O Iesu o loo aoao atu i le apitaogalu

Iesu o Loo Aoao Atu Tagata i le Apitaogalu, saunia e James Tissot.

Fepuari 25–Mati 3

Mataio 6–7

“Ua Ia Aoao Atu ia te i Latou e Pei o Se ua i ai le Pule”

A o e tapenapena e aoao atu, amata i le tapenaina o oe lava. Suesue le Mataio 6--7, ma tusifaamaumau ou lagona uunai. O le a fesoasoani lea e te maua ai faaaliga i le auala e sili ona e taulimaina ai manaoga o lau vasega. Ona saili lea i le upega tafailagi mo manatu faafaiaoga.

Tusifaamaumau Ou Lagona Uunai

aikona fefaasoaai

Valaaulia Fefaasoaai

Valaaulia tagata o le vasega e faasoa mai pe o fea fuaitau i le Lauga i luga o le Mauga latou te manatu e sili ona manaomia i aso nei. Fautuaina tagata o le vasega e faaopoopo atu i manatu o isi.

aikona aoao atu

Aoao atu Aoaoga Faavae

Mataio 6–7

Afai tatou te faalogo ma galulue i aoaoga a le Alii, o le a fauina o tatou olaga i luga o se faavae mausali.

• O a aoaoga patino mai le Mataio 6--7 o le a sili ona aoga ia i latou e te aoaoina? Mafaufau e tusi i le laupapa ni mau mai le Mataio 6--7 o loo i ai nei aoaoga. E mafai e le vasega ona filifili se tasi o mau e suesue le leoa i ai ona tusi lea i le laupapa soo se upumoni faaleagaga latou te aoaoaina. Pe o faapefea ona tosina o tatou olaga i nei aoaoga?

• Na faaiu e le Faaola Lana lauga i se faataoto e ono fesoasoani i lau vasega e malamalama atili lelei ai i le taua o le ola i aoaoga a le Faaola (tagai Mataio 7:24--27; tagai foi Helamana 5:12) Ina ia vaai faalemafaufau i lenei faataoto, e mafai e tagata o le vasega ona galulue faatasi e fau se faavae malosi e faaaoga ai poloka, ipu, po o nisi ‘anomea ona tofotofo lea o le malosi o a latou faavae. Atonu e mafai ona latou faaigoaina a latou ‘anomea i mea latou te mafai ona fai e faaaoga ai aoaoga a le Faaola. E mafai faapefea i le faia o nei mea ona fesoasoani tatou te tatalia ai afa o le olaga?

Mataio 6:5–13

Sa aoaoina i tatou e le Faaola i le ala e tatalo ai.

• O le suesue i le Tatalo a le Alii e mafai ona fesoasoani ai i tagata o le vasega e faailoa pe mafai faapefea ona latou faaleleia a latou lava tatalo e ala ile mulimuli i faataitaiga a le Faaola. E mafai ona e valaauliaina i latou e tusi i le laupapa fasifuaitau mai le Mataio 6:9–13 (po o le Luka 11:1–4) lea e tulaga ese ai i latou. A o tatou manatunatu loloto i upu a le Faaola, o le a le mea ua tatou aoao e uiga i uiga faaleatua e tatau ona tatou maua a o tatou tatalo? O le a se mea ua tatou aoaoina e uiga i ituaiga o mea e tatau ona tatalo ai? E ono aoga i tagata ole vasega ona faaupu nisi o fasifuaitau a le Faaola e pei o mea latou te fai atua i a latou lava tatalo. Mo se faataiaiga, “Ia e foai mai i le aso nei a matou meaai e tatau ma le aso” e mafai ona faaupu faapea “Faamolemole fesoasoani mai i a’u taumafaiga e saunia mea mo lo’u aiga.”

