“1. Ang Plano sa Dios ug ang Imong Tahas diha sa Iyang Buhat sa Kaluwasan ug Kahimayaan,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).
“1. Ang Buhat sa Dios sa Kaluwasan ug Kahimayaan,” Kinatibuk-ang Tamdanan nga Basahon.
1.
Ang Plano sa Dios ug ang Imong Tahas diha sa Iyang Buhat sa Kaluwasan ug Kahimayaan
1.0
Pasiuna
Ikaw gitawag sa pagserbisyo diha sa Ang Simbahan ni Jesukristo sa mga Santos sa Ulahing mga Adlaw. Salamat sa imong pagserbisyo. Ikaw makapanalangin og mga kinabuhi ug makasinati og hingpit nga kalipay samtang ikaw matinud-anong moserbisyo.
Kining tamdanan nga basahon makatabang nimo nga makat-on sa mga baroganan sa Kristohanong pagserbisyo ug makasabot sa imong mga responsibilidad. Ikaw mahimong labing epektibo kon imong ipahiangay ang imong pagserbisyo diha sa Simbahan uban sa buhat sa Dios nga Amahan ug sa Iyang Anak, nga si Jesukristo. Kini nga kapitulo makatabang nimo nga makaangkon og panan-awon sa:
-
Plano sa Dios sa kalipay.
-
Ang buhat sa Dios sa kaluwasan ug kahimayaan.
-
Katuyoan sa Ang Simbahan ni Jesukristo sa mga Santos sa Ulahing mga Adlaw.
1.1
Plano sa Dios sa Kalipay
Ang Langitnong Amahan mihatag sa plano sa kalipay aron kita makatagamtam sa Iyang tanang panalangin. Ang Iyang buhat ug himaya mao ang “pagpahinabo sa pagka-imortal ug kinabuhi nga dayon sa tawo” (Moises 1:39). Ang pagka-imortal mao ang pagpuyo sa kahangtoran uban sa nabanhaw nga pisikal nga lawas. Ang kinabuhing dayon, o kahimayaan, mao ang pagkahimong sama sa Dios ug pagpuyo diha sa Iyang presensya sa kahangtoran isip mga pamilya.
Si Jesukristo mao ang sentro sa plano sa Dios. Tungod sa walay kinutoban nga gugma sa Langitnong Amahan alang nato, Siya mipadala sa Iyang Anak sa pagtubos kanato gikan sa sala ug kamatayon pinaagi sa Iyang maulaong sakripisyo (tan-awa sa Juan 3:16). Pinaagi sa Iyang Pag-ula, si Jesukristo miseguro nga ang matag usa nato nga matawo sa yuta mabanhaw ug makaangkon og pagka-imortal.
Aron makadawat og kinabuhing dayon, kita kinahanglan nga “[mo]duol ngadto ni Kristo” (Moroni 10:32). Ang Pag-ula sa Manluluwas mihimo usab nga posible alang nato nga malimpyohan gikan sa sala ug mausab ang atong mga kasingkasing aron kita makadawat og kinabuhing dayon ug kahingpitan sa kalipay. Ang Langitnong Amahan gusto nga ang Iyang tanang mga anak mopili nga mobalik ngadto Kaniya.
1.2
Ang Buhat sa Dios sa Kaluwasan ug Kahimayaan
Samtang moduol kita ngadto ni Kristo ug motabang sa uban sa pagbuhat sa ingon, kita miapil sa buhat sa Dios sa kaluwasan ug kahimayaan. Kini nga buhat gigiyahan sa duha ka dagkong mga sugo sa paghigugma sa Dios ug sa paghigugma sa atong mga silingan (tan-awa sa Mateo 22:37–39).
Ang buhat sa Dios sa kaluwasan ug kahimayaan nagtutok sa upat ka balaanong gitudlo nga mga responsibilidad. Kini gilatid sa ubos.
Kini nga tamdanan nga basahon makatabang nimo nga makasabot niining upat ka aspeto sa buhat sa Dios.
