Leksiyon 27: Doktrina ug mga Pakigsaad 18

Doktrina ug mga Pakigsaad 18:1–13

“Hinumdomi ang Bili sa mga Kalag Mahinungdanon sa Panan-aw sa Dios”

Agig tubag sa unang mga lider sa Simbahan nga nagtinguha sa kabubut-on sa Ginoo kon unsaon sa pagtukod sa Iyang Simbahan, ang Ginoo mihatag og pagpadayag ngadto kang Joseph Smith, Oliver Cowdery, ug David Whitmer nga narekord sa Doktrina ug mga Pakigsaad 18. Ang Ginoo mitudlo niining mga tawhana og importante nga mga kamatuoran mahitungod sa bili sa atong mga kalag. Kini nga leksiyon makatabang sa mga estudyante nga mobati nga ang bili sa ilang mga kalag mahinungdanon sa panan-aw sa Dios.

Posible nga mga Kalihokan sa Pagkat-on

Atong bili

Ikonsiderar ang pagsugod sa klase pinaagi sa pagsulat sa mosunod nga dili kompleto nga pamahayag diha sa pisara. Dapita ang mga estudyante sa paghunahuna og tinud-anay nga mga paagi sa pagkompleto niini. Pangutan-a sila kon nganong ingon niini ang bation sa mga batan-on.

Sa kalibotan nga atong gipuy-an, tingali mobati kita nga matintal o mapugos sa pagbase sa atong bili diha sa _______________.

Sa laing paagi, mahimo nimong isulat diha sa pisara ang mosunod nga mga pulong: Panagway, mga Kalamposan, ug mga Kabtangan. Pangutan-a ang mga estudyante kon nganong ang ubang mga batan-on mobati nga matintal o mapugos sa pagbase sa ilang bili niini nga mga butanga. Pangutan-a kon unsa ang uban pang mga butang nga mahimong bation sa mga batan-on nga matintal nga gamiton isip basehan sa ilang bili.

Paggahin og kadiyot sa pagpamalandong kon unsay imong gibati mahitungod sa imong personal nga bili ug ngano. Sa unsa man nimo gibase ang imong bili? Samtang magtuon ka karon, pangitaa ang mga kamatuoran nga makatabang kanimo nga mabati ang imong bili sa panan-aw sa Dios.

Ang Ginoo nagtudlo mahitungod sa bili sa mga kalag

Ang mosunod nga pagpamubo makatabang sa mga estudyante nga makasabot sa konteksto sa mga bersikulo nga ilang tun-an sa Doktrina ug mga Pakigsaad 18.

Niadtong Hunyo 1829, si Joseph Smith, Oliver Cowdery, ug David Whitmer nakadawat og pagpadayag nga nailhan isip Doktrina ug mga Pakigsaad 18. Ang pagpadayag mahitungod sa pagtawag og dose ka Apostoles sa kataposang mga adlaw ug sa pagtukod sa Simbahan. Agi og dugang niini nga mga panudlo, ang Ginoo mipakigbahin kang Oliver ug David og gamhanang mga kamatuoran mahitungod sa atong bili.

Ang Doktrina ug mga Pakigsaad 18:10–11 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Doktrina ug mga Pakigsaad 18:9–13 aron makita unsa ang gitudlo sa Ginoo mahitungod sa atong bili ngadto Kaniya.

• Unsa ang imong ganahan o nakat-onan gikan niini nga mga bersikulo?

Samtang mopakigbahin ang mga estudyante, isulat diha sa pisara ang mga kamatuoran nga ilang nadiskobrehan. Kini ang pipila ka mga kamatuoran nga mahimo nilang mailhan:

Ang bili sa kalag mahinungdanon sa panan-aw sa Dios.

Hilabihan ka mahinungdanon ang akong bili nga andam si Jesus nga mag-antos ug mamatay aron ako makahinulsol.

Mahimong makatabang ang pagkahibalo nga ang sunod nga leksiyon (“Doktrina ug mga Pakigsaad 18:11–16”) mas nakatutok sa kalipay nga bation sa Manluluwas kon kita maghinulsol.

• Sa unsang paagi nga ang pag-antos ug kamatayon sa Manluluwas alang kanato nagpakita sa atong bili ngadto Kaniya?

• Sa unsa kaha nga paagi kini makaapekto kanato nga ibase ang atong bili sa gugma sa Langitnong Amahan ug sa Manluluwas alang kanato imbes sa kalibotanong mga timaan?

Palawman ang imong pagsabot

Aron matabangan ang mga estudyante nga molawom ang ilang pagsabot sa mga kamatuoran gikan sa Doktrina ug mga Pakigsaad 18:10–11, ikonsiderar ang paghatag sa mga estudyante og mga kopya sa giuban nga handout ug dapita sila sa pagkompleto sa usa o sa daghan pa sa mga opsiyon sa pagtuon. Ipakita kini nga mga opsiyon o ihatag kini isip handout.

Paghinumdom sa atong bili ngadto sa Dios

Pagpili og usa o ang duha sa mosunod nga mga opsiyon aron sa pagtabang kanimo nga mas makasabot ug makadayeg sa imong bili ngadto sa Dios.

Opsiyon 1: Pagtuon mahitungod sa Pag-ula ni Jesukristo ug pamalandongi ang Iyang gugma alang kanimo. Mahimo nimong basahon ang pipila sa mosunod nga mga bersikulo: Isaias 53:3–5; Lucas 22:41–44; Juan 3:16–17; 1 Mga taga-Corinto 6:11, 19–20; Alma 7:7, 10–13. Mahimo ka usab mangita og laing mga bersikulo aron tun-an.

Ikonsiderar ang pagrekord sa mga cross-reference nga gusto nimong hinumdoman. Mahimo nimo kining isulat diha sa imong mga kasulatan tapad sa Doktrina ug mga Pakigsaad 18:10–11, isulat kini diha sa imong journal sa pagtuon, o gamita ang imong Gospel Library nga app aron sa paghimo og mga tag o mga link.

Opsiyon 2: Tun-i unsa ang gitudlo sa mga lider sa Simbahan mahitungod sa atong bili ngadto sa Dios. Gamita ang Gospel Library o ubang mga kapanguhaan sa pagpangita og may kalabotang mga pamahayag o mga pakigpulong. Mahimo kang mag-search sa mga termino sama sa “bili” o “gugma sa Dios” aron matabangan ka nga makakita og mga kapanguhaan. Ang mosunod nga pamahayag ni Sister Joy D. Jones, kanhi Kinatibuk-ang Presidente sa Primary, usa ka pananglitan sa unsay imong makit-an.

Tugoti ko sa pagpasabot sa panginahanglan sa paghatag og kalainan tali sa duha ka kritikal nga mga pulong: bili ug katakos. Dili kini pareha. Ang espirituhanong bili nagpasabot sa paghatag og bili sa atong kaugalingon sama sa paghatag og bili sa Langitnong Amahan, dili sama sa paghatag og bili kanato sa kalibotan. Ang atong bili natino na sa wala pa kita moanhi niini nga yuta. “Ang gugma sa Dios walay sukod ug kini mohangtod.”

Sa laing bahin, ang katakos makab-ot pinaagi sa pagkamasulundon. Kon makasala ta, dili kaayo ta takos, apan dili gyod nga wala na tay bili! Magpadayon ta sa paghinulsol ug maningkamot nga mahisama ni Jesus uban sa atong bili nga bug-os. Sama sa gitudlo ni Presidente Brigham Young: “Ang pinakaubos, ang labing kubos nga espiritu ania na sa yuta … dunay bili sama sa mga kalibotan.” Bisan unsa pa, kita bililhon kanunay sa mga mata sa atong Langitnong Amahan. (Joy D. Jones, “Bili nga dili Masukod,” Liahona, Nob. 2017, 14)

Human sa igong panahon, hatagi ang mga estudyante og kahigayonan sa pagpakigbahin sa unsay ilang nakat-onan. Mahimo una silang mopakigbahin nga magpares, ug dayon ang andam nga mga estudyante mahimong mopakigbahin sa klase.

Paghimo og palibot diin ang tanan gitahod ug nahibalo nga ang ilang mga tampo gihatagan og bili: Pangita og mga kahigayonan sa pagpasalamat sa mga estudyante sa ilang mga tubag ug pahibaloa sila nga imong gihatagan og bili ang mga paagi nga sila miapil. Alang sa dugang nga pagbansay kon unsaon pagtabang sa mga estudyante sa pagsabot sa ilang bili, tan-awa ang pagbansay nga giulohan og “Paghimo og palibot diin ang tanan gitahod ug nahibalo nga ang ilang mga tampo gihatagan og bili.” Kini nga pagbansay makita sa Pagpalambo sa mga Kahanas sa Magtutudlo.

Mahimong makatabang sa klase kon ang usa ka listahan sa paborito nga mga kapanguhaan sa mga klasmeyt gibutang tanan diha sa pisara. Mahimong kopyahon sa mga estudyante kini nga lista alang sa personal nga pakisayran.

Pagkonektar niini sa imong kinabuhi

Ang pagpakigbahin og modernong mga istorya o mga kasinatian makatabang sa mga estudyante nga mobati sa ilang bili ngadto sa Dios. Sa dili pa hangyoon ang mga estudyante sa paghisgot sa mosunod nga pangutana, ikonsiderar ang pagpakigbahin sa imong kaugalingong ehemplo kon sa unsang paagi imong gibati ang imong bili ngadto sa Dios. Mahimo usab nimo ipakita ang bidyo nga “The Hope of God’s Light” (6:46), anaa sa ChurchofJesusChrist.org, ug dapita ang mga estudyante sa pagpangita kon sa unsang paagi nahibaloan sa usa ka tawo ang iyang bili sa mga mata sa Dios.

• Unsa nga mga kasinatian gikan sa imong kinabuhi o sa kinabuhi sa uban ang nakatabang kanimo nga mobati nga ang bili sa imong kalag mahinungdanon sa panan-aw sa Dios?

Dapita ang mga estudyante sa pagbuhat og usa ka butang aron sa pagpamalandong og mas lawom sa ilang bili sa panan-aw sa Dios sa sunod semana o sa sunod nga duha ka semana. Hatagi sila og panahon sa klase sa pag-andam unsay ilang buhaton. Ang mosunod nga lista naglakip sa mga ideya nga mahimo nimong ipakigbahin. Ang leksiyon nga “Sukda ang Imong Nakat-onan 2” mag-follow up sa mga kasinatian sa mga estudyante niini nga kalihokan.

Tinoa kon unsaon nimo sa pagpamalandong ang imong bili sa panan-aw sa Dios sa mosunod nga pipila ka semana. Ania ang pipila ka mga paagi nga mahimo nimo kini:

• Paghimo og usa ka pahinumdom ug ibutang kini kon asa nimo kini makita kanunay. Kini mahimo nga usa ka poster o usa ka background sa smartphone nga naglakip sa usa ka hulagway ug tingali bisan mga pulong gikan sa mga kasulatan.

• Pag-ampo matag buntag ug gabii aron mas masabtan kon sa unsang paagi ang imong Amahan sa Langit nagtan-aw kanimo.

• Pagplano og regular nga panahon sa pagpamalandong diha sa imong journal mahitungod sa imong bili.

• Paggahin og panahon sa daghang mga okasyon sa pagbasa ug pagtuon og mas lawom sa imong patriyarkal nga panalangin. Hunahunaa kon unsaon nimo kini paghimo sa lahi nga paagi sa pagsabot gayod kon unsa ang gusto sa imong Amahan sa Langit nga imong mahibaloan ug bation bahin sa imong kaugalingon.

