Xkomon chik li b’eresink

Li paab’ank, li k’ulub’ank, ut li k’iik

Xwaklesinkil li paab’ank, li k’ulub’ank, ut li k’iik Tenq’ahomaq chixwaklesinkil jun na’ajej b’ar wi’ li kristiaan te’xnimob’resi li xpaab’aaleb’, te’xk’ulub’a rib’ chiribileb’ rib’, ut te’xnima lix seeb’aleb’. Naru nekeb’aanu a’in rik’in xb’oqb’aleb’ laj k’utunel, xkawresinkileb’ li kab’l te’ch’utlaaq wi’, ut xk’eeb’al reetal naq eb’ laj tzolonel ut eb’ laj k’utunel wankeb’ chixjunileb’ lix k’anjeleb’aal te’raj ru. Naru ajwi’ tex’aatinaq rik’in xkomoneb’ chik li kristiaan li naru neke’xtenq’aheb’ laj tzolonel, jo’eb’ li misioneer ut xkomoneb’ chik li ch’uut re tenq’ank-ib’.

Eb’ laj jolominel re li tijonelil

Aatinak rik’ineb’ laj jolominel re li tijonelil. K’ehomaq reetal naq k’ulub’anb’il ut ilb’il lee k’anjeleb’aal xb’aaneb’ laj jolominel re li tijonelil. Eb’ laj jolominel re li tijonelil a’aneb’ li neke’xb’eresiheb’ li k’anjel re tenq’ank-ib’, li seminario ut instituto, ut lix k’anjeleb’ li misioneer. Aatinanqex rik’ineb’ laj jolominel re li tijonelil chirix:

• Xxaqab’ankileb’ ut xk’eeb’aleb’ reetal li ajom ut li elk chi uub’ej (chi’ilmanq “EnglishConnect natenq’an chixwaklesinkil lix k’anjel li Dios re li kolb’a-ib’ ut li taqenaqil loq’al”).

• Xchaab’ilob’resinkileb’ li rajom li k’anjeleb’aal.

• Xb’oqb’aleb’ laj k’utunel (chi’ilmanq “Eb’ laj k’utunel”).

• Xb’oqb’al xkomoneb’ chik li kristiaan chi tz’aqonk (chi’ilmanq “Li b’oqok ut li puktesink esil”).

• Xtenq’ankileb’ chixjunil chi tz’aqonk (chi’ilmanq “Li na’ajej ut jo’q’e nab’aanuman”).

• Xb’oqb’aleb’ laj tzolonel chiroksinkil xkomoneb’ chik li k’anjeleb’aal re li Iglees (chi’ilmanq “Roksinkil xkomoneb’ chik li k’anjeleb’aal re li Iglees”).

Xq’axtesinkil li esil reheb’ laj jolominel re li tijonelil. Q’axtesihomaq reheb’ laj jolominel re li tijonelil resil li chaab’ilal ut li ch’a’ajkilal yoo chi k’ulmank sa’eb’ li ch’uut re EnglishConnect.

Xk’eeb’al reetal naq paab’anb’ileb’ lix chaq’rab’il li tenamit. K’ehomaq reetal naq li k’anjeleb’aal EnglishConnect naxk’am rib’ rik’ineb’ li chaq’rab’ re li tenamit li neke’tawman sa’ englishconnect.org/leader/approved-locations.

K’ehomaq reetal: Eb’ li k’anjeleb’aal re EnglishConnect xxaqab’ankileb’ xb’aaneb’ li chaq’rab’ re derechos de autor ut ink’a’ naru najalman chi maak’a’ liceens.

Li k’anjelak rochb’een li mision

K’ehomaq reetal naq oksinb’ilaq EnglishConnect re xwotzb’al li evangelio. EnglishConnect naru naxtaw xna’aj sa’ xyi li k’uub’anb’il na’leb’ re xjultikankil li evangelio re li teep. Eb’ li ch’uut re English Connect neke’ru:

• Chixtenq’ankileb’ li misioneer chixtawb’al ut chixtzolb’al naab’aleb’ li kristiaan.

• Chixkawob’resinkil li komonil wankeb’ wi’ li komon, eb’ li ramiiw li Iglees, ut eb’ li misioneer.

• Chixtenq’ankileb’ li komon li yookeb’ chi sutq’iik malaj eb’ li kristiaan li neke’tzolok rik’ineb’ li misioneer chi oksiik sa’ li teep.

