ia gaoioiga a le siteki. O le komiti o gaoioiga a le siteki e aofia ai se taitaifono (o se fautua maualuga) ma sui auai o le komiti (tagai i le 20.3.2.2 ma le 20.3.2.3). E mafai foi e le au peresitene o le siteki ona valaaulia isi tagata e fesoasoani i le fuafuaina o se gaoioiga se tasi pe sili atu.

20.3.2.2

Taitaifono o le Komiti o Gaoioiga a le Siteki

Afai e faatulaga e le au peresitene o le siteki se komiti o gaoioiga a le siteki, latou te tofia se fautua maualuga e avea ma taitaifono o le komiti. O ona tiutetauave e mafai ona aofia ai:

• Tausisia o se kalena o gaoioiga a le siteki.

• Vaavaaia o sui auai o le komiti i le fuafuaina o gaoioiga a le siteki.

• Fautuaina atu o se paketi auiliili o gaoioiga a le siteki i le au peresitene o le siteki ao lei oo i le amataga o tausaga taitasi. O lenei paketi e le aofia ai ia gaoioiga e mo faalapotopotoga taitasi a le siteki.

• E avea ma se punaoa i taitai o faalapotopotoga a le siteki pe a latou fuafuaina ia gaoioiga.

20.3.2.3

Sui Auai o le Komiti o Gaoioiga a le Siteki

O se tasi o le au peresitene o le siteki po o se fautua maualuga e tofia e mafai ona valaauina tagata e galulue i le komiti o gaoioiga a le siteki. Latou te galulue i lalo o le taitaiga a le taitaifono o le komiti. E fesoasoani sui auai o le komiti e fuafua ma faatulaga ia gaoioiga i le sieki.

20.3.3

Gaoioiga a Siteki Tuufaatasi ma le Eria

I eria e toalaiti le autalavou, e ao i taitai ona faia faavaitaimi ni gaoioiga a siteki tuufaatasi mo autalavou, ina ia mafai ai ona manuia le autalavou mai fegalegaleaiga i vaega toatele atu. E mafai foi ona faia i nisi taimi ia gaoioiga faale-eria mo autalavou.

O gaoioiga faifaisoo a siteki tuufaatasi e ao ona faia mo talavou nofofua matutua i mea e le manaomia tele ai se taimi po o tupe faaalu i ni tauaofiaga. E mafai foi ona faia i nisi taimi ia gaoioiga faale-eria mo talavou nofofua matutua.

Mo faamatalaga e uiga i gaoioiga a siteki tuufaatasi mo tagata nofofua o le ekalesia, tagai i le 14.2.1.3.

O gaoioiga a siteki tuufaatasi e tatau ona faigofie ma eseese.

Afai e manatu ia peresitene o siteki e aoga se gaoioiga a siteki tuufaatasi i tagata o a latou siteki, e mafai ona latou talosagaina le faatagaga mai le Au Peresitene o le Eria. Ao lei fautuaina atu se gaoioiga mo siteki tuufaatasi, e filima’oti e peresitene o siteki pe o le auala sili lea e tali ai manaoga ua latou silafia. E silasila foi peresitene o siteki i le tau, taimi, ma le feoaiga o le a manaomia e le gaoioiga. Latou te iloiloina foi le saogalemu (tagai i le 20.7.6).

O fonotaga e soalaupule ai le fuafuaina o gaoioiga a siteki tuufaatasi e mafai ona faia a o lei faia ia fonotaga pe ina ua mae’a foi fonotaga a le aufono o le eria ma le fonotaga a le aufono faamaopoopo (tagai i le 5.2.3 ma le 5.2.4). Pe a manaomia, o taitai faaopoopo—e aofia ai peresitene o le Aualofa, Alii Talavou, ma Tamaitai Talavou o le siteki—e mafai ona valaaulia e auai ai.

E mafai e le Au Peresitene o le Eria ona tofi ni peresitene o siteki po o Fitugafulu Eria e taitaia komiti e fuafuaina ma faatino ia gaoioiga a siteki tuufaatasi po o le eria. E mafai e au peresitene o siteki ona valaau tagata o a latou siteki e galulue i komiti nei.

O le faatupeina o gaoioiga a siteki tuufaatasi e aumai i tupe o paketi a siteki o loo auai. O le faatupeina o gaoioiga faale-eria, e mafai ona aumai i paketi a le eria po o le laumua o le Ekalesia pe a faamaonia.

20.3.4

Tausisia o Aiaiga Faavae o Femalagaaiga a le Ekalesia

O gaoioiga a le siteki, siteki tuufaatasi, ma le eria e tatau ona tausisi i aiaiga faavae o femalagaaiga a le Ekalesia (tagai 20.7.7). O femalagaaiga mo konafesi a le MMA e ao ona tausisi i aiaiga faavae o femalagaaiga a le Ekalesia sei vagana ua tuuina atu e se taitai o le MMA i taitai i le lotoifale nisi faatonuga.

tagata o loo talanoa

20.4

Konafesi a le Autalavou

E amata atu ia Ianuari o le tausaga e atoa ai lo latou ta’i 14 tausaga, e valaaulia ai alii talavou ma tamaitai talavou e auai faatasi i se konafesi a le autalavou. O konafesi a le autalavou e masani ona faia ta’itasi i le tausaga i le tulaga faaleuarota po o le faalesiteki. E mafai foi ona faia i se tulaga o ni siteki tuufaatasi po o le eria. I se tausaga e atofa ai le autalavou e auai i se konafesi a le MMA, e le tatau ona faia ai ni konafesi a siteki ma uarota mo autalavou.

