Kōjerbale Itok, Ļoor Eō—N̄an Jabōt Jikuuļ

M̧aanjabpopo n̄an Katakin ilo Jabōt Jikuuļ

Ekkatak eo am̧ make im an baam̧le ilo m̧weo ej aikuj in ioļapen ekkatak gospel eo. Menin em̧ool n̄an kwe im n̄an ro kwoj katakin. Ilo am̧ m̧aanjabpopo n̄an katakin, jino kōn en̄jake ko am̧ make ilo jeje ko rekwojarjar. M̧aanjabpopo eo am̧ elukkuun aorōktata enaaj waļo̧k ilo am̧ itok n̄an Kraist, etale jeje ko rekwojarjar, im kappukot im̧we eo an Jetōb Kwojarjar.

Itok, Ļoor Eō—N̄an Kajjojo Armej im Baam̧le ko ej m̧ōttan eo eaorōk jim̧or ilo am̧ ekkatak im am̧ m̧aanjabpopo n̄an katakin. Enaaj jipan̄ eok bōk juon meļeļe eo em̧wilaļļo̧k an pedped in katak ko loi ilo jeje ko rekwojarjar. Enaaj barāinwōt kwōmaron̄ am̧ im̧we im kajjitōk ippān ro uwaan kūlaaj eo n̄an kōjerbale Itok,Ļoor Eō—N̄an Kajjojo Armej im Baam̧le ko n̄an kōkōm̧anm̧anļo̧k ekkatak jeje ko rekwojarjar eo aer make im baam̧le eo (n̄an jipan̄ kōm̧m̧ane menin, lale “Ļōmņak ko n̄an Kōketak Ekkatak an Juon Make im an Baam̧le” ilo kein jipan̄ in). Ilo am̧ kōm̧m̧ane, keememej n̄an maron̄ jab kainepataiki ro uwaan kūlaaj eo me jekjek ko an baam̧le eo remaron̄ jab rie ekkatak jeje ko rekwojarjar ilo baam̧le im nokon in jota eo an baam̧le.

Ilo iien m̧aanjabpopo eo am̧, ļōmņak ko im im̧we ko renaaj iwōj n̄an eok kōn armej ro kwoj katakin, wāween an pedped in katak ko ilo jeje ko rekwojarjar naaj kalōk tōmak eo aer ilo Jemedwōj Ilan̄ im Jisōs Kraist, im ewi wāween am̧ maron̄ im̧we er n̄an loi pedped in katak ko ilo aer katak jeje ko rekwojarjar ippaer make.

Ļōmņak ko n̄an Katakin

Ilo am̧ m̧aanjabpopo n̄an katakin, komaron̄ in bōk im̧we ko jet jān am̧ etali laajrak in katak ko ilo bok in jipan̄ in. Jab ļōmņak kōn meļeļe kein āinwōt kwoj aikuj ļoore kōmeļeļe bun̄tōn ņae bun̄tōn ak āinwōt elmakot ko n̄an kōkajoorļo̧k en̄jake ko am̧ make. Kwojeļā ro uwaan kūlaaj eo am̧, im kwonaaj kōm̧m̧an bwe kwon jeļā kajjeer em̧m̧anļo̧k ilo ami ekkatak ippān doon ilo kūlaaj. Irooj ejeļā kajjeer barāinwōt, im Enaaj im̧we eok kōn wāween ko rem̧m̧antata n̄an jipan̄ ro uwaan kūlaaj eo kalōk ekkatak gospel eo rej kōm̧m̧ane ilo m̧weo.

Elōn̄ kein jipan̄ ko jet rej pād n̄an eok n̄an am̧ kōjerbali ilo am̧ m̧aanjabpopo, ekoba ļōmņak ko ilo Itok, Ļoor Eō—N̄an Kajjojo Armej im Baam̧le ko im māākjin ko an Kabun̄ in. N̄an eļapļo̧k meļeļe ko kōn kein jipan̄ kein im ko jet, lale jākjen eo taitōl eo ej “Kein Jipan̄ ko Jet” ilo bok in jipan̄ in.