• Chixtenq’ankileb’ li komon chixk’anjelankileb’ li na’leb’ re rahok, wotzok, ut b’oqok (chi’ilmanq Jolomil K’anjenel Hu, 23.1).

Jun k’anjel li b’eresinb’il xb’aaneb’ li komon ut li tenq’anb’il xb’aaneb’ li misioneer q’axal taatenq’anq sa’ xtz’aqob’resinkileb’ ru li ajom a’in. Naq eb’ li komon neke’xb’eresiheb’ li ch’uut re EnglishConnect, q’axal wi’chik naq eb’ li neke’tz’aqon te’xtaw ramiiweb’ sa’ xyanqeb’ li komon ut te’kawob’resiiq rik’in paab’aal. Eb’ li misioneer, laj jolominel re mision, ut eb’ li ch’uut re tenq’ank-ib’ tento te’xk’uub’ xna’leb’ sa’ komonil re xk’eeb’al reetal naq sa’eb’ li ch’uut re EnglishConnect moko ch’a’aj ta xwotzb’al ut xyu’aminkil li evangelio.

Xb’oqb’aleb’ li misioneer re te’tenq’anq. Sa’eb’ li na’ajej b’ar wi’ k’eeb’ileb’ li ch’uut re EnglishConnect xb’aaneb’ li oqech malaj teep, b’oqomaqeb’ li misioneer re naq te’tenq’anq rik’in:

• Wulak sa’eb’ li ch’uut ut tz’aqonk sa’eb’ li kok’ k’anjel.

• Roksinkil li Ingles rik’ineb’ li kristiaan sa’ xyiheb’ li hoonal re aatinak sa’ ch’uut.

• K’utuk chi jo’q’ehaq jo’ na’ajman ru.

Eb’ laj k’utunel

Lix k’anjeleb’ laj k’utunel

Nim lix k’anjeleb’ laj k’utunel sa’ xb’oqb’al li Musiq’ej ut sa’ xwaklesinkil li paab’ank, li k’ulub’ank, ut li k’iik sa’eb’ li ch’uut re EnglishConnect. Moko aajel ta ru naq neke’xnaw li Ingles chi tz’aqal re ru chi moko naq ak xe’k’anjelak jo’ aj k’utunel. Moko aajel ta ru naq neke’xnaw li raatinob’aleb’ laj tzolonel. Xe’k’uub’aman li tzolok re EnglishConnect rik’ineb’ li na’leb’ ak yalb’ileb’ rix chirix li tzolok aatinob’aal, ut eb’ laj k’utunel te’elq chi uub’ej wi te’xb’eresiheb’ li kristiaan rik’in rahok sa’eb’ li tzolok. Eb’ laj k’utunel naru neke’xtenq’aheb’ li kristiaan chi nach’ok rik’in li Dios rik’in xtzolb’al li Ingles.

Chan ru naq wan laj k’utunel

Eb’ laj k’utunel li jwal chaab’ileb’:

• Anchaleb’ ut saheb’ xch’ool chirix xk’utb’al li Ingles.

• Neke’xraheb’ ut wankeb’ xkuyum rik’ineb’ li kristiaan ut jwal neke’raj naq te’elq chi uub’ej.

• Saheb’ xch’ool ut wankeb’ xyo’onihom.

• K’eek’ookeb’ xch’ool chi wulak ut chi wank aran re xb’eresinkil li ch’uut.

Xb’oqb’aleb’ laj k’utunel. Xb’aan naq neke’ru chi tz’aqonk li saaj sa’ EnglishConnect, jun aj jolominel re li tijonelil tento taaraatina li junjunq li taaraj k’anjelak jo’ aj k’utunel, ut tento tixk’e reetal naq moko wan ta li esil sa’ lix huhil lix komonil rub’elaj naq tixk’e xb’oqb’al. Wi wankeb’ li saaj sa’ jun ch’uut, tento naq wanq numenaq wiib’ li kristiaan ninq ut tento naq taaqenb’ilaq lix chaq’rab’il li Iglees re xkolb’aleb’ rix li saaj. Tz’aamanb’il naq te’wanq wiib’ chi aj k’utunel sa’ jun ch’uut us ta moko saajeb’ ta li kristiaan re naq wanq junaq li naru chi k’utuk wi jun reheb’ moko wan ta malaj yaj.

