litrato sa pamilya

2.

Pagsuporta sa mga Indibidwal ug mga Pamilya diha sa Buhat sa Dios sa Kaluwasan ug Kahimayaan

2.0

Pasiuna

Isip usa ka lider sa Simbahan ni Jesukristo, ikaw mosuporta sa mga indibidwal ug mga pamilya diha sa pagtuman sa buhat sa Dios sa kaluwasan ug kahimayaan (tan-awa sa 1.2). Ang labing dako nga katuyoan niini nga buhat mao ang pagtabang sa tanang mga anak sa Dios nga makadawat sa mga panalangin sa kinabuhing dayon ug sa kahingpitan sa kalipay.

Kadaghanan sa buhat sa Dios sa kaluwasan ug kahimayaan matuman pinaagi sa pamilya. Alang sa tanang mga miyembro sa Simbahan, kini nga buhat nasentro diha sa panimalay. Kini nga kapitulo makatabang nimo nga makaangkon og panan-awon sa:

• Tahas sa pamilya diha sa plano sa Dios.

• Buhat sa Dios sa kaluwasan ug kahimayaan diha sa panimalay.

• Relasyon tali sa panimalay ug sa Simbahan.

2.1

Ang Tahas sa Pamilya diha sa Plano sa Dios

Ang pamilya gi-orden sa Dios ug mao ang sentro sa Iyang plano. Ang matag usa kanato “hinigugmang espiritu nga anak nga lalaki o babaye sa langitnong mga ginikanan [adunay] kinaiya sa pagkadios ug kalagmitan nga mahimong usa ka dios (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Kita kabahin sa ilang pamilya. Kita nagpuyo uban kanila sa wala pa kita matawo sa yuta.

Isip kabahin sa Iyang plano, ang Langitnong Amahan miestablisar og mga pamilya dinhi sa yuta. Tuyo Niya nga ang mga pamilya makahatag nato og kalipay. Ang mga pamilya mohatag og mga oportunidad sa pagkat-on, pagtubo, pagserbisyo, paghinulsol, ug pagpasaylo. Sila makatabang nato sa pag-andam alang sa kinabuhing dayon.

Niini nga kinabuhi, daghang mga tawo adunay limitado nga mga oportunidad sa mahigugmaong mga relasyon sa pamilya. Walay pamilya nga walay mga hagit, kasakit, ug kasubo. Ang mga indibidwal ug mga pamilya magpakita og hugot nga pagtuo sa Ginoo ug maningkamot nga magpuyo sumala sa mga kamatuoran nga Iyang gipadayag kabahin sa pamilya. Ang Manluluwas misaad nga Siya motabang sa pagpas-an sa mga luwan sa tanan nga moduol ngadto Kaniya (tan-awa sa Mateo 11:28–30).

Ang plano sa Langitnong Amahan alang sa kalipay moseguro nga ang Iyang tanang mga anak adunay oportunidad sa pagdawat sa Iyang ebanghelyo ug makadawat sa Iyang labing mahinungdanong mga panalangin (tan-awa sa Doktrina ug mga Pakigsaad 137:7–10). Ang tanan nga mohimo ug motuman sa mga pakigsaad uban sa Dios makasinati og kalipay ug “kalinaw niini nga kalib[o]tan, ug kinabuhi nga dayon diha sa kalib[o]tan nga umaab[o]t” (Doktrina ug mga Pakigsaad 59:23; tan-awa usab sa Mosiah 2:41).

Ang saad sa Dios sa kinabuhing dayon naglakip sa mahangtoron nga kaminyoon, mga anak, ug sa tanan pang mga panalangin sa usa ka mahangtorong pamilya. Kini nga saad alang usab niadtong kinsa dili minyo karon o walay pamilya diha sa Simbahan (tan-awa sa 38.1.4). Kini nga mga panalangin gipaneguro ngadto sa tanan nga nagtinguha nga magpakabuhi isip mga disipulo ni Jesukristo.

2.1.1

Mahangtorong mga Pamilya

Ang mahangtorong mga pamilya maporma kon ang mga miyembro sa Simbahan mohimo og mga pakigsaad samtang sila modawat sa mga ordinansa sa pagsilyo diha sa templo. Ang mga panalangin sa usa ka mahangtorong pamilya moabot kon ang mga miyembro motuman niadtong mga pakigsaad ug maghinulsol kon sila makasala. Ang mga lider sa Simbahan motabang sa mga miyembro nga makaandam sa pagdawat niini nga mga ordinansa ug motahod sa ilang mga pakigsaad.

