Դաս 142. Վարդապետություն և Ուխտեր 129–132

Վարդապետության սերտման վարժություն 9

Մտապահել. Ձեռք բերել հոգևոր գիտելիքներ

Վարդապետության սերտումը կօգնի ուսանողներին կառուցել իրենց կյանքի հիմքը Հիսուս Քրիստոսի և Նրա ավետարանի վրա: Այս դասը ուսանողներին հնարավորություն կտա վարժվել մտապահել վարդապետության սերտման հատվածների հղումները և դրանց հետ կապված սուրբ գրության հիմնական արտահայտությունները: Այն նաև կօգնի նրանց սովորել և կիրառել հոգևոր գիտելիքներ ձեռք բերելու աստվածային սկզբունքները:

Հնարավոր ուսումնական վարժություններ

Վարդապետության սերտման կրկնություն․ Մտապահել

Կարող եք ցուցադրել ջրի դատարկ սափոր և ջրով լի մի քանի բաժակ։ Բաժակները լցրեք ջրով: Առաջարկեք ուսանողներից մեկին բարձրաձայն ասել վարդապետության սերտման սուրբ գրությունների հղումները և սուրբ գրության հիմնական արտահայտությունները, որոնք նա մտապահել է: Յուրաքանչյուր ասված հատվածի համար ուսանողը կարող է ջրով բաժակներից մեկը լցնել սափորի մեջ:

• Ձեր կարծիքով, սուրբ գրությունների մտապահումն ինչպե՞ս կարող է նման լինել անհրաժեշտության ժամանակ ջրի պաշար ունենալուն։

• Ո՞ր իրավիճակներում ձեզ կարող է անհրաժեշտ լինել մտաբերել սուրբ գրություններ, որոնց կարող եք հղում կատարել:

Խնդրեք ուսանողներին հիշել այնպիսի իրավիճակ, որի ժամանակ իրենք մտաբերել են որևէ սուրբ գրություն: Գուցե մտաբերել են որևէ հատվածի որոշակի բառեր կամ ամբողջական ուսմունք։ Ուսանողներին առաջարկեք կիսվել իրենց փորձառություններով:

Նշեք, որ եթե մենք ուսումնասիրել և ծանոթ ենք սուրբ գրությունների հատվածներին, Սուրբ Հոգին կարող է այդ հատվածները մեր մտքին բերել անհրաժեշտության ժամանակ (տես Հովհաննես 14․26)։ Ուսանողներին ասեք, որ այսօր որոշ ժամանակ կհատկացնեք՝ ավելի լավ ծանոթանալու վարդապետության սերտման որոշ հատվածների: Հետևյալը դա անելու եղանակներից մեկն է: Մտապահելու համար լրացուցիչ գաղափարներ կարելի է գտնել հավելվածի «Վարդապետության սերտման կրկնության վարժություններ» բաժնում:

Մտապահելու վարժություն

Որոշեք, թե վարդապետության սերտման որ հատվածները կցանկանայիք, որ դասարանը կրկներ: Այս վարժության համար արդյունավետ կլինի օգտագործել երկուսից չորս հատված:

Յուրաքանչյուր ուսանողի տրամադրեք մի դատարկ թուղթ: Առաջարկեք նրանց թղթի վրա գրել վարդապետության սերտման հատվածներից և հիմնական արտահայտություններից յուրաքանչյուրը։ Առաջարկեք նրանց առանձին-առանձին կտրտել որևէ հղման և հիմնական արտահայտության յուրաքանչյուր բառը։ Այնուհետև ուսանողները կարող են խառնել կտորները և նորից հավաքել դրանք ճիշտ հերթականությամբ: Եթե նրանք կարողանան հաջող կատարել այդ խնդիրը, առաջարկեք նրանց կրկնել գործընթացը հաջորդ հատվածի և հիմնական արտահայտության համար։ Երբ ուսանողները բավականին լավ սովորեն հատվածներն ու հիմնական արտահայտությունները, նրանք կարող են խառնել տարբեր հատվածների և հիմնական արտահայտությունների բոլոր մասերը և փորձել դրանք նորից հավաքել:

