« 10. Te mau pupu o te Autahu’ara’a a Aarona », Buka arata’i rahi : Tāvini i roto i te ’Ēkālesia a Iesu Mesia i te Feiā Mo’a i te mau Mahana Hope’a nei (2020).
« 10. Te mau pupu o te Autahu’ara’a a Aarona », Buka arata’i rahi.
10.
Te mau pupu o te Autahu’ara’a a Aarona
10.1
Te fā ’e te fa’anahonahora’a
E tauturu te Autahu’ara’a a Aarona i te mau tamari’i a te Atua ’ia fa’aineine nō te ho’i i mua i tōna ’aro. Tē mau nei te reira « i te mau tāviri nō te utuutura’a a te mau melahi, ’e nō te ’evanelia nō te tātarahapa, ’e nō te bāpetizo » (Te Ha’api’ira’a Tumu ’e te mau Fafaura’a 13 ; hi’o ato’a 3.3.2 i roto i teie buka arata’i).
10.1.1
Te fā
E tauturu te mau pupu o te Autahu’ara’a a Aarona i te feiā ’āpī tamāroa ’ia rave ’e ’ia ha’apa’o i te mau fafaura’a mo’a, ’e ’ia fa’ahōhonu i tō rātou fa’afāriura’a ia Iesu Mesia ’e i tāna ’evanelia.
Hō’ē pupu autahu’ara’a o te hō’ē ïa pupu fa’anahonahohia o te mau taea’e tei mau i te autahu’ara’a. Te fā o te hō’ē pupu autahu’ara’a o te tauturura’a ïa i te mau ta’ata tei mau i te autahu’ara’a ’ia ’ohipa ’āmui nō te fa’aoti i te ’ohipa o te fa’aorara’a ’e o te fa’ateiteira’a. I roto i tā rātou mau pupu, e tāvini te mau taea’e tei mau i te Autahu’ara’a a Aarona i te tahi atu mau ta’ata, e fa’aoti i te mau ’ohipa a te autahu’ara’a, e patu i te tāhō’ēra’a, e ha’api’i mai ’e e ora i te ha’api’ira’a tumu.
10.1.2
Te parau tai’o a te pupu Autahu’ara’a a Aarona
E nehenehe te parau tai’o a te pupu o te Autahu’ara’a a Aarona e tauturu i te feiā ’āpī tamāroa tāta’itahi ’ia māramarama i tōna ti’ara’a hanahana, ’e tāna fā ’ei ta’ata tei mau i te autahu’ara’a. E tai’o te feiā ’āpī tamāroa ’e tō rātou feiā fa’atere i te parau tai’o i te ’ōmuara’a o te mau putuputura’a a te pupu, ’e i te tahi atu mau putuputura’a a te pupu. Teie te parau tai’o :
« E tamaiti here au nā te Atua, ’e e ’ohipa tāna nā’u.
« Ma tō’u ’ā’au ato’a ’e te itoito ’e te mana’o ’e te pūai, e here au i te Atua, e ha’apa’o vau i tā’u mau fafaura’a, ’e e fa’a’ohipa vau i tāna autahu’ara’a nō te tāvini ia vetahi ’ē, ma te ha’amata i roto i tō’u iho ’utuāfare.
« ’A tūtava ai au i te tāvini, i te fa’a’ohipa i te fa’aro’o, i te tātarahapa ’e i te ha’amaita’i atu ā iā’u i te mahana tāta’itahi, e ineine ïa vau nō te fāri’i i te mau ha’amaita’ira’a nō te hiero ’e te ’oa’oa mure ’ore o te ’evanelia.
« E fa’aineine au nō te riro ’ei misiōnare itoito mau, ’ei tāne fa’aipoipo ha’apa’o mau ’e ’ei metua tāne here ho’i, nā roto i te rirora’a ’ei pipi mau nā Iesu Mesia.
« E tauturu vau ’ia fa’aineine i te ao nei nō te ho’ira’a mai ’o te Fa’aora, nā roto i te anira’a i te mau ta’ata ato’a ’ia haere mai i te Mesia ’e ’ia fāri’i i te mau ha’amaita’ira’a o tōna tāra’ehara ».
10.1.3
Te mau pupu autahu’ara’a
E fa’anaho te ’episekōpo i te feiā e mau nei i te Autahu’ara’a a Aarona i roto i te mau pupu autahu’ara’a mai tei fa’a’itehia i raro nei. (Hi’o ato’a Te Ha’api’ira’a Tumu ’e te mau Fafaura’a 107:85–88.)
10.1.3.1
Te pupu o te mau diakono
E tomo te feiā ’āpī tamāroa i roto i te pupu o te mau diakono i te ’āva’e Tēnuare o te matahiti e ti’a ai tō rātou matahiti i te 12. I teie taime, e ti’a ato’a ia rātou ’ia fa’atōro’ahia ’ei diakono mai te mea ē, ’ua fa’aineinehia rātou ’e ’ua ti’amā.
E tāvini hō’ē melo diakono fa’atōro’ahia o te pupu ’ei peresideni nō te pupu. Mai te mea e nehenehe, e tāvini hō’ē ’aore rā, e piti tauturu ’e hō’ē pāpa’i parau i pīha’i iho iāna. E mau diakono ato’a nā tauturu ’e te pāpa’i parau.
’Ua fa’ata’ahia te mau ’ohipa a te hō’ē diakono i roto i Te Ha’api’ira’a Tumu ’e te mau Fafaura’a 20:57–59 ; 84:111. Te tahi atu mau ’ohipa, te ’ōperera’a i te ’ōro’a mo’a ’e te tāuturura’a i te ’episekōpo « nō te ha’apa’ora’a ïa i te mau mea tāhuti nei » (Te Ha’api’ira’a Tumu ’e te mau Fafaura’a 107:68).
10.1.3.2
Te pupu o te mau ha’api’i
E tomo te feiā ’āpī tamāroa i roto i te pupu o te mau ha’api’i i te ’āva’e Tēnuare o te matahiti e ti’a ai tō rātou matahiti i te 14. I teie taime, e ti’a ato’a ia rātou ’ia fa’atōro’ahia ’ei mau ha’api’i mai te mea ē, ’ua fa’aineinehia rātou ’e ’ua ti’amā.
E tāvini hō’ē melo ha’api’i fa’atōro’ahia o te pupu ’ei peresideni nō te pupu. Mai te mea e nehenehe, e tāvini hō’ē ’aore rā, e piti tauturu ’e hō’ē pāpa’i parau i pīha’i iho iāna. ’Ei mau ha’api’i ato’a te mau tauturu ’e te pāpa’i parau.
Hō’ē ā ’ohipa tā te mau ha’api’i ’e tā te mau diakono. E fa’aineine ato’a rātou i te ’ōro’a mo’a ’e e tāvini ’ei mau taea’e aupuru. ’Ua fa’ata’ahia te tahi atu mau ’ohipa i roto i Te Ha’api’ira’a Tumu ’e te mau Fafaura’a 20:53–59 ; 84:111.
10.1.3.3
Te pupu o te mau tahu’a
E tomo te feiā ’āpī tamāroa i roto i te pupu o te mau tahu’a i te ’āva’e Tēnuare o te matahiti e ti’a ai tō rātou matahiti i te 16. I teie taime, e ti’a ato’a ia rātou ’ia fa’atōro’ahia ’ei mau tahu’a mai te mea ’ua fa’aineinehia rātou ’e ’ua ti’amā.