Ang matag tawo mahimong motuman og daghang mga tahas diha sa usa ka mahangtorong pamilya. Ang tanang tahas sa pamilya sagrado ug importante. Kini nga mga tahas mahimong maglakip sa inahan ug amahan, anak nga babaye ug anak nga lalaki, igsoong babaye ug igsoong lalaki, iyaan ug uyoan, ug apohang babaye ug apohang lalaki. Ang pagtuman niini nga mga tahas pinaagi sa gugma makatabang sa mga anak sa Dios nga mouswag ngadto sa kinabuhing dayon.

Usa ka dugang nga aspeto sa pag-establisar og mahangtorong mga pamilya mao ang pagpahigayon og mga ordinansa diha sa templo nga motugot sa mga miyembro nga masilyo ngadto sa ilang namatay nga mga katigulangan.

Uban sa pagsabot sa plano sa Dios, ang mga miyembro magtinguha og mga panalangin sa usa ka mahangtorong pamilya.

2.1.2

Bana ug Asawa

Ang kaminyoon tali sa lalaki ug sa babaye giorden sa Dios (tan-awa sa Doktrina ug mga Pakigsaad 49:15). Ang usa ka bana ug asawa gipaabot nga mouswag pagdungan ngadto sa kinabuhing dayon (tan-awa sa 1 Mga Taga-Corinto 11:11).

Usa sa mga kinahanglanon sa pag-angkon og kinabuhing dayon mao nga ang usa ka lalaki ug usa ka babaye mosulod sa pakigsaad sa celestial nga kaminyoon (tan-awa sa Doktrina ug mga Pakigsaad 131:1–4). Ang usa ka magtiayon mohimo niini nga pakigsaad sa dihang sila modawat sa ordinansa sa pagsilyo sa kaminyoon diha sa templo. Kini nga pakigsaad mao ang pundasyon sa usa ka mahangtorong pamilya. Kon matinud-anong gituman, kini makatugot sa ilang kaminyoon nga molahutay hangtod sa kahangtoran. Sa kataposan, sila mahimong sama sa Dios (tan-awa sa Doktrina ug mga Pakigsaad 132:19–20).

Ang Dios misugo sa mga bana ug mga asawa nga makig-unong sa usag usa (tan-awa sa Genesis 2:24; Doktrina ug mga Pakigsaad 42:22). Niini nga konteksto, ang pulong pag-unong nagpasabot nga hingpit nga mahalaron ug matinud-anon ngadto sa usa ka tawo. Ang minyo nga mga magtiayon mag-inunongay pinaagi sa paghigugma ug pagserbisyo sa usag usa.

Ang pag-unong naglakip usab sa hingpit nga pagkamatinud-anon tali sa bana ug asawa. Ang pisikal nga kasuod tali sa bana ug asawa gituyo nga maanindot ug sagrado. Kini gi-orden sa Dios aron malalang ang mga anak ug alang sa pagpadayag sa gugma tali sa bana ug asawa. Ang pagkamalumo ug pagtahod—dili kahakog—kinahanglang mogiya sa ilang relasyon sa kasuod.

Ang Dios misugo nga ang sekswal nga kasuod kinahanglang ireserba alang sa kaminyoon tali sa usa ka lalaki ug babaye. Ang pagpabilin nga putli sa sekswal nga paagi sa dili pa ang kaminyoon ug matinud-anon sulod sa kaminyoon makatabang sa mga indibidwal nga tinud-anay nga magmalipayon ug makalikay sa espirituwal, emosyonal, ug pisikal nga kadaot. Ang mga ginikanan ug mga lider sa Simbahan giawhag sa pagbuhat sa tanan nilang mahimo sa pagpalig-on niini nga pagtulon-an. (Tan-awa sa 38.6.5.)

Ang usa ka magtiayon magtinguha nga magkahiusa sa pag-establisar sa ilang pamilya (tan-awa sa Genesis 2:24). Ang pagkahiusa diha sa kaminyoon nagkinahanglan og hingpit nga panagkauban, panag-ambitay sa mga responsibilidad. Ang usa ka bana ug asawa managsama sa mga mata sa Dios. Ang usa kinahanglang dili modominar sa lain. Ang ilang mga desisyon kinahanglan himoon pinaagi sa panaghiusa ug gugma, uban sa hingpit nga partisipasyon sa duha.

Si Adan ug Eva nagpakita og ehemplo alang sa mga bana ug mga asawa. Sila nagtrabaho, nag-ampo, ug nagsimba og dungan (tan-awa sa Moises 5:1, 4). Sila mitudlo sa ilang mga anak sa ebanghelyo ug nagbangutan sa ilang mga pagsulay (tan-awa sa Moises 5:12, 27). Nagkahiusa sila sa usag usa ug uban sa Dios.

