Jesucristo

Septiembre 9–15

2 Taga Corinto 1–7

“Makikappiakayo iti Dios”

Bayat ti panangbasam iti 2 Taga Corinto 1–7 itoy a lawas, panunotem maipapan kadagiti masinunuo a miembro ti klase—dagitay umay iti klase ken dagitay saan nga umay. Kasano a mabendisionan ida dagiti pagbatayan kadagitoy a kapitulo?

Isuratmo Dagiti Impresionmo

icon iti panagbibinninglay

Yawis ti Panagbibinninglay

Mangted iti oras kadagiti miembro ti klase tapno mangibinglay kadagiti kapanunotan a mangaramid a nasamsamay ti panagadalda iti nasantuan a kasuratan.

icon iti panangisuro

Isuro ti Doktrina

2 Taga Corinto 1:3–7; 4:6–10, 17–18; 7:4–7

Mabalin a bendision dagiti pannuboktayo.

• Nalabit nga adda maysa a tao iti klasem nga agpaspasar iti narigat a pannubok. Dagiti padas nga inladawan ni Pablo ken ti balakad na intedna iti 2 Taga Corinto ket makatulong kadagiti miembro ti klase nga agpanunot maipapan kadagiti bendision a mabalin a sumangbay manipud kadagiti pannubokda. Tapno mairugi ti panaglilinnawag, mabalinmo nga idawat iti maysa a miembro ti klase nga umay a nakasagana nga agsarita maipapan no kasano a pinaraburan ti pannubok iti biagna wenno no ania ti nasursurona manipud iti maysa a tao a nakaibtur iti pannubok. Kalpasanna mabalinmo nga ikkan dagiti miembro ti klase iti sumagmamano a minuto a mangrebyu iti 2 Taga Corinto 1:3–7; 4:6–10, 17–18; ken 7:4–7, a mangsapsapul no ania ti insuro ni Pablo maipapan kadagiti panggep ken bendision dagiti pannubok. (Para kadagiti pagarigan dagiti pannursurona, kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.) Paibinglay kadagiti miembro ti klase no ania ti nasarakanda. Mabalinmo nga isingasing a basaenda iti napigsa ti bersikulo a nakasarakanda iti naipangruna a pannursuro ket kalpasanna mangibinglay iti maysa a padas wenno pammaneknek a mainaig iti dayta a pannursuro.

• Ibilangmo ti panangted kadagiti miembro ti klase iti oras nga agutob maipanggep iti no kasano a mabendisionan dagiti pannubok ti biagtayo, agraman ti panangrebyu kadagiti pannursuro ni Pablo a masarakan iti 2 Taga Corinto 1:3–7; 4:6–10, 17–18; ken 7:4–7. Kabayatan daytoy nga oras, mabalinda nga isurat no kasano a mayaplikar dagiti pannursuro ni Pablo iti rigrigat a nakaipasanguanda iti bukodda a biag.

• Tapno mangnayon iti panaglilinnawag, ibilangmo ti aggigiddan a panangkanta kadagiti paggugusto a himno dagiti miembro ti klase a mangipaneknek maipapan iti liwliwa ken dagiti bendision nga idiaya ti Nailangitan nga Ama ken ti Mangisalakan iti panawen ti pannubok—kas iti “Anian a Tibker ti Puon” (Dagiti Himno ken Kanta dagiti Ubbing, 33438 864). Kalpasan ti aggigiddan a panagkanta, mabalinmo nga awisen dagiti miembro ti klase a mangsapul iti maysa a ragup dagiti balikas iti 2 Taga Corinto 1 ken 4 a mariknada a mayannatup iti mensahe ti himno.

2 Taga Corinto 2:5–11

Umawattayo kadagiti bendision ket mangbendisiontayo kadagiti dadduma no mamakawantayo.

• Addaantayo amin iti padpadas idi “pinagleddaang[natayo]” ken ti pamiliatayo ti maysa a tao (bersikulo 5). Nalabit a mabalin a sukisoken dagiti miembro ti klase ti 2 Taga Corinto 2:5–11,a mangsapsapul iti balakad manipud ken ni Pablo maipapan iti no kasano ti mangtrato iti maysa a tao a nangpasakit kadatayo. Ibilangmo ti panangawis kadagiti miembro ti klase a mangrebyu iti Lucas 15:11–32; Juan 8:1–11; ken ti adaw ni Elder Kevin R. Duncan (kitaen iti “Dagiti Nainayon a Resources”) tapno masursuro ti ad-adu pay maipapan no kasano ti nasken a panangtratotayo kadagitoy nakabasol. Kasano a madangrantayo ti bagbagitayo ken dagiti dadduma no ditayo agtallugod a mamakawan?

