Դաս 172․ Սուրբ գրությունների ուսումնասիրության հմտություններ

Սուրբ գրությունների ուսումնասիրության գործիքներ

Ուսումնասիրության օժանդակ նյութերի օգտագործումը

Այս դասը կարող է օգնել ձեզ բարելավել սուրբ գրությունների ձեր անձնական ուսումնասիրությունը և ամրապնդել ձեր հարաբերությունները Երկնային Հոր և Հիսուս Քրիստոսի հետ՝ սուրբ գրությունների ուսումնասիրության գործիքների օգտագործման միջոցով:

Ուսանողի նախապատրաստում․ Առաջարկեք ուսանողներին պատրաստվել կիսվելու գործիքներով, որոնք հասանելի են՝ այսօրվա աշխարհում մեզ օգնելու համար և հասանելի չէին 50 տարի առաջ: Խնդրեք նրանց պատրաստվել բացատրելու, թե ինչպես են այս գործիքները ազդում մեր կյանքի վրա։

Հնարավոր ուսումնական վարժություններ

Գործիքներ

Կարող եք ցուցադրել հետևյալ պատկերները (կամ այլ նմանատիպ պատկերներ) և առաջարկել ուսանողներին պատասխանել ստորև բերված հարցերին:

• Ինչպե՞ս են այս գործիքներն ազդել ճամփորդելու և աշխատելու մեր կարողության վրա:

• Ի՞նչ այլ գործիքներ են մշակվել տարիների ընթացքում, որոնք մեծացրել են տարբեր գործեր անելու մեր կարողությունը:

• Կյանքն ի՞նչով կտարբերվեր, եթե մենք չիմանայինք այս գործիքների կամ դրանց օգտագործման եղանակի մասին:

Ինչպես և ճամփորդության ու աշխատանքի դեպքում, կան գործիքներ, որոնք օգնում են մեզ ուսումնասիրել սուրբ գրությունները և ավելի մոտենալ Երկնային Հորը և Հիսուս Քրիստոսին:

Կիրակնօրյա դպրոցի նախկին գերագույն նախագահ Եղբայր Թադ Ռ. Քալիսթերը կիսվել է հետևյալով․

Ներկայիս սերունդը հայտնաբերում է իր նախահայրերից շատերի համար անհայտ ճշմարտություններ, գաղափարներ և լրացուցիչ հաստատումներ ոչ այն պատճառով, որ ներկայիս սերունդն անպայման ավելի արդար է, ոչ այն պատճառով, որ ավելի բարձր ինտելեկտ ունի, այլ որովհետև ունի ավելի լավ գործիքներ: Ձիով և գութանով աշխատող նույնիսկ ամենափորձառու ֆերմերը չի կարող հասնել նույնքան հմուտ մեկ ուրիշ ֆերմերի, որի տրամադրության տակ կա բարձր տեխնոլոգիական տրակտոր: Լոգարիթմական քանոն օգտագործող մաթեմատիկոսը չի կարող մրցակցել իր գործընկերոջ հետ, որն օգտագործում է գերարագ համակարգիչ: Ձեռքի աստղադիտակով Գալիլեոն երբեք չէր բացահայտի տիեզերքն այնպես, ինչպես դա անում են գերժամանակակից աստղադիտակով: Ավետարանի իմացության հարցում Տերը մեզանից պետք է շատ ավելին ակնկալի, քան նախորդ սերունդներից, քանի որ մենք ունենք շատ ավելի մեծ հնարավորություններ մեր տրամադրության տակ: (Թադ Ռ. Քալիսթեր The Infinite Atonement [2000], 21)

Խորհեք հետևյալ հարցերի շուրջ.

• Որքանո՞վ եք տեղյակ սուրբ գրությունների ուսումնասիրության գործիքների մասին, որոնք կարող են օգնել ձեզ գտնել ձեր հարցերի պատասխանները և ավելի մոտենալ Երկնային Հորը և Հիսուս Քրիստոսին:

• Որքանո՞վ եք լավ օգտագործում դրանք:

Այս դասը ուսումնասիրելիս ձգտեք ավելի լավ հասկանալ սուրբ գրությունների ուսումնասիրության գործիքները և այն, թե դրանք ինչպես կարող են օգնել ձեզ:

Սահմանում. Սուրբ գրությունների ուսումնասիրության գործիքների օգտագործումը

Որպեսզի օգնեք ուսանողներին հստակ հասկանալ, թե որոնք են սուրբ գրությունների ուսումնասիրության գործիքները, արեք հետևյալը։

Առաջարկեք ուսանողներին մտածել և գրել սուրբ գրությունների ուսումնասիրության որևէ գործիք, որը գիտեն, որ Տերը տվել է մեզ՝ օգնելու պատասխանել մեր հարցերին և ավելի մոտենալ Իրեն: Կարող եք ավելացնել հետևյալ գործիքներից որևէ մեկը, որն ուսանողները չեն նշում։

Ծանոթագրություններ

Թեմաների ուղեցույց

Սուրբ գրքերի ուղեցույց

Եռահատորի ցանկ

Քարտեզներ

Եկեղեցու պատմության լուսանկարներ

Մատնանշեք գրատախտակին գրված տարբեր գործիքները և հարցրեք ուսանողներին, թե ինչ են դրանք և որտեղ կարող են դրանք գտնել: Եթե ուսանողները ծանոթ չեն դրանցից որևէ մեկին, կարող եք օգտագործել հետևյալ բացատրությունները և ցույց տալ ուսանողներին, թե որտեղ են գտնվում այդ գործիքները:

Ծանոթագրություններ․ ծանոթագրությունների հղումները նշվում են հատվածում՝ փոքրատառ մանր տառատեսակով և ուղղորդում են ձեզ էջի ներքևի հատված, որտեղ դուք կարող եք գտնել սուրբ գրությունների լրացուցիչ հղումներ կամ տվյալ հատվածի հետ կապված թեմաներ: Սեղմելով ծանոթագրություններին Gospel Library հավելվածում՝ կարող եք տեսնել նույն տեղեկությունները:

Թեմաների ուղեցույց․ այս աղբյուրը պարունակում է տարբեր թեմաներին վերաբերող սուրբ գրություններ և այլ նմանատիպ թեմաների հղումներ: Այն կարելի է գտնել Աստվածաշնչի Վերջին Օրերի Սրբերի տարբերակի վերջում կամ Gospel Library հավելվածում՝ «Սուրբ գրություններ» բաժնի «Ուսումնասիրության օժանդակ նյութեր» ենթաբաժնում:

Սուրբ գրքերի ուղեցույց․ այս աղբյուրը պարունակում է սուրբգրային եզրույթների հակիրճ, պարզ սահմանումներ, ինչպես նաև յուրաքանչյուր տերմինի հետ կապված սուրբգրային մի քանի հղում։ Այն կարելի է գտնել Մորմոնի Գրքի վերջում կամ Gospel Library հավելվածում՝ «Սուրբ գրություններ» բաժնի «Ուսումնասիրության օժանդակ նյութեր» ենթաբաժնում:

Եռահատորի ցանկ․ այս ցանկը պարունակում է սուրբ գրությունների հղումներ տարբեր թեմաների համար, որոնք պարունակվում են Վարդապետություն և Ուխտեր գրքում, Մորմոնի Գրքում և Թանկագին Մարգարիտում: Այն կարելի է գտնել Եռահատորի վերջում կամ Gospel Library հավելվածում՝ «Սուրբ գրություններ» բաժնի «Ուսումնասիրության օժանդակ նյութեր» ենթաբաժնում:

Քարտեզներ և Եկեղեցու պատմության լուսանկարներ․ այս աղբյուրները կարելի է գտնել Եռահատորի վերջում կամ Gospel Library հավելվածում՝ «Սուրբ գրություններ» բաժնի «Ուսումնասիրության օժանդակ նյութեր» ենթաբաժնում:

Մոդել

Սուրբ գրությունների ուսումնասիրության գործիքների՝ դասարանով օգտագործումը մոդելավորելու համար կատարեք հետևյալ վարժությունը.

Մտածեք այն մասին, թե ինչ գիտեք և ինչ կցանկանայիք իմանալ ներման մասին:

Կարդացեք Վարդապետություն և Ուխտեր 64․9–11 հատվածը և գտեք ներման մասին ճշմարտություններ։

• Ի՞նչ իմացաք: Այս հատվածները ի՞նչ են ձեզ օգնում ավելի լավ հասկանալ Երկնային Հոր և Հիսուս Քրիստոսի մասին։

  Այժմ առաջարկեք ուսանողներին ասել, թե ինչ գործիքներ կարող են օգտագործել իրենց հասկացողությունը խորացնելու համար: Երբ ուսանողը ասում է որևէ գործիքի մասին, հարցրեք նրան, թե ինչպես օգտագործել այդ գործիքը և առաջարկեք բոլոր ուսանողներին հետևել նրա ուղղորդմանը։ Օրինակ՝ նրանք կարող են որոնել հատվածների ծանոթագրություններում տրված սուրբ գրությունները: Նրանք կարող են նաև որոնել «Հիսուս Քրիստոս» կամ «Փրկագնել»՝ Սուրբ գրքերի ուղեցույցում, «Ներել»՝ Եռահատորի ցանկում կամ «Քավություն»՝ Աստվածաշնչի բառարանում։

  Ուսանողներին առաջարկեք կիսվել իրենց սովորածով և բացատրել, թե ինչու է այն կարևոր իրենց համար:

• Սուրբ գրությունների ուսումնասիրման այս գործիքների օգտագործումն ինչպե՞ս օգնեց ձեզ ուսումնասիրության ժամանակ:

Գործնական կիրառում

Առաջարկեք ուսանողներին գալ գրատախտակի մոտ և գրել ավետարանական թեմաներ կամ հարցեր, որոնց մասին իրենք կամ իրենց ծանոթները ցանկանում են ավելին իմանալ կամ որոնց պատասխանել են: Որպես այլընտրանք, կարող եք օգտագործել անանուն հարցման գործիքը՝ նրանց պատասխանները ստանալու համար:

Եթե ուսանողները դժվարանում են գաղափարներ տալ, կարող եք գրատախտակին գրել հետևյալ թեմաները: Առաջարկեք ուսանողներին ընտրել այս թեմաներից մեկը (կամ իրենց նախընտրած մեկ այլ թեմա), որի վերաբերյալ իրենք ունեն հարցեր կամ որոնց ուսումնասիրությունն իրենց կարծիքով, ավելի կմոտեցնի իրենց Հիսուս Քրիստոսին.

• Ներում

• Ստանալ հայտնություն

• Երկնային Հայրը

• Ինչու մենք Հիսուս Քրիստոսի կարիքն ունենք

• Նախաերկրային կյանք

• Հոգիների աշխարհ

• Վերջին դատաստան

• Ամուսնություն և ընտանիք

• Հիսուս Քրիստոսի Երկրորդ Գալուստը

Որպես այլընտրանք, ուսանողները կարող են ներկայացնել մի դերախաղ, որում ընկերը ցանկանում է ավելին իմանալ վերը նշված թեմաներից մեկի մասին:

Մի քանի րոպե հատկացրեք այս թեման կամ հարցը ուսումնասիրելու համար՝ օգտագործելով սուրբ գրությունների ուսումնասիրության գործիքները։ Փնտրեք ճշմարտություններ, որոնք կարևոր են ձեզ համար, պատասխանեք ձեր հարցերին կամ ավելի մոտեցրեք ձեզ Երկնային Հորը և Հիսուս Քրիստոսին:

Բավարար ժամանակ հետո կարող եք ուսանողներին առաջարկել զույգերով կամ փոքր խմբերով կիսվել, թե ինչ են սովորել և ինչպես են սովորել: Այնուհետև ուսանողներին առաջարկեք պատասխանել հետևյալ հարցին՝ դասը եզրափակելու համար։

• Սուրբ գրությունների ձեր անձնական ուսումնասիրության ընթացքում այս գործիքների հետևողական օգտագործումն ինչպե՞ս կարող է ազդել Երկնային Հոր և Հիսուս Քրիստոսի մասին ձեր գիտելիքների և Նրանց հետ ձեր հարաբերությունների վրա:

Օժանդակ նյութեր

Սուրբ գրությունների ուսումնասիրությունն ինչպե՞ս կարող է խորապես օրհնել իմ կյանքը։

Տասներկու Առաքյալների Քվորումի նախագահ Բոյդ Ք. Փաքերը (1924–2015) ուսուցանել է.

Սուրբ գրությունները կրում են հոգևոր պաշտպանության բանալիները: Դրանք պարունակում են վարդապետությունը և օրենքը և արարողությունները, որ Աստծո յուրաքանչյուր զավակի կտան վկայություն Հիսուս Քրիստոսի մասին՝ որպես Փրկիչ և Քավիչ:

Նախապատրաստվելով տարիների ընթացքում` հսկայական ջանքեր են գործադրվել, որ սուրբ գրությունները հրատարակվեն ամեն լեզվով` տողատակի ծանոթագրություններով և հղումներով: Մենք ջանում ենք դրանք մատչելի դարձնել բոլորի համար, ովքեր ցանկանում են սովորել: Դրանք ուսուցանում են մեզ, թե ուր գնալ և ինչ անել: Դրանք առաջարկում են հույս և գիտելիք:

Տարիներ առաջ Յոթանասունի քվորումից երեց Ս. Դիլվորթ Յանգը տվել է ինձ մի դաս սուրբ գրությունները կարդալու մասին: Ցցում անդամների միջև կային տարաձայնություններ ու դժվարություններ, և խորհուրդ տալու կարիք կար:

Ես հարցրի նախագահ Յանգին. «Ի՞նչ պետք է ասեմ ես»:

Նա պարզապես պատասխանեց. «Ասեք նրանց, որ կարդան սուրբ գրությունները»:

Ես հարցրի. «Ո՞ր սուրբ գրությունները»:

Նա ասաց. «Իրականում դա կարևոր չէ: Ասեք նրանց, որ բացեն Մորմոնի Գրքի պատահական մի էջ և սկսեն կարդալ: Շուտով կգա խաղաղության և ոգեշնչման զգացումը և կգտնվի լուծումը»: (Բոյդ Ք. Փաքեր «The Key to Spiritual Protection», Լիահոնա, նոյեմբեր 2013 թ․, 26–27)

Նախագահ Փաքերը, խոսելով սուրբ գրությունների ծանոթագրությունների, Թեմաների ուղեցույցի և այլ գործիքների մասին, ուսուցանել է հետևյալը.

Տարիների ընթացքում այդ սուրբ գրությունները կպատրաստեն հավատարիմ քրիստոնյաների հաջորդող սերունդներ, որոնք կճանաչեն Հիսուս Քրիստոսին և պատրաստ կլինեն հնազանդվել Նրա կամքին։ …

… Այնպիսի հայտնություններ կբացվեն նրանց, որ աշխարհի պատմությունը երբևէ չի գրանցել։ … … Նրանք կզարգացնեն ավետարանի վերաբերյալ այնպիսի գիտելիքներ, որոնք կգերազանցեն այն, ինչին իրենց նախնիները կարող էին հասնել։ Նրանք վկայություն կունենան, որ Հիսուսը Քրիստոսն է և իրավասու կլինեն հռչակելու Նրան և պաշտպանելու Նրան։ …

Սուրբ գրքերի չորս հատորներից այս հղումները կազմում են սուրբ գրքերի տեղեկությունների ամենաբազմակողմանի հավաքածուն Տեր Հիսուս Քրիստոսի առաքելության և ուսմունքների վերաբերյալ: (Բոյդ Ք. Փաքեր «Scriptures»,Համաժողովի հաշվետվություն, հոկտեմբեր 1982 թ․, 75–76 կամ Ensign նոյեմբեր 1982, 53)

Ի՞նչ գործիքներ են հասանելի սուրբ գրությունների Վերջին Օրերի Սրբերի հրատարակություններում:

Այս հարցի վերաբերյալ լրացուցիչ տեղեկություններ գտնելու համար կարող եք ընթերցել «Սուրբ գրությունների ուսումնասիրության գործիքներ» հոդվածը 2006 թվականի հոկտեմբեր ամսվա Ensign ամսագրում։

Օժանդակ ուսումնական վարժություններ

Լրացուցիչ ուսուցում ուսումնասիրության գործիքների վերաբերյալ

Եթե ուսանողների համար օգտակար կլինի ավելին իմանալ այս դասում նշված ուսումնասիրության գործիքներն օգտագործելու մասին, առաջարկեք նրանց ծանոթանալ նախագահ Բոյդ Ք. Փաքերի (1924–2015)՝ Տասներկու Առաքյալների Քվորումի նախկին նախագահի հեղինակած «Using the New Scriptures» հոդվածին՝ 1985 թվականի դեկտեմբերի Ensign ամսագրում։ Ուսանողներին բաժանեք զույգերի և զույգից մի ուսանողի հանձնարարեք ուսումնասիրել «Թեմաների ուղեցույցը» բաժինը, իսկ մյուսին՝ «Ծանոթագրություններ» բաժինը: Բավարար ժամանակից հետո զույգի երկու ուսանողին առաջարկեք ուսուցանել միմյանց այն, ինչ սովորել են, և միմյանց հարց տալ, որի վերաբերյալ իրենք կարող են ուսումնասիրություն կատարել՝ օգտագործելով այս գործիքները: Այնուհետև նրանք կարող են օգնել միմյանց գտնել պատասխանները:

Մեկ այլ գաղափար է՝ վերանայել «Ուսումնասիրության օժանդակ նյութերը Վերջին Օրերի Սրբերի Եկեղեցու սուրբ գրությունների հրատարակություններում»։ Վերանայեք տարբեր վարժություններ և գտեք այնպիսիք, որոնք ավելի շատ են կենտրոնացած Վարդապետություն և Ուխտեր գրքի վրա կամ որոնք կօգնեն ձեր ուսանողներին ավելի արդյունավետ ուսումնասիրել սուրբ գրությունները:

Այս նյութն օգտագործելու օրինակներից մեկը հետևյալն է. ուսանողներին հինգ հոգանոց խմբերի բաժանեք: Յուրաքանչյուր խմբում յուրաքանչյուր ուսանողի հանձնարարեք ուսումնասիրել դասի հետևյալ բաժիններից մեկը. «Ծանոթագրություններ», «Թեմաների ուղեցույց», «Եռահատորի ցանկ», «Աստվածաշնչի բառարան» և «Եկեղեցու պատմության ժամանակագրություն, քարտեզներ և լուսանկարներ»։ Նրանք պետք է ուսումնասիրեն իրենց բաժնի նյութը և պատրաստվեն իրենց խմբին ուսուցանելու իրենց հանձնարարված գործիքի մասին։