Hōho’a pēni nō te hō’ē vahine e pure ra.

E mea mo’a tō ’oe tino

1 Korinetia 6:18–20

e mau ta’ata e ha’uti ra i te tu’era’a pōpō

E hōro’a fa’ahiahia tō ’oe tino nō ’ō mai i tō ’oe Metua i te ao ra. ’Ua hōro’a mai ’oia i te reira ’ia riro ’oe mai iāna ra te huru. Maoti te tino e mana rahi a’e tō ’oe nō te fa’a’ohipa i tō ’oe ti’amāra’a ’ia mā’iti. E nehenehe te ’evanelia a Iesu Mesia i fa’aho’ihia mai e tauturu ia ’oe ’ia hi’o i tō ’oe tino mai tā te Atua e hi’o nei. ’E e ’ohipa ta’a ’ē rahi tā te reira i roto i tā ’oe mau mā’itira’a nō ni’a i te mea tā ’oe e rave i tō ’oe na tino, ’e te huru e aupuru i te reira.

Te mau parau mau mure ’ore

Tei te hōho’a o te Atua tō ’oe tino—’o te tino ora hanahana roa a’e ’e te tura ari’i i roto i te ra’i nui ātea. Tē fa’aau nei te mau pāpa’ira’a mo’a i tō tātou tino i te hō’ē hiero mo’a, e vāhi i reira te Vārua e pārahi ai. Parau mau, ’aita tō ’oe tino i te fāito maita’i roa i teienei. Terā rā, te mau ’ohipa e tupu ’a vai ai ’oe i roto i te tino, e tauturu ïa ia ’oe ’ia fa’aineine nō te fāri’i i te hō’ē tino maita’i roa ’e te ti’afa’ahou ’e te hanahana, ’ia tae i te hō’ē mahana.

Tō ’oe vairua, ’o tō ’oe tino ïa ’e tō ’oe vārua. Nō reira, ’ua tū’ati rahi te ea pae tino ’e te ea pae vārua. ’Ua heheu mai te Fa’aora i te Parau pa’ari nō te ha’api’i ia ’oe i te mau parau tumu nō te aupurura’a i tō ’oe tino—’e nō te parau fafau i te mau ha’amaita’ira’a i te pae tino ’e i te pae vārua.

’Ua riro te hereherera’a ’ei tuha’a faufa’a rahi i roto i te fa’anahora’a a te Atua, nō te fa’atupu i te mau fa’aipoipora’a ’oa’oa ’e te mau ’utuāfare mure ’ore. E ’ere te reira mau mana’o i te hara—e mea mo’a rā. Nō te mo’a rahi ’e te pūai rahi o te hereherera’a, ’ua hōro’a te Atua ia ’oe i tāna ture nō te vi’ivi’i ’ore, nō te fa’aineine ia ’oe ’ia fa’a’ohipa i te reira mau mana’o mai tei ’ōpuahia. Tē parau nei te ture nō te vi’ivi’i ore ē, tē fāri’i nei te Atua i te ’ohipa hereherera’a i rotopū noa i te hō’ē tāne ’e te hō’ē vahine tei fa’aipoipohia. E rave rahi i roto i te ao nei e tāu’a ore nei ’e e fa’ao’ō’o nei i te ture a te Atua, tē ani nei rā te Fatu ia tātou ’ia riro ’ei pipi nāna ’e ’ia ora i te hō’ē ture teitei a’e i tā te ao nei.

E ’utuāfare e hāhaere ra nā ni’a i te purūmu o te ’oire.