O faamoemoega o konafesi a le autalavou o le fesoasoani lea i le autalavou:

• E fausia ai le faatuatua ia Iesu Keriso.

• Faamalolosia molimau.

• Atiina ae taleni.

• Fai ni uo fou.

• Ia fiafia faatasi ma le autalavou o e e tutusa o latou talitonuga ma tulaga faatonuina.

E mafai foi e le autalavou ona aoaoina tomai faaleautaitai a o latou fesoasoani i le fuafuaina o konafesi a le autalavou.

O konafesi a le autalavou a le uarota e fuafuaina ma faatino e le aufono a le autalavou o le uarota, i lalo o le taitaiga a le au epikopo (tagai i le 29.2.6). E maua mai e le au epikopo le faamaoniga mai le au peresitene o le siteki mo fuafuaga o se konafesi a le autalavou a le uarota.

O konafesi a le autalavou a le siteki e fuafua ma faatino e le komiti a le au taitai o le autalavou a le siteki (tagai i le 29.3.10). E tatau ona valaaulia le autalavou e fesoasoani i le komiti i le tele e mafai ai.

O konafesi a le autalavou e faatupeina mai le paketi a le siteki po o le uarota. E le tatau ona talosagaina le au paia e totogi ni tupe mo konafesi a le autalavou (tagai i le 20.6).

A o fuafuaina e taitai ma le autalavou se konafesi a le autalavou, e tatau ona latou usitaia ia aiaiga o i le mataupu lenei ma mulimuli i taiala nei:

• Filifili se autu faaletalalelei, e pei o se mau, o le a musuia ai le autalavou ma fesoasoani ai ia latou malamalama i faamoemoega o le konafesi. E mafai ona faaaoga le autu faaletausaga a le Ekalesia mo le autalavou e fai ma autu o le konafesi. E tatau ona faamaonia e le au epikopo po o le au peresitene o le siteki le autu.

• Ia fuafua ni gaoioiga e ogatusa ma le autu.

• Ia maua se faamaoniga mai le au epikopo po o le au peresitene o le siteki mo le au failauga uma ma gaoioiga. O failauga e tatau o ni tagata o le Ekalesia o e aoao atu i le Agaga. Tagai i le 38.8.18 mo isi taiala e faatatau i failauga.

• Afai e i ai se gaoioiga o fuafua mo le Aso Sa, e tatau ona talafeagai mo le aso Sapati. O sauniga molimau, talanoaga ma le au epikopo, po o ni fonotaga faapena e faatagaina. Peitai, e le tatau ona faia ni sauniga faamanatuga—ma e le tatau foi ona faatinoina le faamanatuga—i fafo atu o maota tapuai a le uarota po o le siteki. Soo se tuusaunoaga e tatau o se gaoioiga e lagolagoina e le Ekalesia ma e tatau foi ona faamaonia e le Au Peresitene o le Eria. E le tatau ona faimalaga atu ni vaega i le konafesi a le autalavou po o le malaga mai foi mai le konafesi a le autalavou i se Aso Sa.

• Ia mautinoa e lava le vaavaaiga a le au matutua i taimi uma (tagai i le 20.7.1).

• Ia mulimulitaia taiala uma mo le saogalemu, tagai i le 20.7.6.

E valaaulia taitai matutua e auai i le tele e mafai ai o le konafesi. O i latou nei e aofia ai uso o le au epikopo po o le au peresitene o le siteki, au peresitene o Tamaitai Talavou o le uarota po o le siteki, ma le au peresitene o Alii Talavou o le siteki. E mafai foi ona valaaulia ia faufautua o Tamaitai Talavou ma Alii Talavou o le uarota e auai ai.

20.5

O Aiaiga Faavae ma Taiala mo le Filifilia ma le Fuafuaina o Gaoioiga

E faamautinoa e taitai o loo usitaia ia aiaiga faavae ma taiala nei i le filifilia ma le fuafuaina o gaoioiga a le Ekalesia.

20.5.1

Gaoioiga Faapisinisi pe Faaupufai

E le faatagaina ni gaoioiga e faia mo soo se faamoemoega faapisinisi pe faapolotiki (tagai i le 35.5.6.1 ma le 35.5.6.3).

20.5.2

Siva ma Musika

I siva uma lava, o laei, teuga, moli, ituaiga siva, upu o pese, ma musika e tatau ona saofagā i se siosiomaga e mafai ona afio ai le Agaga o le Alii (tagai i le tamaitusi Mo Le Malosi o le Autalavou ).

E faaaoga e taitai le fomu o le Feagaiga o Faafiafiaga pe a faatonu se faaili, aufaaili, po o se tagata e tatāina musika tapue. E fesoasoani lenei feagaiga e faamautinoa ai e talafeagai ia amio ma musika mo siva a le Ekalesia. E faia e taitai ni maliega manino tusitusia e faata’utino ai tagata o e saunia musika ia mulimuli i tulaga faatonuina o le Ekalesia i gaoioiga a le Ekalesia.

20.5.3

Po o Aso Gafua

E fautuaina tagata o le au paia ia faia gaoioiga faaleaiga i le Aso Gafua po o i isi taimi. E leai ni gaoioiga a le Ekalesia, fonotaga, po o sauniga o papatisoga e tatau ona faia pe a te’a le 6:00 i afiafi o Aso Gafua.

Ia faamautinoa e taitai e tapunia fale ma isi meatotino a le Ekalesia i po o Aso Gafua. O ‘aiga ma isi gaoioiga faapena e le tatau ona faia i fale o le Ekalesia i po o Aso Gafua.