’O te ’episekōpo te peresideni nō te pupu o te mau tahu’a (hi’o Te Ha’api’ira’a Tumu ’e te mau Fafaura’a 107:87–88). E pi’i ’oia hō’ē ’aore rā, e piti melo o te pupu ’ia riro ’ei rima tauturu nōna. E nehenehe ato’a e pi’i i te hō’ē pāpa’i parau. E fa’atōro’ahia nā rima tauturu ’e te pāpa’i parau ’ei tahu’a.
Hō’ē ā ’ohipa tā te mau tahu’a ’e tā te mau diakono ’e tā te mau ha’api’i. ’Ua fa’ata’ahia te tahi atu mau ’ohipa i roto i Te Ha’api’ira’a Tumu ’e te mau Fafaura’a 20:46–52, 73–79.
10.1.4
Te mau tāviri o te Autahu’ara’a
E fa’aterehia te pupu tāta’itahi e te hō’ē peresideni tei mau i te mau tāviri o te autahu’ara’a. E mau te peresideni o te pupu diakono, te peresideni o te pupu ha’api’i ’e te ’episekōpo, i te mau tāviri o te autahu’ara’a. Nō te tahi atu mau ha’amāramaramara’a nō ni’a i teie mau tāviri, hi’o 3.4.1.
10.1.5
Te fa’atanora’a i te mau pupu i te mau hina’aro nō te fenua iho
I roto i te hō’ē pāroita ’e ’aore rā hō’ē ’āma’a, e mea iti te feiā ’āpī tamāroa, e nehenehe te mau pupu nō te Autahu’ara’a a Aarona e ’āmui hō’ē nō te mau ha’api’ira’a ’e nō te mau fa’a’oa’oara’a.
Mai te mea i roto i te hō’ē pāroita ’ua hau te rahira’a diakono i te 12, e nehenehe te ’episekōpo e vāhi i te pupu o te mau diakono. E au ato’a te reira nō te mau ha’api’i, mai te mea ’ua hau rātou i te 24 (hi’o Te Ha’api’ira’a Tumu ’e te mau Fafaura’a 107:85–86). ’Ia rave-ana’e-hia teie fa’aotira’a, e feruri te ’episekōpo i te mea tā te reira e fa’atupu i ni’a i te mau melo o te pupu.
10.2
Te ’āmuira’a i roto i te ’ohipa nō te fa’aorara’a ’e te fa’ateiteira’a
Tē ani mai nei te Atua i te mau ta’ata ato’a ’ia haere mai i te Mesia ’e ’ia tauturu i roto i tāna ’ohipa nā roto i :
-
Te orara’a i te ’evanelia a Iesu Mesia.
-
Te ha’apa’ora’a i te feiā tei hina’aro i te tauturu.
-
Te anira’a i te mau ta’ata ato’a ’ia fāri’i i te ’evanelia.
-
Te tāhō’ēra’a i te mau ’utuāfare nō te tau a muri atu.
E putuputu te ’episekōpora’a ’e te feiā ’āpī fa’atere pupu autahu’ara’a, pāturuhia e tō rātou mau tauturu ha’amāramarama (hi’o 10.5), nō te ’āparau nō ni’a e nāhea i te fa’atupura’a i teie ’ohipa. Nō te mau ha’amāramaramara’a hau atu nō ni’a i te ’Ohipa o te Fa’aorara’a ’e te Fa’ateiteira’a, ’a tuatāpapa i te pene 1.
10.2.1
Te orara’a i te ’evanelia a Iesu Mesia
10.2.1.1
Te mau ’ohipa a te mau metua ’e te feiā fa’atere
E hōpoi’a nā te mau metua ’ia ha’api’i i tā rātou mau tamari’i i te ’evanelia ’e i te tauturu ia rātou ’ia ora i te reira (hi’o Te Ha’api’ira’a Tumu ’e te mau Fafaura’a 68:25–28). E pāturu te ’episekōpora’a ’e te feiā ’āpī fa’atere pupu, ma te tauturu a te mau tauturu ha’amāramarama, i te mau metua i roto i teie hōpoi’a mai teie i muri nei :
-
E fa’aitoito i te ’āparaura’a i rotopū i te feiā ’āpī tamāroa ’e tō rātou ’utuāfare.
-
E ha’apāpū ē, tē pāturu nei ’e tē ha’amaita’i nei te mau ’ātivite a te feiā ’āpī i te mau ’utuāfare.
-
E tauturu i te mau metua ’ia fa’aineine i tā rātou mau tamaiti nō te mau fa’atōro’ara’a autahu’ara’a ’e nō te fāri’i i te Autahu’ara’a a Melehizedeka.
-
E tauturu i te mau metua ’ia fa’aineine i tā rātou mau tamaiti nō te ’ōro’a hiero, nō te ’ohipa misiōnare rave tāmau, nō te fa’aipoipora’a hiero, ’e nō te ti’ara’a metua tāne.
E ti’a i te feiā fa’atere e ara i ni’a i te feiā ’āpī ’aita te ’utuāfare e pāturu nei ia rātou nō te ora i te ’evanelia.
E tūtava te mau metua ’e te feiā fa’atere ’ia riro rātou ’ei mau hi’ora’a maita’i nō te feiā ’āpī. E fa’aa’o rātou i te feiā ’āpī i roto i tā rātou mau tauto’ora’a ’ia riro hau atu mai ia Iesu Mesia te huru. E nehenehe te fa’anahora’a a te mau tamari’i ’e a te feiā ’āpī e tauturu i roto i teie mau tauto’ora’a (hi’o ChildrenandYouth.ChurchofJesusChrist.org).
10.2.1.2
Te ha’api’ira’a mai i te ’evanelia
E fa’aitoito te ’episekōpora’a, te feiā fa’atere pupu feiā ’āpī, ’e te mau tauturu ha’amāramarama, i te feiā ’āpī tamāroa ’e i tō rātou ’utuāfare ’ia ha’api’i mai i te ’evanelia i te fare. E tuatāpapa te feiā fa’atere ’e te mau tauturu ha’amāramarama i te ’evanelia ’e e fa’a’ite atu i te feiā ’āpī tamāroa i te mea tā rātou i ’apo mai. E ani rātou i te mau melo o te pupu ’ia fa’a’ite i te ’ēkālesia i te mea tā rātou i ha’api’i mai i te fare.
E putuputu te mau pupu Autahu’ara’a a Aarona i te sābati nō te ha’apūai i te fa’aro’o, nō te patu i te hō’ēra’a, nō te ha’apūai i te mau ’utuāfare ’e te mau nohora’a, ’e nō te rave i te mau fa’anahora’a nō te fa’atupu i te ’ohipa nō te fa’aorara’a ’e te fa’ateiteira’a. E fa’anaho te ’episekōpora’a ’e te feiā ’āpī fa’atere pupu, pāturuhia e te mau tauturu ha’amāramarama, i te mau putuputura’a o te sābati.