1.2.1
Pagsunod sa Ebanghelyo ni Jesukristo
Ang pagsunod sa ebanghelyo ni Jesukristo naglakip sa:
-
Pagpakita og hugot nga pagtuo diha ni Jesukristo, paghinulsol kada adlaw, paghimo og mga pakigsaad uban sa Dios samtang modawat kita sa mga ordinansa sa kaluwasan ug kahimayaan, ug paglahutay hangtod sa kataposan pinaagi sa pagtuman niadto nga mga pakigsaad (tan-awa sa 3.5.1).
-
Pagkat-on ug pagtudlo sa ebanghelyo ni Jesukristo diha sa panimalay ug sa simbahan.
-
Pagkahimong makabarog pinaagi sa kinaugalingong paningkamot sa pagsangkap sa atong kaugalingon ug sa atong mga pamilya, sa espirituwal ug temporal nga paagi.
1.2.2
Pag-atiman Niadtong Nanginahanglan
Ang pag-atiman niadtong nanginahanglan naglakip sa:
-
Pagserbisyo ug pagpangalagad sa mga indibidwal, mga pamilya, ug mga komunidad.
-
Pagpakigbahin sa mga kapanguhaan, lakip na sa tabang sa Simbahan, ngadto niadtong nanginahanglan.
-
Pagtabang sa uban nga mahimong makabarog pinaagi sa kinaugalingong paningkamot.
1.2.3
Pagdapit sa Tanan nga Modawat sa Ebanghelyo
Ang pagdapit sa tanan nga modawat sa ebanghelyo naglakip sa:
-
Pag-apil sa misyonaryo nga buhat ug pagserbisyo isip mga misyonaryo.
-
Pagtabang sa bag-o ug mibalik nga mga miyembro sa Simbahan nga mouswag subay sa dalan sa pakigsaad.
1.2.4
Paghiusa sa mga Pamilya alang sa Kahangtoran
Ang paghiusa sa mga pamilya alang sa kahangtoran naglakip sa:
-
Paghimo og mga pakigsaad samtang kita nagdawat sa atong kaugalingon nga mga ordinansa sa templo.
-
Pagpangita sa atong namatay na nga mga katigulangan ug sa pagpahigayon sa mga ordinansa alang kanila diha sa templo aron sila makahimo og mga pakigsaad uban sa Dios.
-
Pag-adto sa templo kanunay, kon posible, aron sa pagsimba sa Dios ug sa pagpahigayon sa mga ordinansa alang sa Iyang mga anak.
1.3
Ang Katuyoan sa Simbahan
Si Jesukristo miestablisar sa Iyang Simbahan aron ang mga indibidwal ug mga pamilya makatabang sa Dios diha sa pagtuman sa Iyang buhat sa kaluwasan ug kahimayaan (tan-awa sa Mga Taga-Efeso 4:11–13; tan-awa usab sa 2.2 niini nga tamdanan nga basahon). Aron makatabang nga matuman kining balaan nga katuyoan, ang Simbahan ug ang mga lider niini naghatag og:
-
Awtoridad ug mga yawe sa pagkapari.
-
Mga pakigsaad ug mga ordinansa.
-
Mapanagnaong direksyon.
-
Mga kasulatan.
-
Suporta sa pagkat-on ug pagtudlo sa ebanghelyo.
-
Mga oportunidad sa pagserbisyo ug pagpangulo.
-
Usa ka komunidad sa mga Santos.
1.3.1
Awtoridad ug mga Yawe sa Pagkapari
Pinaagi sa pagkapari, ang Dios makatuman sa Iyang buhat sa kaluwasan ug kahimayaan. Ang awtoridad ug mga yawe sa pagkapari nga gikinahanglan sa paggiya sa buhat sa Dios dinhi sa yuta gipahiuli ngadto ni Propeta Joseph Smith (tan-awa sa Doktrina ug mga Pakigsaad 110:11–16; 112:30; tan-awa usab sa 3.1 niini nga tamdanan nga basahon). Kini nga mga yawe gihuptan sa mga lider sa Simbahan karon. Kini nga mga lider motawag ug motugot sa uban sa pagtabang diha sa buhat sa Dios (tan-awa sa Doktrina ug mga Pakigsaad 107:8, 65–67).
