“19. Musika,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).
“19. Musika,” Kinatibuk-ang Tamdanan nga Basahon.
Imahe
babaye ug bata nga nagpatukar og piano
19.
Musika
19.1
Katuyoan sa Musika diha sa Simbahan
Sa usa ka pagpadayag ngadto ni Propeta Joseph Smith, ang Ginoo miingon, “Ang akong kalag mahimuot sa awit sa kasingkasing; oo, ang awit sa mga matarong mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo” (Doktrina ug mga Pakigsaad 25:12). Siya miingon usab, “Ang mga matarong … moadto sa Zion, mag-awit sa mga awit sa walay kataposan nga hingpit nga kalipay” (Doktrina ug mga Pakigsaad 45:71).
Ang sagrado nga musika mopalambo sa hugot nga pagtuo diha ni Jesukristo. Magdapit kini sa Espiritu ug magtudlo sa doktrina. Magmugna usab kini og usa ka pagbati sa balaang pagtahod, maghiusa sa mga miyembro, ug maghatag og paagi sa pagsimba sa Langitnong Amahan ug ni Jesukristo.
19.2
Musika sa Panimalay
Pinaagi sa Iyang mga propeta, ang Ginoo nag-awhag sa mga indibidwal ug mga pamilya sa paggamit og makapabayaw nga musika diha sa ilang inadlaw nga mga kinabuhi. Ang pagkanta ug pagpaminaw sa sagrado nga musika makadapit og diwa sa katahom ug kalinaw. Makapalambo usab kini sa gugma ug panaghiusa tali sa mga sakop sa pamilya. Ang mga himno makatabang sa mga indibidwal nga makabaton og kaisog ug makasugakod sa mga tintasyon.
Ang mga pagrekord sa musika sa Simbahan anaa sa mosunod nga mga tinubdan:
Ang Simbahan naghatag og mga kapanguhaan aron sa pagtabang sa mga indibidwal ug mga pamilya nga makakat-on og sukaranang mga kahanas sa musika. Kini makita diha sa music.ChurchofJesusChrist.org (tan-awa usab sa 19.6). Ang pagpalambo sa mga kahanas sa musika mopalapad sa mga oportunidad alang sa mga miyembro sa pagserbisyo diha sa panimalay ug sa Simbahan.
19.3
Musika diha sa mga Miting sa Simbahan
Ang sagrado nga musika usa ka importante nga bahin sa panagtigom alang sa sakramento ug sa ubang mga miting sa Simbahan. Kini adunay gahom sa pagdapit sa Espiritu, modala sa mga indibidwal paduol ngadto sa Dios. “Pipila sa talagsaon nga mga sermon gisangyaw pinaagi sa pagkanta og mga himno.” (Tan-awa sa Mga Himno, ix.)
19.3.1
Pagplano og Musika alang sa mga Miting sa Simbahan
Ang mga koordinitor sa musika sa ward ug stake makigtinabangay sa mga lider sa pagkapari sa pagplano sa musika alang sa mga tulumanon sa pagsimba. Sila mopili og musika nga makapalambo sa diwa sa pagsimba diha sa mga miting.
Ang mga himno gamiton alang sa tanang pagpanganta sa kongregasyon diha sa mga tulumanon sa pagsimba. Ang mga himno o ubang sagrado nga mga pinili nga musika mahimong gamiton alang sa prelude ug postlude nga musika, musika sa choir, ug nag-inusara [solo] o gamay nga gupo nga mga pasundayag. Ang tanang musika diha sa mga miting sa Simbahan kinahanglang ipresentar sa diwa sa pagsimba sa Langitnong Amahan ug ni Jesukristo, dili isip usa ka pasundayag aron ipakita ang talento sa musika.
Ang mga pinili nga musika kinahanglang nahiangay sa masimbahon nga diwa sa mga himno. Kinahanglang magtudlo kini sa ebanghelyo uban sa gahom ug kaklaro.
Ang sagrado nga musika nga gisulat o gikanta sa kultural nga paagi managlahi ang mga estilo sa musika mahimong makatabang sa paghiusa sa mga kongregasyon. Ang mga koordinitor sa musika ug ang mga lider sa pagkapari mahimong molakip og lainlaing angay nga mga estilo sa musika nga mapakita ngadto sa mga miyembro sa nagkalainlaing mga gigikanan.
