Դաս 116. Վարդապետություն և Ուխտեր 102–105

Վարդապետություն և Ուխտեր 103

Իսրայելի բանակի կազմավորումը

1834 թվականի փետրվարի 24-ին Մարգարե Ջոզեֆ Սմիթը հայտնություն ստացավ Տիրոջից, որտեղ Տերը նրան պատվիրում էր կազմավորել կամավորների մի խումբ՝ օգնելու տառապող Սրբերին Միսսուրիում: Տերը մեծ հավատք պահանջեց նրանցից, ովքեր արձագանքեցին խմբին միանալու կոչին, որը հայտնի դարձավ որպես Իսրայելի բանակ: Այս դասը կօգնի ուսանողներին հնազանդվել Տիրոջ կողմից իրենց տված պատվիրաններին:

Հնարավոր ուսումնական վարժություններ

Սա Իսրայելի բանակի փորձառությունների մասին երեք դասերից առաջինն է, որոնք ուսուցանվել են Վարդապետություն և Ուխտեր 102–105 բաժինների ուսուցման շաբաթվա ընթացքում: Եթե դուք չեք կարողանում երեք դասերն առանձին դասավանդել, քանի որ բավականաչափ հասանելի դասաժամանակ չունեք, մտածեք, թե ինչպես կարող եք համատեղել այս դասերի գաղափարները:

Հավերժական կյանքի խոչընդոտները

Կարող եք գրատախտակի մի կողմում նկարել մարդուկի պատկեր: Գրատախտակի մյուս կողմում գրեք հավերժական կյանք բառերը և դրանց միջև ինչ-որ պատնեշ նկարեք: Ապա կիսվեք Նախագահ Վիլֆորդ Վուդրուֆի հետևյալ խոսքերով։

Նախագահ Վիլֆորդ Վուդրուֆը (1807–98) ասել է․

Ես ձգտում եմ փրկության և հավերժական կյանքի և չեմ ուզում, որ որևէ բան կանգնած լինի իմ և այն բանի միջև, ինչին ես ձգտում եմ: (Վիլֆորդ Վուդրուֆ, Journal of Discourses, 17:246)

• Որո՞նք են մի քանի խոչընդոտները կամ արգելքները, որոնք մարդկանց թույլտվությամբ ստեղծվում են հավերժական կյանքին ձգտելու իրենց ճանապարհին:

  Նշեք, որ Վիլֆորդ Վուդրուֆի հայտարարությունը Տիրոջից ստացած դժվարին պատվիրանի պատասխանն էր։ Նախքան այդ պատվիրանը քննարկելը, կարող եք առաջարկել ուսանողներին լուռ մտածել հետևյալ հարցի իրենց պատասխանի մասին:

• Մեկից (պատարաստակամ չեմ) մինչև տասը (շատ պատրաստակամ եմ) սանդղակով որքանո՞վ եք պատրաստ հնազանդվել Տիրոջը, երբ թվում է, թե դժվար է հնազանդվել Նրա պատվիրաններին։

Մտածեք այն պատճառների մասին, թե ինչու հենց այդ պատասխանը տվեցիք։ Այսօր ուսումնասիրելիս ուշադրություն դարձրեք Երկնային Հոր կողմից Սուրբ Հոգու միջոցով ստացած ուսմունքներին և հոգևոր հուշումներին, որոնք կօգնեն ձեզ հետևել Փրկչին, նույնիսկ երբ պատվիրանին հնազանդվելը դժվար է թվում:

Տերը կոչ է անում մարդկանց փրկագնել Սիոնը

Օգտակար կլինի առաջարկել ուսանողներին կիսվել, թե ինչ են հիշում այն հանգամանքների մասին, որոնց բախվեցին Միսսուրիի Սրբերը 1833 թվականի վերջին: Անհրաժեշտության դեպքում հիշեցրեք նրանց, որ Սրբերը հալածվել և վտարվել էին իրենց տներից:

Մարգարե Ջոզեֆ Սմիթն աղոթեց Երկնային Հորը՝ այդ իրավիճակի վերաբերյալ Նրա կամքն իմանալու համար: Վարդապետություն և Ուխտեր 103 բաժնում արձանագրված հայտնությունը ստացվել է այն օրը, երբ Ջոզեֆ Սմիթը և Եկեղեցու մյուս ղեկավարները միասին խորհրդակցում էին, թե ինչպես օգնել Միսսուրիի Սրբերին:

Կարդացեք Վարդապետություն և Ուխտեր 103․15–18, 22, 27–28 հատվածները՝ փնտրելով, թե Հիսուս Քրիստոսը Սրբերին ինչ պատվիրեց անել:

• Ինչպե՞ս կամփոփեք Տիրոջ ցուցումներն այս հատվածներում։

Տերը պատվիրել էր մարդկանց կազմակերպվել տասը, քսան, հիսուն և հարյուր հոգանոց խմբերում: Նա կանչել էր հինգ հարյուր մարդ, սակայն պահանջել, որ մասնակցող տղամարդկանց թիվը լինի հարյուրից ոչ պակաս (տես Վարդապետություն և Ուխտեր 103.29–34): Ընդհանուր առմամբ, երկու հարյուրից մի փոքր ավելի տղամարդ մասնակցել է խմբին, որը հայտնի է որպես Իսրայելի բանակ, և որը հետագայում կոչվեց Սիոնի բանակ:

• Ըստ ձեզ, ի՞նչ մտքեր կամ զգացմունքներ կարող եք ունենալ, եթե կանչվեք միանալու Իսրայելի բանակին: Ինչո՞ւ։

Կարող եք առաջարկել ուսանողներին դասընկերոջ հետ կարդալ հետևյալ հատվածները և քննարկել ստորև ներկայացված հարցը:

Կարդացեք Վարդապետություն և Ուխտեր 103.20, 36 հատվածները՝ փնտրելով, թե ինչ է Տերը խոստացել նրանց, ովքեր կմասնակցեն Իսրայելի բանակին:

• Ի՞նչ գտաք այս հատվածներում, որոնք կմխիթարեն Իսրայելի բանակի անդամներին:

Բացատրեք, որ դասի սկզբում մեջբերված խոսքերում Վիլֆորդ Վուդրուֆը խոսում էր Իսրայելի բանակին միանալու իր կոչի մասին: Կարող եք ուսանողներին ցուցադրել խոսքերի հետևյալ ընդլայնված տարբերակը:

Վիլֆորդ Վուդրուֆը նկարագրել է Իսրայելի բանակին միանալու իր որոշումը.

Ես կանչվեցի՝ վերցնելու իմ կյանքն իմ ձեռքերի մեջ և բարձրանալու դեպի Միսսուրի, և մեզանից մի քանիսը գնացինք փրկագնելու մեր եղբայրներին: Մենք, անշուշտ, պետք է գնայինք հավատքով: Հարևաններս կանչեցին և աղաչեցին, որ չգնամ՝ ասելով. «Մի գնա, եթե գնա, կյանքդ կկորցնես»։ Ես ասացի նրանց. «Եթե ես իմանամ, որ Միսսուրի նահանգում կատարածս առաջին քայլի ժամանակ գնդակը [կխոցի] սիրտս, ես կգնամ»: … Դա այն էր, ինչ ես զգում էի այդ օրերին՝ կապված Աստծո գործի հետ, և այդպես եմ զգում այսօր: Ես ձգտում եմ փրկության և հավերժական կյանքի և չեմ ուզում, որ որևէ բան կանգնած լինի իմ և այն բանի միջև, ինչին ես ձգտում եմ: (Վիլֆորդ Վուդրուֆ, Journal of Discourses, 17:246, ուղղագրությունն արդիականացված է)

• Այս խոսքերում ի՞նչն է տպավորում ձեզ:

• Ի՞նչ սովորեցիք այս խոսքերից, որը կօգնի ձեզ, երբ հանդիպեք պատվիրանների, որոնց դժվար է հնազանդվել:

Երբ ուսանողները կիսվեն իրենց սովորածով, կարող են բացահայտել հետևյալ ճշմարտությունը. Երբ մենք հավատք ենք դրսևորում առ Հիսուս Քրիստոս, մենք կարողանում ենք զգալ Նրա պատվիրաններին հնազանդվելու ավելի մեծ պատրաստակամություն և կարողություն:

Տիրոջ պատվիրաններին հնազանդվելու հավատք

Կարող եք գրատախտակին ցուցադրել հետևյալ հարցերը: Նախքան դասարանով քննարկելը՝ ուսանողները կարող են նախ քննարկել դրանք դասընկերոջ հետ կամ փոքր խմբերով: Կարող եք ուսանողներին հանձնարարել գրատախտակին թվարկել առաջին հարցի իրենց պատասխանները։

• Որո՞նք են Տիրոջ պատվիրանների այն օրինակները, որոնց հնազանդվելը դժվար կլինի այսօրվա դեռահասների համար:

• Ինչո՞ւ կարող է դժվար լինել այս պատվիրաններին հնազանդվելը:

Հետևյալ ուսումնական վարժությունը կօգնի ուսանողներին ավելին իմանալ առ Հիսուս Քրիստոս հավատք դրսևորելու մասին՝ Նրա պատվիրաններին հնազանդվելու համար։ Կարող եք ցուցադրել հետևյալ ուսումնասիրության տարբերակները և ուսանողներին ժամանակ տալ՝ դրանք ուսումնասիրելու համար: Դասարանը կարող եք բաժանել երեք խմբի և յուրաքանչյուր խմբին հանձնարարել հետևյալ տարբերակներից մեկը։ Որպես այլընտրանք, կարող եք թույլ տալ ուսանողներին ընտրել փոքր խմբերով ուսումնասիրելու տարբերակը:

Պատկերացրեք, որ ունեք ընկեր, որը բախվել է պատվիրանի, որին դժվար է հնազանդվել: Ընտրեք ուսումնասիրության հետևյալ տարբերակներից մեկը և փնտրեք ուսմունքներ և ճշմարտություններ, որոնցով կցանկանաք կիսվել ձեր ընկերոջ հետ:

Տարբերակ 1. Պատմություններ սուրբ գրություններից

• Մովսես 6․26–34 (Ենովք)

• Ղուկաս 1.26–38 (Մարիամ՝ Հիսուսի մայրը)

• 1 Նեփի 3․1–8 (Նեփի)

Տարբերակ 2. Պատմություններ Հիսուս Քրիստոսի մասին

• Ղուկաս 22․39–44

• Հովհաննես 18․1–12, 33–37

• 1 Նեփի 19․8–9

Տարբերակ 3. Ուսմունքներ Երիտասարդներին զորացնելու համար․ Ընտրություններ կատարելու ուղեցույց գրքույկում (գրքույկ, 2022)

• «Կատարեք ոգեշնչված ընտրություններ»

• «Հիսուս Քրիստոսը կօգնի ձեզ»

• «Քայլեք Աստծո լույսի մեջ»

Ուսումնական վարժությունը կատարելու համար ուսանողներին ժամանակ տրամադրելուց հետո նրանց հնարավորություն տվեք կիսվել իրենց հայտնաբերածով: Կարող եք տալ նմանատիպ հարցեր.

• Ի՞նչ եք սովորել ուսումնասիրված հատվածներից, որը կօգնի ձեզ հնազանդվել այն պատվիրաններին, որոնք դժվար է պահել:

• Ինչպե՞ս է Տերն օրհնել ձեզ, երբ դուք հավատք եք դրսևորել Նրա հանդեպ այն ժամանակ, երբ Նրա պատվիրաններին դժվար էր հնազանդվել:

Ծրագիր կազմեք

Ուսանողներին ժամանակ տվեք՝ առաջնորդություն փնտրելու Երկնային Հորից, թե ինչպես կիրառել իրենց կյանքում այն, ինչ սովորել են: Կարող եք ցուցադրել հետևյալ հուշումները և առաջարկել ուսանողներին գրել դրանց պատասխաններն իրենց օրագրերում կամ թվային նշումներում:

1. Մտածեք մի պատվիրանի մասին, որին հնազանդվելը կարող է դժվար լինել ձեզ համար:

2. Բացահայտեք, թե ինչն է խոչընդոտում հնազանդվել այս պատվիրանին:

3. Այսօրվա ձեր սովորածից բացահայտեք այն, ինչը կօգնի ձեզ ավելի լավ հնազանդվել այս պատվիրանին:

4. Կազմեք ծրագիր, որը կօգնի ձեզ հավատք դրսևորել առ Հիսուս Քրիստոս՝ այս պատվիրանին հնազանդվելու համար:

Օժանդակ նյութեր

Վարդապետություն և Ուխտեր 103․12: Ինչպե՞ս կարող են նեղություններն օրհնություններ բերել:

Առաջին Նախագահությունից նախագահ Հենրի Բ. Այրինգն ուսուցանել է.