E fa’atupuhia te mau rurura’a pupu i te piti ’e i te maha o te sābati o te ’āva’e. E 50 minuti noa. Nā te hō’ē melo o te peresidenira’a pupu (’aore rā, hō’ē o o nā rima tauturu o te ’episekōpo i roto i te pupu tahu’a) e arata’i. E arata’i ’oia i te pupu nā roto i te tai’ora’a i te parau tai’o ’e te ’āparau-’āmui-ra’a i ni’a i te mau fa’auera’a ’ohipa, te mau hōpoi’a, ’e te tahi mau ’ohipa ’ē atu.
I muri iho, e fa’atere te hō’ē melo o te pupu ’aore rā, hō’ē ta’ata pa’ari, i te ha’api’ira’a ’evanelia. E paraparau te feiā fa’atere pupu ’e te mau tauturu ha’amāramarama nō te fa’aoti e nā vai e ha’api’i. E ’itehia te mau arata’ira’a o te putuputura’a i roto i te Mai, pe’e mai—nō te mau pupu Autahu’ara’a a Aarona ’e te mau piha ha’api’ira’a a te Feiā ’Āpī Tamāhine (hi’o ComeFollowMe.ChurchofJesusChrist.org).
Te ti’ara’a mau, e putuputu fa’ata’a ’ē te pupu Autahu’ara’a a Aarona tāta’itahi (hi’o 10.1.5). E nehenehe te feiā ’āpī tamāroa ’e te feiā ’āpī tamāhine e ’āmui i te tahi taime nō te hō’ē ha’api’ira’a i te sābati, mai tei fa’aauhia e te ’episekōpora’a ’e te peresidenira’a Feiā ’Āpī Tamāhine.
E fa’aitoitohia te feiā ’āpī tamāroa ’ia haere i te ha’api’ira’a séminaire (hi’o 15.1).
10.2.1.3
Te tāvinira’a ’e te mau ’ātivite
Nā te ’episekōpora’a ’e te feiā fa’atere pupu feiā ’āpī, pāturuhia ’e te mau tauturu ha’amāramarama, e fa’anaho i te tāvinira’a ’e te mau ’ātivite. E tauturu te reira i te fa’atupura’a i te ’ohipa o te fa’aorara’a ’e te fa’ateiteira’a. E patu te tāvinira’a ’e te mau ’ātivite i te mau ’itera’a pāpū, e ha’apūai i te mau ’utuāfare, ’e fa’atupu i te hō’ēra’a o te pupu, ’e e hōro’a mai i te mau rāve’a nō te ha’amaita’i ia vetahi ’ē. ’Ia rave-fa’atano-hia te reira i roto e maha tuha’a nō te tupura’a o te ta’ata iho : te pae vārua, te pae tōtiare, te pae tino, ’e te pae ferurira’a.
E ravehia te rahira’a o te mau ’ātivite a te feiā ’āpī i te mau taime ta’a ’ē atu i te sābati ’aore rā, i te mau pō monirē. E fa’atupuhia te reira hō’ē taime i te hepetoma. I roto i te tahi mau fenua, nō te ātea, nō te pārurura’a, ’aore rā, nō te tahi atu mau tumu, ’aita te mau ’ātivite e fa’atupuhia. I roto i te reira mau fenua, e nehenehe e fa’aiti ri’i mai te fa’atupura’a i te reira mau ’ātivite, ’ia fa’atupuhia rā hō’ē a’e i te ’āva’e hō’ē. E nehenehe e fa’anaho i te mau ’ātivite i ni’a i te Hi’ora’a nō te fa’anahora’a i te ’ohipa tāvinira’a ’e te ’ātivite, e vai ra i ni’a i te ChurchofJesusChrist.org.
Tē vai ra te tahi tāvinira’a ’e te tahi mau ’ātivite e ’āmui te feiā ’āpī tamāroa ’e te feiā ’āpī tamāhine, nō te feiā ’āpī pa’ari ana’e rā.
E nehenehe te feiā ’āpī e fāna’o i te autahira’a i roto i te mau pupu rarahi a’e. E nehenehe te feiā ’āpī i roto e piti pāroita ’aore rā hau atu, e putuputu ’āmui i te tahi taime nō te tāvinira’a ’e te mau ’ātivite. E nehenehe te mau titi ’aore rā, te mau mata’eina’a e fa’anaho i te tahi taime i te tāvinira’a ’e te mau ’ātivite nā te feiā ’āpī.
E tauturu te feiā fa’atere ta’ata pa’ari ’ia hi’o ē, e mea ataata ’ore te mau ’ātivite (hi’o safety.ChurchofJesusChrist.org ; hi’o ato’a 20.7 i roto i teie buka arata’i). E tītauhia e piti a’e feiā fa’atere pa’ari ha’apa’o ’ia tae mai i roto i te mau ’ātivite ato’a (hi’o 10.8.1).
Nō te mau ha’amāramaramara’a hau atu, hi’o AaronicPriesthoodQuorums.ChurchofJesusChrist.org. Hi’o ato’a JustServe.org i te vāhi e roa’a te reira. E hōro’a mai teie mau rāve’a tauturu i te mau mana’o nō te tāvinira’a ’e te ’ātivite.
Te mau ’ātivite tāmatahiti. Ta’a ’ē atu te mau ’ātivite tāmau a te feiā ’āpī, e nehenehe ato’a te feiā ’āpī tamāroa e ’āmui atu i roto i teie mau ’ātivite i muri nei i te matahiti tāta’itahi :
-
Hō’ē purera’a piri atu i te ’ōmuara’a o te matahiti, nā te feiā ’āpī ’e tō rātou mau metua. E nehenehe te reira e fa’atupu-fa’ata’a-’ē-hia nō te feiā ’āpī tamāroa ’e te feiā ’āpī tamāhine, ’aore rā e fa’atupu-’āmui-hia. E nehenehe ato’a te reira e fa’atupuhia nā te pāroita ’aore rā, nā te titi. E arata’ihia ’e e fa’anahohia te reira nā te mau rima tauturu o te ’episekōpo i roto i te pupu o te mau tahu’a ’e te peresidenira’a o te piha feiā ’āpī tamāhine pa’ari a’e. Nō te feiā ’āpī tamāroa e ti’ahia tō rātou matahiti i te 12 i roto i te matahiti, e fāri’i rātou i tā rātou pihi tā’amura’a i roto i taua putuputura’a ra (hi’o 10.8.3). Nō te tahi atu mau ha’amāramaramara’a, hi’o ChildrenandYouth.ChurchofJesusChrist.org.
-
E pūhapara’a nā te pupu Autahu’ara’a a Aarona (hi’o Guide pour les camps des collèges de la Prêtrise d’Aaron [Arata’i nō te pūhapara’a a te pupu Autahu’ara’a a Aarona]). E nehenehe te feiā ’āpī tamāroa e ’āmui i roto i te tahi atu mau pūhapara’a, te mau tupura’a ’ohipa, ’e te mau ’ātivite i te pō, i te roara’a o te matahiti, i te vāhi e nehenehe e rave.
-
E ’āmuira’a feiā ’āpī pāroita ’aore rā titi, ’aore rā e ’āmuira’a Nō te pūai o te feiā ’āpī (JSF). Nō te mau ha’amāramaramara’a nō ni’a i te mau āmuira’a JSF, hi’o FSY.ChurchofJesusChrist.org. Nō te mau ha’amāramaramara’a nō ni’a i te mau pi’ira’a ’e te mau hōpoi’a a te JSF, nō te pāroita ’e nō te titi, hi’o FSYLeader.ChurchofJesusChrist.org (nō te Fenua Marite ’e Tanata) ’aore rā FSY Planning Guide (Arata’i nō te fa’anahora’a i te JSF) (nō te tahi atu mau fenua).