19.3.2
Musika diha sa Panagtigom alang sa Sakramento
Ang mga miyembro magpundok diha sa panagtigom alang sa sakramento aron sa paghinumdom ni Jesukristo pinaagi sa pag-ambit sa sakramento. Sila magpundok aron sa pagpalig-on sa hugot nga pagtuo ug pagpamatuod ug aron sa pagsimba sa Langitnong Amahan ug ni Jesukristo. Ang musika kinahanglang pilion aron makatabang nga makab-ot kini nga mga katuyoan.
Ang musika diha sa panagtigom alang sa sakramento naglakip sa pagpanganta sa kongregasyon sa mga himno sa pagbukas ug pagtapos sa miting ug sa dili pa ipahigayon ang sakramento. Ang mga himno sa kongregasyon maghatag og oportunidad alang sa mga miyembro nga mahiusa kon sila aktibo nga moapil sa dungan nga pagsimba. Kana nga himno sa sakramento kinahanglan nga nagpasabot sa sakramento mismo o sa sakripisyo sa Manluluwas. Alang sa dugang nga impormasyon, tan-awa sa “Mga Himno alang sa mga Kongregasyon,” Mga Himno, 248–49.
Ang prelude nga musika ipatukar samtang ang mga miyembro magpundok sa dili pa ang miting. Ang katuyoan niini mao ang pagmugna og usa ka kahimtang sa pagsimba nga nagdapit sa Espiritu. Human sa panapos nga pag-ampo, usa ka instrumental nga postlude ipatukar samtang ang mga miyembro mobiya sa miting. Ang mga himno ug ubang sagrado nga musika mahimong pilion alang sa prelude ug postlude nga musika.
Ang panagtigom alang sa sakramento mahimong maglakip usab og dugang nga himno sa kongregasyon nga kantahon diha sa tunga-tunga sa miting—pananglitan, taliwala sa pagpamulong sa mga mensahe. O mahimong maglakip kini og usa o daghan pang pinili nga musika. Mahimo kining ipresentar sa mga choir (tan-awa sa 19.3.7), vocal o instrumental nga mga solowista, o sa gamay nga mga grupo. Ang mga panagtigom alang sa sakramento kinahanglan nga dili ipadumala sa mga grupo sa musika sa gawas.
Ang piano, organ, o laing instrumento nga giaprobahan sa bishopric mahimong gamiton sa pagduyog sa pagpanganta sa himno diha sa panagtigom alang sa sakramento (tan-awa sa 19.3.6).
Ang mga koordinitor sa musika ug ang mga bishopric maningkamot sa pagbalanse tali sa pamilyar ug dili kaayo pamilyar nga mga himno. Ang mga pinili nga musika nga ipresentar sa choir sa ward o sa uban makatabang sa mga miyembro nga mahimong mas pamilyar ang mga himno nga wala kaayo mahibaloi.
19.3.3
Musika diha sa mga Klase ug Ubang mga Miting sa Ward
Ang pagpanganta og himno mahimong epektibo nga paagi sa pagtudlo o pagpalig-on sa mga baroganan sa ebanghelyo. Ang mga lider kinahanglang moawhag sa mga magtutudlo sa paggamit sa mga himno ug ubang sagrado nga musika aron sa pagpalambo sa ilang pagtudlo.
Ang Dominggo nga mga miting sa korum ug mga klase sa kasagaran dili magsugod og pangbukas nga himno.
19.3.4
Musika diha sa Komperensiya sa Stake
Ang musika alang sa komperensiya sa stake kinahanglan nga planohon aron sa pagpalig-on sa hugot nga pagtuo ug pagpamatuod. Kinahanglang nagsunod kini sa mga baroganan diha sa 19.3.1. Ang tigdumalang awtoridad morebyo sa tanan nga gisugyot nga mga pinili nga musika alang sa komperensiya sa sayo pa sa panahon sa pagplano.
Ang musika alang sa komperensiya sa stake kasagaran maglakip sa pagpanganta sa kongregasyon sa himno ug ubang pinili nga mga musika gikan sa choir, mga solowista, o gamay nga mga grupo. Ang kongregasyon kasagaran manganta sa himno sa tunga-tunga nga bahin sa miting. Ang kapangulohan sa stake mahimong moaprobar sa solo ug iduyog nga mga instrumento gawas sa piano o organ (tan-awa sa 19.3.6).
19.3.5
Ubang Musika diha sa Chapel
Ang chapel mahimong gamiton panagsa alang sa mga kalihokan sa mga kultural art nga maglakip sa sekular nga musika, sama sa mga konsiyerto, mga recital, ug ubang mga pasundayag. Kon ang pagpakpak dili pwede diha sa mga tulumanon sa pagsimba, pwede kini niini nga mga kalihokan.