Paghatag og pagpamatuod sa gugma sa Dios ug sa walay kataposan nga bili sa matag estudyante, gipakita pinaagi sa Pag-ula sa Manluluwas.

Isag-ulo

Mahimo nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan alang sa Doktrina ug mga Pakigsaad 18:10–11 kay “Ang bili sa mga kalag mahinungdanon sa panan-aw sa Dios.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Giunsa pagpakita sa Dios kanato kon unsa kita ka bililhon ngadto Kaniya?

Si Elder D. Todd Christofferson sa Korum sa Napulog Duha ka Apostoles mihisgot sa unsay gitanyag sa Langitnong Amahan kanato nga nagpakita sa atong bili ngadto Kaniya:

Ang gitanyag sa atong Langitnong Amahan kanato mao ang Iyang Kaugalingon ug ang Iyang Anak, usa ka suod ug malahutayong relasyon uban Kanila pinaagi sa grasya ug pagpataliwala ni Jesukristo, ang atong Manunubos. Kita mga anak sa Dios, gigahin alang sa pagka-imortal ug kinabuhing dayon. Ang atong kapalaran mao nga mahimong Iyang mga manununod, “isig ka manununod uban kang Kristo” [Mga Taga-Roma 8:17]. (D. Todd Christofferson, “Ang Atong Relasyon sa Dios,” Liahona, Mayo 2022, 79)

Unsay bili sa usa ka kalag?

Ikonsiderar ang pagtan-aw sa “My Brother’s Keeper” gikan sa time code 1:54 hangtod sa 4:24 aron makita ang usa ka ehemplo sa usa ka gamhanan nga tubag niini nga pangutana.

Si Presidente Dieter F. Uchtdorf, niadtong anaa sa Unang Kapangulohan, mitudlo:

Nasayran nato sa moderno nga pinadayag nga “ang bili sa mga kalag mahinungdanon sa panan-aw sa Dios” [Doktrina ug mga Pakigsaad 18:10]. Dili nato masukod ang bili sa laing kalag labaw pa kay sa atong pagsukod sa gilapdon sa kalibotan. Ang matag tawo nga atong mahimamat usa ka Importante Kaayo nga Tawo [Very Important Person] ngadto sa atong Langitnong Amahan. …

Usa ka babaye kinsa nakaagi og mga pagsulay ug kasakit sulod sa mga katuigan misulti nga naghilak, “Akong naamgohan nga sama ako sa usa ka karaan nga 20 dolyares nga kwarta—kum-ot, gisi, hugaw, giabusahan, ug nausab ang porma. Apan usa gihapon ako ka 20 dolyares nga kwarta. Ako adunay bili. Bisan tuod nga dili na kaayo ko maayong tan-awon, ug bisan tuod nga ako giabusahan ug gigamit, ang akong bili 20 dolyares nga kwarta lang gyod gihapon.” (Dieter F. Uchtdorf, “Kamo ang Akong mga Kamot” Liahona, Mayo 2010, 69)

Si Presidente Uchtdorf mipasabot usab:

Ug samtang magtan-aw kita sa kadako sa universe ug moingon, “Unsa ra man ang tawo kon itandi sa kanindot sa gilalang?” Ang Dios mismo nag-ingon nga kita ang hinungdan nga Iyang gilalang ang universe! Ang Iyang buhat ug himaya—ang katuyoan niining nindot nga uniberso—mao ang pagluwas ug paghimaya sa katawhan [tan-awa sa Moises 1:38–39]. Sa laing pagkasulti, ang kalapad sa kahangtoran, ang mga himaya ug mga misteryo sa walay kinutuoban nga gidak-on ug panahon tanan gimugna alang sa kaayohan sa ordinaryo nga mortal sama ninyo ug nako. Ang atong Langitnong Amahan milalang sa uniberso aron atong makab-ot unta ang atong potensiyal isip Iyang mga anak.