1.3.2
Mga Pakigsaad ug mga Ordinansa
Sa plano sa Langitnong Amahan, kita mohimo og mga pakigsaad samtang modawat kita og mga ordinansa sa kaluwasan ug kahimayaan, sama sa bunyag (tan-awa sa Juan 3:5; tan-awa usab sa kapitulo 18 niini nga tamdanan nga basahon). Kini nga mga pakigsaad ug mga ordinansa importante alang nato nga mahimong mas sama sa Dios ug mobalik ngadto sa Iyang presensya (tan-awa sa Doktrina ug mga Pakigsaad 84:19–22).
1.3.3
Mapanagnaong Direksyon
Pinaagi sa Iyang pinili nga mga propeta, ang Dios nagpadayag sa kamatuoran ug naghatag og dinasig nga giya ug mga pasidaan (tan-awa sa Amos 3:7; Doktrina ug mga Pakigsaad 1:4). Kini nga giya nagtabang nato nga mosulod ug magpabilin diha sa dalan paingon sa kinabuhing dayon.
1.3.4
Mga Kasulatan
Ubos sa direksyon sa mga propeta ug mga apostoles sa Ginoo, ang Simbahan naghatag ug nagpreserbar sa pulong sa Dios sumala sa makita diha sa balaan nga mga kasulatan. Ang mga kasulatan nagpamatuod ni Kristo, nagtudlo sa Iyang ebanghelyo, ug nagtabang nato sa pagpakita og hugot nga pagtuo diha Kaniya (tan-awa sa Jacob 7:10–11; Helaman 15:7).
1.3.5
Suporta sa Pagkat-on ug Pagtudlo sa Ebanghelyo
Ang Simbahan nagsuporta sa mga indibidwal ug mga pamilya sa ilang responsibilidad sa pagkat-on sa mga kamatuoran sa ebanghelyo ug sa pagtudlo niini nga mga kamatuoran ngadto sa mga sakop sa pamilya ug sa uban (tan-awa sa Doktrina ug mga Pakigsaad 88:77–78, 118; tan-awa usab sa 2.2.3 niini nga tamdanan nga basahon).
1.3.6
Mga Oportunidad sa Pagserbisyo ug Pagpangulo
Pinaagi sa mga calling ug mga buluhaton diha sa Simbahan, ang Dios naghatag sa mga miyembro og mga oportunidad sa pagserbisyo ug sa pagpangulo. Ang Simbahan naghatag og estraktura sa pagtabang sa pag-atiman sa mga miyembro nga nanginahanglan ug sa paghatag og makatawhanon [humanitarian] nga kahupayan ngadto sa uban (tan-awa sa Mosiah 18:27–29).
1.3.7
Usa ka Komunidad sa mga Santos
Isip usa ka komunidad sa mga Santos, ang mga miyembro sa Simbahan magpundok kanunay aron sa pagsimba sa Dios ug sa paghinumdom sa Manluluwas pinaagi sa pag-ambit sa sakramento (tan-awa sa Moroni 6:4–6; Doktrina ug mga Pakigsaad 20:77). Ang mga miyembro moatiman usab ug mangalagad sa usag usa (tan-awa sa Mga Taga-Efeso 2:19).
1.4
Imong Tahas sa Buhat sa Dios
Isip usa ka lider sa Simbahan, ikaw gitawag sa pagtudlo ug pagsuporta niadtong imong giserbisyohan samtang sila motabang sa Dios diha sa Iyang buhat sa kaluwasan ug kahimayaan (tan-awa sa 1.2). Ang pagbaton og klaro nga pagsabot sa buhat sa Dios, sa unsay Iyang gidapit nga imong buhaton, ug ang katuyoan sa Iyang Simbahan makatabang nimo sa pagtutok sa imong mga paningkamot sa pagdala og mga kalag ngadto ni Kristo.
Mainampoong magtinguha nga masayod unsaon nimo sa pagtabang sa pagpahinabo sa mga katuyoan sa Dios diha sa mga kinabuhi niadtong imong giserbisyohan. Ang Dios mogiya kanimo pinaagi sa mga pag-aghat sa Espiritu Santo (tan-awa sa 2 Nephi 32:5). Ang paghago uban sa Dios sa Iyang ubasan makahatag kanimo og dakong kalipay (tan-awa sa Jacob 5:70–72