Ang lokal nga mga lider sa pagkapari motubag sa mga pangutana mahitungod sa kultural nga mga kalihokan nga ipahigayon diha sa chapel. Tan-awa sa 35.5 alang sa impormasyon mahitungod sa tukma nga paggamit sa mga meetinghouse.
19.3.6
Mga Instrumento sa Musika
Ang live nga mga instrumento maoy kasagaran nga gigamit sa pagduyog alang sa prelude ug postlude nga musika ug alang sa himno diha sa mga miting sa Simbahan. Kon aduna ug kon ang mga miyembro makapatukar niini, ang mga organ ug mga piano maoy sumbanan nga mga instrumento. Ang mga bishopric mahimong moaprobar sa paggamit sa ubang mga instrumento nga iduyog sa pagpanganta sa kongregasyon, alang sa prelude ug postlude nga musika, ug ubang mga pinili nga musika.
Ang mga instrumento sa musika kinahanglang makapadangat og usa ka pagbati sa pagsimba ug ipatukar sa paagi nga mapabilin ang diwa sa miting.
Kon walay piano, organ, o tigduyog, ang mga girekord mahimong gamiton (tan-awa sa 19.2).
19.3.6.1
Pag-angkon og mga Instrumento sa Musika
Ang mga gambalay sa Simbahan sa kasagaran adunay organ, mga piano, o elektronik nga mga keyboard. Ang mga lider mahimong mokontak sa lokal nga manedyer sa mga pasilidad alang sa impormasyon mahitungod sa pag-angkon og bag-o o puli nga mga instrumento.
19.3.6.2
Pagmentinar sa mga Instrumento sa Musika
Ang mga piano ipaangay ug ang mga organ ipamentinar kanunay. Ang bishop o ang representante sa gambalay sa stake [stake building representative] mahimong mokontak sa manedyer sa mga pasilidad uban sa mga pangutana. Kon gikinahanglan, siya usab mahimong mosumiter og usa ka hangyo diha sa Facility Issue Reporting (FIR) sa pagmentinar ug pag-ayo sa mga piano ug mga organ (tan-awa sa 35.4.2).
19.3.7
Mga Choir
Sukad pa sa mga panahon sa Daang Tugon, ang mga anak sa Dios nanganta diha sa mga choir aron sa paghalad og pagdayeg ngadto Kaniya. Ang mga choir sa Simbahan nagdala og himaya ngadto sa Dios, naghiusa ug naghatag og kaayohan sa mga miyembro sa Simbahan, ug nagdala og kalipay ngadto sa mga partisipante ug sa mga kongregasyon.
Kon adunay igong mga miyembro, ang mga ward mahimong mag-organisar og mga choir nga regular nga mokanta sa panagtigom alang sa sakramento. Ang bishopric mahimong motawag og usa ka direktor sa choir ug tigduyog sa choir (tan-awa sa 19.4.3.3).
Ang mga miyembro sa ward mahimong moboluntaryo sa pagkanta diha sa choir. Ang mga miyembro ug ang uban mahimo usab nga dapiton sa pag-apil. Ang mga awdisyon dili ipahigayon.
Ang mga choir giawhag sa paggamit sa mga himno sa Simbahan. Ang pagkanta sa mga himno makadapit sa Espiritu ug makatabang sa mga partisipante sa choir ug sa mga kongregasyon nga makat-on sa ebanghelyo (tan-awa sa Mga Himno, 249–51). Kon ang ubang sagrado nga pinili nga musika maoy gamiton, ang mga lagda diha sa 19.3.1 kinahanglang sundon.
Ang mga pagpraktis sa choir kasagaran dili mosobra sa usa ka oras.
Kon ang choir sa ward magkinahanglan og piyesa sa musika, mahimo kining paliton gamit ang pundo sa badyet sa ward (tan-awa sa 19.7.1). Ang mga choir sa ward giawhag sa pagpaambit sa pinalit nga musika ngadto sa ubang choir diha sa stake. Ang pagpakopya sa piyesa sa musika nga walay pagtugot gikan sa tag-iya sa katungod sa pag-imprinta sa sinulat [copyright] nahisupak sa palisiya sa Simbahan (tan-awa sa 38.8.11).