• E mafai ona aoga mo i latou e te aoaoina le suesue mai isi faataitaiga a le Faaola o loo tatalo atu i Lona Tama, e pei o le Mataio 26:36–42 ma le Ioane 17. E mafai ona e valaaulia le vasega e suesue nisi o nei mau, saili mo tali i fesili e pei o le “O le a se mea ua tatou aoao e uiga i le tatalo mai le ala sa tatalo ai le Faaola?” ma le “E mafai faapefea ona tatou faia a tatou tatalo ia atili faapei o tatalo a le Faaola?” Mo isi tatalo o faataitaiga, tagai Enosa 1:3–17; Alema 31:26–35; 33:3–11.

• Pe i ai ni ou aafiaga e mafai ona e faasoa atu e fesootai i le tatalo? O le faasoa atu o aafiaga e ono faamalosiauina ai tagata o le vasega e faia foi faapena. Na faasoa mai e Peresitene Thomas S. Monson ni aafiaga patino e faatatau i le tatalo i lana savali o le “Consider the Blessings” (Ensign po o le Liahona, Nov. 2012, 86–89). E mafai ona outou talanoaina ia mataupu faavae mai lenei savali ma mai saunoaga i le “Punaoa Faaopoopo.” O le faamatalaga “Tatalo” i le Bible Dictionary e mafai ona aoga.

Mataio 7:7–11

E tali mai le Tama Faalelagi i au tatalo.

• Ina ia fesoasoani i tagata o le vasega ia faamalolosia lo latou faatuatua o le a faafofogaina e le Atua ma tali mai ia latou tatalo, e mafai ona e tusia le ole atu, saili, ma le tu’itu’i atu i le laupapa. Ona valaaulia lea o le vasega e sailiili i tusitusiga paia mo faataitaiga o tagata o e sa “ole atu,” “saili,” ma “tu’itu’i atu” (mo se faataitaiga, tagai 1 Nifae 11:1; Eteru 2:18–3:6; Talafaasolopito—Iosefa Samita 1:11–17). O a ni mea ua tatou aoao mai nei faataitaiga e uiga i le mauaina o tali i a tatou tatalo?

• O nisi o manatu faavae taua mo le Mataio 7:7–11 e mafai ona maua i le Faaliliuga a Iosefa Samita o le Mataio 7:12–17 (i le Faaopoopo o le Tusi Paia). I fuaiupu nei, na fia iloa ai e soo o Iesu ni mafuaaga e ono aumai e tagata mo le le sailia o le upumoni mai le Tama Faalelagi. E mafai ona e fai i tagata o le vasega e mafaufau faapea e i ai se latou uo e musu e saili atu mo se taitaiga po o faamanuiaga mai le Alii. O a ni mea e mafai e le vasega ona fai atu e fautuaina ai lenei uo? Mata e faapefea ona latou faaaogaina upu a le Faaola o i le Mataio 7:7–11?

Mataio 7:15–20

E mafai ona tatou faailoa ia perofeta pepelo i o latou fua.

• Atonu ua iloa e lau vasega ni filosofia pepelo ma isi mea taufaasese a le tiapolo, pe o luga o le upega tafailagi pe mai isi faapogai. Atonu foi ua latou faalogo i isi o faitio i auauna a le Alii. E mafai faapefea ona e fesoasoani ia latou malamalama pe faapefea ona iloatino perofeta pepelo ma aoaoga mai perofeta moni? E mafai ona e faaali ni fasi fualaau aina ma fesili pe o a ni o tatou manatu i laau na o mai ai. E faapefea ona fesoasoani lenei mea na fai tatou te malamalama ai i le Mataio 7:15--20? E mafai foi ona outou faitau faatasi ni savali talu ai nei mai perofeta soifua. O a “upumoni” po o taunuuga e maua mai i le mulimuli i a latou fautuaga?

  fua

  E mafai ona tatou iloa perofeta moni i o latou fua.