Գուցե մտածեք, թե ինչո՞ւ է սիրող և ամենազոր Աստված թույլ տալիս, որ մեր մահկանացու փորձությունն այդքան դժվար լինի։ Պատճառն այն է, որ Նա գիտի, որ մենք պետք է աճենք հոգևոր մաքրության և ամրության մեջ, որպեսզի կարողանանք հավերժ ապրել ընտանիքներով՝ Նրա ներկայության մեջ։ …

Ամենամեծ օրհնությունը, որը կստանանք, երբ փորձությունների ժամանակ ապացուցենք, որ հավատարիմ ենք մեր ուխտերին, կլինի մեր էության փոփոխությունը։ Եթե ընտրենք պահել մեր ուխտերը, Հիսուս Քրիստոսի զորությունը և Նրա Քավության օրհնությունները կարող են գործարկվել մեր մեջ։ Մեր սրտերը կարող են փափկել, որպեսզի սիրենք, ներենք և առաջարկենք ուրիշներին գալ դեպի Փրկիչը։ Տիրոջ հանդեպ մեր վստահությունը մեծանում է: Նվազում են մեր վախերը։ (Հենրի Բ. Այրինգ, «Փորձված, ստուգված և հղկված», Լիահոնա, նոյեմբեր 2020, 97–98)

Վարդապետություն և Ուխտեր 103․20: Որքա՞ն հաճախ է Աստված օգտագործում հրեշտակներին՝ մեզ օգնելու համար:

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Սկզբից ի վեր ողջ տնտեսությունների ընթացքում Աստված օգտագործել է հրեշտակներին որպես Իր պատվիրակներ՝ հայտնելու սեր և մտահոգություն Իր զավակների հանդեպ: …

Սովորաբար այսպիսի էակները տեսանելի չեն։ Երբեմն տեսանելի են։ Սակայն, տեսանելի, թե ոչ տեսանելի, նրանք միշտ մոտ են մեզ։ Երբեմն նրանց հանձնարարությունները շատ վիթխարի են և կարևորություն ունեն ողջ աշխարհի համար։ Երբեմն ուղերձներն ավելի անձնական են: Ժամանակ առ ժամանակ, հրեշտակների նպատակը զգուշացնելն է: Սակայն ավելի հաճախ դա մխիթարելն է, ողորմածության ինչ-որ տեսակի դրսևորումը, դժվար պահերին առաջնորդելը: (Ջեֆրի Ռ. Հոլլանդ «Հրեշտակների ծառայությունը», Լիահոնա, նոյեմբեր 2008, 29)

Նախագահ Ռասսել Մ. Նելսոնն ուսուցանել է․

Հնազանդությունն Աստծո պատվիրաններին կապահովի ֆիզիկական և հոգևոր պաշտպանություն։ Եվ հիշեք՝ Աստծո սուրբ հրեշտակները միշտ կանչի են սպասում մեզ օգնելու համար: Տերն այսպես է հայտարարել. «Ես կգնամ ձեր առջևից: Ես կլինեմ ձեր աջ կողմում և ձեր ձախ կողմում, և իմ Հոգին կլինի ձեր սրտերում, և իմ հրեշտակները՝ ձեր շուրջը, որ բարձրացնեն ձեզ» (Վարդապետություն և Ուխտեր 84.88): Ինչպիսի խոստում: Եթե մենք հավատարիմ լինենք, Նա և Նրա հրեշատակները կօգնեն մեզ: (Ռասսել Մ․ Նելսոն, «Հավատքով դեմ առ դեմ կանգնեք ապագային», Լիահոնա, մայիս 2011, 35)