Agi og dugang sa choir sa ward, ang mga pamilya ug mga grupo sa kababayen-an, kalalakin-an, kabatan-onan, o kabataan mahimong dapiton sa pagkanta diha sa mga miting sa Simbahan.
Uban sa pagtugot sa mga lider sa stake o sa area, ang mga choir sa stake ug sa multistake mahimong i-organisar alang sa mga komperensiya sa stake ug sa ubang mga okasyon, sama sa mga kalihokan sa komunidad. Human sa miting o kalihokan, ang choir dili na magpadayon hangtod moabot ang laing mga okasyon.
19.4
Pagpangulo sa Musika diha sa Ward
19.4.1
Bishopric
Ang bishop maoy responsable alang sa musika sa ward. Siya mahimong mosangon niini nga responsibilidad ngadto sa usa sa iyang mga magtatambag. Ang mga bishopric aduna sa mosunod nga mga responsibilidad:
Motawag ug mo-set apart og mga miyembro nga moserbisyo sa mga calling sa musika nga gihulagway diha sa 19.4.2 ug 19.4.3 kon gikinahanglan.
Makigtinabangay sa koordinitor sa musika sa ward sa pagplano og musika sa mga panagtigom alang sa sakramento (tan-awa sa 19.3.1).
Motudlo mahitungod sa kaimportante sa pagsimba pinaagi sa musika diha sa mga miting. Moawhag sa mga miyembro sa pag-apil sa pagpanganta sa kongregasyon. Moawhag sa mga miyembro, labi na sa kabatan-onan, sa paggamit sa makabayaw nga musika matag adlaw diha sa ilang personal nga mga kinabuhi (tan-awa sa 19.2).
Modesisyon kon kanus-a mahimong gamiton ang mga instrumento gawas sa mga piano o mga organ diha sa mga miting sa Simbahan (tan-awa sa 19.3.6).
Mosuporta sa choir sa ward pinaagi sa pag-awhag sa mga miyembro nga moapil.
19.4.2
Koordinitor sa Musika sa Ward
Ang koordinitor sa musika sa ward moserbisyo ubos sa direksyon sa bishopric. Siya aduna sa mosunod nga mga responsibilidad:
Mahimong usa ka kapanguhaan sa bishopric ug ubang mga lider sa ward bahin sa mga butang nga may kalabotan sa musika. Motambong sa miting sa konseho sa ward kon dapiton sa bishop aron motabang sa pagkoordinar sa musika diha sa ward.
Makigtinabangay sa bishopric sa pagplano og musika sa panagtigom alang sa sakramento (tan-awa sa 19.3.1 ug 19.3.2).
Morekomendar ug modumala sa pagbansay sa musika diha sa ward, kon gikinahanglan (tan-awa sa 19.6). Motabang sa mga miyembro sa pagpangita og mga oportunidad sa pagpalambo ug paggamit sa ilang mga talento sa musika diha sa ward.
Kon hangyoon sa bishopric, morekomendar og mga miyembro nga moserbisyo diha sa mga calling sa musika sa ward. Motudlo niadtong nagserbisyo niini nga mga calling, motanyag og suporta, instruksiyon, ug pagbansay kon gikinahanglan.
Moserbisyo diha sa ubang mga calling sa musika sa ward kon wala pay natawag.
Mokunsulta sa koordinitor sa musika sa stake alang sa pagbansay ug suporta kon gikinahanglan.
Diha sa mga ward nga igo ang gidaghanon, ang bishopric mahimong motawag og mga miyembro aron moserbisyo sa mosunod nga mga calling. Ang kabatan-onan ug kadtong anaa sa laing tinuohan mahimong tawagon sa pagserbisyo. Ang mga bishopric mahimong mopahiangay niini nga mga calling kon gikinahanglan aron matubag ang mga panginahanglan sa ilang ward.
19.4.3.1
Lider sa Musika sa Ward
Ang lider sa musika mopahigayon sa mga himno sa kongregasyon sa mga panagtigom alang sa sakramento ug alang sa ubang mga miting sa ward kon gihangyo.
19.4.3.2
Tigduyog sa Ward
Ang tigduyog sa ward mohatag sa prelude ug postlude nga musika ug moduyog sa mga himno atol sa panagtigom alang sa sakramento ug sa ubang mga miting sa ward kon gihangyo. Kon gikinahanglan, ang tigduyog mahimo usab nga moduyog sa choir o moserbisyo isip piyanista sa Primary.