• O le Mataio 7:15--20 e mafai ona fesoasoani e fausia ai le faatuatua o tagata o le vasega i le misiona paia a le Perofeta o Iosefa Samita. O a fua o galuega na faataunuuina e Iosefa Samita? Mo nisi manatu, tagai i le savali a Elder Neil L. Andersen “Iosefa Samita” (Ensign po o le Liahona, Nov. 2014, 28–31). E mafai faapefea ona e faaaogaina le talafaatusa ale Faaola i le Mataio 7:15--20 e tuu atu ai molimau ia tatou uo ma aiga e uiga i le Perofeta o Iosefa?

aikona aoaoina

Fautuaina le Aoaoina i le Aiga

O le vaiaso lenei, a o suesue e tagata o le vasega le tele o vavega na faia e le Faaola, valaaulia i latou e manatunatu loloto i faataitaiga o vavega o ona po nei--pe tetele pe laiti---ua latou o i ai pe faalogo ai foi.

aikona o punaoa

Punaoa Faaopoopo

Mataio 6–7

Pese mo le faaaogaina i le potuaoga.

• O a mataupu faavae e fesootai ile tatalo e aoao ai e le vasega mai upu o le “O le Tatalo o Mo’omo’oga Moni o le Agaga”? (Viiga, nu. 80).

• O le faitau, usuina, po o le faalogologo i le “Vi’ia Le na Fetaia’i ma Ieova ,” Viiga, nu. 15, e ono fesoasoani i tagata o le vasega e mafaufau ai i ni fua e mafai ai ona tatou iloa o Iosefa Samita o se perofeta a le Atua (tagai foi MFF 135:3; “Iosefa Samita,” Autu o le Talalelei, topics.lds.org).

Tala e uiga i le tatalo.

Na faamatala e Peresitene Boyd K. Packer se tatalo faaleaiga na faia e lona aiga a o lei tuua e ia mo se malaga i Kalefonia. Sa ta’u atu ia i latou e se fomai manu o le a mate le latou povi ao lei uma le aso. “Sa fai e la ma tamaitiiti le matou tatalo. Ina ua uma ona ia ole atu i le Tama Faalelagi e faamanuia “Tama” i lana malaga ma faamanuia i matou uma,’ ona ia amata loa lea o se aioiga ma le lotonaunau. Fai mai a ia, ‘Le Tama Faalelagi e, faamolemole faamanuia le povi o Bossy ina ia manuia.”

“I Kalefonia, sa ou faamatalaina lena mea ma fai atu, ‘Atonu na ia aoaoina e le maua gofie uma mea matou te tatalo atu ai.’

“Sa i ai se lesona e tatau ona aoaoina, ae o a’u le sa aoaoina, e le mai lo’u atalii. Ina ua ou toe foi i le po o le Aso Sa, sa ‘tatau ona manuia’ Bossy (“Talosaga ma Uunaiga,” Ensign po o le Liahona, Nov. 2009, 45).

Fai mai Uso Mangal Dan Dipty, o se tagata o le Ekalesia mai Initia: “A o ou laitiiti sa ou lotu e le aunoa i le lotu Siamani Luteru. Matou te o soo i mauga e tatalo faatasi ai. I se tasi aso timuga, sa susu tagata uma i le vaega tatalo, ma o se tasi o faifeau na faia se tatalo faatauanau ma aioi atu i le Alii e taofi ai le timu. I lo matou ofo tele na taofi le timu. O le amataga lena o lo’u faatuatua i le Atua ma le tatalo” (“O Lau Malaga o se Paionia mai Initia,” Liahona, Iulai 2016, 67).

Mo isi tala e uiga i le tatalo, tagai i le vaega o Leo o le Au Paia o Aso e Gata Ai o le Ensign po o le Liahona.

Faaleleia o Lo Tatou Aoao Atu

Aua le fefe i le leai o se tali “O fesili lelei e umi se taimi e tali ai. E manaomia ai le mafaufau loloto, suesuega, ma musumusuga. O le taimi e te faaaluina e faatalitali ai mo ni tali i se fesili e mafai ona avea ma se taimi paia o le mafaufau loloto. Aloese mai le faaosoosoga e vave faamaea lea taimi e ala i le taliina o la oe lava fesili po o le se’e atu i se isi mataupu” (Aoao Atu i le Ala a le Faaola, 31).