2 Taga Corinto 5:14–21

Babaen ti Pannubbot ni Jesucristo, mabalintayo ti makikappia iti Dios.

• Adu a tao ti umay iti simbaan nga addaan iti tarigagay a makarikna nga as-asidegda iti Dios, ken ti panangilawlawag iti 2 Taga Corinto 5:14–21 ket makatulong kadakuada. Tapno mangrugi, mabalin a sukisoken dagiti miembro ti klase ti kayat a sawen ti balikas a makikappia, nalabit a mangrugi babaen ti panangsarak iti balikas iti maysa a diksionario. Ania dagiti nauneg a pannakaammo ken pannakaawat [insights] nga ited daytoy maipapan iti pannakikapia iti Dios? Ania dagiti mainayon a nauneg a pannakaammo ken pannakaawat [insights] a magun-odtayo manipud iti entry a “Pannubbot” iti Pangiwanwan iti Nasantuan a Kasuratan? Kasano a makatulong kadatayo dagitoy a nauneg a pannakaaammo ken pannakaawat [insights] tapno maawatantayo ti 2 Taga Corinto5:14–21? Mabalin a kayatmo nga awisen dagiti miembro ti klase a mangiburay kadagiti riknada maipapan iti Mangisalakan, a ti Pannubbotna ti mangaramid a mabalin kadatayo ti makitipon manen iti Dios.

2 Taga Corinto 7:8–11

Ti panagladingit a mayannurot iti Dios ket mangiturong iti panagbabawi.

• 2 Taga Corinto 7:8–11 ket mangted iti makatulong a palawag maipapan iti panagladingit a mayannurot iti Dios ken iti akem daytoy iti panagbabawi. Ania ti masursurotayo maipapan iti panagladingit a mayannurot iti Dios manipud iti 2 Taga Corinto 7:8–11 ken dagiti balikas ni Presidente Dieter F. Uchtdorf iti “Dagiti Nainayon a Resources”? Apay a kasapulan iti panagbabawi ti panagladingit a mayannurot iti Dios?

• Mabalin a maawis ti riknam tapno mangyallukoy iti nasaksaknap a panangilawlawag maipapan iti panagbabawi. No kasta, mabalinmo a padasen ti kastoy: Isuratmo iti pisarra ti Ti panagbabawi ket . Idawatmo kadagiti miembro ti klase a mangsarak kadagiti wagas a mangileppas iti daytoy a ragup ti balikas, nga us-usarenda dagiti banag a masursuroda manipud iti 2 Taga Corinto 7:8–11, kasta met a manipud kadagiti nasantuan a kasuratan ken dadduma pay a resources a masarakan iti “Dagiti Nainayon a Resources.” Kasano a mausarda dagitoy a pannursuro a makatulong a maipaawat iti maysa a tao no kasano ti sipupudno nga agbabawi?

icon iti panangsursuro

Yallukoy ti Panagsursuro iti Pagtaengan

Damagen dagiti miembro ti klase no inkararagandan a maikkat ti maysa a pannubok wenno rigatda. Iti 2 Taga Corinto 8–13, maammuandanto no kasano a nagresponde ni Pablo idi inkararaganna daytoy ngem saan a nasungbatan ti kararagna iti wagas a ninamnamana.

resources icon

Dagiti Nainayon a Resources

2 Taga Corinto 1–7

Ti panangkita kadagiti dadduma a kas iti panangkita ti Dios kadakuada ket makatulong kadatayo a mamakawan.

Insuro ni Elder Kevin R. Duncan: “Maysa a kasapulan nga elemento iti panangpakawan kadagiti dadduma ket panangpadas a mangkita ida a kas iti panangkita ti Dios kadakuada. No dadduma, mabalin a palugodannatayo ti Dios nga umawat ken bendisionannatayo iti sagut a kumita iti puso, kararua, ken espiritu ti sabali a tao a nakabasol kadatayo. Daytoy a nauneg a pannakaammo ken pannakaawat [insights] ket mabalin pay a mangiturong iti napalaus nga ayat para iti dayta a tao” (“The Healing Ointment of Forgiveness,” Ensign wenno Liahona, Mayo 2016, 34).