Որպես այլընտրանք, կարող եք առաջարկել ուսանողներին օգտագործել Վարդապետության սերտման հավելվածը՝ մտապահելու հմտության վրա աշխատելու համար:

Եթե բավարար ժամանակ ունեք, կարող եք առաջարկել մի քանի ուսանողի գալ և կիսվել մտապահած մի հատվածով և հիմնական արտահայտությունով և մի բաժակ ջուր լցնել սափորի մեջ:

Այնպես հաշվարկեք, որ մտապահելու վարժությունը տևի ընդամենը 10–15 րոպե, որպեսզի դասի ընթացքում բավարար ժամանակ լինի վարդապետության սերտման վարժությունի համար:

Սովորեք և կիրառեք հոգևոր գիտելիքներ ձեռք բերելու սկզբունքները

Եթե զգում եք, որ ուսանողներին անհրաժեշտ է կրկնել հոգևոր գիտելիքներ ձեռք բերելու սկզբունքները, ժամանակ տվեք նրանց՝ վերանայելու պարբերություններ 5–12-ը Վարդապետության սերտման հիմնական փաստաթղթի (2023) «Ձեռք բերել հոգևոր գիտելիքներ» բաժնում։ Կրկնելու համար առաջարկվող վարժությունները ներառված են «Վարդապետության սերտման կրկնության վարժություններ» հավելվածում:

Առաջարկեք ուսանողներին ընտրել հետևյալ սցենարներից մեկը կամ օգտագործել ձեր ստեղծած սցենարը, որը համապատասխանում է ձեր ուսանողների կարիքներին: Երբ ուսանողները ընտրեն սցենարը, քննարկեք, թե ինչու մարդը կարող է այդպես կարծել: Դա կարող է օգնել, որ սցենարներն ավելի իրական լինեն ուսանողների համար:

Կարող եք նաև դիտարկել սցենարի այլընտրանքային թեմաներ «Օժանդակ ուսումնական վարժություններ» բաժնում՝ այս դասի վերջում։

Սցենար 1. Պատկերացրեք, որ դուք ունեք մի ընկեր, որը երկմտանքի մեջ է տաճարային ամուսնության վերաբերյալ: Նա կարծում է, որ տաճարային ամուսնության համար շատ բան է պահանջվում, և այն մեծ պարտավորություն է։ Նա մտահոգվում է այն բոլոր ակնկալիքների համար, որ այն առաջացնում է իր նկատմամբ:

Սցենար 2. Ձեր ընկերը ձեզ հարցնում է. «Արդյո՞ք տաճարային ամուսնությունն իսկապես անհրաժեշտ է: Արդյո՞ք զույգի համար բավարար չէ քաղաքացիական ամուսնությունը, եթե նրանք իսկապես սիրում են միմյանց»:

Որպեսզի օգնեք ուսանողներին պատասխանատվություն ստանձնել իրենց ուսման համար, նրանց որոշ ժամանակ տվեք՝ մտածելու և իրենց ուսումնական օրագրերում պատասխանելու հետևյալ հարցերին:

• Ձեր կարծիքով, հոգևոր գիտելիքներ ձեռք բերելու ո՞ր սկզբունքն է առավել օգտակար այս սցենարների համար: Ինչո՞ւ։

• Վարդապետության սերտման ո՞ր հատվածները կարող են օգտակար լինել այս սցենարների համար:

Ուսանողներին ժամանակ տալով պատասխաններ պատրաստելու համար՝ կարող եք նրանց փոքր խմբերի բաժանել: Օգտակար կլինի խմբերի ղեկավարներ նշանակել՝ քննարկումը հեշտացնելու համար: Ղեկավարը կարող էր որոշել, թե ով է առաջինը արտահայտվում կամ որոշել, թե որ հերթականությամբ պետք է քննարկվեն հոգևոր գիտելիքներ ձեռք բերելու սկզբունքները: Խմբերին առաջարկեք կիսվել և քննարկել ներկայացվող հարցերի իրենց պատասխանները: Խմբերին բավականաչափ ժամանակ տվեք, որպեսզի յուրաքանչյուր անդամ արտահայտվի:

