Dalagita nga nagapangamuyo sa iya hiligdaan.

Maghimo sang inspirado nga mga pagpili

Sa Para sa Kusog sang mga Lamharon, makita mo ang mga pinanudlo ni Jesucristo kag sang Iya mga propeta. Upod ining mga kamatuoran bilang imo giya, makahimo ka sang inspirado nga mga pagpili nga magabugay sa imo sa karon kag sa bilog nga wala katubtuban.

Si Jesucristo amo ang dalan pakadto sa kalipay nga wala katapusan. Samtang imo ginagamit ang imo kahilwayan sa pagpili nga sundon si Jesucristo, ara ka sa dalan nga nagapadulong sa wala katapusan nga kalipayan. Himoa si Jesucristo nga imo sulundan, imo mabaskog-pa-sa-bato nga pundasyon. Itukod ang imo kabuhi sa Iya mga pinanudlo, kag taksa ang imo mga pagpili base sa mga ini. Ang mga kasugtanan nga imo ginhimo sa bunyag, sa tion sang sakramento, kag sa templo amo ang mga halamtangan sang imo mabakod nga pundasyon kay Cristo. Magapangatubang ka gihapon sang mga kabudlayan kag tentasyon, pero ang Amay nga Langitnon kag ang Manluluwas magabulig sa imo nga malampuwasan ang mga ini.

Pinalangga ka nga espiritu nga anak sang Dios. Ang Iya dako nga plano sang kalipayan nagapatigayon nga magtubo ka sa espirituhanon kag pauswagon ang imo diosnon nga kapalaran. Amo Ini ang rason kon ngaa ginpadala Niya si Jesucristo nga mangin imo Manluluwas.

Nagasalig ang Imo Amay sa Langit sa imo. Ginhatagan ka Niya sang dalagko nga mga bugay, lakip na ang kabug-osan sang ebanghelyo kag ang sagrado nga mga ordinansa kag mga kasugtanan nga nagabugkos sa imo sa Iya kag nagadala sang Iya gahum sa imo kabuhi. Upod sinang mga bugay ang dugang nga responsibilidad. Nakahibalo Sia nga masarangan mo maghimo sang kinalain sa kalibutan, kag nagapangayo ina, sa madamo nga kahigayunan, nga mangin lain ka sa kalibutan. Pangayoa ang giya sang Amay nga Langitnon samtang nagahimo ka sang mga pagpili. Bugayan ka Niya sang inspirasyon paagi sa Balaan nga Espiritu.

Ang tuyo sang Para sa Kusog sang mga Lamharon indi ang sabton ka sang “huo” ukon “indi” sa tanan nga posible nga pagpili nga imo atubangon. Kundi, ginaagda ka sang Ginuo nga magpangabuhi sang mas mataas kag mas balaan nga paagi—sa Iya paagi. Ining giya magatudlo sa imo parte sa Iya paagi. Ginapaathag sini ang mga kamatuoran nga Iya ginpahayag. Himoa ining mga kamatuoran nga imo giya sa paghimo sang mga pagpili—dalagko nga mga pagpili, pareho sang paghimo sang mga kasugtanan sa templo kag pag-alagad sa misyon, amo man sang adlaw-adlaw nga mga pagpili, pareho sang kon paano trataron ang mga tawo ukon paano gamiton ang imo oras.

Bisan makabulig ang iban sa imo, ang imo espirituhanon nga pagtubo personal nga butang. Sa tunga mo ini kag sang Ginuo. Nahibal-an Niya ang imo tagipusuon, kag Sia lamang ang mangin katapusan nga Hukom. Himoa ang imo pinakamaayo para mag-uswag kada adlaw, tumana ang mga kasuguan sang Dios kag respetuha ang imo mga kasugtanan, kag buligi ang iban nga mas magpalapit sa Manluluwas.

Tan-awa sa Mosias 4:29–30 (ang paagi sa pagpakasala tama kadamo, gani kinahanglan naton bantayan ang aton kaugalingon); Helaman 5:12 (ipasad ang imo pundasyon kay Cristo); Doktrina kag mga Kasugtanan 45:57 (himoa ang Espiritu nga Balaan nga imo giya); 82:15 (ihigot ang imo kaugalingon sa Ginuo paagi sa mga kasugtanan).

mga tawo nga nagagamit sang icon sang mapa

Paano gin-organisar ining giya

Ang tagsa ka topiko may tatlo ka bahin:

1. Wala katapusan nga mga kamatuoran, ukon doktrina sang ginpanumbalik nga ebanghelyo ni Jesucristo

2. Mga pangagda nga aktohan ina nga mga kamatuoran

3. Ginpromisa nga mga bugay nga ginatanyag sang Ginuo sa mga nagapangabuhi sang Iya mga pinanudlo