Kon walay makapatukar sa piano o sa organ, ang mosunod nga mga opsiyon anaa:
Ang miyembro mahimong motukar og puli nga instrumento nga giaprobahan sa bishop (tan-awa sa 19.3.6).
Ang digital nga mga piano ug mga organ nga motukar og giprograma nang daan nga mga pagduyog sa himno anaa na sa pipila ka meetinghouse (tan-awa sa 19.3.6.1).
Ang mga miyembro mahimong mogamit og mga girekord gikan sa mosunod nga mga tinubdan:
Ang direktor sa choir sa ward morekomendar og musika nga kantahon sa choir, mogiya sa mga pagpraktis sa choir, ug modumala sa choir diha sa mga panagtigom alang sa sakramento (tan-awa sa 19.3.7).
Ang tigduyog sa choir sa ward maoy motukar alang sa mga pagpraktis sa choir ug kon ang choir mokanta diha sa mga panagtigom alang sa sakramento.
Alang sa dugang nga impormasyon mahitungod sa pagdumala og mga choir, tan-awa sa Conducting Course nga manwal, mga pahina 73–83.
Ang bishopric mahimong motawag og mga espesyalista aron motabang sa pagbansay sa musika diha sa ward (tan-awa sa 19.6).
19.5
Pagpangulo sa Musika diha sa Stake
19.5.1
Kapangulohan sa Stake
Ang presidente sa stake modumala sa musika sa stake. Siya mahimong mosangon sa mosunod nga mga responsibilidad ngadto sa usa sa iyang mga magtatambag o sa usa ka sakop sa high council:
Motawag ug mo-set apart og mga miyembro nga moserbisyo sa mga calling sa musika nga gihulagway diha sa 19.5.2 ug 19.5.3 kon gikinahanglan.
Mokunsulta sa koordinitor sa musika sa ward sa pagplano og musika alang sa komperensiya sa stake ug ubang mga kalihokan sa stake (tan-awa sa 19.3.1, 19.3.4, ug 19.3.7.2).
Motudlo mahitungod sa kaimportante sa pagsimba pinaagi sa musika diha sa mga miting. Moawhag sa mga miyembro sa pag-apil sa pagpanganta sa kongregasyon. Moawhag sa mga miyembro sa paggamit sa makabayaw nga musika matag adlaw diha sa ilang personal nga mga kinabuhi (tan-awa sa 19.2).
Modesisyon kon kanus-a mahimong gamiton ang mga instrumento gawas sa mga piano o mga organ diha sa mga miting sa stake (tan-awa sa 19.3.6).
19.5.2
Koordinitor sa Musika sa Stake
Ubos sa direksyon sa kapangulohan sa stake, ang koordinitor sa musika sa stake aduna sa mosunod nga mga responsibilidad:
Moserbisyo isip usa ka kapanguhaan sa kapangulohan sa stake ug ubang mga lider sa stake bahin sa mga butang nga may kalabotan sa musika.
Mokunsulta sa kapangulohan sa stake sa pagplano og musika alang sa komperensiya sa stake ug ubang mga kalihokan sa stake (tan-awa sa 19.3.1, 19.3.4, ug 19.3.7.2).
Morekomendar ug modumala sa pagbansay sa musika diha sa stake (tan-awa sa 19.6).
Kon gihangyo sa kapangulohan sa stake, morekomendar og mga miyembro nga hatagan og mga calling sa musika sa stake. Motudlo niadtong nagserbisyo niini nga mga calling. Motanyag og suporta, instruksiyon, ug pagbansay kon gikinahanglan.
Mohatag og pagbansay ug suporta alang sa mga koordinitor sa musika sa ward kon gikinahanglan.
Moserbisyo isip lider sa musika ug direktor sa choir diha sa mga miting sa stake kon wala pay natawag.
Ang mga espesyalista sa musika sa stake mahimong tawagon kon gikinahanglan. Mahimo kining maglakip sa usa ka direktor sa choir sa stake, lider sa musika sa stake, ug tigduyog sa stake. Ang mga espesyalista sa musika sa stake mahimo usab nga sangonan aron mohatag og pagbansay sa musika (tan-awa sa 19.6).
19.6
Mga Pagbansay sa Musika ug mga Kapanguhaan
Ang pagkat-on sa sukaranang mga kahanas sa musika nag-andam sa mga miyembro sa paggamit sa ilang mga talento sa pagserbisyo diha sa Simbahan. Ang mosunod nga mga kapanguhaan makatabang niadtong adunay mga calling sa musika. Makatabang usab kini sa tanang miyembro nga interesado sa pagpalambo sa mga abilidad sa musika.