Te mau tītaura’a manihini

’A rave i tō ’oe tino—’e te tino o vetahi ’ē—ma te fa’atura. ’Ia rave ’oe i te mau fa’aotira’a nō ni’a i tō ’oe ’ahu, tō ’oe rouru ’e tō ’oe hōho’a, ’a ui ia ’oe iho : « Tē fa’atura ra ānei au i tō’u tino mai te hō’ē hōro’a mo’a nō ’ō mai i te Atua ra ? » Tē hina’aro nei te Metua i te ao ra ’ia hi’o tātou i te tahi ’e te tahi i tō tātou huru mau : ’eiaha mai te mau tino tāhuti noa, mai te mau tāmari’i here rā nāna, ma te hope’a hanahana. ’A ’ape i te huru haere’a e tūra’i ’aore rā e ’ume i te hi’ora’a ti’a ’ore i ni’a i tō ’oe tino, ’e ’aita atu ra ïa te hi’ora’a i ni’a i tō ’oe huru mau ’ei tamari’i nā te Atua ma te ananahi mure ’ore. ’Ia arata’i te vai-mā-ra’a i te pae mōrare ’e te here i te Atua i tā ’oe mau mā’itira’a. ’A ani i te a’o a tō metua.

E piti taure’are’a tamāroa i roto i te fa’a.

’A rave i te mau mea ’otē ha’apūai i tō ’oe tino—’eiaha te mea e ha’apēpē ’aore rā e tū’ino i te reira. ’A oa’oa ’e ’a māuruuru i te mau maita’i e rave rahi tā te Atua i hōro’a mai. ’A ha’amana’o rā ē, e ’ere te ’ava, te ’ava’ava, te taofe, te tī ’e te tahi atu mau rā’au taero ’e te mau mea ’ino nō tō ’oe tino ’e nō tō ’oe vārua. E nehenehe ato’a te tahi mau rā’au, mai te mau rā’au e hōro’ahia mai e te taote e fa’atupu i te fifi, mai te mea ’aita e fa’a’ohipa-tano-hia.

’A fa’ariro noa i te ’āpeni ’e te hereherera’a ’ei ’ohipa mo’a. ’Eiaha te reira ’ia riro ’ei parau ha’uti ’e te fa’a’ārearea. I rāpae i te fa’aipoipora’a o te hō’ē tāne ’e te hō’ē vahine, e mea hape ’ia tāpe’ape’a i te mau vāhi ta’a ’ē ’e te mo’a o te tino o te hō’ē ta’ata, noa atu e mea nā ni’a i te ’ahu. ’Ia mā’iti ’oe i tā ’oe mea e rave, e hi’o, e tai’o, e fa’aro’o, e feruri, e pia ’e e hāpono, ’a ’ape i te mau mea ato’a e fa’aauma’i i te mau mana’o ’iminave i roto i te ta’ata ’e ia ’oe iho. ’O te hōho’a faufau ato’a ïa, noa atu te ’ohipa, noa atu te ’ohipa. Mai te mea tē ’ite ra ’oe ē, e pūai fa’ahou mai te mau fa’ahemara’a nō terā vaira’a ’aore rā nō terā ’ohipa, ’a ’ape i te reira. ’Ua ’ite iho ā ’oe e aha te reira huru vaira’a ’e te reira huru ’ohipa. ’E mai te peu noa atu ’aita ’oe i pāpū, nā te Vārua, nā tō ’oe nā metua ’e tō ’oe nā feiā fa’atere e tauturu mai ia ’oe ’ia ’ite. ’A fa’a’ite i tō ’oe Metua i te ao ra ē, tē fa’atura nei ’oe ’e te ha’apa’o maita’i nei ’oe i te mana mo’a nō te hāmani i te ora.

E piti tamāroa e tauturu ra i tō rāua māmā e tunu i te mā’a.

Te mau ha’amaita’ira’a i parauhia

E rahi tō ’oe fa’atura ia ’oe ’e ia vetahi ’ē ’ia fa’atura ’oe i tō ’oe tino, nā roto i tā ’oe mau peu, tō ’oe hōho’a ’e tō ’oe ’ahu.

’Ua fafau te Fatu i te mau tao’a rahi nō te ’ite i te feiā e ha’apa’o i te Parau Paari. E fa’arahi ato’a te tino maita’i, ’aita e ma’i fa’atītī, i tō ’oe ’aravihi ’ia fāri’i i te heheura’a nō ’oe iho, ’ia feruri maita’i ’e ’ia tāvini i te Fatu.