-
Hō’ē a’e ’ātivite nō te tūra’i i te parau nō te mau ture i roto i te Nō te pūai o te feiā ’āpī. E nehenehe te feiā ’āpī tamāroa ’e te feiā ’āpī tamāhine e ’āmui atu i roto i teie tupura’a ’ohipa. E nehenehe ato’a e ani i te mau metua.
Te fāito matahiti e tītauhia Ma te parau fa’ati’a a tō rātou mau metua, e nehenehe te feiā ’āpī tamāroa e haere i te pūhapara’a a te Autahu’ara’a a Aarona e ha’amata i te ’āva’e Tēnuare o te matahiti e ti’a ai tō rātou matahiti i te 12. E nehenehe rātou e haere i te mau orira’a, te mau ’āmuira’a feiā ’āpī, ’e te mau ’āmuira’a JSF e ha’amata i te ’āva’e Tēnuare o te matahiti e ti’a ai tō rātou matahiti i te 14. Terā rā, ’ia ti’ahia tō rātou e 16 a’e matahiti hou te arapaera’a (hi’o Nō te Pūai o te Feiā ’Āpī [2011], 4).
Aufaura’a i te mau ’ātivite. Nā te tāpura faufa’a a te pāroita e ’aufau i te mau ’ātivite, tae noa atu i te mau tauiha’a. ’Eiaha te mau rāterera’a ’e te mau ha’amāu’ara’a ’ia rahi roa.
Fa’anahora’a ta’a ’ē, mai te mea ’aita e rava’i te tāpura faufa’a a te pāroita nō te ’aufau i te mau ’ātivite e rave rahi mahana, mai te mau pūhapara’a, e nehenehe te feiā fa’atere e ani i te feiā e ’āmui atu i te reira ’ātivite ’ia ’aufau i tā rātou tuha’a. Teie rā, ’eiaha e ’ōpani i te hō’ē feiā ’āpī tamāroa ’ia haere atu mai te mea ’aita tāna e nehenehe e ’aufau. Mai te mea e hina’aro-noa-hia ā te tahi atu moni, e nehenehe te ’episekōpo e fa’ati’a ’ia ravehia te hō’ē ’ātivite ’imira’a moni i te matahiti hō’ē (hi’o 20.6.5).
E ha’apāpū te ’episekōpora’a ē, ’ua nava’i ’e ’ua tuea maita’i te tāpura faufa’a ’e te mau ’ātivite nā te feiā ’āpī tamāroa ’e nā te feiā ’āpī tamāhine. ’Ua fa’ata’ahia te tāpura faufa’a nō te mau pupu Autahu’ara’a a Aarona mai te au i te rahira’a o te feiā ’āpī tamāroa i roto i te pāroita. ’Ua fa’ata’ahia te tāpura faufa’a nō te feiā ’āpī tamāhine mai te au i te rahira’a o te feiā ’āpī tamāhine i roto i te pāroita.
Hi’o FSY.ChurchofJesusChrist.org nō te mau ha’amāramaramara’a nō ni’a i te ’aufaura’a i te mau ’āmuira’a JSF.
10.2.1.4
Te fa’ahotura’a iāna iho
I roto i tā rātou mau tauto’ora’a ’ia riro hau atu mai te Fa’aora te huru, e anihia i te feiā ’āpī ’ia ha’amau i te mau ’ōpuara’a nō te tupu i te rahi i te pae vārua, te pae tōtiare, te pae tino ’e te pae ferurira’a (hi’o Luka 2:52). E ’imi te feiā ’āpī i te fa’aurura’a nō te ’ite, e aha te ti’a ia rātou ’ia ha’amaita’i atu. Nā roto i te tauturu a te mau metua, e hāmani rātou i te mau fa’anahora’a, e ha’a i ni’a i tā rātou mau fa’anahora’a, ’e e feruri i ni’a i te mea tā rātou i ha’api’i mai. E hōro’a te feiā fa’atere ’e te mau tauturu ha’amāramarama i te tauturu mai te mea e hina’arohia. Teie rā, ’eiaha rātou e hi’opo’a i te mau ’ōpuara’a a te feiā ’āpī tamāroa. E nehenehe te mau metua ’e te feiā fa’atere e hōro’a i te mana’o nō te mau ’ōpuara’a, e vaiiho rā rātou i te feiā ’āpī ’ia ’imi i tā rātou iho fa’aurura’a nō ni’a i te mau ’ōpuara’a e rave.
E fa’aitoitohia te feiā ’āpī ’ia fa’aoti e piti a’e ’ōpuara’a i roto i nā tuha’a tāta’itahi e maha i te matahiti tāta’itahi. E nehenehe rātou e fa’a’ohipa i te buka iti Fa’ahotura’a i te ta’ata iho : Buka arata’i nā te feiā ’āpī ’aore rā, te fa’aaura’a rorouira Ora i te ’evanelia, nō te ha’amau ’e nō te tāpa’opa’o i te mau fā.
Nō te tahi atu mau ha’amāramaramara’a, hi’o ChildrenandYouth.ChurchofJesusChrist.org.
10.2.2
Te ha’apa’ora’a i te feiā tei hina’aro i te tauturu
E tauturu te feiā tei mau i te Autahu’ara’a a Aarona i te ’episekōpo i roto i « te ha’apa’ora’a i te mau ’ohipa tāhuti nei »(Te Ha’api’ira’a Tumu ’e te mau Fafaura’a 107:68). E fāri’i rātou i te mau rāve’a tāmau nō te tāvini ia vetahi ’ē i roto, ’e nā muri iho i tō rātou ’utuāfare, i roto i te mau ’ātivite a te feiā ’āpī, ’e i tā rātou iho. Tē vai ra te mau mana’o nō te tāvinira’a i ni’a i te ChildrenandYouth.ChurchofJesusChrist.org. I te vāhi tē vai ra, e hōro’a mai te JustServe.org i te mau rāve’a ’ohipa tāvini i rotopū i te huira’atira.
10.2.2.1
Aupururaʼa
Te aupurura’a, o te ha’apa’ora’a ïa ia vetahi ’ē mai tā te Fa’aora e nā reira. E fāri’i te feiā tei mau i te Autahu’ara’a a Aarona i te mau fa’auera’a ’ohipa aupuru ’o tē ha’amata i te ’āva’e Tēnuare o te matahiti e ti’a ai tō rātou matahiti i te 14. Nō te tahi atu mau ha’amāramaramara’a, hi’o pene 21.
10.2.3
Te anira’a i te mau ta’ata ato’a ’ia fāri’i i te ’evanelia
E ’ohipa nā te feiā tei mau i te Autahu’ara’a a Aarona « ’ia ani i te mau ta’ata ato’a ’ia haere mai i te Mesia » (Te Ha’api’ira’a Tumu ’e te mau Fafaura’a 20:59). ’Ua tāpurahia i raro nei te tahi mau rāve’a nō te rave i te reira :
-
Fa’a’ite i te hō’ē hi’ora’a maita’i ’ei mau pipi nā Iesu Mesia.