Ang mga materyal sa sukaranang pagbansay sa musika anaa diha sa “Ang Paggamit sa Hymnbook” nga seksiyon diha sa Mga Himno ug sa “Paggamit sa Songbook” nga seksiyon diha sa Songbook sa mga Bata.
Ang mosunod nga mga kapanguhaan mahimong mapuslanon usab:
Usa ka librarya sa mga piyesa sa musika ug mga pagrekord sa musika nga gamiton diha sa panimalay ug sa simbahan anaa sa Sacred Music nga app ug sa online diha sa music.ChurchofJesusChrist.org. Ang pagpaminaw sa mga girekord makatabang sa mga miyembro nga mahimong mas pamilyar sa mga himno.
Ang interactive music player diha sa ChurchofJesusChrist.org makatabang niadtong nagtinguha nga makat-on og bag-ong musika o mapalambo ang mga kahanas sa musika.
Ang Labing Yano nga Pagtuon sa Musika [Basic Music Course] makatabang sa mga miyembro kon unsaon pagbasa ug pagtugtog sa musika. Naglakip kini sa Conducting Course Kit ug Keyboard Course Kit. Kini nga mga kapanguhaan mahimong mapalit diha sa store.ChurchofJesusChrist.org.
Ang Music Education Fund giestablisar sa punoang buhatan sa Simbahan aron sa pagsangkap og mga keyboard, mga materyal sa pagbansay, ug mga instruksiyon alang sa mga miyembro nga nagtinguha sa pagpalambo sa mga kahanas sa musika. Alang sa impormasyon mahitungod niini nga pundo, tan-awa sa musicfund.ChurchofJesusChrist.org.
Ang mga koordinitor sa musika sa stake ug sa ward mahimong mag-organisar og mga kurso sa sukaranang pagbansay sa musika alang sa mga lider sa musika, mga direktor sa choir, o mga tigduyog. Ang mga partisipante mahimong maglakip niadtong sa kasamtangan nagserbisyo diha sa mga calling sa musika ug ubang interesado nga mga hamtong, kabatan-onan, ug kabataan. Ang mga koordinitor o mga espesyalista sa musika mahimong motudlo sa mga kurso. Ang mga koordinitor sa musika mahimo usab nga morekomendar og kwalipikado nga mga magtutudlo nga makahatag sa pagbansay.
Kon adunay igong mga miyembro, ang mga koordinitor sa musika mahimong mokunsulta sa mga lider sa pagkapari ug morekomendar nga mag-organisar og mga workshop sa pagbansay sa stake o multistake. Walay bayad ang gipasiugdahan sa Simbahan nga pagbansay.
19.7
Dugang nga mga Palisiya ug mga Lagda
19.7.1
Pag-angkon ug Paggamit sa Musika
Ang suplay sa mga hymnbook isangkap sa bag-ong mga meetinghouse. Ang dugang nga mga hymnbook, musika sa choir, ug ubang musika mahimong mapalit gamit ang mga pundo sa badyet sa stake o sa ward.
19.7.2
Paggamit sa mga Instrumento sa Meetinghouse alang sa Pagpraktis, Pribado nga Instruksiyon, ug mga Recital
Kon walay laing resonable nga alternatibo, ang mga lider sa pagkapari mahimong motugot nga gamiton ang mga piano ug mga organ sa meetinghouse sa pagpraktis, binayran nga pribado nga panudlo, ug mga recital nga naglakip sa mga miyembro sa yunit nga naggamit sa meetinghouse. Kini nga pagtugot mao ang eksepsiyon nga gihulagway diha sa 35.5.6.1. Walay bayad nga paninglon alang sa mga recital.
19.7.3
Mga Choir sa Komunidad
Ang taas og termino nga mga choir sa komunidad nga gidumala ug giapilan sa kadaghanan sa mga miyembro sa Simbahan wala pasiugdahi sa Simbahan. Kini nga choir dili gayod mogamit sa ngalan sa Simbahan diha sa ilang mga ngalan.
Kon ang kapangulohan sa stake moaprobar, ang mga choir sa komunidad mogamit sa mga gambahay sa Simbahan alang sa mga pagpraktis ug mga pasundayag. Sila kinahanglan nga mosunod sa mga sumbanan ug mga palisiya nga may kalabotan sa mga meetinghouse (tan-awa sa 35.5).