Xkawresinkileb’ laj k’utunel. Naru neke’kawresiik laj k’utunel rik’in EnglishConnect choq’ reheb’ laj k’utunel ut eb’ li k’anjeleb’aal sa’ englishconnect.org/teacher. Us ajwi’ naq teek’e reheb’ laj k’utunel li k’anjenel hu ut li hu re tzolok neke’roksi laj tzolonel (chi’ilmanq “Eb’ li k’anjeleb’aal”). Waklesinb’ileb’ ajwi’ xch’ool laj k’utunel chixch’utub’ankil rib’ chi kok’ aj xsa’ re xwotzb’al li chaab’il na’leb’, xsumenkileb’ lix patz’om chirib’ileb’ rib’, ut xtz’ilb’aleb’ rix li k’anjenel hu.

Xtenq’ankileb’ laj tzolonel chi ok choq’ aj k’utunel. Eb’ laj k’utunel naru neke’xk’e reetaleb’ li kristiaan sa’ li ch’uut li taaruuq te’xkawresi rib’ re k’utuk sa’ jun li ch’uut sa’ junaq kutan. Li k’utuk naxtenq’aheb’ laj tzolonel chi k’iik ut naxtenq’aheb’ xkomoneb’ chik li kristiaan chixtawb’al li k’anjeleb’aal.

Eb’ li k’anjeleb’aal

Xk’eeb’aleb’ li k’anjeleb’aal reheb’ laj tzolonel. Eb’ laj tzolonel tento te’roksi EnglishConnect 1 choq’ reheb’ laj tzolonel malaj EnglishConnect 2 choq’ reheb’ laj tzolonel sa’ li Biblioteca del Evangelio malaj te’xtaw sa’ lix k’ayib’aal li Iglees sa’ internet sa’ store.ChurchofJesusChrist.org. Wankeb’ xkomoneb’ chik li k’anjeleb’aal re xtenq’ankileb’ chi tzolok, jo’eb’ li hu re tzolok ut eb’ li kok’ k’anjel sa’ internet. Re rilb’al lix ch’olob’ankileb’ chixjunileb’ li k’anjeleb’aal naru neke’oksiman, chi’ilmanq “B’ar wankeb’ li k’anjeleb’aal re EnglishConnect choq’ reheb’ laj tzolonel ut laj k’utunel?” sa’ li raqal “Li k’a’ru rajlal napatz’man.”

Eb’ li k’anjeleb’aal isinb’ileb’ chiru hu

Wi nekek’eheb’ li k’anjeleb’aal li isinb’ileb’ chiru hu, eb’ li teep malaj oqech neke’xtenq’a li k’anjel a’in rik’in xtuminal. Wi na’ajman ru xkomon chik li tumin, eb’ li awa’b’ej re oqech tento te’xpatz’ li tumin jo’ chanru ak k’ulub’anb’il naq te’xb’aanu. Meepatz’ xtumineb’ li ani te’tz’aqonq. Wi eb’ laj tzolonel tento te’xloq’eb’ lix k’anjeleb’aal, naru te’xb’aanu sa’eb’ li centro de distribucion re li Iglees malaj li k’ayib’aal sa’ internet.

K’ehomaq reetal: Wan naq na’ajman toj waqib’ xamaan re te’wulaq li k’anjenel hu.

Xk’eeb’aleb’ li k’anjeleb’aal reheb’ laj k’utunel. Eb’ laj k’utunel tento te’xtz’il rix EnglishConnect choq’ reheb’ laj k’utunel sa’ li Biblioteca del Evangelio jo’eb’ ajwi’ xkomoneb’ chik li k’anjeleb’aal aj kawresinel sa’ englishconnect.org/teacher.

Li k’utuk sa’ internet

Eb’ laj k’utunel naru neke’roksiheb’ li k’anjeleb’aal re xk’utb’al EnglishConnect re xb’eresinkileb’ li aatinak sa’ ch’uut sa’ internet. Eb’ li tzolok naru neke’tawman sa’ englishconnect.org/resources/teaching-materials.

B’ar ut jo’q’e taa’uxq

Xsik’b’al ru ma taak’eemanq li ch’uut sa’ kristiaanil malaj sa’ internet. Us naq te’uxq li ch’uut sa’ kristiaanil sa’eb’ li rochochil li Iglees re naq naru taa’uxq li k’ulub’ank. Wi ch’a’aj li wulak sa’eb’ li rochochil li Iglees choq’ reheb’ li te’tz’aqonq, maare chaab’ilaq raj xb’aanunkil li ch’utam sa’ internet. Li “K’anjenel hu re xb’eresinkileb’ li ch’uut sa’ internet” ut “K’anjenel hu reheb’ li te’tz’aqonq sa’ li ch’uut sa’ internet” naru neke’xtenq’aheb’ laj jolominel, laj k’utunel, ut laj tzolonel chixwaklesinkil jun musiq’anb’il wanjik re tzolok sa’ internet. Eb’ li tzolok re internet naru neke’tawman sa’ englishconnect.org/resources/teaching-materials.