Այնուհետև կարող եք խմբերին առաջարկել նշել հոգևոր գիտելիքներ ձեռք բերելու այն սկզբունքները, որոնք չեն ընտրվել, և քննարկել, թե ինչպես կարող են այդ սկզբունքները ևս կիրառվել սցենարների վերաբերյալ:

Փոխգործակցեք խմբերի հետ՝ գնահատելու հոգևոր գիտելիքներ ձեռք բերելու սկզբունքները քննարկելու նրանց կարողությունը: Ըստ անհրաժեշտության, օգտագործեք հետևյալ հարցերը՝ օգնելու ուսանողներին բովանդակալից քննարկում ծավալել:

Գործեք հավատքով

• Ինչպե՞ս կարող է մարդը օգնություն խնդրել Երկնային Հորից և Հիսուս Քրիստոսից, երբ նա կասկածներ, մտահոգություններ կամ հարցեր ունի տաճարային ամուսնության վերաբերյալ:

• Մարդը, որը մտահոգություններ ունի տաճարային ամուսնության վերաբերյալ, ուրիշ ինչպե՞ս կարող է գործել հավատքով առ Հիսուս Քրիստոս:

Քննեք հասկացությունները և հարցերը հավերժության հեռանկարից

• Երկնային Հոր և Նրա փրկության ծրագրի մասին ի՞նչ գիտեք, որը կարող է օգտակար լինել այս սցենարի համար։

• Ինչպե՞ս կարող է տաճարային ամուսնությունը ազդել մարդու կյանքի վրա ներկայումս և հավերժության մեջ:

Ձգտեք մեծացնել հասկացողությունը աստվածային աղբյուրների միջոցով

• Ինչպե՞ս կարող է Վարդապետություն և Ուխտեր 131.1–4 հատվածներում ուսուցանված վարդապետությունն օգտակար լինել ձեր ընտրած սցենարի համար:

• Ի՞նչ այլ սուրբ գրություններ կամ մարգարեների խոսքեր կարող են օգտակար լինել (օրինակ՝ Վարդապետություն և Ուխտեր 132.19, Ա Կորնթացիներին 11.11, Ծնունդ 2.24)։ (Կարող եք նաև որոնել «Eternal Marriage»՝ Gospel Library հավելվածում:)

• Տեղեկությունների ո՞ր աղբյուրները կարող են ազդեցություն ունենալ այս անձի եզրահանգումների վրա:

Օգնեք ուսանողներին գնահատել իրենց փորձառությունը՝ կիրառելով հոգևոր գիտելիքներ ձեռք բերելու սկզբունքները։ Հետևյալ հարցերը կարող են օգտակար լինել.

• Հոգևոր գիտելիքներ ձեռք բերելու սկզբունքներն ինչպե՞ս են ձեզ օգնել արձագանքել սցենարին:

• Ի՞նչ դժվարությունների հանդիպեցիք, երբ փորձում էիք կիրառել հոգևոր գիտելիքներ ձեռք բերելու սկզբունքները սցենարների վերաբերյալ:

• Ի՞նչ եք սովորել կամ զգացել Հիսուս Քրիստոսի վերաբերյալ, որը, ձեր կարծիքով, կարևոր է հիշել:

Լրացուցիչ նյութեր

Սելեստիալ ամուսնությունն ինչպե՞ս համեմատել որևէ այլ բանի հետ:

Նախագահ Ռասսել Մ. Նելսոնն ուսուցանել է․

Ընտրության կարևորությունը կարելի է պատկերավոր ներկայացնել իմ մտածած գաղափարով, որը մի օր մտքիս եկավ, երբ գնումներ էի անում մեծ խանութում: Ես անվանեցի այն «գնորդների մոդելներ»։ Քանի որ գնումները մեր առօրյա կյանքի մի մասն են կազմում, այս մոդելները ծանոթ կլինեն:

Խելացի գնորդները նախքան ընտրություն կատարելը մանրակրկիտ ուսումնասիրում են առկա տարբերակները: Նրանք հիմնականում ուշադրություն են դարձնում իրենց փնտրած ապրանքի որակի և երկարաժամկետ հուսալիության վրա: Նրանք ցանկանում են գնել ամենալավ ապրանքը: Որոշ գնորդներ փնտրում են էժան գնումներ, մեկ այլ տեսակի գնորդներ էլ հակառակը՝ շռայլում են գումարը և հետագայում հասկանում, ի հիասթափություն իրենց, որ իրենց ընտրությունը չի արդարացրել սպասումները։ Եվ ցավոք, կան նաև հազվագյուտ մարդիկ, որոնք անազնիվ կերպով գողանում են այն, ինչ ցանկանում են ձեռք բերել: Մենք նրանց անվանում ենք խանութի գողեր:

Գնորդների մոդելները կարող են կիրառվել ամուսնության թեմայի վերաբերյալ։: Սիրահարված զույգը կարող է ընտրել ամենաբարձր մակարդակի ամուսնությունը, կամ՝ ավելի ցածր, որը երկարաժամկետ հուսալիություն չունի։ Կամ նրանք կարող են ընտրել ոչ մեկը և ոչ էլ մյուսը՝ լկտիաբար գողանալով այն, ինչ ուզում են ունենալ՝ դառնալով ամուսնական «խանութի գողեր»։

Ամուսնության թեման շատ է քննարկվում աշխարհում, որտեղ գոյություն ունեն կողակիցների համատեղ կյանքի մի քանի տարբերակներ: Խոսելով այս թեմայի մասին՝ իմ ելույթի նպատակն է հայտարարել որպես Տիրոջ առաքյալ, որ ամուսնությունը տղամարդու և կնոջ միջև սուրբ է. այն կարգված է Աստծո կողմից: Ես նաև հաստատում եմ տաճարային ամուսնության առաքինությունը: Դա ամուսնության ամենաբարձր և հարատև տարբերակն է, որը մեր Արարիչը կարող է առաջարկել իր զավակներին: (Ռասսել Մ. Նելսոն, «Սելեստիալ ամուսնություն», Լիահոնա, նոյեմբեր 2008, 92)

Օժանդակ ուսումնական վարժություններ

Դասը սկսելու այլընտրանքային եղանակ

Կարող եք ցուցադրել հետևյալ նկարը և գրատախտակին գրել «Դուք չեք կարող ջուր հանել դատարկ ջրհորից» արտահայտությունը:

• Ձեր կարծիքով, այս ասացվածքը ինչի՞ն կարող է վերաբերել մեր կյանքում:

• Ինչպե՞ս կարող է կիրառվել այս ասացվածքը՝ վարդապետության սերտման հատվածները մտապահելու համար:

Այլընտրանքային սցենարներ

Ստորև բերված են երկու հնարավոր սցենարներ, որոնք կարող են օգտագործվել հոգևոր գիտելիքներ ձեռք բերելու սկզբունքների կիրառման վարժության ընթացքում։

1. «Արդյո՞ք ես պետք է վճարեմ տասանորդը, եթե բավարար գումար չեմ վաստակում այլ բաների համար վճարելու համար»: (Տես Վարդապետություն և Ուխտեր 82․10, 119։)

2. «Պատկերացրեք, որ ձեր ընկերոջ հետ զրուցելիս շոշափվում է առ Աստված նրա ունեցած հավատքի թեման։ Նա ասում է ձեզ այն, ինչ իրեն սովորեցրել են, որ Աստված անձ չէ, այլ ավելի շատ ներկայություն կամ ուժ, որը պարզապես գոյություն ունի և գտնվում է ամենուր միաժամանակ: Երբ ձեր ընկերը կիսվում է իր պատկերացումով, նա դիմում են ձեզ և հարցնում, թե արդյոք համաձայն եք, որ դա այդպես է»։ (Տես Վարդապետություն և Ուխտեր 130․22–23:)