ចុះចំពោះក្រុមគ្រួសាររបស់ខ្ញុំវិញ ?
មានមនុស្សជាច្រើនមើលទៅស្ថានភាពបច្ចុប្បន្ននៃក្រុមគ្រួសាររបស់ពួកគេ ហើយឆ្ងល់ថា តើពួកគេនឹងអាចទទួលពរជ័យឲ្យមានកុ្រមគ្រួសារដ៏នៅអស់កល្បជានិច្ចមួយបានតាមរបៀបណា ។ ព្រះជាព្រះវរបិតាសួគ៌របស់អ្នក ជ្រាបអំពីកង្វល់របស់អ្នក ហើយទ្រង់ស្គាល់អ្នក ថែមទាំងមានព្រះទ័យស្រឡាញ់ក្រុមគ្រួសាររបស់អ្នក ។ ក្រុមគ្រួសារទាំងអស់សុទ្ធតែជួបនឹងឧបសគ្គ ហើយគ្មានគ្រួសារណាមួយដែលល្អឥតខ្ចោះនោះទេ ប៉ុន្តែដំណឹងល្អនៃព្រះយេស៊ូវគ្រីស្ទអាចព្យាបាល ហើយជួយយើងម្នាក់ៗបាន ។ នៅពេលក្រុមគ្រួសារខិតខំរស់នៅតាមដំណឹងល្អដោយស្មោះត្រង់ ពួកគេអាចដោះស្រាយការយល់ច្រឡំ ការទាស់ទែងគ្នា និង ឧបសគ្គនានាបាន ។ យើងអាចយកឈ្នះលើរាល់ភាពមិនល្អឥតខ្ចោះ និង ភាពអយុត្តិធម៌ក្នុងជីវិតនេះបាន តាមរយៈដង្វាយធួនរបស់ព្រះយេស៊ូវគ្រីស្ទ ។
ព្រះបានមានព្រះបន្ទូលសន្យាថា ពរជ័យនៃអាពាហ៍ពិពាហ៍ ក្រុមគ្រួសារ និង ជីវិតដ៏នៅអស់កល្បជានិច្ច នឹងមានដល់បុត្រាបុត្រីទ្រង់គ្រប់គ្នា ដែលទទួលយក ហើយធ្វើតាមផែនការនៃសុភមង្គលរបស់ទ្រង់ ។ ការទទួលខុសត្រូវរបស់អ្នកគឺ ត្រូវមានសេចក្ដីជំនឿទៅលើបន្ទូលសន្យានេះ ហើយធ្វើតាមគំរូរបស់ព្រះយេស៊ូវគ្រីស្ទ ។
នៅពេលអ្នកបន្តរក្សាសេចក្ដីសញ្ញារបស់អ្នក ហើយជួយមនុស្សដទៃឲ្យធ្វើដូចអ្នកដែរ នោះអ្នកនឹងទទួលអារម្មណ៍ភាពសុខសាន្ត និង អារម្មណ៍នៃព្រះចេស្ដារបស់ព្រះនៅក្នុងជីវិតរបស់អ្នក ។ ក្រុមគ្រួសាររបស់អ្នកនឹងមានពរតាមរយៈគំរូរបស់អ្នក ហើយព្រះវិញ្ញាណបរិសុទ្ធអាចបន្ទន់ដួងចិត្ត ហើយជួយអ្នកឲ្យស្គាល់របៀបពង្រឹងទំនាក់ទំនងជាមួយសមាជិកគ្រួសាររបស់អ្នកកាន់តែរឹងមាំ ។ សូមមានសេចក្ដីជំនឿថា ព្រះកំពុងរៀបចំសមាជិកម្នាក់ៗក្នុងគ្រួសាររបស់អ្នក គឺដូចជាទ្រង់បានរៀបចំអ្នកដែរ ។ អ្នកក៏អាចបម្រើគ្រួសារដ៏នៅអស់កល្បជានិច្ចរបស់អ្នកបានដែរ គឺនៅពេលអ្នកស្វែងរកឈ្មោះជីដូនជីតាអ្នក ហើយធ្វើពិធីបរិសុទ្ធក្នុងព្រះវិហារបរិសុទ្ធសម្រាប់ពួកគេ ។ ព្រះនឹងសម្រេចតាមបំណងប្រាថ្នារបស់អ្នកឲ្យមានពរជ័យនៃក្រុមគ្រួសារអស់កល្បជានិច្ច ទៅតាមពេលវេលា និង របៀបរបស់ទ្រង់ ។