2.1.3

Mga Ginikanan ug mga Anak

Ang unang sugo sa Dios ngadto ni Adan ug Eva isip bana ug asawa mao ang pagbaton og mga anak (tan-awa sa Genesis 1:28). Ang mga propeta sa ulahing mga adlaw mitudlo nga ang “sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman” (“Ang Pamilya: Usa ka Pamahayag ngadto sa Kalib[o]tan”; tan-awa usab sa Doktrina ug mga Pakigsaad 49:16–17).

Usa ka sagrado nga pribilehiyo ug responsibilidad alang sa usa ka bana ug asawa ang pag-atiman sa mga anak nga ilang gipanganak o gisagop. Ang nagsagop nga mga ginikanan adunay sama nga mga panalangin ug mga responsibilidad sa biyolohikanhon nga mga ginikanan.

Ang usa ka mahigugmaong bana ug asawa mohatag sa labing maayong kahimtang alang sa pagpadako ug pag-amuma sa mga anak. Ang indibidwal nga mga sirkumstansiya mahimong makapugong sa mga ginikanan sa pagpadako sa ilang mga anak nga magkauban. Hinoon, ang Ginoo mopanalangin kanila kon sila magtinguha sa Iyang tabang ug maningkamot sa pagtuman sa ilang mga pakigsaad Kaniya.

Ang mga ginikanan adunay importante nga responsibilidad sa pagtabang sa ilang mga anak nga makaandam sa pagdawat sa mga panalangin sa kinabuhing dayon. Sila motudlo sa ilang mga anak sa paghigugma ug pagserbisyo sa Dios ug sa uban (tan-awa sa Mateo 22:36–40). Sila motudlo kanila sa pag-ampo ngadto sa Langitnong Amahan ug sa pagtuon sa pulong sa Dios (tan-awa sa Alma 37:36–37, 44–46). Sila motabang sa ilang mga anak nga makasabot sa doktrina sa hugot nga pagtuo diha ni Jesukristo, paghinulsol, bunyag, ug sa gasa sa Espiritu Santo (tan-awa sa Doktrina ug mga Pakigsaad 68:25). Sila usab motabang nila nga makaandam sa paghimo og mga pakigsaad samtang sila modawat sa mga ordinansa sa kaluwasan ug kahimayaan.

“Ang mga amahan mao ang mangulo sa ilang mga pamilya diha sa gugma ug sa pagkamatarong ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya” (“Ang Pamilya: Usa ka Pamahayag ngadto sa Kalib[o]tan”). Kon walay bana o amahan sa panimalay, ang inahan maoy modumala sa pamilya.

Ang pagdumala sa pamilya mao ang responsibilidad sa pagtabang sa paggiya sa mga sakop sa pamilya sa pagpuyo og balik sa presensya sa Dios. Kini himoon pinaagi sa pagserbisyo ug pagtudlo uban ang kalumo, kaaghop, ug putli nga gugma, magsunod sa ehemplo ni Jesukristo (tan-awa sa Mateo 20:26–28). Ang pagdumala sa pamilya naglakip sa paggiya sa mga sakop sa pamilya sa kanunay nga pag-ampo, pagtuon sa ebanghelyo, ug ubang mga aspeto sa pagsimba. Ang mga ginikanan molihok nga magkahiusa sa pagtuman niini nga mga responsibilidad.

“Ang unang mga kapangakohan sa mga inahan mao ang pag-atiman sa ilang mga anak” (“Ang Pamilya: Usa ka Pamahayag ngadto sa Kalibotan”). Ang pag-atiman nagpasabot sa pag-alima, pagtudlo, ug pagsuporta, magsunod sa ehemplo sa Manluluwas (tan-awa sa 3 Nephi 10:4). Dinuyugan sa iyang bana, ang usa ka inahan magtabang sa iyang pamilya nga makat-on sa mga kamatuoran sa ebanghelyo ug makapalambo og hugot nga pagtuo diha sa Langitnong Amahan ug ni Jesukristo. Silang duha mougmad og kahimtang sa gugma diha sa pamilya.

“Niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban” (“Ang Pamilya: Usa ka Pamahayag ngadto sa Kalib[o]tan”). Sila mainampoong magpakigtambag sa usag usa ug uban sa Ginoo.

papa nga nagtudlo sa pamilya

2.2

Ang Buhat sa Dios sa Kaluwasan ug Kahimayaan diha sa Panimalay

Ang Unang Kapangulohan miingon, “Ang panimalay mao ang basehanan sa usa ka matarung nga kinabuhi” (First Presidency letter, Peb. 11, 1999). Sa ilang mga panimalay, ang mga indibidwal ug mga pamilya moapil diha sa pagtabang nga matuman ang buhat sa Dios sa kaluwasan ug kahimayaan.

