Fesiliteitaina o Vaega

Ia Amataina (10 minute pe itiiti ifo)

Fesiliteita

Amata le fonotaga faaleaoaoga mo le fesiliteita faapenei:

1. Amata i se tatalo (ma se pese, pe a manaomia).

2. Atonu o le a saunia e le tagata faapitoa mo le ola tutoatasi po o se isi tagata o le komiti mo le ola tutoatasi se folasaga ma se molimau e tolu i le lima minute.

3. Fai atu i tagata taitoatasi e faailoa puupuu mai o ia (ia le silia ma le 30 sekone tagata taitasi).

4. Valaaulia le vaega atoa e tatala a latou tusi lesona ma mulimuli mai.

Afifio mai

Faitau

Faafetai mo lou naunau e auauna atu o se fesiliteita. O le a e fesoasoani e taitai se vaega toaitiiti o tagata ina ia ola tutoatasi atili e ala i le fesoasoani atu ia i latou ia aoaoina ni tomai fou faaletino ma ola i mataupu faavae o le talalelei. O le a avea oe ma se vaega o se mea matagofie. E mafai e vaega o le ola tutoatasi ona suia olaga. E le manaomia ona avea oe ma se tagata tomai silisili. Nao le mulimuli lava i anomea ma faalagolago i musumusuga mai le vaega ma le Agaga.

Talu ai e fai sina eseese o vaega o le ola tutoatasi mai isi vaega na tatou i ai, o lenei aoaoga o le a fesoasoani ia i tatou e aoao ma faataitai ai i mea e tulaga ese ai nei vaega. O le asō o le a taliina ai nisi o fesili masani e masani ona i ai i fesiliteita ao lei amataina se vaega:

• O le a le uiga o le ola tutoatasi?

• E faapefea ona faagaoioi vaega o le ola tutoatasi?

• O le a se mea e mafai ona ou faia ia avea ai ma se fesiliteita sili ona lelei?

E le gata i lenei aoaoga, ia mautinoa e te faitauina le Faaopoopoga i lou lava taimi ma siaki punaoa i le srs.lds.org ao amataina lau fonotaga muamua.

O le aoaoga i le aso, o le a foliga ma pei o fonotaga a le vaega o le ola tutoatasi o le a tatou fesiliteitaina. I lenei aoaoga ma i a tatou vaega o le ola tutoatasi, o le a tatou mulimuli i le anomea e pei ona tusia. O tusi lesona uma o le ola tutoatasi e i ai faamanatu e fesoasoani tatou te iloa ai le mea e fai. A tatou vaaia faamanatu nei, o le a tatou mulimuli i faatonuga nei:

siata, faatonuga mo faamanatu

Faitau

O lenei aoaoga ma tusi lesona o le a tatou faaaogaina i a tatou vaega e aofia ai le taimi ua fautuaina mo vaega, talanoaga, ma gaoioiga. E fesoasoani lenei mea tatou te faafoeina ai le taimi ma kava ai anomea. Tofi i taimi uma se tagata e vaaia le taimi mo fonotaga taitasi a le vaega e faatumauina ai le vaega i le faatulagaga.

Fesiliteita

Fai atu i se tasi pe manao e avea ma tagata e vaaia le taimi mo le vaega o totoe o le aoaoga.

O Le A Le Uiga O Le Ola Tutoatasi?

Faitau

“O le ola tutoatasi o le tomai, tautinoga, ma le taumafaiga e saunia mea faaleagaga ma faaletino e manaomia o le olaga mo le tagata lava ia ma le aiga” (Tusitaulima 2: Taitaiina o le Ekalesia [2010], 6.1.1). O le ola tutoatasi e le faapea e mafai ona tatou faia pe maua soo se mea tatou te mananao ai. Afai tatou te ola tutoatasi, tatou te iloa e ala i le alofa tunoa o Iesu Keriso, faatasi ai ma lo tatou faatuatua, o le a mafai ona tatou galulue mo mea manaomia faaleagaga ma faaletino o le olaga lea tatou te manaomia mo i tatou lava ma o tatou aiga. O vaega o le ola tutoatasi ua mamanuina e fesoasoani ia i tatou ia suia le ala o tatou ola ai, galulue faatasi ma le Alii ia tatou ola tutoatasi atili ai faaletino ma faaleagaga.