Ti panagladingit a mayannurot iti Dios ket mangparegta iti panagbalbaliw ken namnama.

Inlawlawag ni Presidente Dieter F. Uchtdorf:

“Tipanagladingit a mayannurot iti Dios ket mangparegta iti panagbalbaliw ken namnama babaen ti Pannubbot ni Jesucristo. Tipanagladingit a mayannurot iti lubong ket mangupay kadatayo, pukawenna ti namnamatayo, ket guyugoyennatayo nga agpasulisog iti ad-adu pay.

“Tipanagladingit a mayannurot iti Dios ket mangiturong iti kumbersion ken panagbalbaliw iti puso. Daytoy ti mangigapu kadatayo tapno gumura iti basol ken agayat iti kinaimbag. Allukoyennatayo a tumakder ken magna iti silaw ti ayat ni Cristo. Ti pudno a panagbabawi ket maipapan iti pana gbalbaliw wenno transpormasion, saan a pammarparigat wenno pannakaidadanes” (“You Can Do It Now!” Ensign wenno Liahona, Nob. 2013, 56).

Ania ti panagbabawi?

• Ezequiel 18:30–31

• Mosiah 3:19; 5:2

• Alma 5:11–21; 42:29–30

• 3 Nephi 9:13–14, 20–22

• Doktrina ken Katulagan 58:42–43

• Pangiwanwan iti Nasantuan a Kasuratan, “Agbabawi, Panagbabawi”

Insuro ni Elder Neil L. Andersen:

“No agbasoltayo, umadayotayo iti Dios. No agbabawitayo, agsublitayo iti Dios.

“Ti awis nga agbabawi ket manmano a panangipeksa iti pannakababalaw ngem ketdi maysa a naayat a pakaasi a tumaliaw ket ‘agsubli’ iti Dios [kitaen iti Helaman 7:17]. Daytoy ti awis ti maysa a managayat nga Ama ken ti Bugbugtong nga Anakna nga agbalintayo nga ad-adda pay ngem datayo, tapno mangragpat iti nangatngato a dalan ti biag, nga agbalbaliw, ken mangrikna iti ragsak gapu iti panagtungpal kadagiti bilin. No datayo dagiti disipulo ni Cristo, agrag-otayo iti bendision ti panagbabawi ken ti rag-o ti pannakapakawan. Agbalin dagitoy a pasettayo, a mangsuksukog iti wagas a panagpanunot ken panagriknatayo. …

Para iti kaaduan, ti panagbabawi ket ad-adu pay a panagdaliasat ngem iti maysa a banag nga aramidentayo laeng iti maminsan iti panagbiagtayo. Saan a nalaka daytoy. Narigat ti agbalbaliw. Kasapulanna ti adu pay a panangkagumaan tapno makapagbabawi. Kinuna ni Jesus, ‘Siasino man ti mayat nga umay sumurot kaniak, paglikudanna ti bagina, ket alaenna ti krusna, surotennak’ [Mateo 16:24]. Ti panagbabawi ket panangtallikud manipud iti sumagmamano a banag, a kas iti kinaulbod, kinapalangguad, pungtot, ken narugit a pampanunot, ken panagsubli iti dadduma pay a banag, kas iti kinaimbag, kinamanagparabur, kinaanus, ken kinaespirituan. Daytoy ti ‘panagsubli’ iti Dios” (“Repent … That I May Heal You,” Ensign wenno Liahona, Nob. 2009, 40–41).

Panangpadur-as iti Panangisurotayo

Iramanmo dagiti mangikarkarigatan nga agbalbaliw. No dadduma kasapulan laeng dagiti mangikarkarigatan a miembro ti klase a maibilangda ken mariknada a maipatpategda. Ibilangmo ti panangted kadakuada iti naidutok nga aramiden a makiraman iti umay nga adalen. Saanka a sumuko no saanda nga agresponde kadagiti panagkagumaanmo iti damo. (Kitaen iti Panangisuro iti Wagas ti Mangisalakan, 8–9.)