Լրացուցիչ ուսումնական վարժություններ

Հնազանդությունն օրհնություններ է բերում

Կարող եք ցուցադրել «Հնազանդությունն օրհնություններ է բերում» (3:26) տեսանյութը: Կարող եք առաջարկել ուսանողներին ուշադրություն դարձնել Նախագահ Թոմաս Ս. Մոնսոնի (1927–2018) հիշատակած օրհնություններին, որոնք հասանելի են նրանց համար, ովքեր հնազանդվում են Տիրոջ պատվիրաններին:

Տեսանյութի դիտումից հետո խնդրեք ուսանողներին քննարկել, թե դժվար պատվիրաններին հնազանդվելու համար հավատք դրսևորելու ընտրությունն ինչպես կօգնի մեզ զարգացնել Երկնային Հոր և Հիսուս Քրիստոսի հատկանիշների նման հատկանիշներ:

Պահանջվում են կամավորներ

Կարող եք ցուցադրել մի ցուցանակ, որտեղ գրված է «Պահանջվում են կամավորներ»։ Ուսանողներին առաջարկեք պատկերացնել, որ իրենք ապրում են Կիրթլենդում (Օհայո) 1834թ. փետրվարին և հրավիրված են հատուկ հավաքի՝ քննարկելու Միսսուրիի պայքարը: Այնուհետև ցուցադրեք «Սիոնի բանակը» տեսանյութը 0:24-1:57։

Տեսանյութը դիտելուց հետո տվեք հետևյալ հարցերը.

• Ըստ ձեզ, Տերն ինչո՞ւ է կամավորներ խնդրում՝ Իր գործը կատարելու համար:

• Ի՞նչ եղանակներով է Նա օրհնում է մեզ՝ մեր ժամանակը, տաղանդները, եռանդն ու միջոցները կամավոր տրամադրելու համար, որպեսզի ծառայենք Իր զավակներին և կառուցենք Իր արքայությունը:

Մեր կյանքը տանք Տիրոջը

Որպեսզի օգնեք ուսանողներին ավելի լավ հասկանալ, թե իրենք ինչպես կարող են Վարդապետություն և Ուխտեր 103.27 հատվածի Տիրոջ ուսմունքները կիրառել իրենց կյանքում, կարող եք կիսվել Առաջին Նախագահության Նախագահ Ջեյմս Ի. Ֆաուստի (1920–2007) այս խոսքերով.

Մեզանից շատերի համար … այն ինչ պահանջվում է մեզանից, որ անենք Եկեղեցու համար, դա մահանալը չէ, այլ ապրելը հանուն դրա։ Շատերի համար Քրիստոսանման կյանքով ապրելը կարող է ավելի դժվար լինել, քան իր կյանքից հրաժարվելը։ (Ջեյմս Ի. Ֆաուստ, «Որտե՞ղ կարող եմ ամրացնել իմ դիրքը», Լիահոնա, նոյեմբեր 2006, 22)

Կարող եք հարցնել ուսանողներին, թե ինչ է նշանակում ապրել Հիսուս Քրիստոսի և Նրա ավետարանի համար: Քննարկման ընթացքում հաշվի առեք Նախագահ Ռասսել Մ. Նելսոնի հետևյալ հարցերը.

Դուք պատրա՞ստ եք թույլ տալ Աստծուն տնօրինել ձեր կյանքը: Դուք պատրա՞ստ եք թույլ տալ, որ Աստված ամենամեծ ազդեցությունն ունենա ձեր կյանքում: Թույլ կտա՞ք, որ Նրա խոսքերը, Նրա պատվիրաններն ու ուխտերը ազդեն ձեր ամենօրյա քայլերի վրա: Թույլ կտա՞ք, որ Նրա ձայնը գերակշռի մյուս ձայներին: Դուք պատրա՞ստ եք թույլ տալ, որ այն, ինչ Նա է ցանկանում, որ դուք անեք, ավելի կարևոր լինի ձեր մնացած բոլոր նպատակներից: Դուք պատրա՞ստ եք, որ ձեր «կամքը կուլ գնացած լին[ի Նրա] կամքին»: (Ռասսել Մ․ Նելսոն, «Թող Աստված տնօրինի», Լիահոնա, նոյեմբեր 2020, 94)