O le a tatou matamata i se vitio o loo talanoa mai ai tagata o le vaega ma taitai e uiga i o latou aafiaga i vaega o le ola tutoatasi. Ao e maimoa i le vitio, faalogo mo le auala na aafia ai e vaega o le ola tutoatasi tagata i le faaletino ma le faaleagaga.

Maimoa

“Self-Reliance: Tools to Become Better,” o loo maua i le srs.lds.org/videos. (E le maua le vitio? Ia faitau pea.)

Talanoa (2 minute)

O a ni ou aafiaga na fesoasoani ia te oe e aoao ai o le faaleagaga ma le faaletino e fesootai?

E Faapefea ona Faagaoioi Vaega o le Ola Tutoatasi?

Faitau

O vaega o le ola tutoatasi o ni tamai aufono o loo taulai atu e fesoasoani i tagata taitoatasi o le vaega ia tuputupu ae. E fa vaega o le ola tutoatasi e filifili mai ai:

• Saili se Galuega e Sili Atu

• Amataina ma le Faaolaina o La’u Pisinisi

• Tupe Patino

• A’oga mo se Galuega Lelei Atu

E mafai ona aoao tagata e uiga i vaega i o latou lava taimi, i se faigalotu, pe ala atu i se valaaulia tuusao atu. E filifili e tagata po o fea vaega latou te fia auai ai.

E masani lava ona toalaiti vaega, e itiiti ifo nai lo le toa 12 tagata. E fono le vaega i vaiaso taitasi mo le 12 vaiaso, ma o fonotaga taitasi e pe a ma le lua itula.

O vaega taitasi o le ola tutoatasi e taitaia e se fesiliteita (tatou). O vaega o le ola tutoatasi e fesiliteitaina, ae le aoaoina e se faiaoga. I le avea ai ma ni fesiliteita, e le o faamoemoeina i tatou ia avea ma ni tagata tomai silisili. Ae, ia tatou fesoasoani i le vaega ia mulimuli i anomea e pei ona tusiaina ma valaaulia tagata taitasi o le vaega ia auai.

O fonotaga taitasi a le vaega e mulimuli i se mataupu i le tusi lesona. E tofu mataupu taitasi ma ni vaega se lima o i ai ni taimi fautuaina. O nei vaega e lima o le ute po o le autu lea o se fonotaga a le vaega mo le ola tutoatasi. Ina ia faagaoioia se fonotaga a le vaega, na o le mulimuli lava i anomea ma taimi ua fautuaina atu—aua lava nei sikipiina se vaega.

Gaoioiga: (8 minute)

Sei o tatou faaaluina ni nai minute ma tagai i se tusi lesona mo le ola tutoatasi. O le a fesoasoani lenei mea tatou te iloa ai o le faagaoioia o se fonotaga a le vaega, na o le mulimuli lava i anomea. O le a tatou faia lenei gaoioiga faatasi o se vaega.

Laasaga 1: O le a tufa atu e le fesiliteita ni kopi o tusi lesona mo le ola tutoatasi. E mafai ona faasoa atu e tagata ma i latou o loo siomia ai i latou.

Laasaga 2: Faatasi ai o se vaega, ia susue tagata uma i le mataupu lona lua o le tusi lesona. Faatasi ai, o le a tatou saili i le mataupu ma sue vaega e lima o se fonotaga a le vaega mo le ola tutoatasi. Ao tatou mauaina vaega taitasi i le mataupu, o le a tatou taofi ma o le a faitau leotele e le fesiliteita faamatalaga o le vaega mai le siata lenei.

siata, vaega e lima o se fonotaga a le vaega mo le ola tutoatasi

aikona, sui fesiliteita

Sui Fesiliteita

Faitau

I le faaiuga o fonotaga taitasi, e mafai ona tatou fesoasoani i tagata o le tatou vaega e filifili se soa galue mo se fesoasoani ma le lagolagosua i le gasologa o le vaiaso. E mafai ona fesuisuiai soa galue i vaiaso taitasi. E masani lava e tutusa itupa ae e le o ni tagata o se aiga.

