C. C. A. Christensen (1831–1912), Zion’s Camp, c. 1878, tempera on muslin, 78 × 114 inches. Brigham Young University Museum of Art, gift of the grandchildren of C. C. A. Christensen, 1970

Jeptōm̧ba 13–19

Katak im Bujen Ko 102–105

“Ālkin Eļap En̄taan … Ej Itok Kōjeraam̧m̧an Eo”

Ilo am̧ m̧aanjabpopo n̄an katakin Katak im Bujen Ko 102–5, ron̄jake im̧we ko an Jetōb. E emaron̄ tōlļo̧k eok n̄an pedped in katak ko rejjab kwaļo̧ke ilo unin tōl in me enaaj jipan̄ armej ro kwoj katakin.

Je En̄jake ko Rej Im̧we Eok

Kajjitōk bwe ren Kwaļo̧k

Ro uwaan kūlaaj eo remaron̄ je juon ak ruo eoon ko jān Katak im Bujen Ko 102–5 me renaaj lo eļap meļeļe in n̄an er make. Innām remaron̄ jānij eoon ko ippān bar juon uwaan kūlaaj eo im ekōnono kake ippān doon ta eo raar ekkatak jān eoon kein.

Katakin Katak eo

Katak im Bujen Ko 103; 105

Mālijjon̄ ko ad rej katakin kōj katak ko raorōk im letok n̄an kōj iminene.

• Ilo an ro uwaan kūlaaj eo kar ekkatak jekjōn 103 im 105 wiik in, remaron̄ in kar lo pedped in katak ko me remaron̄ jipan̄ kōj ilo iien mālijjon̄ ko ak jum̧ae, kōtļo̧k bwe ren kwaļo̧k ta eo raar lo. Ak kwomaron̄ kajjitōk ippāer n̄an kappukot kain pedped in katak ko ilo Katak im Bujen Ko 103:5–7, 12, 36; 105:5–6, 9–12, 18–19 (lale barāinwōt “Kein Jipan̄ ko Jet”). Ta eo pedped in katak kein rej kwaļo̧k kōn ekōjkan ad maron̄ ņa mejļan n̄e jej jelm̧ae kapan̄pan̄ ak inepata? Ro uwaan kūlaaj eo remaron̄ m̧ōņōņō in kwaļo̧k en̄jake ko aer kōn kōjeraam̧m̧an ko raar itok “ālkin eļap en̄taan” (Katak im Bujen Ko 103:12).

• Eļan̄n̄e kwoj en̄jake ke jet bwebwenato ak bwebwenato ko an juon make kōn Kāām eo an Zaion enaaj lukkuun jipan̄, kwomaron̄ kajjitōk ippān juon n̄an etale juon iaan kein jipan̄ kein m̧okta jān kūlaaj eo im kwaļo̧k ilo tukadu in ta eo rej ekkatak: Saints, 1:194–206; “The Acceptable Offering of Zion’s Camp” (Revelations in Context, 213–18); ak “Voices of the Restoration: Zion’s Camp” (ilo laajrak in katak eo an wiik in ilo Itok, Ļoor Eō—N̄an Kajjojo Armej im Baam̧le ko). Eļan̄n̄e jemaron̄ kar reilikļo̧k im kōnono kōn Kāām eo an Zaion, ta eo jemaron̄ kar ba n̄an kōketak er? Ta eo remaron̄ kar ba n̄an kōketak kōj?

  

  Kāām eo an Zaion ekar pād itōrerein dān ko an Little Fishing Reba eo, ej waļo̧k ijin.

Katak im Bujen Ko 104:11–18

Kajjojo iaad ej “juon ribōk eddo ioon kōjeraam̧m̧an ko an laļ.”

• N̄an jipan̄ kūlaaj eo mour kōn katak ko ilo Katak im Bujen Ko 104:11–18, kwomaron̄ kajjitōk ippāer n̄an pijaikļo̧k aer tōn kappeik juon armej n̄an kōjparok juon men aorōkrōk. Ta eo renaaj kar ba n̄an armej eo? Ta eo renaaj kar kōtmene jān ļeo ak lio? Innām ro uwaan kūlaaj eo remaron̄ riiti Katak im Bujen Ko 104:11–18 n̄an lo ta eo Irooj ekar kappeik n̄an kōjparok eo ad im ta eo Ej kōtmene jān kōj. Ekōjkan an eoon kein jelōt wāween ad ļōmņak kōn laļ in, kōjeraam̧m̧an ko ad, ak armej ro ipeļaakid?