-
Fa’a’ite i tō rātou ’itera’a pāpū i te mau hoa ’e i te mau melo o te ’utuāfare.
-
Aupuru i te mau melo paruparu o tā rātou mau pupu.
-
Ani i te mau hoa ’ia haere mai i te purera’a ’aore rā, i te mau ’ātivite a te feiā ’āpī.
-
Ani i te mau hoa ’ia ’āmui mai i roto i te fa’anahora’a a te mau tamari’i ’e a te feiā ’āpī. E ha’a te feiā fa’atere piri roa i te mau metua o teie mau feiā ’āpī nō te tauturu ia rātou ’ia hāro’aro’a i te fa’anahora’a ’e ’ia fa’ata’a nāhea rātou ’e tā rātou mau tamari’i ’ia ’āmui mai i roto.
-
Ani i te mau hoa ’ia ha’api’ihia e te mau misiōnare.
E fa’aitoito te mau metua ’e te feiā fa’atere i te feiā ’āpī tamāroa ’ia fa’aineine nō te tāvini i te hō’ē misiōni rave tāmau ’e ’ia fa’a’ite i te ’evanelia i te roara’a o tō rātou orara’a. ’Ua tāpurahia i raro nei te tahi mau rāve’a nō te rave i te reira :
-
E fa’aitoito i te feiā ’āpī tamāroa ’ia noa’a tō rātou iho ’itera’a pāpū nō ni’a i te fa’anahora’a nō te ’oa’oa a te Metua i te ao ra, te tāra’ehara o Iesu Mesia, ’e te fa’aho’i-fa’ahou-ra’a-hia mai o tāna ’evanelia.
-
Ha’api’i i te feiā ’āpī tamāroa nō ni’a i te mau ha’amaita’ira’a o te tāvinira’a i te hō’ē misiōni, ’e e aha tē tīa’ihia ra ia rātou.
-
Hōro’a i te mau rāve’a nō te tāvini i roto i te ’Ēkālesia.
-
Hōro’a i te mau rāve’a nō te ha’api’i i te ’evanelia i roto i te mau putuputura’a a te pupu ’e i te tahi atu mau vāhi.
’Ei tuha’a nō teie fa’aineinera’a, e nehenehe te ’episekōpora’a ’aore rā, te peresidenira’a titi e fanahonaho i te hō’ē piha fa’aineinera’a misiōnare. Te mau mātēria tumu nō teie ha’api’ira’a ’o te mau pāpa’ira’a mo’a ïa, te Règles missionnaires pour les disciples de Jésus-Christ [Te mau ture misiōnare nō te mau pipi a Iesu Mesia], ’e ’Ia Poro Haere i tā’u nei ’Evanelia. E’ita teie ha’api’ira’a e fa’aterehia i te mau putuputura’a mātarohia i te sābati.
Tē hōro’a mai nei te Missionary.ChurchofJesusChrist.org i te tahi atu mau rāve’a ’o tē nehenehe e tauturu i te feiā ’āpī tamāroa ’a fa’aineine ai rātou nō te tāvini ’ei misiōnare. Hi’o te mau pene 23 ’e te 24 nō te mau ha’amāramaramara’a hau atu.
10.2.4
Te tāhō’ēra’a i te mau ’utuāfare nō te tau a muri atu
E nehenehe te feiā tei mau i te Autahu’ara’a a Aarona e tauturu i te tāhō’ēra’a i te mau ’utuāfare nō te tau a muri atu nā roto i te mau rāve’a e rave rahi. ’Ua tāpurahia i raro nei te tahi o te reira mau rāve’a :
-
Fa’atura i tō rātou mau metua ’e e fa’a’ite i te hō’ē hi’ora’a nō te hō’ē orara’a mai tō te Mesia i roto i tō rātou fare.
-
Fa’aineine ’ia fāri’i i tō rātou iho ’utuāfare mure ’ore.
-
Vai ti’a mā nō te hō’ē parau fa’ati’a nō te hiero.
-
Fa’aineine nō te fāri’i i te mau ’ōro’a nō te hiero, tae noa atu i te fa’aipoipora’a mure ’ore.
-
Ha’api’i mai i te parau nō ni’a i tō rātou mau ’utuāfare fēti’i ’e te mau tupuna (hi’o Tō’u ’utuāfare : Te mau ’ā’amu e tāhō’ē ia tātou).
-
’Imi i te mau tupuna tei tītauhia te mau ’ōro’a o te hiero (hi’o FamilySearch.org).
-
’Āmui pinepine i roto i te mau bāpetizora’a ’e te mau ha’amaura’a nō te feiā pohe, mai te mea e nehenehe.
-
Rave i te tānūmerara’a (hi’o FamilySearch.org/indexing).
-
E tāvini ’ei tauturu ’ohipa hiero ’e ’ā’amu ’utuāfare, ’ia pi’ihia e te ’episekōpora’a (hi’o 25.2.4).
10.3
’Episekōpora’a
Te ’episekōpora’a ’o te peresidenira’a ïa o te Autahu’ara’a a Aarona i roto i te pāroita (hi’o Te Ha’api’ira’a Tumu ’e te mau Fafaura’a 107:13–15). Nā rātou e fa’atere i te ’ohipa a te mau pupu o te Autahu’ara’a a Aarona. Te hōpoi’a mātāmua a te ’episekōpo ’o te ha’apa’ora’a ïa i te feiā ’āpī tamāroa ’e te feiā ’āpī tamāhine i roto i tāna pāroita. E ha’api’i mai ’oia i tō rātou i’oa ’e e māramarama i te huru o tō rātou orara’a i te fare. E haere tāmau ’oia i tā rātou mau ’ātivite ’e i tā rātou mau putuputura’a i te sābati.
Te ’episekōpo ’o te peresideni ïa o te pupu o te mau tahu’a. Tāna ’ohipa « ’o te peresidenira’a ïa i ni’a i [te] mau tahu’a, e ’ia parahi i roto i te ’āpo’ora’a i pīha’i iho ia rātou ra, ’ia ha’api’i atu ia rātou i te mau ’ohipa nō tō rātou tōro’a » (Te Ha’api’ira’a Tumu ’e te mau Fafaura’a 107:87).
Tei te tauturu hō’ē i roto i te ’episekōpora’a te hōpoi’a nō te pupu o te mau ha’api’i. Tei te tauturu piti te hōpoi’a nō te pupu o te mau diakono.
’Ia pārahi ana’e te hō’ē melo o te ’episekōpora’a i roto i te putuputura’a a te hō’ē pupu, nāna e peresideni i te reira putuputura’a.
Teie i muri nei te tahi atu mau hōpoi’a a te ’episekōpora’a nō te mau pupu o te Autahu’ara’a a Aarona :
-
E arata’i i te mau peresidenira’a pupu ’e nā rima tauturu o te ’episekōpo i roto i te pupu o te mau tahu’a. E tauturu ia rātou ’ia māramarama ’e ’ia rave i tā rātou mau ’ohipa ’ei feiā fa’atere. Nō te rave i te reira, e fa’a’ohipa te ’episekōpora’a i te mau pāpa’ira’a mo’a ’e « Te ha’api’ira’a a te Autahu’ara’a a Aarona ’e a te peresidenira’a pupu o te feiā ’āpī tamāhine » (hi’o AaronicPriesthoodQuorums.ChurchofJesusChrist.org). E nehenehe ato’a rātou e fa’a’ohipa i te pene 4 o teie buka arata’i.
