“Unsa ang Akong Buhaton Atol sa Inadlaw nga Pagtuon sa Pinulongan?,” Giya sa Pagtuon sa EnglishConnect alang sa mga Misyonaryo

“Inadlaw nga Pagtuon sa Pinulongan,” Giya sa Pagtuon sa ECM

Unsa ang Akong Buhaton Atol sa Pagtuon sa Pinulongan?

Sunda ang mga Baroganan sa Isangyaw ang Akong Ebanghelyo

Ang Isangyaw ang Akong Ebanghelyo motudlo nimo kon unsaon sa pag-andam ang imong kaugalingon sa espirituwal nga paagi ug sa paghimo sa imong pagtuon nga makahuloganon. Makatabang usab kini kanimo sa pagkat-on kon unsaon sa pagtinguha sa gasa sa mga pinulongan ug sa paggamit niini nga mga baroganan sa pagkat-on sa pinulongan. Rebyoha kanunay ang mga baroganan nga gitudlo diha sa Isangyaw ang Akong Ebanghelyo, kapitulo 7 ug tinguhaa ang pagsunod niini atol sa imong pagtuon sa pinulongan.

Paghimo og usa ka Plano sa Pagtuon sa Pinulongan

“Ang usa ka plano sa pagtuon sa pinulongan makatabang sa bag-o ug sa sinati nga mga misyonaryo nga makatutok sa unsay ilang mabuhat matag adlaw sa pagpalambo sa ilang abilidad” (Isangyaw ang Akong Ebanghelyo, 161). Ikonsiderar ang paggamit sa proseso sa pagtakda og tumong nga gitudlo diha sa Isangyaw ang Akong Ebanghelyo, kapitulo 8, aron matabangan ka sa pagkat-on og Iningles.

Paghimo og sinemana o inadlaw nga mga tumong alang sa pagkat-on og Iningles.
Magrekord ug mag-eskedyul kon unsa nga mga leksiyon sa EnglishConnect, mga manwal sa tigkat-on, mga workbook, ug online nga mga kapanguhaan ang imong gamiton, kanus-a nimo kini gamiton, ug unsaon nimo sa pagplano nga maapil ang imong kompanyon.
Buhata ang imong mga plano.
Magrebyo ug mag-follow up. Rebyoha ang imong plano sa pagtuon kanunay aron matimbang-timbang kon nasunod ba kini pag-ayo.

Gamita ang mga baroganan sa Isangyaw ang Akong Ebanghelyo, kapitulo 7, sa pagpalambo sa imong pagtuon. Tan-awa ang mosunod nga ehemplo sa mga plano sa pagtuon alang sa dugang nga tabang base sa imong lebel:

Magrebyo ug Mag-follow Up

Kon makompleto na nimo ang mga kalihokan sa leksiyon, gamita ang leksiyon sa mga pag-eksamin sa kaugalingon aron sa pagsusi sa imong pagkat-on. Kon nahuman na ka sa tanang kalihokan alang sa lebel, himoa ang ulahi nga pag-eksamin alang niana nga lebel. Kon sa imong pamati andam na ka, mahimo ka nga mopadayon sa sunod nga lebel. Ang mga pag-eksamin sa kaugalingon ug ang online nga mga kalihokan makita diha sa missionary.englishconnect.org. Matag karon ug unya, paggahin og panahon sa pag-ebalwar kon unsaon nga imong magamit ang mga baroganan diha sa Isangyaw ang Akong Ebanghelyp, kapitulo 7, sa pagpalambo sa imong pagtuon.

Unsaon Nako sa Pagsubay sa Akong Kalamboan?

Matag upat ka bulan makadawat ka og email nga magdapit nimo sa pagkuha og eksamin sa imong abilidad sa pinulongan nga Iningles. Human sa pagkompleto sa eksamin, makadawat ka og report sa kalamboan. Kini nga report motabang nimo sa pagsubay sa imong kalamboan ug sa pagkat-on og mga paagi sa paglambo. Atol sa imong kataposang pagbalhin, mokuha ka og kataposan nga pag-eksamin ug makadawat og sertipiko. Makaakses ka sa imong mga eksamin diha sa Missionary Portal nga pahina sa pagkat-on og pinulongan aron sa pagsubay sa imong kalamboan.