E tae mai te mana’o fāri’i o te Atua ’e tō ’oe iho mana pae vārua, i te orara’a i te ture nō te vi’ivi’i ’ore. ’Ia fa’aipoipo ’oe, e fa’atae mai te reira ture i te here rahi a’e ’e te ti’aturi ’e te tāhō’ē i roto i tō ’oe fa’aipoipora’a. I te ha’apa’ora’a i teie ture ’oe e haere ai i mua i roto i te tau mure ’ore, ma te riro rahi atu ā mai tō ’oe Metua i te ao ra te huru. E rahi tō ’oe ti’aturi ’ia ora ana’e ’oe mai te hō’ē pipi nā Iesu Mesia.

Hōho’a pēni nō Iesu e poro ra ia Maria ’e ia Mareta.

ītona nō te uira’a ’e pāhonora’a

Uira’a ’e pāhonora’a

E aha te fa’aturera’a a te Fatu nō ni’a i te ’ahu, te fa’anehenehera’a, te tātaura’a ’e te pātiara’a i te tino ? Te fa’aturera’a a te Fatu, ’o te fa’aturara’a ïa ’oe i te mo’ara’a o tō ’oe tino, noa atu ē e hi’ora’a ’ē tō ’oe i tō te ao nei. ’Ia arata’i teie parau mau ’e te Vārua i tā ’oe mau fa’aotira’a—te mau fa’aotira’a iho ā rā e fa’ahope’ara’a vai maoro i ni’a i tō ’oe tino. ’Ei taure’are’a pa’ari ’oe ’e te ha’apa’o maita’i, ’e ’ia ’imi ’oe i te parau a’o a tō metua ’e tō feiā fa’atere.

Nāhea vau e upo’oti’a ai i ni’a i te mau fa’ahemara’a ’e te mau peu ’ino ? E mana tō te Metua i te ao ra ’e tō Iesu Mesia nō te tauturu ia ’oe. ’A fa’a’ī i tō ’oe orara’a i te mau mea e tītau i taua mana ra i roto i tō ’oe orara’a, mai te pure, te tuatāpapara’a pāpa’ira’a mo’a, ’e te tāvinira’a ia vetahi ’ē. ’A fāriu i ni’a ia Iesu Mesia ’e tāna evanelia, e ’ite ïa ’oe ē, e nehenehe te mau paruparu e riro mai ’ei pūai. ’A tītau i te tauturu a te mau metua, te feiā fa’atere ’e te feiā tōro’a fa’aa’o mai te mea e tītauhia. Nō rātou i raro a’e i te ma’i fa’atītī, tē vai nei tā te ’Ēkālesia te hō’ē fa’anahora’a fa’aora ma’i fa’atītī. E mau ha’amaita’ira’a teie tā te ’Ēkālesia a te Fa’aora e hōro’a nei nō te tauturu ia ’oe ’ia fa’atere fa’ahou ā i tō ’oe orara’a. E tītauhia te taime, nō reira ’a fa’a’oroma’i ’e ’eiaha roa atu e fa’aru’e.

E tamāhine e tai’o ra i te mau pāpa’ira’a mo’a.

Tē fa’ahina’aro nei au i te mau ta’ata nō tō’u ’āpeni. Nāhea ïa teie mau fa’aturera’a i te tano i ni’a iā’u ? E ’ere te mana’o fa’ahina’arora’a ta’ata nō tōna iho ’āpeni i te hara. Mai te mea ’o te reira tō ’oe mau mana’o ’e ’aita ’oe e pe’e nei i te reira, ’aore rā ’aita ’oe e rave nei i te reira, tē ha’apa’o nei ïa ’oe i te ture mo’a a te Metua i te ao ra nō te vi’ivi’i ’ore. E tamari’i here ’oe nā te Atua ’e e pipi ho’i nā Iesu Mesia. ’A ha’amana’o ē, ’ua māramarama te Fa’aora i te mau mea ato’a e tupu ra i ni’a ia ’oe. Nā roto i tō ’oe tū’atira’a iāna ’e tā ’oe fafaura’a i mua iāna, e ’ite mai ’oe i te pūai nō te ha’apa’o i te mau fa’auera’a a te Atua ’e nō te fāri’i i te mau ha’amaita’ira’a tāna e parau fafau nei. ’A ti’aturi iāna ’e i tāna ’evanelia.

