Նկար. Տղամարդը խնամքով գրկել է երեսնիվայր պառկած, հյուծված, տղամարդու վիրակապված գլուխը

Սիրեք Աստծուն և սիրեք ձեր ընկերոջը

Մատթեոս 22.37-40

ծառայություն կատարող մարդիկ, պատկերակ

Աստված պատվիրաններ է տալիս, որպեսզի օգնի ձեզ լավ ընտրություններ կատարել: Նա անում է դա, քանի որ սիրում է ձեզ: Եվ Աստծո պատվիրաններին հնազանդվելու լավագույն պատճառն այն է, որ դուք սիրում եք Նրան: Սերը Աստծո պատվիրանների հիմքում է:

Երիտասարդ տղամարդը փողոցում հրում է հաշմանդամի սայլակում նստած տարեց կնոջը:

Հավերժական ճշմարտություններ

Աստված սիրում է ձեզ: Նա ձեր Հայրն է: Նրա կատարյալ սերը կարող է ոգեշնչել, որ դուք սիրեք Նրան: Երբ ձեր սերը Երկնային Հոր հանդեպ ամենակարևոր ազդեցությունն է ձեր կյանքում, շատ որոշումներ ավելի հեշտ են դառնում:

Հիսուսի ուսուցանած երկու մեծագույն պատվիրաններն են՝ սիրել Աստծուն և սիրել ձեր ընկերոջը: Իսկ ո՞վ է քո ընկերը։ Ամեն ո՛ք: Սուրբ գրություններում և մարգարեների կողմից ուսուցանված մնացած ամեն ինչ կապված է այս երկու պատվիրանների հետ:

Բոլոր մարդիկ ձեր եղբայրներն ու քույրերն են, ներառյալ, իհարկե, մարդիկ, որոնք տարբերվում են ձեզանից կամ համաձայն չեն ձեզ հետ: Երկնային Հայրը ցանկանում է, որ Իր զավակները սիրեն միմյանց: Երբ դուք ծառայում եք Նրա զավակներին, դուք ծառայում եք Նրան:

Հրավերներ

Աստծո հանդեպ սեր ցույց տվեք՝ պահելով Նրա պատվիրանները: Օրինակ՝ Հանգստության օրը սուրբ պահելով, այդ թվում՝ հավատարմորեն պատրաստվելով և ճաշակելով հաղորդությունը, դուք ցույց եք տալիս Աստծուն, որ պատրաստ եք շաբաթական մեկ օր նվիրել Նրան: Երբ ծոմ եք պահում և վճարում տասանորդն ու նվիրաբերությունները, դուք ցույց եք տալիս Աստծուն, որ Նրա աշխատանքը ձեզ համար ավելի կարևոր է, քան նյութական բաները: Երբ դուք օգտագործում եք Աստծո և Քրիստոսի անունները ակնածանքով, ոչ երբևէ իզուր կամ պատահական ձևով, դուք ցույց եք տալիս, որ երախտապարտ եք այն ամենի համար, ինչ Նրանք արել են ձեզ համար:

Յուրաքանչյուրին վերաբերվեք՝ որպես Աստծո զավակի: Որպես Հիսուս Քրիստոսի աշակերտ՝ դուք կարող եք օրինակ ծառայել՝ սիրով, հարգանքով և ընդգրկվածությամբ վերաբերվելով բոլոր ռասաների և կրոնների մարդկանց և ցանկացած այլ խմբերի, հատկապես նրանց, ովքեր երբեմն վիրավորական խոսքերի և արարքների զոհ են դառնում: Սատարեք նրանց, ովքեր զգում են միայնակ, մեկուսացված կամ անօգնական: Օգնեք նրանց զգալ Երկնային Հոր սերը ձեր միջոցով:

Երկու երիտասարդ տղամարդիկ՝ վերնաշապիկներով և փողկապներով։

Համոզվեք, որ ձեր խոսքերը սեր են արտացոլում Աստծո և ուրիշների հանդեպ՝ անկախ նրանից՝ դուք անձամբ եք շփվում, թե հեռավար: Ասեք այնպիսի բաներ, որոնք ոգևորում են, և մի ասեք որևէ բան, որը կարող է պառակտող, վնասակար կամ վիրավորական լինել, նույնիսկ՝ կատակով: Ձեր խոսքերը կարող են հզոր լինել: Թող ձեր խոսքերը լավ ազդեցություն ունենան ուրիշների վրա:

Աստծո բոլոր զավակներին սիրելը սկսվում է տնից: Կատարեք ձեր բաժինը՝ ձեր տունը դարձնելով մի վայր, որտեղ բոլորը կարող են զգալ Փրկչի սերը:

Խոստացված օրհնություններ

Աստծո հետ ձեր հարաբերությունները կխորանան, երբ դուք արտահայտեք ձեր սերը՝ հնազանդվելով Նրա պատվիրաններին և պահելով Նրա հետ ունեցած ձեր ուխտերը:

Ձեր հարաբերությունները ուրիշների հետ կխորանան, երբ դուք արտահայտեք ձեր սերը Քրիստոսանման ծառայության միջոցով: Դուք ուրախություն կգտնեք՝ աշխարհն ավելի սիրող վայր դարձնելով:

հարցերի և պատասխանների պատկերակ

Հարցեր և պատասխաններ

Ինչպե՞ս կարող եմ զգալ Աստծո սերը: Երկնային Հոր սերը միշտ հասանելի է: Հաճախ խոսեք Նրա հետ աղոթքի միջոցով: Կիսվեք Նրա հետ ձեր զգացմունքներով և լսեք Նրա հուշումները: Կարդացեք Նրա խոսքերը սուրբ գրություններում: Մտածեք այն ամենի մասին, ինչ Նա արել է ձեզ համար: Ժամանակ անցկացրեք այն վայրերում և այնպիսի միջոցառումներում, որտեղ ներկա է Նրա Հոգին:

Արդյո՞ք Տերն ակնկալում է, որ ես սիրեմ բոլորին, նույնիսկ նրանց, ովքեր վատ են վերաբերվում ինձ: Տերն ակնկալում է, որ դուք սիրեք ձեր թշնամիներին և աղոթեք նրանց համար, ովքեր վատ են վերաբերվում ձեզ: Սակայն, դա չի նշանակում, որ դուք պետք է մնաք այնպիսի իրավիճակում, որը ձեզ հուզական, ֆիզիկական կամ հոգևոր վնաս է պատճառում: Առողջ սահմաններ դրեք՝ ձեր անվտանգությունն ապահովելու համար: Եթե դուք ենթարկվում եք ծաղր ու ծանակի կամ բռնության, կամ եթե գիտեք, որ դա տեղի է ունենում մեկ ուրիշի հետ, խոսեք վստահելի մեծահասակի հետ:

Ե՞րբ և ինչպե՞ս պետք է ծանոթանամ հակառակ սեռի ներկայացուցիչների հետ: Ուրիշներին ճանաչելու լավագույն միջոցը իսկական բարեկամությունն է: Քանի դեռ երիտասարդ եք, լավ ընկերական հարաբերություններ հաստատեք շատերի հետ։ Որոշ մշակույթներում երիտասարդները ծանոթանում են հակառակ սեռի ներկայացուցիչների հետ առողջ խմբային գործունեության միջոցով: Ձեր հուզական և հոգևոր զարգացման ու անվտանգության համար անհատական միջոցառումները պետք է հետաձգվեն, մինչև հասունանալը. 16 տարեկանը լավ ուղենիշ է: Խորհրդակցեք ձեր ծնողների և ղեկավարների հետ: Պահեք այդ բացառիկ հարաբերությունները, երբ դուք ավելի մեծ եք: Ժամանակ անցկացրեք նրանց հետ, ովքեր օգնում են ձեզ պահել ձեր պարտավորությունները Հիսուս Քրիստոսի հանդեպ:

Ի՞նչ կարող եմ անել, եթե իմ տունը սիրո վայր չէ: Ձեր Փրկիչը գիտի ձեր վիճակը, և Նա սիրում է ձեզ: Եղեք համբերատար, շարունակեք պահել Աստծո պատվիրանները և լավ օրինակ եղեք ձեր ընտանիքի համար: Ստեղծեք հարաբերություններ ձեր ծխի ընտանիքում: Այժմ պատրաստվեք կառուցելու ձեր սեփական ընտանիքը՝ հիմնված Հիսուս Քրիստոսի ուսմունքների վրա:

Տես Եսայի 58.3–11 (ծոմի նպատակները), 58.13–14 (Հանգստյան օրը հարգելու օրհնություններ), Մաղաքիա 3.8–10 (տասանորդ վճարելու օրհնություններ), Ղուկաս 6.27–28 (սիրեք ձեր թշնամիներին), 10.25–37 (ո՞վ է իմ ընկերը), Հովհաննես 3.16–17 (), 14.15 (մենք պահում ենք պատվիրանները, որովհետև սիրում ենք Աստծուն), Ա Հովհաննես 4.19 (Աստված սիրեց մեզ, ուստի Նա ուղարկեց Իր Որդուն), Մոսիա 2.17 (երբ մենք ծառայում ենք ուրիշներին, մենք ծառայում ենք Աստծուն):

Տաճարի պատկերակ

Տաճարային երաշխավորագրի հարցազրույցի հարցեր

Դուք հետևո՞ւմ եք Հիսուս Քրիստոսի Եկեղեցու ուսմունքներին Ձեր ընտանիքի անդամների կամ ուրիշների հետ Ձեր անձնական կամ հասարակական հարաբերություններում։

Դուք ձգտո՞ւմ եք սուրբ պահել Հանգստության օրը՝ տանը և եկեղեցում, հաճախել Ձեր ժողովներին, պատրաստվել և արժանիորեն ընդունել հաղորդությունը, և ապրել ավետարանի օրենքներին ու պատվիրաններին ներդաշնակ կյանքով:

Դուք լիարժեք տասանորդ վճարո՞ղ եք: