Ni Cristo iti panagparangna ken ni Pablo iti pagbaludan

Septiembre 23–29

Taga Galacia

“Magna iti Espiritu”

Bayat ti sikakararag a panagbasam ken panagutobmo iti Taga Galacia, isuronto ti Apo kenka no ania ti nasken nga ibinglaymo iti klasem. Ti panangisuratmo kadagiti impresionmo ti mangipakita iti panagyaman iti Dios para iti tulongna (kitaen iti Paul B. Pieper, “To Hold Sacred,” Ensign wenno Liahona, Mayo 2012, 109).

Isuratmo Dagiti Impresionmo

icon iti panagbibinninglay

Yawis ti Panagbibinninglay

Ti panagadal iti nasantuan a kasuratan ket masansan nga agbanag iti napnuan kaipapanan a panaglilinnawag iti ebanghelio iti pamilia wenno gagayyem. Napasamak kadin daytoy kadagiti miembro ti klasem iti daytoy a lawas? Awisem ida a mangibinglay kadagiti padasda.

icon iti panangisuro

Isuro ti Doktrina

Taga Galacia 1:6–7; 3:1–5; 4:8–21; 5:1, 13–14

Mangidiaya ti ebanghelio ni Jesucristo iti wayawaya.

• Ti panagadal iti ania man a libro ti nasantuan a kasuratan ket nalaklaka no ammotayo no apay a naisurat daytoy. Gapu iti daytoy, mabalin a nasayaat nga irugim ti panangilawlawag maipapan kadagiti Taga Galacia nga addaan iti saludsod kas iti “Ania iti panagkunayo ti panggep ni Pablo iti panangisuratna iti daytoy a surat?” wenno “Ania a problema ti padpadasen ni Pablo a risuten?” Awisem dagiti miembro ti klase a mangsapul kadagiti pamugtuan iti Taga Galacia 1:6–7; 3:1–5; 4:8–21. Kasano nga addan kaipapanan ti mensahe ni Pablo ita nga agdama?

• Napanunot ti sumagmamano a Santo iti Galacia a kasapulanda nga ituloy ti panagbiag iti linteg ni Moises. Ken ni Pablo, kasla panagbiag daytoy iti “sangol ti pannakaadipen” a maidilig iti wayawaya a naidiaya iti linteg ni Cristo (Taga Galacia 5:1). Idinto a gagangay a ditayo sanguen daytoy a problema ita nga agdama, sanguentayo amin ti isu met la a pili iti nagbaetan ti naespirituan a pannakaadipen ken wayawaya babaen ken ni Jesucristo. Tapno matulongan dagiti miembro ti klase nga agsukisok kadagiti pannursuro ni Pablo maipapan iti wayawaya ken pannakaadipen, mabalinmo a saludsoden kadakuada a mangibaga kadagiti ugali ken tignay a mabalin a mangiturong iti naespirituan a pannakaadipen (kas kadagiti kannawidan iti kultura, dakes nga ugali, palso a pammati, wenno panangipokus kadagiti akinruar a tignay imbes a ti akin-uneg a kumbersion). Segun iti Taga Galacia 5:1, 13–14, kasano a masarakantayo ti wayawaya manipud iti naespirituan a pannakaadipen? Kasano a napadasanen dagiti miembro ti klase ti wayawaya a naikari iti ebanghelio ni Cristo? Mabalinmo pay nga awisen dagiti miembro ti klase a mangibinglay no kasano a makapagrespondeda iti maysa a tao a makarikna a ti panagbiag iti ebanghelio ti manglimitar iti bukod a wayawaya.

Taga Galacia 5:16–26

No “magnatayo iti Espiritu,” awatentayonto ti “bunga ti Espiritu.”

• Adu a tao ti agkarigatan a mangilasin iti impluensia ti Espiritu. Taga Galacia 5 makatulong kadagiti miembro ti klase a mangilasin iti bunga ti Espiritu. Nalabit a mabalinmo nga irugi babaen ti panangkiddawmo kadakuada a mangsukisok iti Taga Galacia 5:22–25 a mangsarak kadagiti balikas ni Pablo a nausar a pangiladawan iti bunga ti Espiritu. Apay a ti bunga ket maysa a nasayaat a metapora para iti wagas a pangimpluensiaan kadatayo ti Espiritu? Nalabit a mabalin nga ibinglay dagiti miembro ti klase no kasano a nasaksianda daytoy a bunga iti biagda, wenno ti biag dagiti tao nga am-ammoda. Sumagmamano a sabali pay a resources a sukisoken ket mangiraman iti Mateo 7:16–18; Juan 14:26–27; Moroni 7:13–17; Doktrina ken Katulagan 11:12–13; ken dagiti palawag ni Presidente Gordon B. Hinckley iti “Dagiti Nainayon a Resources.”

  dagiti mansanas iti maysa a kayo

  Maawattayo ti “bunga ti Espiritu” no kalikagumantayo a gun-oden daytoy.

• No dadduma masursurotayo maipapan ti maysa a prinsipio babaen ti panagsursuro maipapan iti kasupadina. Kas pagarigan, iti Taga Galacia 5:16–26, indasig ni Pablo ti “aramid ti lasag” iti “bunga ti Espiritu.” Tapno makatulong kadagiti miembro ti klase a mangutob no ania ti tukad a “magnada iti Espiritu,” mabalinmo nga isingasing a basaenda ti Taga Galacia 5:16–26 ket kalpasanna mangaramid iti bukod a panangamiris a kapadpada ti Attribute Activityiti panid 126 ti Preach My Gospel. Kas pagarigan, para iti tunggal banag a nakalista kadagiti bersikulo 19–23, mabalinda nga isurat ti saludsod a kas “Apalak kadi dagiti kapatadak?” wenno “Mariknak kadi ti ayat iti inaldaw?” Nasken a saan nga ibinglay dagiti miembro dagiti sungbatda iti panangamiris iti bagi, ngem maawismo ida a mangibingay kadagiit padas wenno kapanunotan a pagtitinnulonganda a “magna iti Espiritu.” No awan ti orasmo a mangileppas iti daytoy nga aktibidad iti klase, mabalinmo nga isingasing nga ileppas dagiti miembro ti klase daytoy iti pagtaengan.

Taga-Galacia 6:7–10

No agmulatayo “iti Espiritu,” aganitayto kadagiti bendision iti umno a panawen.

• Ti panangadal iti Taga Galacia 6:7–10 a makatulong kadagiti miembro ti klase a mangpanunot a nasayaat maipapan kadagiti napaut a pagbanagan dagiti pilida. Tapno matulongan ida, mabalin a mangitugotka iti bukbukel iti nadumaduma a kita, kasta met dagiti mulmula, bungbunga, wenno natnateng nga agtubo manipud iti tunggal maysa kadagitoy a bukbukel (wenno mangitugotka kadagiti ladawan dagitoy a banag). Makapagtitinnulong dagiti miembro ti klase a mangiparis iti tunggal bukel iti banag a patauden daytoy. Kalpasanna mabalinda a basaen dagiti bersikulo 7–10 ket pagsasaritaanda no ania ti kayat a sawen ti “agmula a maipaay iti lasag” ken “iti Espiritu.” (Mabalin a makatulong ti mensahe manipud ken ni Elder Ulisses Soares iti “Dagiti Nainayon a Resources.”) Ania ti apitentayo no agmulatayo a maipaay iti lasag? Ania ti apitentayo no agmulatayo a maipaay iti Espiritu? (kitaen iti Taga Galacia 5:22–23). Ibilang ti panangawis kadagiti miembro ti klase a mangutob kadagiti naespirituan a bendision a namnamaenda nga awaten. Ania ti maaramidda a “panagmula” ita tapno agsagana nga umawat kadagita a bendision? Mabalinmo pay nga awisen ida a mangisurat kadagiti kapanunotanda ken, no mariknada a komportableda, a mangibinglay kadagitoy.