O le tuufaatasiga o mataupu faavae faaleagaga, tomai faaletino, ma le malosi o le vaega e fatuina ai se siosiomaga tulagaese o le aoaoina lea e fesoasoani i tagata e faaleleia o latou olaga. E pei o le a e vaaia i le vitio lenei, i o tatou vaega o le ola tutoatasi tatou te aoao ai mai ni punavai se tolu: o anomea, o le tasi ma le isi, ma le Agaga.

Maimoa

“The Power of the Group,” o loo maua i le srs.lds.org/videos. (E le maua le vitio? Ia faitau pea.)

Talanoa (2 minute)

O le a sou manatu e faapefea ona ese mai au vaega o le ola tutoatasi mai isi vasega po o vasega faalematata na e auai? Pe o le a faapefea ona latou tutusa?

aikona, sui fesiliteita

Sui Fesiliteita

O Le A Se Mea E Mafai Ona Ou Faia Ia Avea Ai Ma Se Fesiliteita Sili Ona Lelei?

Faitau

O le avea ma se fesiliteita e mafai ona avea ma se aafiaga matagofie. O fesiliteita sili ona mataala e faia mea matua lava e tolu:

• Fesiliteita, aua le aoao atu.

• Tausia lelei o isi tiutetauave.

• Auauana atu o se leoleo mamoe mo le vaega.

Fesiliteita, Aua Le Aoao Atu

Faitau

O vaega o le ola tutoatasi ua mamanuina ma le faamoemoe ina ia fesiliteitaina ma aua le aoaoina e se faiaoga. E le saunia e fesiliteita ni lesona, lauga atu i le vaega, pe sili atu ona tautala nai lo isi tagata o le vaega. Latou te mulimuli i anomea o kosi ma valaaulia tagata taitasi o le vaega ina ia auai tutusa. O fesiliteita e fesoasoani e fausia se siosiomaga lea e mafai ai e le Agaga ona aoao atu le vaega.

I le vitio e sosoo ai, matamata i auala na sui ai e se tasi o fesiliteita le aoao atu i le fesiliteitaina, ma le aafiaga i le vaega.

Maimoa

“How to Facilitate a Group,” o loo maua i le srs.lds.org/videos. (E le maua le vitio? Ia faitau pea.)

Talanoa (2 minute)

E faapefea ona ese le fesiliteitaina mai le aoao atu?

aikona, sui fesiliteita

Sui Fesiliteita

Faitau

I le avea ai ma se fesiliteita, e nafa i tatou ma le fausiaina o se siosiomaga lelei, faaaloalo, ma le fiafia i le aoaoina. Tatou te fesoasoani i tagata o tatou vaega e fetausiai i le tasi ma le isi ma faaali atu le alofa ma le lagolago.

Gaoioiga (5 minute)

O lisi nei o mea tatou te ono faia i le avea ai o i tatou ma fesiliteita a le o le fesoasoani po o le faatiga i le siosiomaga o le aoaoina o a tatou vaega. Fai atu i se tasi o tagata e faitau leotele ia lisi, ona talanoa lea o se vaega e uiga i le mafuaaga e fesoasoani pe faatiga ai nei mea.

siata, mea e fesoasoani ma faatiga

aikona, sui fesiliteita

Sui Fesiliteita

Faitau

I le avea ai ma fesiliteita, tatou te faia le faataitaiga. E mafai ona tatou fesoasoani i tagata o le tatou vaega e fausia se siosiomaga lelei ma le popole. E le faasolosolo atoatoa ai pea mea, ma i taimi e ono manaomia ai lo tatou fesoasoani i tagata o le vaega e vaai pe o faapefea ona aafia e a latou faatinoga le vaega ma pe faapefea ona suia i latou. O le a tatou talanoa atili e uiga i lenei mea i le isi a tatou gaoioiga.

Gaoioiga (10 minute)

Laasaga 1 (5 minute): Paga ma le tagata o loo i ou autafa, piki se tasi o vaaiga nei, ma talanoa pe faapefea ona e taulimaina.

Laasaga 2 (5 minute): Toe o mai faatasi o se vaega ma fetufaai mea na tou talanoa e uiga i ai.

Vaaiga Faataitai

• E toatasi pe toalua tagata o le vaega na tuuina mai ni faamatalaga e tele nai lo le vaega o totoe o le vaega, ao isi tagata o le vaega o loo taofiofi ma e le o faasoaina mai o latou aitia ma manatu.