E avea o se tuusaunoaga, e mafai ona faia ni gaoioiga a uarota talavou matutua nofofua ma uarota a le au matutua nofofua i po o Aso Gafua, e aofia ai i fale o le Ekalesia. E mafai foi ona faia se tuusaunoaga faapitoa pe a pa’ū le Po Faauma Tausaga i se Aso Gafua (tagai 20.5.4).

20.5.4

Gaoioiga mo le Po Faauma Tausaga

Afai e fuafua e se uarota po o se siteki se gaoioiga mo le Po o le Faauma Tausaga, ma afai e pa’ū le Po o le Faauma Tausaga i le Aso Toonai, Aso Sa, po o le Aso Gafua, e tatau i taitai ona mulimulita’ia taiala nei.

Aso Toonai. E mafai e le peresitene o le siteki ona atofa se isi Aso Sa mo le faamamaluina o le aso anapogi. E mafai ona faaauau le gaoioiga i le mavae ai o le vaeluaga o le po. Peitai, e tatau ona faauma vave pe a mavae le vaeluaga o le po, ina ia mafai ona auai tagata o i ai i sauniga o le Aso Sa.

Aso Sa. E mafai ona fuafua ia gaoioiga a le Ekalesia mo le Aso Toonai, 30 o Tesema. E faaaoga i ai taiala o loo i le parakalafa na muamua atu. E mafai ona fautuaina aiga e faamanuia le Po o le Faauma Tausaga i o latou fale. E tatau ona talafeagai gaoioiga mo le aso Sapati.

Aso Gafua. E mafai e le peresitene o le siteki po o le epikopo ona faataga le faaaogaina o fale o le Ekalesia i le afiafi o le Aso Gafua.

20.5.5

Gaoioiga e Faasoloatoa ma le Po

E manaomia le faatagaga a matua po o e o tausia, mo gaoioiga uma a le Ekalesia e faasoloatoa ma le po, ia e aofia ai le autalavou (tagai i le 20.7.4).

O gaoioiga a le Ekalesia e faasoloatoa ma le po mo vaega tuufaatasi o alii talavou ma tamaitai talavou e tatau ona faamaonia e le epikopo ma le peresitene o le siteki. E moni foi lena mea mo gaoioiga mo alii ma tamaitai nofofua o le au paia. O na ituaiga o gaoioiga e tatau ona seāseā faia. O faataitaiga e aofia ai konafesi a le autalavou, konafesi a le MMA, po o malaga i le malumalu lea e manaomia ai le faimalaga i mea mamao.

O alii ma tamaitai ma taitai e auai ai, e tatau ona eseese fale e momoe ai. Peitai, e mafai e se ulugalii faaipoipo ona faaaoga se potu po o se faleie e tasi. E tatau i talavou taitoatasi ona i ai lona lava moega po o le ato moe.

O le tele o tulaga, e le nofo se talavou i le faleie po o le potu e tasi ma se tagata matua sei vagana ai o le tagata matua o sona matua po o se o tausia. E mafai ona faia se tuusaunoaga pe afai e sili atu ma le toalua tagata matutua i se faleie po o se potu, ma o le itupa e tutusa ma le talavou.

Afai e faaaoga faatasi e taitai matutua ma le autalavou ni fale mo le po, e pei o se tamai fale, e tatau ona le itiiti ma le toalua tagata matutua i le fale e tasi, ma e tatau ona itupa tutusa ma le talavou.

O gaoioiga uma a le Ekalesia e faasoloatoa ma le po, e tatau ona aofia ai taitai matutua e le itiiti ifo i le toalua.

E tatau ona lava se aofai o taitai perisitua matutua e i ai i taimi uma o gaoioiga e faasoloatoa ma le po e tuuina atu le lagolagosua ma le puipuiga. Mo gaoioiga a Tamaitai Talavou, e tatau i taitai perisitua ona nonofo i ni fale e ese mai i tamaitai talavou.

E faatumu e taitai se fomu o le Fuafuaina o Mea e Fai ma Gaoioiga mo gaoioiga uma e faasoloatoa ma le po.

E le faatagaina ni gaoioiga e faasoloatoa ma le po i falelotu o le Ekalesia po o lotoa e i ai falelotu.

Mo nisi faamatalaga, tagai i le “FAQs—What Should I Do?” i luga o le ChurchofJesusChrist.org.

20.5.6

Faafoligaina o le Atua

O le Atua le Tama ma le Agaga Paia e lē tatau ona faafoligaina i sauniga, tala faatino, po o musika.

Afai e faafoligaina le Faaola, e tatau ona faia ma le migao ma le mamalu. E na o alii e matua tauagafau ma lelei le amio, e tatau ona manatulia mo le vaega lea. O le tagata e faafoliga i le Faaola, e le tatau ona pese pe siva. A tautala, e tatau ona ia faaaogaina tau lava o mau e sii sa’o mai ia na fetalaia e le Faaola. A maea le faatinoga, e tatau ia te ia ona sui vave i ona lavalava masani.

E le tatau ona faafoligaina le Faaola e tamaiti i tala faatino se’i vagana ai se vaaiga i Lona soifua mai.

20.5.7

Tatalo ma Faigalotu i Gaoioiga

O gaoioiga uma lava e tatau ona tatala ma, pe a talafeagai ai, faaiu i se tatalo. E mafai ona aofia ai se viiga, se mafaufauga faaleagaga, po o se saunoaga a se taitai po o se tagata auai.

20.5.8

Tausia o le Aso Sapati

E leai ni tolauapiga, taaloga, po o ni gaoioiga faafiafia e faatulagaina i le Aso Sa. E le tatau foi i vaega o autalavou ma isi ona faimalaga atu pe faimalaga mai i tolauapiga po o konafesi a le autalavou i Aso Sa.

E avea o se tuusaunoaga, pe a avea le saogalemu po o le tau o femalagaaiga o ni popolega ogaoga, e i ai ni gaoioiga a le autalavou e mafai ona faatulaga vave i le taimi lava e maea ai sauniga tapuai i le Aso Sa. O nei gaoioiga e tatau ona ese mai le faasologa o sauniga o le Aso Sa. E ao ona ogatusa ma le tausiga o le agaga o le Sapati. E manaomia ai le faamaoniga mai le epikopo ma le peresitene o le siteki.

20.5.9

Taaloga

O gaoioiga o taaloga a le Ekalesia e maua ai avanoa mo gaoioiga faaletino ma le fefaa’aumeaa’i. E faamamafaina ai le auai, taalo tausaafia, ma le atina’ega o tomai. Pe a aofia i le gaoioiga ni tauvaga, e ao ona faia taumafaiga uma e aloese ai mai le femisaa’i. E tatau ona maua e tagata uma o ‘au ia avanoa masani e taaalo ai, tusa lava po o le a le maualuga o tomai.

O le au peresitene o le siteki e vaaia gaoioiga o taaloga lagolagoina e faia i totonu o la latou siteki. Latou te faavaeina foi ni taiala e (1) e faama’oti atu ai tausaga [matutua] e mafai ai e le au taaalo ona auai i taaloga a le Ekalesia ma le (2) e filima’otia le agavaa o le tagata taalo. O ia faaiuga e tatau ona faia a’o lei amataina se vaitau [o le taaloga].

Afai e fai ni taaloga a ni siteki tuufaatasi, o le Au Peresitene o le Eria po o Fitugafulu Eria ua tofia, e vaaia. O nei gaoioiga e faatautaia e tagata popoto faapitoa mo taaloga o ē tofia e peresitene o siteki taiulu ia na tofia e le Au Peresitene o le Eria. E le faatagaina ni taamilosaga o taaloga a le Eria.

O tagata e auai i taaloga a le Ekalesia e le faapea e na o tagata o le Ekalesia e tatau ona i ai. Peitai, e tatau ona nonofo i latou i totonu o tuaoi o le iunite ma ia malilie e mulimuli i tulaga faatonuina ma aiaiga faavae a le Ekalesia i taimi o gaoioiga.

Afai e faaaoga ni toniga a ‘au, e tatau ona faigofie, taugofie, ma talafeagai mo le gaoioiga. O mitiafu lanu po o mitiafu mafanafana e masani ona lava na. O toniga e tatau ona totogi i tupe o paketi a le siteki po o le uarota.

E le fautuaina le tauaaoina atu o taui po o ipu i ‘au po o tagata taitoatasi.

alii o loo taaalo soka

20.5.10

Asiasiga i le Malumalu

O asiasiga i le malumalu e faatulagaina i le tulaga faaleuarota po o le faalesiteki i totonu o le itulagi ua atofa i ai le malumalu.

E le fautuaina ni malaga faatulagaina faaleuarota pe faalesiteki i malumalu i fafo atu o le itulagi ua atofa i ai le malumalu. O ni malaga faapena e manaomia ai le faamaoniga a le au peresitene o le siteki. O ni malaga i le malumalu e momoe, e manaomia ai le faamaoniga a le au peresitene o le siteki.

O malaga i le malumalu e tatau ona ogatusa ma aiaiga faavae mo femalagaaiga o loo i le 20.7.7. O malaga i le malumalu e momoe e tatau foi ona ogatusa ma aiaiga faavae o loo i le 20.5.5.

20.5.11

Gaoioiga E Le Faamaonia

E mafai ona le lagolagoina e iunite o le Ekalesia ia gaoioiga e le ogatusa ma taiala o loo i le mataupu lenei. E aofia ai tulaga nei:

• O gaoioiga e maualuga le tulaga lamatia o ni manu’aga po o ma’i (tagai i le 20.7.6).

• O gaoioiga e manaomia ai se tupe faaalu po o ni femalagaaiga e le masani ai (tagai i le 20.7.7).

• Polokalama faamalositino e i ai musika, fatuga, ofu, po o isi elemene e le ogatusa ma tulaga faatonuina o le Ekalesia.

Afai e i ai se epikopo e i ai se fesili e uiga i le talafeagai o se gaoioiga pe leai, e fesili atu o ia i le peresitene o le siteki. E mafai e peresitene o siteki ona faailoa atu ia fesili i le Au Peresitene o le Eria.

20.6

O Aiaiga Faavae ma Taiala mo le Faatupeina o Gaoioiga

E faamautinoa e taitai o loo usitaia ia aiaiga faavae ma taiala nei i le faatupeina o gaoioiga uma a le Ekalesia.

20.6.1

O Gaoioiga e Totogi i Tupe o Paketi a le Uarota po o le Siteki

O tupe o paketi a le uarota ma le siteki e tatau ona faaaoga e totogi ai gaoioiga uma---ma tuusaunoaga nei e ono i ai o loo lisi atu i le 20.6.2.

E le tatau i tagata o le au paia ona tuuina atu ni mea e faaaogaina, sapalai, tupe totogi e faaaoga pe ulufale ai, po o ni feoa’iga mamao ia latou lava tupe. E mafai e tagata o le au paia ona aumaia meaai pe afai e le o se avega mamafa le faia o lena mea.