Sa pagsuporta sa mga miyembro sa paghimo sa buhat sa Dios sa kaluwasan ug kahimayaan diha sa panimalay, ang mga lider sa Simbahan nag-awhag kanila sa pag-establisar og usa ka panimalay diin anaa ang Espiritu. Sila usab nag-awhag sa mga miyembro sa pagtahod sa adlaw nga Igpapahulay, pagtuon ug pagkat-on sa ebanghelyo diha sa panimalay, ug paghimo og sinemana nga home evening. Ang mga lider mohatag og espesyal nga gibug-aton sa pagsuporta sa mga indibidwal nga kulang sa tabang o awhag gikan sa mga sakop sa pamilya.

2.2.1

Usa ka Panimalay Diin Anaa ang Espiritu

Ang mga miyembro sa Simbahan giawhag sa paghimo sa ilang mga panimalay nga usa ka dapit sa espirituwal nga kalig-on ug kalipay. Sila makadapit sa Espiritu sa Ginoo diha sa ilang mga panimalay pinaagi sa yanong mga paningkamot.

2.2.2

Pagsunod sa Igpapahulay

Ang Dios misugo sa Iyang mga anak nga “hinumdoman mo ang adlaw nga igpapahulay, aron sa pagbalaan niini” (Exodo 20:8). Ang mga miyembro sa Simbahan magpundok sa Igpapahulay aron sa pag-ambit sa sakramento agi og paghinumdom ni Jesukristo ug sa Iyang Pag-ula (tan-awa sa Doktrina ug mga Pakigsaad 59:12). Ang Igpapahulay mao ang adlaw sa pagkat-on ug pagtudlo sa ebanghelyo diha sa simbahan ug sa panimalay. Ang mga miyembro mahimong malig-on sa Igpapahulay samtang sila mohimo sa mga kalihokan sama sa:

• Personal nga pagsimba pinaagi sa pag-ampo ug pagpuasa.

• Pagtuon ug pagkat-on sa ebanghelyo.

• Pagpangalagad ug pagserbisyo sa uban.

• Family history.

• Malipayong panahon sa pamilya.

• Uban pang angay nga mga panagpundok.

2.2.3

Pagtuon ug Pagkat-on sa Ebanghelyo diha sa Panimalay

Ang pagtudlo ug pagkat-on sa ebanghelyo nakasentro sa panimalay ug gisuportahan sa Simbahan. Ang mga lider sa Simbahan nag-awhag sa tanang mga miyembro sa pagtuon sa ebanghelyo diha sa panimalay sa adlaw nga Igpapahulay ug sa tibuok semana. Ang pagtuon sa ebanghelyo diha sa panimalay makapalig-on sa mga indibidwal ug mga pamilya. Makapalig-on kini sa pagkakabig ngadto sa Langitnong Amahan ug ni Ginoong Jesukristo.

Ang pagtuon sa mga kasulatan sumala sa gilatid diha sa Dali, Sunod Kanako—Alang sa mga Indibidwal ug mga Pamilya mao ang gisugyot nga kurso sa pagtuon sa ebanghelyo diha sa panimalay.

Ang mga indibidwal ug mga pamilya magtinguha og inspirasyon samtang sila mopili sa pagtuon sa unsay labing makatubag sa ilang mga panginahanglan. Agi og dugang sa mga tudling sa kasulatan nga gisugyot sa Dali, Sunod Kanako, sila mahimong magmainampoong mokonsiderar sa pagtuon sa:

• Ang Basahon ni Mormon ug ang ubang mga kasulatan.

• Mga mensahe sa kinatibuk-ang komperensiya.

• Mga magasin sa Simbahan ug ubang makapabayaw nga basahon.

2.2.4

Home Evening ug Ubang mga Kalihokan

Ang mga propeta sa ulahing mga adlaw mitambag sa mga miyembro sa Simbahan sa paghimo og sinemana nga home evening. Kini usa ka sagrado nga panahon alang sa mga indibidwal ug mga pamilya nga makat-on sa ebanghelyo, makapalig-on sa mga pagpamatuod, makatukod og panaghiusa, ug malingaw sa usag usa.

Ang home evening mausab-usab sumala sa mga sirkumstansiya sa mga miyembro. Mahimo kining himoon sa Igpapahulay o sa ubang mga adlaw ug panahon. Kini mahimong maglakip sa:

• Pagtuon ug instruksiyon sa ebanghelyo (ang mga materyal sa Dali, Sunod Kanako mahimong gamiton kon gitinguha).

