តើខ្ញុំអាចចាប់ផ្ដើមស្រាវជ្រាវពង្សប្រវត្តិ និង ធ្វើពិធីបរិសុទ្ធក្នុងព្រះវិហារបរិសុទ្ធតាមរបៀបណា ?
អ្នកអាចស្រាវជ្រាវពង្សប្រវត្តិរបស់អ្នក ហើយធ្វើពិធីបរិសុទ្ធសម្រាប់ជីដូនជីតារបស់អ្នកតាមរយៈកិច្ចការដូចខាងក្រោម ៖
ស្វែងរក ។ ពិភាក្សាជាមួយសមាជិកគ្រួសារ ដើម្បីរៀនសូត្រពីព័ត៌មាន និង រឿងរ៉ាវផ្សេងៗអំពីជីដូនជីតារបស់អ្នក ។ សរសេរ ហើយរក្សាទុកព័ត៌មាននេះនៅក្នុង ក្រុមគ្រួសាររបស់ខ្ញុំ ៖ ដំណើររឿងដែលនាំយើងឲ្យជួបជុំគ្នា ជាកូនសៀវភៅដែលមាននៅលើគេហទំព័រ FamilySearch.org គេហទំព័ររបស់សាសនាចក្រ ។
យក ។ បន្ទាប់ពីអ្នកបានរៀនសូត្រ ហើយប្រមូលព័ត៌មានអំពីសមាជិកគ្រួសារដែលបានចែកឋាន ( មានដូចជាឈ្មោះ ថ្ងៃខែឆ្នាំកំណើត និង ទីកន្លែងកំណើត ថ្ងៃខែឆ្នាំទទួលមរណភាព និង ទីកន្លែងទទួលមរណភាព ព្រមទាំងហេតុការណ៍ និង ដំណើររឿងផ្សេងៗ ) ហើយ សូមយកឈ្មោះទាំងនេះទៅកាន់ព្រះវិហារបរិសុទ្ធ ហើយទទួលពិធីបរិសុទ្ធជំនួសពួកគេ ។ អ្នកផ្សព្វផ្សាយសាសនា ឬ សមាជិកសាសនាចក្រ អាចបង្រៀនអ្នកអំពីរបៀបធ្វើកិច្ចការនេះបាន ។
បង្រៀន ។ សូមជួយមនុស្សដទៃ ជាពិសេស សមាជិកគ្រួសាររបស់អ្នកឲ្យរៀនអំពីរបៀបស្វែងរកឈ្មោះជីដូនជីតារបស់ពួកគេបន្ថែមទៀត ។ ការចូលរួមរបស់សមាជិកគ្រួសារនៅក្នុងកិច្ចខិតខំប្រឹងប្រែងដើម្បីស្គាល់ ហើយបម្រើជីដូនជីតារបស់អ្នក អាចផ្ដល់ពរដល់គ្រួសារអ្នកឲ្យមានការការពារ និង ភាពរឹងមាំខាងវិញ្ញាណ ។ ពង្សប្រវត្តិ និង ពិធីបរិសុទ្ធក្នុងព្រះវិហារបរិសុទ្ធ អាចជួយឲ្យដួងចិត្តរបស់គ្រួសារចងភ្ជាប់នឹងគ្នា ។