20.6.2

Faatupeina o Tolauapiga a le Autalavou

Afai e le lava tupe o le paketi a le uarota po o le siteki e totogi ai gaoioiga ua lisiina atu i lalo, e mafai ona fai atu taitai i e auai e totogi se vaega po o mea uma:

• Se tolauapiga faaumiumi se tasi faaletausaga a le au Perisitua Arona po o se gaoioiga faapena.

• Se tolauapiga faaumiumi se tasi faaletausaga a Tamaitai Talavou po o se gaoioiga faapena.

E le tatau ona soona tele ni tupe faaalu po o ni feoaiga mo se tolauapiga faaletausaga. O le leai o se tupe a le tagata lava ia, e le tatau ona taofia ai se tagata o le au paia mai le auai ai.

Afai e le lava tupe mai paketi a le uarota ma le siteki ma mai tagata auai mo tolauapiga, e mafai e le epikopo ona faataga se gaoioiga suetupe se tasi a le uarota i le tausaga. E tatau ona ogatusa lenei gaoioiga ma taiala o loo i le 20.6.5.

Mo faamatalaga e uiga i le faatupeina o ni gaoioiga tetele a siteki tuufaatasi po o le eria mo talavou nofofua matutua, tagai i le 14.2.1.3.

20.6.3

Faatupeina o Konafesi a le MMA

E mafai ona talosagaina le autalavou e saofagā se tupe e totogi ina ia auai ai i konafesi a le Mo Le Malosi o le Autalavou (MMA). Afai o le totogi o le a le mafai ai ona auai se talavou, e mafai e le epikopo ona faaaoga tupe o le paketi a le uarota e totogi ai le pili atoa po o se vaega o lena pili. Tagai i le FSY.ChurchofJesusChrist.org.

20.6.4

Faatupeina o Masini ma Sapalai

Afai e mafai, o masini ma sapalai e manaomia e le uarota mo tolauapiga faaletausaga a le autalavou e faatau mai tupe o le paketi. Afai e le lava nei tupe, e mafai e le epikopo ona faataga se gaoioiga suetupe se tasi a le uarota i le tausaga. E tatau ona ogatusa lenei gaoioiga ma taiala o loo i le 20.6.5.

O masini ma sapalai e faatau mai i tupe o le paketi a le uarota po o tupe na maua i se gaoioiga suetupe, e mo na o le faaaogaina e le Ekalesia. E le mo le faaaogaina e tagata lava latou.

20.6.5

Gaoioiga Suetupe

O tupe faaalu mo gaoioiga a le siteki ma le uarota, e masani ona totogi i tupe o le paketi. Peitai, e mafai e se peresitene o le siteki po o le epikopo ona faatagaina se gaoioiga suetupe i tausaga taitasi mo na o faamoemoega nei:

• E fesoasoani e totogi ai gaoioiga o loo lisi atu i le 20.6.2 ma le 20.6.3.

• E fesoasoani e faatau ia masini e moomia e le iunite mo tolauapiga faaletausaga e pei ona faataoto atu i le 20.6.4.

Afai e faia se gaoioiga suetupe, e tatau ona tuuina atu ai se tulaga faatauaina anoa po o se auaunaga.

Ia mautinoa e taitai o faasoasoa tutusa ia tupe na maua i suegatupe. O le paketi mo korama a le Perisitua Arona e fua i le numera o alii talavou i le uarota. O le paketi mo tamaitai talavou e fua i le numera o tamaitai talavou i le uarota.

O foai i gaoioiga suetupe e fai i le lotofuatiaifo. E faamautinoa e taitai ia lē lagona e tagata o le au paia le faapea e tatau lava ona latou foai atu.

O iunite e lagolagoina suegatupe, e le tatau ona latou faasalalaua faalauaitele pe talosagaina mai fafo atu o o latou tuaoi. E le tatau foi ona latou faatauina atu ni oloa po o ni tautua i fale o aiga.

O ni faataitaiga o gaoioiga suetupe e le o faatagaina e aofia ai:

• O gaoioiga e totogi ai le lafoga.

• O gaoioiga e totogi le faatinoina, tusa lava po o tagata faigaluega po o se konekarate.

• Faafiafiaga e totogi ai e le siteki po o le uarota le au faafiafia mo a latou tautua.

• O le faatauina atu o oloa po o auaunaga mai se pisinisi faioloa.

• O taaloga faitupe, e pei o lulu, loto, ma le bingo.

• O gaoioiga e le saogalemu.

Soo se tuusaunoaga i nei faatonuga e tatau ona faamaonia e le Au Peresitene o le Eria.

20.7

O Aiaiga Faavae ma Taiala mo Gaoioiga

E faamautinoa e taitai o loo usitaia ia aiaiga faavae nei ma taiala i gaoioiga uma a le Ekalesia.

20.7.1

Vaavaaiga a Tagata Matutua

E tatau ona le itiiti ifo ma le toalua ni tagata matutua e i ai i gaoioiga uma a le Ekalesia e auai ai tamaiti ma le autalavou. E ono manaomia ni tagata matutua faaopoopo e fua i le toatele o le vaega, o tomai e moomia mo le gaoioiga, ma isi tulaga e tatau ai. E fautuaina matua e fesoasoani atu.

O i latou uma e galulue faatasi ma tamaiti ma le autalavou, e tatau ona faamae’aina le aoaoga faamasani o le puipuiga o tamaiti ma le autalavou. Tagai i le ProtectingChildren.ChurchofJesusChrist.org.

