Kwoj juon Rūkaki ilo Kabun̄ eo an Jisōs Kraist

Kar kūr eok jān Anij n̄an iakwe im katakin ajri ro Nejin ilo wāween eo an Rilo̧mo̧o̧r. Kar kōjenolo̧k eok n̄an kūr in jān maron̄ eo an priesthood eo An ekwojarjar. Men̄e kwojjab juon rūkaki eo eļap imminene ippān, ilo am̧ mour erreo, jar aolep raan, im ekkatak jeje ko rekwojarjar, Jemedwōj Ilan̄ enaaj lewaj n̄an eok kareel im kajoor eo an Jetōb Kwojarjar n̄an jipan̄ eok tōprak (lale 2 Nipai 33:1).

Ro otemjej kar lewaj lōke in ņa ioom̧ n̄an kōjparok ajri ro nejin Jemedwōj Ilan̄, im Ejeļā ta eo rej aikuj im wāween eo em̧m̧antata n̄an an tōpar er. Jān Jetōb Kwojarjar eo, Anij enaaj tōl eok ilo am̧ m̧aanjabpopo im ilo am̧ katakin. Enaaj kwaļo̧k n̄an eok ta eo kwoj aikuj in ba im ta eo kwoj aikuj in kōm̧m̧ane (lale 2 Nipai 32:5).

Jibadbad eo eaorōk an katakin gospel eo im ekkatak ej n̄an ukot mour ko. Jibadbad ko am̧ āinwōt juon rūkaki ej n̄an jipan̄ ro kwoj katakin kōm̧m̧ane aolep men remaron̄e n̄an ļapļo̧k aer oktak n̄an gospel eo an Jisōs Kraist—juon kijejeto me eļapļo̧k jān iien kūlaaj. Kajjitōk ippān ro kwoj katakin n̄an lukkuun bōk koņaer ilo ekkatak pedped ko im katak ko an Jisōs Kraist im n̄an m̧akūtkūt ekkar n̄an ta eo rekar ekkatak. Rōjan̄ er n̄an kōm̧m̧ane ekkatak ko aer make im an baam̧le itulikin kūlaaj eo ej jipan̄ eo eļaptata an ekkatak gospel eo aer make. Ilo aer m̧akūtkūt ilo tōmak jān ekkatak āinwōt kajjojo armej im baam̧le ko, remaron̄ in karuwaineneiktok Jetōb eo n̄an mour ko aer, im ej Jetōb eo me ej bōktok oktak eo em̧ool. Aolep men kwoj kōm̧m̧ane āinwōt juon rūkaki aikuj in iookļo̧k wōt jibadbad in ekwojarjar.

Katakin wōt katak ko an jepļaaktok eo an gospel eo an Jisōs Kraist loe ilo jeje ko rekwojarjar im naan ko an rikanaan ro raan kein. Katak eo erreo—n̄an indeeo, m̧ool eo ejjab oktak katakin jān Anij im rikarejar ro An—karuwaineneik Jetōb eo im kajoor eo an n̄an ukot mour ko.

Kūr eo n̄an katakin ej juon lōke ekwojarjar, im ekkā wōt en̄jake eddodo ilo elōn̄ iien ko. Ak keememej bwe Jemedwōj Ilan̄ ekar kūr eok, im Ej jāmin meļo̧kļo̧k eok. En̄in ej jerbal eo an Irooj, im ilo am̧ jerbal “kōn aolepān būruwōm̧, maron̄, ļōmņak im kajoor” (Katak im Bujen Ko 4:2), Enaaj kōļapļo̧k jon̄an maron̄ eo am̧, mennin letok ko, im tōļan ko, im jerbal in jipan̄ eo am̧ n̄an kōjeraam̧m̧an mour ko an ro kwoj katakin.