Kini ang kalainan sa tawo: itandi ngadto sa Dios, ang tawo walay bili; apan kita ang tanan alang sa Dios. Kon itandi sa walay kinutoban nga paglalang kita morag walay bili, kita adunay tinipik sa mahangturong kalayo nga nagdilaab sulod kanato. Kita adunay dili masabtan nga saad sa kahimayaan—mga kalibotan nga walay kataposan—nga makab-ot ra nato. Ug dako ang tinguha sa Dios sa pagtabang nato nga makab-ot kini. (Dieter F. Uchtdorf, “Kamo Importante ngadto Kaniya,” Liahona, Nob. 2011, 20)

Dugang nga mga Kalihokan sa Pagkat-on

Usa ka alternatibo nga pagsugod sa leksiyon

Pagpakita og nagkalainlaing mga butang o mga hulagway sa mga butang sama sa kendi, mga sinina, mga cell phone, o mga sakyanan, ug pangutan-a ang mga estudyante o ang uban kon unsa ang andam nila nga ibayad sa matag butang. Tabangi ang mga estudyante nga makasabot nga ang bili sa usa ka butang mahimong matino pinaagi sa unsay andam nga ibayad sa usa ka tawo alang niini.

Dayon dapita ang mga estudyante sa pagbasa sa Doktrina ug mga Pakigsaad 18:10–11 aron makita ang ilang bili ug unsa ang andam nga ibayad sa usa ka tawo alang kanila.

Bidyo

Ikonsiderar ang pagpakita sa bidyo nga “Igo Ba Ang Akong Kamaayo? Makasulod Ba Ko Didto?” (3:28), nga naghulagway sa pipila ka mga kabalaka sa kabatan-onan mahitungod sa ilang bili ug kon unsaon sa pagbuntog niadto nga mga kabalaka.

Mga Senaryo

Human matabangan ang mga estudyante sa pag-ila ug sa pagsabot sa mga kamatuoran niini nga leksiyon, ikonsiderar ang pagpakita sa mosunod nga mga senaryo. O mahimo nimong dapiton ang mga estudyante sa paghunahuna og uban nga kasagarang mga sitwasyon diin ang mga batan-on tingali wala makasabot o mobati sa ilang bili. Pangutan-a kon sa unsang paagi nga ang pagkahibalo sa kamatuoran mahitungod sa ilang bili makahimo og kalainan sa matag usa niini nga mga batan-on.

Si Maya kanunay nga nagtandi sa iyang kaugalingon ngadto sa uban ug mibati nga sila mas may talento ug mas adunay gasa kaysa niya.

Si Kallie kanunay nga nabalaka mahitungod sa unsay gihunahuna sa uban mahitungod kaniya.

Gigahin ni Taft ang daghang oras ug kuwarta aron maningkamot nga maanaa sa mga uso diha sa iyang eskuwelahan aron makita siya sa uban nga anaa sa uso.

Paghimo og sulat

Sa hapit na matapos ang leksiyon, tabangi ang mga estudyante sa paghunahuna kon unsaon nila sa pagpakigbahin sa ilang nakat-onan ngadto sa laing tawo. Mahimo silang mamalandong sa posibleng mga hunahuna ug pagbati sa usa ka tawo kinsa wala makasabot sa ilang bili ngadto sa Dios. Dapita ang mga estudyante sa paggamit sa ilang nakat-onan ug gibati niini nga leksiyon aron sa pagsulat og mubo nga sulat niini nga tawo. Mahimo kining maglakip og mga hugpong sa mga pulong gikan sa mga kasulatan o ubang mga kapanguhaan (uban sa ilang mga pakisayran) ingon man usab sa personal nga mga kasinatian. Kon ang mga estudyante maghunahuna og piho nga tawo, mahimo nilang ikonsiderar ang paghatag kanila sa sulat o ipadala kini sa usa ka text message.