-
E fārerei i te feiā ’āpī tamāroa tāta’itahi e piti a’e taime i te matahiti hō’ē (hi’o 31.3.1).
-
E hi’opo’a i te ha’api’ira’a i roto i te mau pupu Autahu’ara’a a Aarona.
-
E tauturu i te feiā ’āpī tamāroa ’ia fa’aineine nō te fāri’i i te Autahu’ara’a a Melehizedeka (hi’o 10.6).
-
E hi’opo’a i te mau parau, te mau parau fa’a’ite, ’e te faufa’a moni a te mau pupu Autahu’ara’a a Aarona.
E tauturu te mau tauturu ha’amāramarama o te pupu ’e te feiā ’aravihi i teie mau hōpoi’a mai te mea e tītauhia (hi’o 10.5).
10.4
Te feiā fa’atere nō te pupu feiā ’āpī
10.4.1
Te pi’ira’a, te pāturura’a ’e te fa’ata’ara’a
E pi’i te ’episekōpo i te hō’ē ’aore rā, e piti tahu’a ’ia riro ’ei rima tauturu nōna, i te fa’aterera’a i te pupu tahu’a. E nehenehe ato’a hō’ē melo o te ’episekōpora’a e pi’i i te hō’ē pāpa’i parau.
E pi’i te hō’ē melo o te ’episekōpora’a i te peresideni o te pupu diakono, ’e o te pupu ha’api’i. Mai te mea ē, e nava’i te feiā tei mau i te Autahu’ara’a a Aarona nō te tāvini, e feruri teie feiā ’āpī tamāroa nā roto i te pure i te mau melo o te pupu e rave ’ei mau tauturu ’e ’ei pāpa’i parau. E feruri te ’episekōpora’a i tā rātou mā’itira’a ’e e hōro’a i te mau pi’ira’a.
Hou ’a ani ai i te hō’ē feiā ’āpī tamāroa ’ia tāvini i roto i te hō’ē o teie mau pi’ira’a, e ani te melo o te ’episekōpora’a i te parau fa’ati’a i te mau metua o te reira feiā ’āpī tamāroa.
I muri a’e i te hōro’ara’a i teie mau pi’ira’a, e tu’u te hō’ē melo o te ’episekōpora’a i te feiā fa’atere o te pupu nō te hō’ē pāturura’a i roto i tā rātou putuputura’a pupu. E fa’ata’a te ’episekōpo i tōna nā rima tauturu ’e i te mau peresideni o te pupu diakono ’e o te pupu ha’api’i. E hōro’a ’oia i te mau tāviri autahu’ara’a i ni’a i te mau peresideni pupu. E nehenehe ’oia e fa’aue i tōna nā tauturu ’ia fa’ata’a i te tahi atu mau melo o te peresidenira’a ’e te pāpa’i parau.
E fa’a’ara te hō’ē melo o te ’episekōpora’a i teie mau pi’ira’a i roto i te purera’a ’ōro’a. ’Aita ’oia e ani i te pāturura’a.
10.4.2
Te mau hōpoi’a
Teie i muri nei te mau hōpoi’a a te mau peresideni pupu Autahu’ara’a a Aarona, tae noa atu i te ’episekōpo. E turu tō rātou mau tauturu, ’e nā rima tauturu o te ’episekōpo i roto i te pupu tahu’a, i roto i teie mau hōpoi’a.
-
E arata’i i te mau tauto’ora’a a te pupu nō te ’āmui i roto i te ’ohipa o te fa’aorara’a ’e te fa’ateiteira’a (hi’o pene 1).
-
’Ia ’ite ’e ’ia tāvini i te melo tāta’itahi o te pupu, tae roa atu ia rātou ’aita e tae mai nei i te mau putuputura’a a te pupu. ’Ia ’ite i tō rātou mau hina’aro ’e tō rātou huru orara’a.
-
Tāvini i roto i te ’āpo’ora’a feiā ’āpī o te pāroita (hi’o 10.4.4).
-
’Āmui i roto i te mau tauto’ora’a pāroita nō te fa’a’ite i te ’evanelia ’e nō te ha’apūai i te mau melo ’āpī ’e tei ho’i fa’ahou mai. E haere te hō’ē rima tauturu nō te pupu tahu’a i te mau rurura’a fa’aaura’a (hi’o 23.5.7).
-
’Āmui i roto i te mau tauto’ora’a nō te hiero ’e te ’ā’amu ’utuāfare a te pāroita. E haere te hō’ē rima tauturu nō te pupu tahu’a i te mau rurura’a fa’aaura’a (hi’o 25.2.7).
-
Ha’api’i i te mau melo o te pupu i tā rātou mau ’ohipa nō te autahu’ara’a (hi’o Te Ha’api’ira’a Tumu ’e te mau Fafaura’a 107:85–88). Pāturu ia rātou i te ravera’a i teie mau ’ohipa.
-
Fa’anaho ’e arata’i i te mau putuputura’a a te pupu (hi’o 10.2.1.2).
-
Fa’anaho ’e e fa’aineine i te tāvinira’a ’e te mau ’ātivite a te pupu autahu’ara’a (hi’o 10.2.1.3).
’Ia pi’i-ana’e-hia te mau pāpa’i parau, e fa’aineine rātou i te mau tāpura ’ohipa nō te mau putuputura’a ’e e pāpa’i ato’a i te mau nota. E tauturu ato’a rātou i te pāpa’i parau o te pāroita ’aore rā, i te hō’ē tauturu ha’amāramarama o te pupu ’ia tāpa’opa’o i te feiā i tae mai.
E ha’api’i te mau melo o te ’episekōpora’a i te feiā ’āpī tamāroa i tā rātou mau hōpoi’a (hi’o 10.3 E tauturu maita’i te mau tauturu ha’amāramarama o te pupu (hi’o 10.5).
10.4.3
Te rurura’a a te peresidenira’a pupu
E putuputu tāmau te mau peresidenira’a pupu Autahu’ara’a a Aarona. Nā te peresideni pupu e arata’i i teie mau putuputura’a. E ’āmui mai e piti a’e ta’ata pa’ari i roto—hō’ē melo o te ’episekōpora’a, hō’ē tauturu ha’amāramarama, ’aore rā, hō’ē ta’ata ’aravihi. I roto i teie mau rurura’a, e paraparau ’āmui te feiā fa’atere ’e e ’imi ho’i i te fa’aurura’a nō ni’a i te hina’aro o te Fatu nō tā rātou pupu. I roto i te tāpura ’ohipa , e nehenehe e ’āparau i te mau tumu parau i muri nei :
-
Te rave-fa’aoti-ra’a i te ’ohipa o te fa’aorara’a ’e te fa’ateiteira’a
-
Te tāvinira’a i te mau melo o te pupu autahu’ara’a, ma te ha’apa’o ta’a ’ē i te mau melo ’āpī ’e te torora’a i te rima i te mau melo paruparu
-
Te torora’a i te rima i te feiā nō te tahi atu mau fa’aro’o ’e mau ti’aturira’a
-
Te fa’anahora’a i te mau putuputura’a a te pupu, te tāvinira’a ’e te mau ’ātivite
-
Ha’api’ira’a nō te fa’aterera’a nō roto mai i te feiā fa’atere pupu ’aore rā, te mau tauturu ha’amāramarama
Tē vai ra te Hōho’a nō te tāpura ’ohipa nō te putuputura’a a te peresidenira’a i ni’a ChurchofJesusChrist.org.