• N̄an jipan̄ ro uwaan kūlaaj eo em̧m̧anļo̧k aer meļeļe “wāween eo bwe … Irooj [ekar] kean̄ n̄an ņa an ro rekwōjarjar [An]” (Katak im Bujen Ko 104:16), ļōmņak in kwaļo̧k pija in alooj eo “The Labor of His Hands” (ChurchofJesusChrist.org). Pedped ioon ta eo jej ekkatak jān pija in alooj in im Katak im Bujen Ko 104:11–18, ta wāween eo an Irooj an leļo̧k n̄an Armej ro An Rekwojarjar? Kwomaron̄ barāinwōt kwaļo̧k ennaan in jān Būreejtōn Marion G. Romney: “Irooj … emaron̄ kea kōn [rijeram̧ōl ro] ilo ad jab jipan̄ eļan̄n̄e en kar jibadbad eo an n̄an kōm̧m̧an āindein. … Bōtaab jej aikuj en̄jake in, bwe ej itok wōt jān ad ekkatak wāween ad kea kōn doon jej kōļapļo̧k iakwe eo āinwōt an Kraist ilo kōj im paotok eo emenin aikuj n̄an kakarbōb kōj n̄an bar ro̧o̧l n̄an im̧aan mejān” (“Living Welfare Principles,” Ensign, Nob. 1981, 92). Leļo̧k n̄an ro uwaan kūlaaj eo jejjo minit ko n̄an je im̧we ko aer kōn ekōjkan aer maron̄ jipan̄ ro jet ilo wāween eo an Irooj.

Kein Jipan̄ ko Jet

Kajoor in karreo eo an mālijjon̄ ko.

Elder Orson F. Whitney ekar katakin: “Ejjeļo̧k metak me jejjab en̄taan, ejjeļo̧k mālijjon̄ me jej en̄jake ejej tokjān. Ej jipan̄ļo̧k jeļāļo̧kjeņ eo ad, n̄an kōkm̧anm̧anļo̧k kain m̧wil ko āinwōt kijenmej, tōmak, peran ilo metak im ettā. Aolep men ko jej en̄taan kaki im aolep men ko me jej niknik kaki, eļap tata n̄e jej niknik ilo kijenmej, kalōk paotok ko ad, karreoik būruōd, kōdepakpakļo̧k ad, im kōm̧m̧an bwe en ļapļo̧k an pidodo ad meanwōd im iakwe, ļapļo̧k ad erreo n̄an ņa etad ajri ro nejin Anij … im ej kōn būrom̧ōj im en̄taan, mōk ilo jerbal melijjon̄, me jej bōk jeļāļo̧kjeņ eo ke jej itok n̄an laļ in n̄an bōk im naaj kōm̧m̧an bwe jen erom̧ eļapļo̧k āinwōt Jemād im Jined ilo lan̄” (in Spencer W. Kimball, Faith Precedes the Miracle [1972], 98).

Elder David A. Bednar ekar ba: “Ilo juon tōre ilo mour ko ad kajjojo, naaj kajjitōk ippād n̄an m̧aaj ilo Kāām eo ad make ilo Zaion. Iien eo an kūr ko renaaj okoktak, im eļap tata kapan̄pan̄ ko jemaron̄ iooni ilo iaļ eo ad renaaj oktak jān doon. Bōtaab uwaak eo an ejjab bōjrak im ej jokkun wōt juon n̄an kūr in em̧ool enaaj waļo̧k āliktata eo me enaaj letok uwaak eo n̄an kajjitōk in ‘Wōn eo ej pād ilo jait eo an Irooj?’” (“On the Lord’s Side: Lessons from Zion’s Camp,” Ensign, Juļae 2017, 35).

Kōkōm̧anm̧anļo̧k Ad Katakin

Jerbal ippān doon ippān ro uwaan baam̧le ko. “Kōnke m̧weo ej dilepān ekkatak im mour kōn gospel eo, kijejeto ko am̧ n̄an kōkajoorļo̧k ro uwaan juon kūlaaj renaaj lukkuun wājapdik n̄e renaaj jerbal ippān doon ippān [ļeo ak lio] … ro uwaan baam̧le eo” (Teaching in the Savior’s Way, 8–9).