’Ua rave-’ino-hia vau, ’e ’ua ha’amā vau. ’Ua hara ānei au ? E ’ere nō te mea ’ua ’ati ’oe i te hāmani-’ino-ra’a ’aore rā i te rave-’ino-ra’a, ’ua riro ïa ’oe ’ei ta’ata hara. ’Eiaha roa e mana’o ē, ’ua hara ’oe ’aore rā e mea ha’amā ’oe. ’Ua here te Fa’aora ia ’oe. ’Ua hina’aro ’oia i te tauturu ia ’oe, i te fa’aora i tō ’oe māuiui ’e i te fa’ahau ia ’oe. E nehenehe ato’a te feiā tōro’a fa’aa’o, te mau melo nō tō ’oe ’utuāfare ’e tō ’oe feiā fa’atere e tauturu mai.

Hi’o Genese 1:27 (’ua hāmanihia tātou i te hōho’a o te Atua) ; Ioane 14:18 (te parau fafau nei te Fa’aora i te tāmāhanahanara’a) ; Philipi 4:7 (’ua hau ’ē atu te hau o te Atua i te ’ite ta’ata nei) ; Te Ha’api’ira’a Tumu ’e te mau Fafaura’a 88:15 (te vārua ’e te tino, ’o te vairua ïa) ; 89 (te Parau pa’ari) ; 121:45 (e noa’a te ti’aturi rahi a’e i te ma mana’o paieti).

ītona nō te hiero

Te mau uira’a nō te parau fa’ati’a nō te hiero

’Ua parau te Fatu ē, ’ia « rave-mā-hia » te mau mea ato’a i mua iāna (Te Ha’api’ira’a Tumu ’e te mau Fafaura’a 42:41). Tē tūtava ra ānei ’oe ’ia vai mā i te pae mōrare, i roto i tō ’oe mau mana’o ’e te mau haere’a ? Tē ha’apa’o ra ānei ’oe i te ture nō te vi’ivi’i ’ore ?

Tē māramarama ra ānei ’oe i te parau pa’ari ’e tē ha’apa’o ra ānei ’oe i te reira ?

Te aupurura’a i tō ’oe tino, ’o te aupurura’a ïa i tō ’oe ea i te pae nō te ferurira’a ’e i te pae manava

E vahine ’e te hō’ē tamāhine e hāhaere ’āmui ra, ma te tauahi te tahi i te tahi.

E ’oto tātou ’e e ha’ape’ape’a tātou i te tahi taime, mai terā iho ā.mai terā iho ā. E’ita ana’e tā ’oe e nehenehe ’ia māhuti i rāpae i teie mau mana’o ’e ’ia maita’i mai, e tāpa’o paha ïa ē, e fifi teie i te pae nō te ferurira’a ’e te manava e tītauhia te tauturu a te metua, ’aore rā te ti’a fa’atere ’aore rā te taote ’aore rā te tahi ta’ata tōro’a fa’aa’o. E riro ē, ’o te reira tauturu te ha’amaita’ira’a a tō ’oe Metua here i te ra’i. Mai te mea noa atu e tupu tō ’oe mana’o e ha’apēpē ia ’oe iho, ’aore rā e ha’apohe ia ’oe, ’a tītau i te tauturu i reira ra. ’A ha’amana’o ē, e taure’are’a herehia ’oe ’e te hoturoto ’e te hina’arohia. Ta’a ’ē noa atu tō ’oe fifi i te pae manava ānei ’e i te pae nō te ferurira’a, ’a ’imi i te hau i roto ia Iesu Mesia ’e tāna ’evanelia.

E pēni nō Iesu Mesia ’e tōna rima toro.