Jet Men ko n̄an Keememeji

• Āinwōt juon rūkaki, emaron̄ wōr juon am̧ eddo eaorōk n̄an rie, kōketak, im kalōk ioon ekkatak gospel eo an ro uwaan kūlaaj eo make im baam̧le eo. Ilo an jet ro uwaan kūlaaj eo maron̄ in jab jokkun wōt juon ekkatak gospel eo ilo m̧weo, kwomaron̄ kōm̧m̧ane juon oktak ekilep ilo kōketak im jipan̄ er kōm̧m̧an bwe m̧ōko im̧wer en jikin ekkatak gospel eo .

• Oktak eo an ro uwaan kūlaaj eo n̄an gospel eo an Jisōs Kraist enaaj m̧wilaļļo̧k ilo aer meļeļe im mour kōn katak ko rem̧ool. Kōketak er n̄an je im m̧akūtkūt ekkar n̄an im̧we ko rej būki jān Jetōb Kwojarjar eo.

• Katakin eļapļo̧k jān baj kōmeļeļe wōt, ak ej barāinwōt ļapļo̧k jān baj tōl juon iien ekōnono. M̧ōttan eddo eo am̧ ej n̄an kōketak bōk koņaan me ej kōkōm̧anm̧anļo̧k im ej pedped wōt ioon jeje ko rekwojarjar. Kwoj aikuj barāinwōt kwaļo̧k en̄jake ko rej im̧we eok me kwoj būki ilo am̧ ekkatak jeje ko rekwojarjar.

• Keememej elōn̄ ro uwaan kūlaaj eo ewōr aer en̄jake ko eļap meļeļeier ilo ekkatak jeje ko rekwojarjar ilo m̧weo. Kwomaron̄ rie ekkatak gospel eo aer ilo leļo̧k n̄an er iien ko rem̧m̧an remakijkij n̄an kwaļo̧k ta eo rej ekkatak ilo m̧weo im ekōjkan an jelet mour ko aer.

• Jemedwōj Ilan̄ ekōņaan bwe kwon tōprak āinwōt juon rūkaki. Ekar kōpooji elōn̄ kein jipan̄ ko n̄an jipan̄ eok, ekoba kweilo̧k in ko̧o̧njeļ ko an rūkaki ro. Ilo kweilo̧k in komaron̄ ko̧o̧njeļ ippān rūkaki ro jet kōn apan̄ ko kwoj jelm̧ai. Kwomaron̄ barāinwōt ekōnono im kamminene pedped in katakin ko an katakin āinwōt Kraist.

• Jet armej em̧m̧an tata aer ekkatak n̄e ewōr aer iien ko rem̧m̧an n̄an katakin. Ilo jet iien, ļōmņak in kōtļo̧k an ro uwaan kūlaaj eo, ekoba jodikdik ro, n̄an katakin jidik in katak eo. Pedped wōt ioon jokāālet in kōn aikuj ko im maron̄ ko an ro uwaan kūlaaj eo. Eļan̄n̄e kwoj kajjitōk ippān juon uwaan kūlaaj eo n̄an katakin, bōk iien eo n̄an jipan̄ ļeo ak lio m̧aanjabpopo m̧oktaļo̧k jān am̧ kōjerbal ļōmņak ko loi ilo bok in jipan̄ in im ilo Itok, Ļoor Eō—N̄an Kajjojo Armej im Baam̧le ko. Keememej bwe āinwōt juon rūkaki kar kūri, kwoj lukkuun bōk eddo in ta eo im katak kake ilo kūlaaj eo.

• Bok in jipan̄ in ekoba kōllaajrak in katakin ko n̄an kajjojo wiik in iiō eo. Ilo Jabōt ko n̄e Jabōt Jikuuļ eo ejjab kōm̧m̧an, baam̧le ko renaaj wōnm̧aanļo̧k wōt in riiti Katak im Bujen Ko ilo m̧weo ekkar n̄an kōllaajrak eo kar jikejuuļi ilo Itok, Loor Eō—N̄an Kajjojo Armej im Baam̧le ko. Kwomaron̄ kāālet n̄an kejoon katak ko me rej pād ilo wiik eo n̄e Jabōt Jikuuļ ejjab kōm̧m̧an, ak kwomaron̄ katakin jān elōn̄ katak ko ilo juon iien kūlaaj.