• O se tasi o tagata o lau vaega e le o auai i talatalanoaga po o gaoioiga a le vaega.

• O se tasi o tagata o lau vaega o loo talanoa soo mai e uiga i mea e le o i ai i le autu. O ona manatu ua faigata ai ona tumau i le ala ma kavaina anomea i totonu o le taimi atofaina.

• O se tagata o le vaega o loo faigata ona faitau leotele mai. E te mafaufau pe na te le o maua le toafimalie pe atonu o matamuli.

• O loo faaauau pea ona tuai le amataina o le vaega ona o nisi o tagata o le vaega e le taunuu mai i le taimi sa’o ma e le lelei ou lagona pe a e amata e aunoa ma i latou.

Fesiliteita

Mo talanoaga nei e uiga i tiutetauave o le fesiliteita, atonu e aoga le toe fesuiai mai o le fesiliteitaina i le fesiliteita autu.

Ia Tausia Lelei Nai Isi Tiutetauave

Faitau

I le avea ai ma fesiliteita, ua tatou mauaina foi nai isi tiutetauave i fafo atu o a tatou fonotaga a le vaega. O le isi gaoioiga o le a tuuina atu ia te oe le avanoa e talanoa ai e uiga i nei tiutetauave.

Gaoioiga (10 minute)

O lisi nei o fesili o le a taitaia i tatou e ala atu i talanoaga e uiga i nisi o tiutetauave ua tatou maua i le avea ai ma ni fesiliteita. O le tagata faapitoa mo le ola tutoatasi ma isi taitai i le lotoifale o le a fesiliteitaina lenei talanoaga ma tuuina mai ia i tatou se taitaiga faapitoa mo aitema taitasi. Ia lagona le saoloto e tuuina mai ni fesili ao tatou faagasolo.

O ai la’u tagata faapitoa mo le ola tutoatasi, ma o le a le mea latou te faia?

• Faamatalaga e fesootai ai:

O afea le faigalotu ma o le a la’u matafaioi?

• O a fea:

• O fea:

• La’u matafaioi:

E faapefea ona mamanu le vaega o ou fesiliteitaina, ma e faapefea ona ou paga ma i latou?

E faapefea ma o afea ou te lesitalaina ai la’u vaega ma lipoti atu lona alualu i luma?

• Auala:

• O a fea:

E faapefea ona ou saunia mo la’u fonotaga muamua?

• O afea ma o fea o le a faia ai:

• Auala o le a ou faaaogaina ai le fale:

• Auala o le a ou mauaina ai tusi lesona:

• Auala o le a ou taina ai vitio:

• Auala o le a ou faatulagaina ai le potu:

O a nisi a tatou fesili o i ai?

aikona, sui fesiliteita

Sui Fesiliteita

Auauana Atu o se Leoleo Mamoe mo Lau Vaega

Faitau

O lea la ua tatou kavaina le auala e fesiliteita ai ma savalia ai nisi o o tatou tiutetauave, o le taimi lava lenei e talanoa ai e uiga i le ki i le avea ai ma fesiliteita sili. O fesiliteita sili ona lelei e alolofa ma popole mo tagata o a latou vaega. Latou te auauna atu i a latou vaega e toetoe lava pei lava ona tausia e se leoleo mamoe lana lafu. Na faaaoga e Keriso le faataitaiga a leoleo mamoe aua e silafia e leoleo mamoe a latou mamoe taitasi i o latou igoa, uiga, ma manaoga. O fesiliteita lelei latou te iloa tagata o latou vaega, popole e uiga i lo latou manuia, ma fesoasoani ia i latou e auai ma ia faamanuiaina. Atonu o le a alu ai ni nai vaiaso mo la outou vaega ia tuufaatasia, ae o le tele o tagata faauu o vaega a le ola tutoatasi e talanoa e uiga i le latou vavalalata ma le popole o le tasi i le isi. I le avea ai ma se fesiliteita, e mafai ona tatou fesoasoani e fausia se siosiomaga lea e uunaia lenei mea.

Ia feauauai i le faitauina o fautuaga nei i le avea ai ma se leoleo mamoe mo lau vaega.

Avea ma se Leoleo Mamoe mo Lau Vaega

• Valaau pe tesi i tagata o le vaega. E mafai ona e siaki ia i latou ma faamanatu atu ia i latou le aso, taimi, ma le nofoaga o le fonotaga.