20.7.2

Tulaga Manaomia o Tausaga mo le Auai Ai i Gaoioiga a le Autalavou

Faatasi ma le faamaoniga a o latou matua, e mafai ai e talavou ona auai i tolauapiga moea e amata ia Ianuari o le tausaga e atoa i ai lo latou ta’i 12. E mafai ona latou auai i siva, konafesi a le autalavou, ma konafesi a le MMA e amata ia Ianuari o le tausaga e atoa i ai lo latou ta’i 14.

20.7.3

Inisiua

20.7.3.1

Inisiua mo Taavale a le Tagata Lava Ia

Tagai i le 20.7.7.

20.7.3.2

Inisiua o le Soifua Maloloina o le Tagata ma Faalavelave

I le tele o vaega o le lalolagi, o loo maua ai inisiua o le soifua maloloina ma faalavelave e ala i polokalama a falefaigaluega po o le malo. O tagata o le ekalesia o i ai lea inisiua e tatau ona maua penefiti uma o loo avanoa pe afai latou te fetaiai ma se manu’a i le taimi o se gaoioiga a le Ekalesia a o lei sailia se fesoasoani mai le inisiua mo gaoioiga a le Ekalesia (tagai i le 20.7.3.4).

20.7.3.3

Inisiua mo Faalavelave Faaletagata Lava Ia

E fautuaina e le Ekalesia ia tagata o le au paia ma taitai o e vaavaaia ia gaoioiga faale-Ekalesia ina ia puipuia i latou lava, i mea e mafai ai, e ala i le tauaveina o ni aofaiga e tatau ai o inisiua mo faalavelave latou te ono totogia. O ia inisiua e mafai ona maua mai e ala i inisiua a i latou e ona ia fale po o isi polisi [inisiua]. Mo nisi faamatalaga, tagai i le “FAQs—What Should I Do?” i luga o le ChurchofJesusChrist.org.

20.7.3.4

Polokalama o Fesoasoaniga Faafomai mo Gaoioiga a le Ekalesia

I le Iunaite Setete ma Kanata, o le Polokalama o Fesoasoaniga Faafomai mo Gaoioiga a le Ekalesia (FFGE) e maua ai penefiti lona lua faafomai ma nifo mo manu’aga e tulai mai a o auai ai i se gaoioiga a le Ekalesia. E tuuina atu ai foi le lagolagosua mo le falelauasiga pe afai e tatau ai. O lenei polokalama ua mamanuina lava e faaopoopo atu, ae le suitulaga i se inisiua a le tagata lava ia mo le soifua maloloina ma faalavelave. Mo nisi faamatalaga, tagai i le “FAQs—What Should I Do?” i luga o le ChurchofJesusChrist.org.

Afai e tulai mai se faalavelave i le taimi o se gaoioiga e lagolagoina e le Ekalesia, e filima’oti e taitai pe manaomia le FFGE. E mafai e soo se taitai ona lipotia se mea e tupu i le polokalama o le Global Incident Reporting i le incidents.ChurchofJesusChrist.org. Afai e ta’u mai e le taitai e moomia se togafitiga i talaatu o fesoasoani muamua, o le a faailoa atu i le epikopo ma o le a ia mauaina faamatalaga e lesitala ai. E iloilo e le epikopo le gafatia e se tagata ona totogi pili faafomai e ala i isi auala, e pei o le inisiua a le tagata lava ia po o isi punaoa. E mafai ona ia faatagaina ona faaaoga tupe a le FFGE pe a ia lagona e talafeagai.

Mo nisi faamatalaga, tagai i le Church Activity Medical Assistance Handbook. Ina ia maua lenei tusitaulima, faafesootai le:

Deseret Mutual Benefit Administrators

P.O. Box 45530

Salt Lake City, UT, 84145-0530

Telefoni: 1-801-578-5650 po o le 1-800-777-1647

Imeli: [e-mail]

Uepisaite: dmba.com/churchactivity

20.7.3.5

Tusi Faamaonia o Inisiua

E tele taimi e talosagaina ai le Ekalesia e tuuina atu se faamaoniga o inisiua mo gaoioiga. O nei talosaga e oo mai ona o maliliega o lisi, konekarate, po o pemita e o faatasi ma gaoioiga.

I le Iunaite Setete ma Kanata, e mafai e taitai ona maua mai se tusi faamaonia e faaali atu ai le faamaoniga o le inisiua i le InsuranceCertificates.ChurchofJesusChrist.org. I fafo atu o le Iunaite Setete ma Kanata, e tatau i taitai ona faafesootai le ofisa o le eria. O talosaga e tatau ona aofia ai:

• Le igoa ma le tuatusi o le faalapotopotoga o loo manaomia le faamaoniga o le inisiua.

• O se faamatalaga ma le nofoaga o le fale, pe afai o se fale o lisi.

• O tapulaa o tupe e ono totogi atu o loo manaomia.

• O isi faamatalaga talafeauga e uiga i le gaoioiga.

E ao i taitai ona vave fuafua lelei ia lava se taimi e sauniuni ai tusi faamaonia.

20.7.4

Faatagaga a Matua

E le mafai ona auai tamaiti ma le autalavou i se gaoioiga a le Ekalesia e aunoa ma le faatagaga a o latou matua po o i latou e vaaia. Mo gaoioiga a le Ekalesia ia e aofia ai le nonofo i le po, feoa’iga mamao, po o se tulaga lamatia e maualuga atu nai lo le mea masani, e tatau ona i ai se maliega tusitusia. O nisi gaoioiga e ono manaomia ai nisi fuafuaga faaopoopo e tuuitiitia ai tulaga lamatia. E tatau ona avea le saogalemu o se tulaga faitaulia taua. Tagai i le 20.7.6.1.

