O̧kwōj 9–15

Katak im Bujen Ko 88

“Kajutak … juon Im̧ōn Anij”

Āinwōt juon rūkaki in gospel, ewōr am̧ eddo n̄an jipan̄ kūlaaj eo am̧ “katakin doon pedped in katak ko an aelōn̄ in kiin̄ eo” im “naan ko in mālōtlōt” (Katak im Bujen Ko 88:77, 118). N̄an kakkobaba n̄an kwaļo̧k men ko me kar im̧we eok n̄an katakin jān Katak im Bujen Ko 88, rōjan̄ ro uwaan kūlaaj eo n̄an katakin doon ta ko rekar ekkatak kaki.

Je En̄jake ko Rej Im̧we Eok

Kajjitōk bwe ren Kwaļo̧k

Jet iien juon pija emaron̄ kōketak n̄an kwaļo̧k. Komaron̄ kwaļo̧k juon pija in juon ra in wōjke olive (ak jin̄n̄aiki juon ioon bo̧o̧t eo) im kajjitōk ippān ro uwaan kūlaaj eo n̄an kwaļo̧k eoon ko jān Katak im Bujen Ko 88 me emaron̄ jipan̄ er meļeļe etke Josep Smith emaron̄ kar ņa etan revelesōn in “‘bilkōn wōjke olive’ … , enaan eo an Irooj kōn aenōm̧m̧an n̄an kōj” (jekjen taitōļ).

Katakin Katak eo

Katak im Bujen Ko 88:6–50

Meram im kakien rej itok jān Jisōs Kraist.

• N̄an jipan̄ kūlaaj eo am̧ meļeļe Katak im Bujen Ko 88:6–50, komaron̄ je meram im kakien ioon bo̧o̧t eo im kōjepel kūlaaj eo am̧ n̄an ruo kurup ko. Juon kurup emaron̄ etale Katak im Bujen Ko 88:6–13, 40–50, kappukot men ko me rej ekkatak kake kōn Jisōs Kraist jān eoon ko n̄an meram ilo eoon kein. Kurup eo juon emaron̄ lale eoon ko 13–26, 34–42, kappukot kōn ta eo rej ekkatak kake kōn aorōkin ļoor kakien ko An. Ta eo m̧ool ko kōn meram̧ im kakien ilo jekjen 88 rej katakin kōj kōn Rilo̧mo̧o̧r? Ewi wāween aer im̧we kōj n̄an erom̧ eļapļo̧k āinwōt E?

Katak im Bujen Ko 88:62–76, 119–26

Jemaron̄ erreo kōn Pinmuur eo an Jisōs Kraist.

• Irooj ekar kakien n̄an “kom̧in kokwōjarjar kom̧” ej waļo̧k ruo kōttan ilo jekjen 88 (eoon ko 68, 74). Eļan̄n̄e kwoj en̄jake im̧we n̄an kōmeļeļeik ta meļeļein, komaron̄ jino kappukoti meļeļe ko an naan in kokwōjarjar ak etale jejjo iaan eoon ko rekar ellaajrak ium̧win “Sanctification” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org). Komaron̄ barāinwōt kajjitōk ippān ro uwaan kūlaaj eo n̄an riiti Katak im Bujen Ko 88:62–76, 119–26 im kōmeļeļeik kajjitōk ko āinwōt kajjitōk kein ippān juon am̧ paatņōr: Ewi wāween ad kokwōjarjar? Ta kallim̧ur ko kar kōm̧m̧ani n̄an kain armej rōt kein ilo eoon kein? Etke Irooj ekōņaan bwe jen erreo? Remaron̄ barāinwōt lo uwaak ko n̄an kajjitōk kein ilo enaan eo an Būreejtōn Dallin H. Oak “Erreo kōn Ukweļo̧k” (Ensign ak Liaona, Māe 2019, 91–94; bar lale “Kein Jipan̄ ko Jet”).

Katak im Bujen Ko 88:77–78, 118–26

Irooj ekōņaan bwe jen kappukot jeļā jān katak im jān tōmak.