• Ao taunuu mai tagata, faafeiloai fiafia i latou ma ia faamasani ia i latou.

• Ia iloa ma faaali le fiafia mo le alualu i luma o tagata o lau vaega.

• Faamanatu i tagata o le vaega ia faaaloalo i faamatalaga e le faalauaiteleina.

• I le va o fonotaga, faamalosiau atu i tagata o le vaega o loo tauivi. Fesoasoani ia latou soa galue e faafesootai ma lagolago foi i latou.

• Faatasi ai ma isi i le vaega, aapa atu i tagata o le vaega o e atonu na misi se fonotaga.

• Tatalo mo tagata o lau vaega i o latou igoa.

• Tagai ma le agaga tatalo i anomea mo le isi fonotaga a lau vaega.

• Faalatalata i le Agaga, ma galue i manatu ma musumusuga.

Talanoa (2 minute)

E faapefea ona fesoasoani le faia o nei mea ia i tatou e avea ai ma leoleo mamoe mo a tatou vaega o le ola tutoatasi?

aikona, sui fesiliteita

Sui Fesiliteita

Gaoioiga (10 minute)

Laasaga 1 (5 minute): Paga ma le tagata o loo i ou autafa, piki se tasi o vaaiga nei, ma talanoa pe faapefea ona e taulimaina.

Laasaga 2 (5 minute): Toe o mai faatasi o se vaega ma fetufaai mea na tou talanoa e uiga i ai.

Vaaiga

• I lau fonotaga lona lua a le vaega, e te lagona le tau faalotolotolua o tagata e lipoti mai le latou le tausia o a latou tautinoga uma. O nisi latou te mananao e pasi le latou avanoa e faasoa mai ai.

• I le taimi o le fonotaga lona fa, e te iloa ai o se tasi o tagata o lau vaega o le a le i ai iina. O le a fai mai lana soa galue na le mafai ona ia fesootai atu ia te ia i le vaiaso atoa.

• E toalua tagata o lau vaega e eseese faatuatuaga. E te manao ia mautinoa o loo talisapaia ma mataala lau vaega i o latou vaaiga.

• O se tasi o tagata o le vaega sa i ai se faalavelave a le aiga ma e le mafai ona auai mai i le fonotaga i lenei vaiaso. O loo ia mafaufau e uiga i le faamutaina mai le vaega ona ua ia misi le vasega.

• E toatasi se tagata o le vasega o loo tauivi. O loo ia foliga faavaivai i lona le vaaia o ni faamanuiaga e pei o isi tagata o le vaega.

aikona, sui fesiliteita

Sui Fesiliteita

Faaiuga

Faitau

Faamoemoe lava na fesoasoani lenei aoaoga ina ia i ai sina tatou tamai malamalama e uiga i le ola tutoatasi, i le ala e galulue ai vaega o le ola tutoatasi, ma le mea e mafai ona tatou faia e avea ai ma fesiliteita sili ona lelei. O le avea ma se vaega o vaega o le ola tutoatasi e ono avea ma se aafiaga ese ma fou mo i tatou ma tagata o le tatou vaega. Atonu e ono alu ai sina taimi ina ia lagonaina le toafimalie ma le faagasologa faapea ma le tasi ma le isi. Ia faasino i lenei tusi lesona, siaki faamatalaga faaopoopo i le Faaopoopoga—aemaise lava faavasegaga—ma asiasi i le srs.lds.org mo nisi faamatalaga ma vitio aoga. Faatasi ai ma le taimi ma le faatuatua i le Alii o le a tatou maua se aafiaga maoae.

Maimoa

“Self-Reliance Facilitators: Bringing About Change,” o loo maua i le srs.lds.org/videos. (E le maua le vitio? Ia faitau pea.)

Talanoa (3 minute)

O a ni mea aupito taua sa e aoaoina mai lenei aoaoga?

Mafaufau Loloto (3 minute)

Ia mafaufau le tagata lava ia i mea ua e aoaoina mai lenei aoaoga, ma mafaufau po o le a se mea e finagalo le Alii e te faia. Tusi lau tali i lalo.

E tusa ai ma le aafiaga sa ou maua i lenei aso, ou te fia:

Tatalo

Valaaulia se tasi e faia le tatalo faaiu.