E tuuina atu e matua ma i latou e vaaia, lenei maliega e ala i le sainia o le fomu o le Faatagaga a Matua Po o Le o Loo Vaaia ma Faamatalaga Faafomai ua Faamatuu Mai. O le tagata o loo taitaia le gaoioiga e tatau ona i ai se fomu ua sainia mo tagata taitoatasi e auai.

20.7.5

Lipoti o le Sauaina po o le Faatautala

Soo se sauaina po o faiga faatautala e tulai mai i le taimi o se gaoioiga a le Ekalesia e tatau ona lipotia i taitai faalemalo. E tatau ona faafesootai vave le epikopo. O loo maua faatonuga mo tagata o le ekalesia i le 38.6.2.7. O loo maua faatonuga mo epikopo i le 38.6.2.1.

Mo faauigaga o le sauaina po o le faatautala, tagai i le 38.6.2.3 ma le 38.6.2.4.

20.7.6

Lapataiga mo le Saogalemu, Tali Atu i Faalavelave, ma le Lipotia o Faalavelave

20.7.6.1

Lapataiga mo le Saogalemu

E iloiloina ma le faaeteete e taitai ma i latou e auai ia gaoioiga ia mautinoa ai le itiiti o se tulaga e ono lamatia ai i ni manu’a po o ni ma’i. O gaoioiga foi e tatau ona itiiti se tulaga e ono lamatia ai le faaleagaina o meatotino. I taimi o gaoioiga, e faia e taitai taumafaiga uma e faamautinoa ai le saogalemu. O le fuafuaina ma le mataalia ma mulimuli i lapataiga o le saogalemu, e mafai ai e taitai ona faaitiitia le tulaga lamatia o ni faalavelave.

O gaoioiga e tatau ona aofia ai aoaoga faamasani talafeagai ma le vaavaaiga. E tatau foi ona talafeagai mo tausaga o tagata e auai, tomai, ma le matutua.

E aoao e taitai tagata uma e auai i faiga masani mo le saogalemu mo le gaoioiga. Pe a manaomia e gaoioiga ni tomai patino faaletino, atonu e tatau ona maua aoaoga faamasani patino pe faaaoga taiala faapolofesa.

E tatau ona saunia taitai mo ni faalavelave faafuasei. E tatau ona latou vave iloa pe faapefea ona faafesootai le ofisa o leoleo ma auaunaga mo faalavelave faafuasei. Mo nisi faamatalaga, tagai i le “FAQs—What Should I Do?” i luga o le ChurchofJesusChrist.org.

vaega o loo eliina le eleele

20.7.6.2

Tali Atu i Faalavelave

Afai e tulai mai se faalavelave po o se manu’a i totonu o lotoa ma fale o le Ekalesia po o le taimi o se gaoioiga a le Ekalesia, ia usitaia e taitai ia taiala nei, e pei ona faatatau i ai:

• Tuuina atu i ai le fesoasoani muamua. Afai e manaomia e se tagata se tausiga faafomai faaopoopo, faafesootai ia auaunaga faafomai mo faalavelave faafuasei. Ia faafesootai foi matua, tagata o loo tausia, po o isi tauaiga e sosoo ai, ma le epikopo po o le peresitene o le siteki.

• Afai e misi se tagata pe maliu, ia vave loa lava ona faafesootai le ofisa o leoleo i le lotoifale. Ia galulue faatasi atoatoa ma i latou.

• Tuuina atu le lagolago faalelagona.

• Aua nei faamalosiauina pe le fautuaina foi se gaoioiga faaletulafono. Aua nei faia ni tautinoga mo le Ekalesia.

• Ia ao mai ma teu ni igoa o ni molimau, o latou faamatalaga e faafesootai ai, tala o le mea na tupu, ma ni atapu’e.

• Lipoti le faalavelave (tagai i le 20.7.6.3).

20.7.6.3

Lipotiina o Faalavelave

O le tulaga nei e tatau ona lipoti atu i luga o upega tafailagi i le incidents.ChurchofJesusChrist.org. O le epikopo, peresitene o le siteki, po o se tasi na te atofaina o lē e iloa e uiga i le faalavelave, e faia vave loa lava le lipoti.

• O se faalavelave po o se manu’a e tulai mai i nofoaga o le Ekalesia po o le taimi foi o se gaoioiga a le Ekalesia.

• O se tagata sa auai i se gaoioiga a le Ekalesia ua misi.

• Ua faaleagaina se meatotino a se tagata, meatotino faitele, po o le Ekalesia i le taimi o se gaoioiga.

• Ua taufaamata’u pe ua faamoemoe mo se faatinoga faaletulafono.

Afai e taunuu se gaoioiga i se manu’aga tuga, oti, po o se tagata ua leiloa, ia vave loa ona faia e le peresitene o le siteki, epikopo, po o se tagata na ia tofia se tasi o faatinoga nei:

• I le Iunaite Setete po o Kanata, ia faafesootai muamua le Risk Management Division [Vaega o le Pulega o Faalavelave] i le laumua o le Ekalesia (1-801-240-4049 po o le 1-800-453-3860, laina 2-4049; i le taimi ua manava galuega po o faaiuga o vaiaso, valaau le 1-801-240-1000 po o le 1-800-453-3860, ma o le a vave ona faafesootai e le talitelefoni se tagata). Ona faafesotai lea o le au Peresitene o le Eria.

• I fafo atu o le Iunaite Setete ma Kanata, faafesootai le ofisa o le eria.