10.4.4
Te ’āpo’ora’a pāroita a te feiā ’āpī
Te fā o te ’āpo’ora’a pāroita a te feiā ’āpī, nō te tauturu ïa i te feiā ’āpī ’ia arata’i mai i te tahi atu mau ta’ata ia Iesu Mesia ra ’e ’ia rave i te ’ohipa nō te fa’aorara’a ’e te fa’ateiteira’a.
Nā te ’episekōpo e peresideni i te ’āpo’ora’a pāroita a te feiā ’āpī. Teie te mau melo o teie ’āpo’ora’a :
-
Te ’episekōpora’a.
-
Hō’ē o nā rima tauturu o te ’episekōpo i roto i te pupu tahu’a, te peresideni pupu ha’api’i, ’e te peresideni pupu diakono.
-
Te mau peresideni piha ha’api’ira’a a te feiā ’āpī tamāhine (’aore rā, te peresidenira’a tā’āto’a o te piha ha’api’ira’a mai te mea ē, hō’ē ana’e piha ha’api’ira’a feiā ’āpī tamāhine i roto i te pāroita).
-
Te peresideni nō te Feiā ’Āpī Tamāhine
E paraparau te ’āpo’ora’a feiā ’āpī a te pāroita i te mau rāve’a nō te tauturu ia vetahi’ē ’ia patu i te ’itera’a pāpū, ’ia fāri’i i te mau ’ōro’a o te fa’aorara’a, ’ia ha’apa’o i te mau fafaura’a, ’e ’ia riro ’ei mau pipi nā Iesu Mesia (hi’o Moroni 6:4–5). E paraparau ’āmui rātou nō ni’a i te mau hina’aro o te feiā ’āpī tamāroa ’e o te feiā ’āpī tamāhine i roto i te pāroita. E nehenehe rātou e paraparau i te mau ’ātivite nō te pāhono i teie mau hina’aro. Terā rā, e fa’anahohia te mau ’ātivite i roto i te mau putuputura’a a te pupu autahu’ara’a ’aore rā, a te piha tamāhine.
Hi’o 29.2.6 nō te tahi atu mau ha’amāramaramara’a nō ni’a i te ’āpo’ora’a a te feiā ’āpī pāroita.
10.5
Te mau tauturu ha’amāramarama ’e te feiā ’aravihi
E pi’i ’e e fa’ata’a te hō’ē melo o te ’episekōpora’a i te mau tāne ’ei mau tauturu ha’amāramarama nō te pupu Autahu’ara’a a Aarona. E pāturu teie mau tauturu ha’amāramarama i te ’episekōpora’a i roto i tā rātou mau hōpoi’a nō te mau pupu Autahu’ara’a a Aarona. E ha’apa’o pāpū rātou i te parau nō te arata’ira’a i te feiā ’āpī tamāroa, te ha’api’ira’a ia rātou nāhea ’ia arata’i nā roto i te fa’aurura’a, ’e te tauturura’a ia rātou ’ia riro hau atu mai ia Iesu Mesia. Mai te mea e hina’arohia, e nehenehe e pi’ihia hau atu i te hō’ē tauturu ha’amāramarama nō te pupu tāta’itahi.
E nehenehe ato’a te ’episekōpora’a e pi’i i te feiā ’aravihi nō te pupu, nō te tauturu i te hō’ē ’ohipa ta’a ’ē, mai te pūhapara’a, te ’āmuira’a feiā ’āpī, ’aore rā te mau tū’aro.
E tītauhia e piti a’e ta’ata pa’ari ha’apa’o i roto i te putuputura’a a te pupu tāta’itahi ’e i te ’ātivite. Te parahira’a mai te mau tauturu ha’amāramarama ’e te feiā ’aravihi i roto, e nehenehe i te mau melo o te ’episekōpora’a e haere e hi’o i te mau piha ha’api’ira’a a te feiā ’āpī tamāhine ’e a te Paraimere ’e i te mau ’ātivite. E ti’a i te mau tauturu ha’amāramarama ’e i te feiā ’aravihi ’ia fāri’i i te ha’api’ipi’ira’a i ni’a ProtectingChildren.ChurchofJesusChrist.org (hi’o 10.8.1).
10.6
Te tāuturura’a i te feiā ’āpī tamāroa ’ia fa’aineine nō te fāri’i i te Autahu’ara’a a Melehizedeka
’Ia ti’a ana’e te matahiti o te hō’ē feiā ’āpī tamāroa i te 18 ’aore rā, hau atu, e ti’a ïa iāna ’ia fāri’i i te Autahu’ara’a a Melehizedeka ’e ’ia fa’atōro’ahia ’ei peresibutero mai te mea ’ua ineine ’oia ’e ’ua ti’amā. E paraparau ’oia i tōna nā metua ’e i te ’episekōpo nō te rave i teie fa’aotira’a.
I te 19 o te matahiti ’aore rā, hou ’a fa’aru’e ai i te fare (mai te haerera’a i te fare ha’api’ira’a tuarua, ’aore rā, i roto i te ’āua fa’ehau), e fa’atōro’ahia ’oia ’ei peresibutero mai te mea ’ua ti’amā ’oia. Noa atu ē, ’aita ’oia i fa’atōro’ahia ’ei peresibutero i te 19ra’a o te matahiti, e anihia ’oia ’ia haere i roto i te mau putuputura’a a te pupu peresibutero.
Tei te mau metua te hōpoi’a mātāmua nō te tauturu i tā rāua mau tamaiti ’ia fa’aineine nō te fāri’i i te Autahu’ara’a a Melehizedeka. E nehenehe ato’a te ’episekōpora’a ’e te mau tauturu ha’amāramarama o te pupu e tauturu nā roto i te hōro’ara’a i te feiā tei mau i te Autahu’ara’a a Aarona, i te mau ’itera’a ’o tē fa’aineine ia rātou nō te hō’ē orara’a tāvini ’ei mau peresibutero. Te fa’aineinera’a maita’i roa a’e nō te fāri’i i te Autahu’ara’a a Melehizedeka o te ravera’a ïa i te mau hōpoi’a a te Autahu’ara’a a Aarona.
E ti’a i te feiā tei fāri’i i te Autahu’ara’a a Melehizedeka ’ia tūtava i te hāro’aro’a i :
-
Te tapura’a ’e te fafaura’a o te autahu’ara’a (hi’o Te Ha’api’ira’a Tumu ’e te mau Fafaura’a 84:33–44).
-
Te mau hōpoi’a a te hō’ē peresibutero (Te Ha’api’ira’a Tumu ’e te mau Fafaura’a 20:38–45 ; 42:44 ; 107:11–12).
-
Te mau fā o te mau ’ōro’a o te autahu’ara’a ’e te mau ha’amaita’ira’a ’e e nāhea ’ia rave i te reira (hi’o pene 18).