• Marikna ti sumagmamano a miembro ti klase a “mabannog ti panagaramid iti naimbag” (Taga Galacia 6:9)—nalabit a dida sigurado nga agbunga dagiti panagkagumaanda. Ti panaglilinnawag iti Taga Galacia 6:7–10 ket makatulong. Tapno mayam-ammo dagitoy a bersikulo, mabalinmo nga awisen ti maysa a tao iti klase nga agsarita biit maipapan iti maysa a panawen idi kasapulanna ti anus idi pinadasna ti nangpadakkel iti maysa a banag. Ania ti maisuro kadatayo ti padas daytoy a tao, kasta met iti Taga Galacia 6:7–10, maipapan kadagiti panagkagumaantayo a “magna iti Espiritu”? (Taga Galacia 5:25).

icon iti panagsursuro

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti Surat kadagiti Taga Efeso, mabalinmo nga isarita kadakuada nga iti daytoy a surat masursurodanto no kasano a kabaelanda ti “agtalinaed a bumusor iti sairo” (Taga Efeso 6:11).

resources icon

Dagiti Nainayon a Resources

Taga Galacia

Dagiti bunga ti panagbiag iti ebanghelio.

Insuro ni President Gordon B. Hinckley: “Kasano nga ammotayo dagiti banag ti Espiritu? Kasano nga ammotayo nga aggapu daytoy iti Dios? Babaen dagiti bunga daytoy. No mangiturong daytoy iti panagdakkel ken panagdur-as, no mangiturong daytoy iti pammati ken pammaneknek, no mangiturong daytoy iti nasaysayaat a wagas iti panagaramid kadagiti banag, no mangiturong daytoy iti kinadiosan, ngarud nagtaud daytoy iti Dios. No daytoy ti mangdadael kadatayo, no daytoy ti mangisangbay kadatayo iti sipnget, no daytoy ti mangtikaw kadatayo ket mangpadanag kadatayo, no daytoy ti mangiturong iti saantayo a panamati, ngarud nagtaud daytoy iti sairo.”

Iti sabali pay a gundaway, kinuna ni Presidente Hinckley: “Mailasinyo dagiti parikna ti Espiritu babaen dagiti bunga ti Espiritu—dayta a manglawlawag, mangpadur-as, dayta nasayaat ken mangpasingked ken mangitag-ay ken mangiturong kadatayo kadagiti nasaysayaat a pampanunot ken nasaysayaat a balikas ken nasaysayaat nga aramid ket naggapu iti Espiritu ti Dios. Dayta a mangdadael kadatayo, a mangiturong kadatayo kadagiti maiparit a dalan—dayta ti nagtaud iti kabusor. Panagkunak kasta laeng ti kalawagna, kasta ti kasimplena” (Teachings of Presidents of the Church: Gordon B. Hinckley [2016], 121).

Panagmula iti Espiritu.

Inlawlawag ni Elder Ulisses Soares: “Ti mangimula iti Espiritu kayatna a sawen a ti amin a panunot, balikas, ken tignaytayo ti nasken a mangitag-ay kadatayo iti tukad ti kinadiosan dagiti nailangitan a nagannaktayo. Nupay kasta, ibasar ti nasantuan a kasuratan iti lasag kas pisikal wenno nailubongan a kasasaad ti gagangay a tao, a mangpalugod iti tao a maimpluensiaan iti nasged a tarigagay, pagganasan, ken pannakagargari ti lasag imbes a panagsapul iti pammaregta manipud iti Espiritu Santo. No saantayo nga agannad, dagita nga impluensia a kadua ti panangdupir ti dakes iti lubong ket mabalin a mangusar kadatayo iti naalas ken narunsanger nga ugali nga agbalin a paset ti kinataotayo” (“Abide in the Lord’s Territory!” Ensign wenno Liahona, Mayo 2012, 39).

Panangpadur-as iti Panangisurotayo

Tulongam dagiti sursuruan nga agpipinnaregta iti tunggal maysa. “Tunggal tao iti klasem ket nabaknang a paggapuan ti pammaneknek, nauneg a pannakaammo ken pannakaawat, ken padpadas iti panagbiag iti ebanghelio. Awisem ida nga agbibinninglay ken agpipinnaregta iti tunggal maysa” (Panangisuro iti Wagas ti Mangisalakan, 5).