E lipoti foi e le peresitene o le siteki po o le epikopo ia manu’aga ma fale po o meatotino a le Ekalesia ua faaleagaina, i le pulega o fale ma fanua a le Ekalesia.

Mo nisi faamatalaga, tagai i le “FAQs—What Should I Do?” i luga o le ChurchofJesusChrist.org.

20.7.6.4

Inisiua ma Fesili

Afai e tulai mai se manu’a i le taimi o se gaoioiga a le Ekalesia, e filima’oti e taitai pe faaaoga le polokalama o le Fesoasoani Faafomai mo Gaoioiga a le Ekalesia (tagai i le 20.7.3.4).

I nisi tulaga, atonu e i ai ni fesili a le peresitene o le siteki po o le epikopo e uiga i mataupu tau i le saogalemu po o tagi faasaga i le Ekalesia. O le peresitene o le siteki (po o se epikopo i lalo o lana faatonuga) e auina atu fesili faapena i le Vaega o le Pulega o Faalavelave po o le ofisa o le eria.

20.7.7

Femalagaaiga

O femalagaaiga mo gaoioiga a le Ekalesia e tatau ona faamaonia e le epikopo po o le peresitene o le siteki. O nei femalagaaiga e le tatau ona tuu ai se avega e le talafeagai i tagata o le au paia. E le fautuaina ni femalagaaiga mamao mo gaoioiga.

I nisi o tulaga tuusaunoaina, atonu e lagona e le peresitene o se siteki po o le epikopo, o le malaga mamao mo se gaoioiga, e tauamiotonuina. E mafaufau ma le lototatalo o ia i penefiti faaleagaga e mafai ona maua i le gaoioiga, o le tau, ma le aafiaga i aiga. Afai na te faamaonia se na femalagaaiga, e le tatau i tagata o le au paia ona faia i a latou lava tupe.

O faiga masani o femalagaaiga ma le faaaogaina o taiala i le vaega lenei, e tatau ona laugatasia uma ai iunite i le eria lava e tasi po o le fono faamaopoopo lava e tasi. E mafai ona talanoaina e peresitene o siteki ma malilie ai i faiga faavae o femalagaaiga i le taimi o fonotaga faamaopoopo a aufono.

E faatumu e taitai se fomu o le Fuafuaina o Mea e Fai ma Gaoioiga mo gaoioiga e aofia ai femalagaaiga mamao.

A i ai se gaoioiga a le Ekalesia mo le autalavou e aofia ai femalaga’iga mamao, pe momoe ai foi i le po, e tatau i matua po o i latou e tausia ona tuuina mai la latou faatagaga tusitusia mo a latou fanau e auai ai (tagai i le 20.7.4). E tatau ona i ai le vaavaaiga faatuatuaina a tagata matutua (tagai i le 20.7.1).

A mafai, e tatau i vaega a le Ekalesia ona faaaoga taavale la’u pasese ua laiseneina mo femalagaa’iga mamao. E tatau ona laiseneina ma ia puipuia e se inisiua mo faalavelave e ono tupu mai.

A feoa’i vaega o le Ekalesia i taavale la’u pasese e tatau ona saogalemu le tulaga o taavale taitasi. E tatau i tagata taitoatasi ona faaaoga se fusipa’u. O avetaavale taitasi e tatau o se tagata matua faautauta, ma ua i ai se laisene. O taavale uma faapea ma avetaavale e tatau ona lava se aofaiga o le inisiua mo faalavelave tautaavale mo le puipuiga. E tatau ona faia fuafuaga ia mautinoa ai e nofouta ma mataalia avetaavale i taimi uma. Soo se taimi e mafai ai, e le tatau ona na o se tagata matua ma se talavou e i totonu o se taavale sei vagana o le talavou o sona atalii/afafine.

O faalapotopotoga a le Ekalesia, e le mafai ona latou umiaina pe faatau ni taavale po o ni pasi mo feoaiga a ni aumalaga.

E le tatau ona malaga faatasi se alii ma se tamaitai na o i la’ua i gaoioiga faale-Ekalesia, fonotaga, po o tofiga sei vagana ua faaipoipo le tasi i le isi pe taufai nofofua foi i la’ua.

Mo nisi faamatalaga, tagai i le “FAQs—What Should I Do?” i luga o le ChurchofJesusChrist.org.

20.8

Aiaiga Faavae Faalepulega mo Gaoioiga

E faamautinoa e taitai o loo usitaia ia aiaiga faavae nei ma taiala pe a faatautaia gaoioiga uma a le Ekalesia.

20.8.1

O Mea ua Puletaofia

Tagai i le 38.8.11.

20.8.2

Lisiina o Fale e Le o Ni Fale o le Ekalesia mo Gaoioiga

Afai e le lava ia fale o le Ekalesia mo gaoioiga a le siteki po o ni siteki tuufaatasi, e mafai ona lisi ni fale pe a faamaonia e le peresitene o le siteki. O talosaga faapena e taulimaina e le pule o fale ma fanua o le Ekalesia.

E mafai ona faatonuina ia iunite i le lotoifale e faaali atu se faamaoniga o le inisiua mo le puipuiga pe a lisiina pe faaaogaina ni fale e le o ni fale o le Ekalesia. Mo faamatalaga e uiga i le mauaina mai o se tusi faamaonia o le inisiua, tagai i le 20.7.3.5.

20.8.3

Gaoioiga e Totogi ai Lafoga

Ia faamautinoa e taitai o gaoioiga e le lamatia ai le tulaga tuusaoloto o le Ekalesia mai le totogiina o lafoga. Mo taiala, tagai i le 34.8.1.