Xsik’b’al ru jo’q’e te’xch’utub’ rib’ li ch’uut. Lix k’ihaleb’ li ch’uut neke’xch’utub’ rib’ jun malaj wiib’ sut chiru li xamaan, a’b’an k’uub’anb’ileb’ li tzolok re naq naru te’xch’utub’ rib’ li ch’uut naab’al chik sut chiru li xamaan wi te’raj. Chijultiko’q eere naq eb’ laj tzolonel te’raj ru hoonal re xb’aanunkileb’ li kok’ k’anjel re tzolok rub’elaj li junjunq chi tzolok.

Xsik’b’al ru jo’q’e te’xch’utub’ rib’ li ch’uut ut xnajtileb’ li ch’utam. Sik’omaq ru jun kutan ut jun hoonal li taak’anjelaq chi us choq’ reheb’ laj tzolonel ut laj k’utunel. Lix k’ihaleb’ li ch’uut neke’ch’utla chiru 90 k’asal, a’b’an naru xjalb’al lix najtil wi te’raj.

Xsik’b’al ru xnajtil li ch’uut ut b’ar wan reheb’ li raqal te’xtzol. Naab’aleb’ li ch’uut ink’a’ neke’raqe’, li naraj naxye naq neke’xtikib’ wi’chik li tzolok 1 chirix naq neke’xchoy li k’anjenel hu. Wankeb’ chik li ch’uut li neke’xb’aanu k’anjenel hu jun sut malaj wiib’ oxib’ reheb’ li raqal sa’ li k’anjenel hu.

Chi’ilmanq li raqal “Eb’ li eetalil” re rilb’al li jar paay chi ch’uut k’uub’anb’il xb’aaneb’ laj jolominel.

Li tz’iib’ank-ib’ ut eb’ li certificado (QuickReg)

Xk’uub’ankileb’ ut xk’anjelankileb’ li ch’uut sa’ QuickReg. QuickReg a’an jun k’anjeleb’aal k’ulub’anb’il xb’aan li Iglees re xk’anjelankileb’ li ch’uut re tenq’ank-ib’. Naru neke’k’uub’aman li ch’uut sa’ QuickReg sa’ quickreg.englishconnect.org. Naru na’oksiman QuickReg re:

• Xpuktesinkil resileb’ li ch’uut.

• Xjalb’al lix kutankil, lix hooril, ut lix na’aj li ch’uut.

• Risinkileb’ chi us li certificado.

• Xjalb’al li na’leb’ chirixeb’ laj tzolonel.

• Xraqb’aleb’ li ch’uut.

Chi’ilmanq chan ru roksinkil QuickReg sa’ englishconnect.org/leader re xtawb’al eena’leb’.

K’ehomaq reetal: Re roksinkil QuickReg, jun komon tento naq (1) wan lix b’oqb’al sa’ li Iglees ut (2) wan chi tz’iib’anb’il lix b’oqb’al sa’ Fuentes de recursos para líderes y secretaries.

Risinkil chiru hu ut xq’axtesinkileb’ li certificado sa’ QuickReg. Eb’ laj k’utunel ut laj especialista re tenq’ank-ib’ naru neke’risi chiru hu ut neke’xq’axtesi li certificado re tz’aqonk reheb’ laj tzolonel li tz’iib’anb’ileb’ sa’ QuickReg.

Li b’oqok ut li puktesink esil

Roksinkileb’ li k’anjelb’aal re puktesink esil. Eb’ li k’anjeleb’aal re puktesink esil naru neke’tawman sa’ lix k’ayib’aal li Iglees sa’ internet sa’ store.ChurchofJesusChrist.org ut sa’ englishconnect.org/resources/leader#publicity.