-
Nāhea te mau tāne ’e te mau vahine ’ia ha’a ’āmui nō te fa’aoti i te ’ohipa a te Atua.
Nō te ha’amāramaramara’a nō ni’a i teie mau tumu parau, hi’o « Te autahu’ara’a a Melehizedeka », « Te autahu’ara’a », ’e « Te mau vahine i roto i te ’Ēkālesia » (Gospel Topics [Mau tumu parau o te ’evanelia), topics.ChurchofJesusChrist.org).
E nehenehe te peresidenira’a o te pupu peresibutero ’e te mau taea’e aupuru e tauturu i te hōro’ara’a i teie arata’ira’a. E nehenehe te reira e tupu nō te ta’ata hō’ē i roto i te fare o te feiā ’āpī tamāroa ’aore rā, i roto i te hō’ē piha ha’api’ira’a e fa’atupuhia i rāpae i te mau putuputura’a mātarohia o te sābati.
10.7
Te feiā fa’atere nō te feiā ’āpī tamāroa o te titi
E pi’i ’e e fa’ata’a te peresidenira’a titi i te hō’ē melo nō te ’āpo’ora’a teitei ’ia riro ’ei peresideni nō te feiā ’āpī tamāroa nō te titi. E nehenehe te mau melo o te ’āpo’ora’a teitei tei fa’ata’ahia nō te feiā ’āpī tamāhine ’e nō te Paraimere, e pi’ihia ’e e fa’ata’ahia ’ia riro ’ei tauturu nōna. ’Aore rā, mai te mea e titi rahi, e nehenehe te tahi atu mau taea’e nō te Autahu’ara’a a Melehizedeka i roto i te titi e pi’ihia ’ei tauturu. (Hi’o 6.5.)
E tāvini te peresideni feiā ’āpī tamāroa nō te titi i raro a’e i te fa’aterera’a a te peresidenira’a titi. E tāvini ’oia ’e tōna nā tauturu ’e te pāpa’i parau i roto i te tōmite fa’atere feiā ’āpī o te titi (hi’o 29.3.10). E tauturu ’oia ’e tōna nā tauturu i te mau ’episekōpora’a nā roto i te ha’api’ira’a ia rātou i tā rātou mau hōpoi’a nō te mau pupu Autahu’ara’a a Aarona.
E nehenehe e pi’i i te hō’ē taea’e melo nō te titi ’ei pāpa’i parau nō te feiā ’āpī tamāroa nō te titi.
Nō te mau ha’amāramaramara’a hau atu nō ni’a i te mau hōpoi’a a te peresidenira’a feiā ’āpī tamāroa titi, ’e te pāpa’i parau, hi’o 6.7.2 ’e 6.7.3.
10.8
Te mau arata’ira’a ’e te mau fa’aturera’a hau atu
10.8.1
Te pārurura’a i te feiā ’āpī
’Ia ’ohipa ana’e te feiā pa’ari ’e te feiā ’āpī i roto i te mau fa’anahora’a a te ’Ēkālesia, e tītauhia e piti a’e ta’ata pa’ari ha’apa’o ’ia tae mai. E nehenehe e tītauhia i te mau pupu ’ia putuputu mai nō te fa’atupu i te reira.
Tītauhia i te mau ta’ata pa’ari ato’a e ha’a nei ’e te feiā ’āpī, ’ia fāri’i hope roa i te ha’api’ipi’ira’a nō ni’a i te pārurura’a i te mau tamari’i ’e i te feiā ’āpī, i roto i te hō’ē ’āva’e o tō rātou pāturu-ra’a-hia (ProtectingChildren.ChurchofJesusChrist.org). E fāri’i fa’ahou rātou i te reira ha’api’ipi’ira’a i te mau toru matahiti ato’a i muri a’e.
Nō te mau ha’amāramaramara’a nō ni’a i te huru teie mau arata’ira’a e tano i ni’a i te mau hoa aupuru, hi’o 21.2.2.
10.8.2
Feiā ’āpī tamāroa huma
E ha’apa’o ta’a ’ē te feiā fa’atere o te pupu i te feiā ’āpī tamāroa huma. Nō te mau ha’amāramaramara’a nō ni’a i te tauturura’a i teie feiā ’āpī tamāroa, hi’o disability.ChurchofJesusChrist.org.
10.8.3
Mau pihi nā te mau tamari’i ’e te feiā ’āpī
E fāri’i te feiā ’āpī i te mau pihi ’ei tuha’a nō te fa’anahora’a a te mau tamari’i ’e te feiā ’āpī. ’Ia riro ana’e te hō’ē feiā ’āpī tamāroa ’ei melo nō tāna pupu Autahu’ara’a a Aarona mātāmua, e fāri’i ’oia i te hō’ē pihi tā’amura’a, mai roto mai i tōna feiā fa’atere pupu. E fāri’i ato’a ’oia i te hō’ē buka iti Fa’ahotura’a i te ta’ata iho : Buka arata’i nā te feiā ’āpī. E nehenehe teie ’ohipa e ravehia ’ia putuputu ana’e te feiā fa’atere pupu ’e ’ōna nō te fāri’i iāna i roto i te pupu. E nehenehe ato’a e rave i te reira i roto i te hō’ē putuputura’a matahiti nō te feiā ’āpī ’e tō rātou mau metua (hi’o 10.2.1.3).
I te ’āva’e Tēnuare e ti’ahia ai te matahiti o te hō’ē feiā ’āpī tamāroa i te 18, e fāri’i ’oia i te tahi atu pihi tā’amura’a.
E nehenehe te feiā ’āpī tamāroa e fāri’i i te hō’ē pihi manuiara’a nā roto i te tūtavara’a ’ia riro hau atu mai te Fa’aora te huru.
Nō te tahi atu mau ha’amāramaramara’a nō ni’a i te mau pihi, hi’o ChildrenandYouth.ChurchofJesusChrist.org.
10.8.4
Te ha’aputura’a i te mau ō ha’apaera’a mā’a
I roto i te mau pāroita e mea piri te fa’aeara’a o te mau melo, e nehenehe te ’episekōpo e fa’aue i te mau taea’e tei mau i te Autahu’ara’a a Aarona ’ia haere e fārerei i te mau melo i te ’āva’e tāta’itahi ’e ’ia ani ia rātou ’ia ’aufau i te mau ō ha’apaera’a mā’a. Nō te rave i te reira fa’aotira’a, e hi’o te ’episekōpo i te rahira’a o te feiā e mau ra i te Autahu’ara’a a Aarona e vai ra, tō rātou vai pārurura’a, ’e te ha’amaita’ira’a nō te mau melo e’ita e nehenehe e ’aufau nā roto i te tahi atu rāve’a.
E haere ’āpitipiti te mau taea’e o te autahu’ara’a nō te ’ohi i te mau ō ha’apaera’a mā’a. Te feiā e ’ohi ra i te mau ō ha’apaera’a mā’a, e hōro’a ’oi’oi rātou i te reira i te hō’ē melo o te ’episekōpora’a.
’Eiaha te mau melo e hōro’a i te tahi atu mau ō, mai te tuha’a ’ahuru ’aore rā, te tahi atu mau ō, i te feiā e ’ohi nei i te mau ō ha’apaera’a mā’a.