• Kapilōk eo an Irooj ekar leļo̧k n̄an jipan̄ kajutak “jikuuļ eo an rikanaan ro” ilo Kirtland (eoon 137) emaron̄ jipan̄ kūlaaj eo am̧ ilo kijejeto ko am̧ n̄an “katakin doon pedped in katak ko an aelōn̄ in kiin̄ eo” (eoon 77). Bōlen komaron̄ etale eoon ko 77–78 and 118–26 im kōmeļeļeik wāween n̄an kōm̧m̧ane kūlaaj eo am̧ bwe en juon “im̧ōn ekkatak” (eoon 119). Ro uwaan kūlaaj eo remaron̄ je jet “ruuļ an kūlaaj eo” ak pedped ko me rej ekkeijel ilo eoon kein me renaaj tōl eok ilo am̧ ekkatak ilo kūlaaj eo am̧. Komaron̄ barāinwōt kajjitōk ippān ro uwaan kūlaaj eo n̄an kwaļo̧k wāween aer kar kajjieon̄ n̄an mour kōn pedped kein ilo aer “kappukot jeļā” (eoon 118).

  

  M̧ōko im̧ōd remaron̄ jikin ko n̄an ekkatak men ko an jetōb.

Katak im Bujen Ko 88:119

Tampeļ eo ej im̧ōn Anij.

• N̄e emaron̄, kwaļo̧k juon pija in juon tampeļ epaaktata ioon bo̧o̧t eo, im kajjitōk ippān kūlaaj eo n̄an je turin naan ko jān eoon eoon 119 me kar kōjerbali n̄an kōmeļeļeik m̧weo im̧ōn Irooj. Kūr er n̄an kwaļo̧k en̄jake ko aer me ej kwaļo̧k wāween an tampeļ eo āinwōt kajjojo iaan kōmeļeļe ko. Komaron̄ barāinwōt kōmeļeļeik wāween an eoon in maron̄ tōl mour ko ad.

Kein Jipan̄ ko jet

Erreo kōn Ukweļo̧k.

Būreejtōn Dallin H. Oaks ekar katakin:

“Ukweļo̧k ej ijjino ippān Rilo̧mo̧o̧r eo ad, im ej juon lan̄lōn̄, ejjab juon ban. …

“N̄an erreo kōn ukweļo̧k, jej joļo̧k jerawiwi ko ad im kwaļo̧ki n̄an Irooj im n̄an ekajet eo An ilo mour in ijo emenin aikuj ie (lale Katak im Bujen Ko 58:43). Alma ekar barāinwōt katakin bwe jej aikuj ‘bōktok jerbal ko in jim̧we’ (Alma 5:35). Aolep men kein rej mōttan ļo̧k kūr in ekutkut an waļo̧k ilo jeje ko rekwojarjar n̄an itok n̄an Kraist.

“Jej aikuj bōk kwojkwoj eo kajjojo Jabōt. Ilo kain̄i in jej kōm̧m̧an bujen ko im bōk kōjeraam̧m̧an ko me rej jipan̄ kōj eļļā ioon aolep kōm̧m̧an im ikdeelel ko me rej bōbrae kōj jān wanōk eo me Rilo̧mo̧o̧r ej kūr kōj n̄an tōpare (lale Matu 5:48; 3 Nipai 12:48). Ilo ad “kaarmejjete [kōj] make jān aolep men ko rejjab em̧m̧an, im iakwe Anij kōn aolep [ad] maron̄, ļōmņak im kajoor,’ innem jemaron̄ ‘weeppān ilo Kraist” im ‘kokwōjarjar’ kōn to̧o̧rļo̧k in bōtōktōkin n̄an ‘kwōjarjar, ejjeļo̧k libbijinjin’ (Moronai 10:32–33). Juon kōjeraam̧m̧an em̧m̧an! Juon menin bwilon̄, ekabwilōn̄lōn̄! Juon kōjeraam̧m̧an!” (“Erreo kōn Ukweļo̧k,” Ensign ak Liaona, Māe 2019, 92).

Kōkōm̧anm̧anļo̧k Ad Katakin

Kappukot kein jipan̄ ko n̄an rie pedped in katak ko. N̄an kakkobaba n̄an ļōmņak ko ilo laajrak in, komaron̄ kappukot pijaan alooj ko an Kabun̄ in, al, ak pija ak jin̄n̄a ko n̄an katakin pedped ko ilo Katak im Bujen Ko 88. (Lale Teaching in the Savior’s Way, 17–18.)