• Pagserbisyo sa uban.

• Pagpanganta ug pagpatukar og mga himno ug mga kanta sa Primary (tan-awa sa kapitulo 19).

• Pagsuporta sa mga sakop sa pamilya sa Kalamboan sa mga Kabataan ug Kabatan-onan.

• Konseho sa pamilya nga maghimo og mga tumong, mosulbad sa mga problema, ug makigsabot sa mga eskedyul.

• Makalingaw nga mga kalihokan.

Ang mga miyembro nga dili minyo ug ang uban mahimong magpundok sa mga grupo nga walay apil sa normal nga mga tulumanon sa pagsimba sa Igpapahulay aron sa pag-apil sa home evening ug paglig-on sa usag usa pinaagi sa pagtuon sa ebanghelyo. Ang Dali, Sunod Kanako mahimong kapanguhaan alang niadtong nagtinguha nga magtuon og dungan.

Sa paghatag og panahon alang sa mga pamilya nga magkauban, ang mga lider kinahanglang mohimo sa Lunes nga mga gabii nga walay mga miting ug mga kalihokan sa Simbahan.

Ang mga lider moawhag sa mga miyembro nga magmakanunayon sa paghimo og home evening ug paggahin og panahon nga magkauban isip mga pamilya (tan-awa sa Doktrina ug mga Pakigsaad 64:33). Kini maglakip sa pagpaambit og mga pagkaon, pagtrabaho ug pagserbisyo og dungan, ug makalingaw nga mga kalihokan.

2.2.5

Pagsuporta sa mga Indibidwal

Ang mga lider sa Simbahan motabang sa mga miyembro nga nagkinahanglan og dugang nga suporta. Ang mga lider motabang niini nga mga miyembro ug sa ilang mga pamilya nga makabaton og mga oportunidad sa pagpakigdait, maayong sosyal nga mga kasinatian, ug espirituwal nga pagtubo. Ang mga lider moawhag ug moabag kanila sa ilang mga paningkamot sa pagkat-on ug pagsunod sa ebanghelyo ni Jesukristo. Ang mga lider mohatag usab nila og mga oportunidad sa pagserbisyo diha sa Simbahan.

magtiayon nga nangatawa

2.3

Ang Relasyon tali sa Panimalay ug sa Simbahan

Ang buhat sa Dios sa kaluwasan ug kahimayaan nakasentro diha sa panimalay ug gisuportahan sa Simbahan. Ang mosunod nga mga baroganan magamit sa relasyon tali sa panimalay ug sa Simbahan.

• Ang mga lider ug mga magtutudlo motahod sa tahas sa mga ginikanan ug motabang kanila. Ang mga lider ug mga magtutudlo moestablisar ug momintenar og epektibong komunikasyon uban sa mga ginikanan.

• Ang pipila ka mga miting sa Simbahan importante kaayo sa matag ward o branch. Kini naglakip sa panagtigom alang sa sakramento ug sa mga miting sa klase ug korum nga gihimo sa Igpapahulay. Daghang mga miting, mga kalihokan, ug mga programa nga dili kaayo importante. Ang mga lider mo-organisar niini sumala sa panginahanglan aron sa pagtabang nga matubag ang mga panginahanglan sa mga indibidwal ug sa mga pamilya. Ang mga lider mohunahuna sa lokal nga mga sirkumstansiya ug mga kapanguhaan.

• Ang mga indibidwal ug mga pamilya mokonsiderar sa ilang mga sirkumstansiya kon maghimo og mga desisyon mahitungod sa pag-apil sa mga programa sa Simbahan nga dili kaayo importante.

• Ang Ginoo mopanalangin sa mga miyembro samtang sila moserbisyo ug mosakripisyo diha sa Iyang Simbahan. Hinoon, ang oras nga ihatag sa pagserbisyo sa Simbahan kinahanglang dili makabalda sa abilidad sa mga miyembro sa pagtuman sa ilang mga responsibilidad sa panimalay, sa trabaho, ug bisan asa. Ang mga lider ug ang mga miyembro kinahanglang dili mabug-atan sa daghan kaayo nga mga responsibilidad sa Simbahan. Ni sila hangyoon sa paghimo og naghinobra nga mga sakripisyo sa pagsuporta sa mga programa ug mga kalihokan sa Simbahan.

Samtang ang mga miyembro mosunod niini nga mga baruganan ug sa mga aghat sa Espiritu, ang Langitnong Amahan mopanalangin sa ilang mga paningkamot.