Xb’oqb’aleb’ laj tzolonel. Naru xpuktesinkil resileb’ li ch’uut re EnglishConnect rik’in roksinkileb’ laj ilol komon ixq ut winq, li misioneer, li hu sa’ li iglees, li puktesinb’il hu, ut wankeb’ chi xkomon. B’ar k’ulub’anb’il ut tojb’il xb’aan li oqech malaj teep, eb’ li ch’uut naru ajwi’ neke’xpuktesi resil li ch’uut sa’eb’ li redes sociales malaj jun perel web re li teep malaj oqech. Rub’elaj roksinkileb’ li k’anjeleb’aal a’an re puktesink esil, tz’ilomaq rix li chaq’rab’ink sa’ englishconnect.org/leader/approved-locations.

Xk’eeb’al xchaab’il k’ulunikeb’ laj tzolonel. K’uub’ahomaq chan ru teek’e xchaab’il k’ulunikeb’ laj tzolonel naq te’xtz’iib’a rib’ sa’ li ch’uut.

Xb’oqb’aleb’ li amiiw re jalan jalanq paab’aal. Waklesinb’il eech’ool chixk’ulb’aleb’ li kristiaan jalan jalanq xpaab’aaleb’. Teeroxloq’i rajlal lix paab’ahomeb’ li kristiaan naq teewotz naq nekepaab’ naq li Dios naru naxtenq’aheb’ laj tzolonel chixtzolb’al li Ingles.

Xk’oxlankil xb’oqb’aleb’ li saaj. Naru te’k’uub’amanq li ch’uut choq’ reheb’ ka’ajwi’ li saaj, malaj naru te’b’oqmanq li saaj chi tz’aqonk rik’ineb’ li ninq. Sa’ EnglishConnect, eb’ li saaj neke’xtzol chan ru xk’ulb’al xtenq’ li Dios re xtzolb’al li Ingles. Eb’ li tzolok a’in naru tixtenq’aheb’ chixpaab’ankil naq li Dios tixtenq’aheb’ sa’ chixjunil xcha’al lix yu’ameb’.

Xtaaqenkil lix chaq’rab’il li Iglees re xkolb’aleb’ rix li saaj. Eb’ li saaj (18 chihab’ xyu’am malaj maji’ neke’xket a’an ut wankeb’ sa’ rochoch xna’ xyuwa’) tento naq te’xk’am jun juch’b’il hu k’eeb’il wi’ xliceens xb’aan xna’ xyuwa’ rub’elaj naq te’tz’aqonq sa’ li ch’uut. Naru neke’tawman li hu sa’ naab’al li aatinob’aal sa’ englishconnect.org/resources/leader. Jo’kan ajwi’, eb’ li ch’uut re EnglishConnect junelik tento te’xtaaqe lix chaq’rab’il li Iglees naq junelik wanqeb’ wiib’ li kristiaan ninq naq neke’ch’utla li ch’uut. Tento xtaaqenkileb’ li chaq’rab’ink a’in us ta li ch’uut nach’utla sa’ internet.

Li xik sa’ li raqal jun chik

Xk’eeb’al xna’leb’eb’ laj tzolonel chirix li b’e re tzolok ut tawok trab’aaj rik’in EnglishConnect ut BYU–Pathway Worldwide. EnglishConnect ut BYU–Pathway Worldwide neke’xk’ameb’ xb’e laj tzolonel sa’ xtawb’al ak’il seeb’al sa’ jun na’ajej wan wi’ li k’ulub’ank ut li paab’aal. Naru neke’tawman li k’anjeleb’aal sa’ byupathway.org/englishconnect.

Xtenq’ankileb’ laj tzolonel chixtz’iib’ankil rib’ sa’ EnglishConnect 3. Chi’ilmanq li raqal “Xtenq’ankileb’ laj tzolonel chixtawb’aleb’ li ch’uut re EnglishConnect 3.”

Li aatinak rik’ineb’ li misioneer aj tenq’anel re BYU–Pathway Worldwide Aatinanqex chirix xtenq’ankileb’ laj tzolonel naq neke’xik chalen EnglishConnect 3 toj sa’ BYU–Pathway Worldwide.

Roksinkil jalaneb’ chik li k’anjeleb’aal re li Iglees

Roksinkil xkomoneb’ chik li k’anjeleb’aal re li Iglees. K’uub’ahomaq chan ru teetenq’aheb’ laj tzolonel chiroksinkil xkomoneb’ chik li k’anjeleb’aal re li Iglees, jo’eb’ li ch’ut re tenq’ank-ib’, eb’ li kok’ k’anjel reheb’ li saaj, ut li tzolok chirix lix evangelio li Jesukristo. Chi’ilmanq li perel “Recursos de empleo y educativos” sa’ ChurchofJesusChrist.org re xtawb’al xkomon chik li na’leb’.