“Appendix,” Para sa Kusog sang mga Lamharon: Giya sa Paghimo sang mga Pagpili (2022)
“Appendix,” Para sa Kusog sang mga Lamharon
Appendix
Isa ka paagi sa pagrebyu sang imo pag-uswag sa dalan sang kasugtanan amo ang pagbinagbinag sang mga pamangkot sa idalom. Amo ini ang mga pamangkot nga ginapamangkot sa imo kon ginainterbyu ka para makabaton sang temple recommend, pero indi ka na maghulat nga interbyuhon. Ikaw na ang maghimo sang imo espirituhanon nga pagtimbang. Ang Tema sang Young Women, ang Tema sang Aaronic Priesthood, kag ang Napulo ka Sugo makabulig man nga mga kasangkapan sa imo pagtimbang-timbang sang kaugalingon.
Mga pamangkot para sa temple recommend para sa mga lamharon
May pagtuo ka bala kag panaksihon sa Dios, ang Wala’y Katapusan nga Amay; sa Iya Anak nga si Jesucristo; kag sa Balaan nga Espiritu?
May panaksihon ka bala sa Pagbayad-Sala ni Jesucristo kag sa Iya papel bilang imo Manluluwas kag Manunubos?
May panaksihon ka bala sa Pagpanumbalik sang ebanghelyo ni Jesucristo?
Ginatib-ong mo bala ang Pangulo sang Ang Simbahan ni Jesucristo sang mga Santos sa Ulihing mga Adlaw bilang propeta, manugpanan-aw, kag manugpahayag sang rebelasyon kag bilang ang solo nga tawo sa kalibutan nga awtorisado sa paggamit sang tanan nga yabi sang priesthood? Ginatib-ong mo bala ang mga miyembro sang Unang Panguluhan kag ang Korum sang Dose ka mga Apostoles bilang mga propeta, mga manugpanan-aw, kag mga manugpahayag sang rebelasyon? Ginatib-ong mo bala ang iban pa nga mga General Authority kag lokal nga mga lider sang Simbahan?
Ang Ginuo nagsiling nga ang tanan nga butang dapat “himuon sa katinlo” sa Iya atubang (Doktrina kag mga Kasugtanan 42:41). Ginatinguhaan mo bala ang moral nga katinlo sa imo kaisipan kag pamatasan? Ginatuman mo bala ang layi sang kaputli?
Ginasunod mo bala ang mga pinanudlo sa Simbahan ni Jesucristo sa imo pribado kag pang-publiko nga pangginawi upod sa mga miyembro sang imo pamilya kag sa iban?
Nagasuporta ka bala ukon nagaduso sang bisan ano nga pinanudlo, pangginawi, ukon doktrina nga supak sa iya sang Ang Simbahan ni Jesucristo sang mga Santos sa Ulihing mga Adlaw?
Ginatinguhaan mo bala nga tipigan nga balaan ang Adlaw nga Inugpahuway, pareho sa puluy-an kag sa simbahan; nagatambong sa imo mga miting; nagahanda kag nagaambit sang sakramento nga takos; kag nagapangabuhi nga suno sa mga layi kag mga kasuguan sang ebanghelyo?
Ginatinguhaan mo bala nga mangin tampad sa tanan mo nga ginahimo?
Nagabayad ka bala sang bug-os nga ikapulo?
Naintiendihan mo bala kag ginasunod ang Pulong sang Kaalam?
May seryoso bala nga mga sala sa imo kabuhi nga kinahanglan resolbahon upod sa mga awtoridad sa priesthood bilang parte sang imo paghinulsol?
Ginakabig mo bala ang imo kaugalingon nga takos sa pagsulod sa balay sang Ginuo kag pagpartisipar sa mga ordinansa sang templo?
Tema sang Young Women
Pinalangga ako nga anak nga babayi sang langitnon nga mga ginikanan, nga may diosnon nga kinaiya kag wala katapusan nga kapalaran.
Bilang disipulo ni Jesucristo, nagatinguha ako nga mangin pareho sa Iya. Nagahandum ako kag nagaakto sa personal nga rebelasyon kag nagaminister sa iban sa Iya balaan nga ngalan.
Magatindog ako bilang saksi sang Dios sa tanan nga oras kag sa tanan nga butang kag sa tanan nga lugar.
Samtang nagatinguha ako nga mangin bagay sa pangkahitaasan, halungan ko ang regalo sang paghinulsol kag magtinguha nga mag-uswag kada adlaw. Nga may pagtuo, pabakuron ko ang akon puluy-an kag panimalay, maghimo kag magtuman sang sagrado nga mga kasugtanan, kag magbaton sang mga ordinansa kag mga bugay sang balaan nga templo.
Tema sang Aaronic Priesthood Quorum
Pinalangga ako nga anak nga lalaki sang Dios, kag may buluhaton Sia para sa akon.
Upod ang bug-os ko nga tagipusuon, ikasarang, panghunahuna, kag kusog, higugmaon ko ang Dios, tumanon ang akon mga kasugtanan, kag gamiton ang Iya priesthood sa pag-alagad sa iban, sugod sa akon kaugalingon nga puluy-an.
Mientras nagatinguha ako nga magserbisyo, magpakita sang pagtuo, maghinulsol kag mag-uswag tagsa ka adlaw, mangin angayan ako sa pagbaton sang mga bugay sang templo kag sang nagadugay nga kalipay sang ebanghelyo.
Magahanda ako nga mangin matutom nga misyonero, tampad nga bana, kag mapinalanggaon nga amay paagi sa pagkamatuod-tuod nga disipulo ni Jesucristo.
Magabulig ako sa paghanda sang kalibutan para sa pagbalik sang Manluluwas paagi sa pag-agda sang tanan nga magkari kay Cristo kag magbaton sang mga bugay sang Iya Pagbayad-Sala.
Ang Napulo ka Sugo
Indi ka magsimba sa iban nga mga dios, luas sa akon.
Indi ka maghimo para sa imo kaugalingon sang larawan nga tinigban.
Indi mo paggamiton sa wala sing pulos ang ngalan sang Ginuo nga imo Dios.
Dumduma ang adlaw nga inugpahuway, sa pagpakabalaan sini.
Tahura ang imo amay kag iloy.
Indi ka magpatay.
Indi ka magpanglahi.
Indi ka magpangawat.
Indi ka magsaksi sing binutig sa imo isigkatawo.
Indi ka magkaibog.
Tan-awa sa Exodo 20:3–17.