Restoration, jān Liz Lemon Swindle

Juļae 26–O̧kwōj 1.

Katak im Bujen Ko 84

“Kajoor in Āinwōt Anij”

Ta eo konaaj kōm̧m̧ane n̄an kajjitōk ippān ro uwaan kūlaaj eo n̄an kwaļo̧k ta eo rekar ekkatak jān e ilo aer kar katak jān Katak im Bujen Ko 84?

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ro uwaan kūlaaj eo n̄an kwaļo̧k n̄an bar juon eo uwaan kūlaaj eo juon m̧ool me rej lo ilo jākjen 84 me ekar im̧we er ak kar jipan̄ er bwe en em̧m̧anļo̧k aer meļeļe kōn priesthood eo an Anij. Innem kajjitōk ippān jejjo n̄an kwaļo̧k n̄an kūlaaj eo.

Katakin Katak eo

Katak im Bujen Ko 84:1–5, 17–28, 31–42

Em̧ōj am̧ deļo̧n̄e kajoor in priesthood im kōjeraam̧m̧an ko an Anij.

• Irooj ej jino “revelesōn kōn priesthood” in ilo (Katak im Bujen Ko 84, jekjen taitōļ) ilo an katakin bwe juon tampeļ enaaj kar ekkal ilo Zaion (lale eoon ko 1–5). Ewi wāween am̧ maron̄ jipan̄ ro uwaan kūlaaj eo meļeļe kōn jem̧jerā eo ikōtaan un ko rekwojarjar an tampeļ im priesthood eo? Komaron̄ jino ilo am̧ je juon kajjitōk ioon bo̧o̧t eo āinwōt Ta un ko an priesthood eo? innem kajjitōk ippān ro uwaan kūlaaj eo n̄an kappukot uwaak ko ilo Katak im Bujen Ko 84:17–28, 31–42. Ewi wāween an tampeļ im kain̄i ko an tampeļ jipan̄ kakūrm̧ool un kein?

• N̄an jipan̄ ro uwaan kūlaaj eo meļeļe kajoor in priesthood eo emaron̄ wōr ilo mour ko ad, komaron̄ kajjitōk ippāer n̄an riit Katak im Bujen Ko 84:17–28 im ļōmņak kōn wāween an mour ko aer naaj lukkun oktak n̄e ejjeļo̧k priesthood an Anij. Rojan̄ er n̄an kwaļo̧k etke rej kam̧m̧oolol kōn priesthood eo, ippānļo̧k en̄jake ko me rekar en̄jake kōn kajoor in priesthood eo—ilo baam̧le ko aer, kūr ko, ak mour an kajjojo. Ewi wāween ad bōk kajoor in priesthood eo?

• Kallim̧ur im bujen ko an priesthood (lale Katak im Bujen Ko 84:31–42) ewōr ie jerbal ko rejeņoļo̧k an ro me em̧ōj kapit er n̄an opij eo an priesthood. Ak elōn̄ kōjeraam̧m̧an ko kar kallim̧ur kaki ilo eoon kein me repojak n̄an aolep. N̄an jipan̄ ro uwaan kūlaaj eo lale wāween an kallim̧ur kein iookļo̧k er, komaron̄ kajjitōk ippāer n̄an riiti eoon ko 33–42 im kōnono kōn wāween ad maron̄ “bōk” priesthood eo (eoon 35), rikajeran Irooj, im Irooj. Remaron̄ barāinwōt riit ennaan ilo “Kein Jipan̄ ko Jet” n̄an kappukot ta eo jej aikuji n̄an kōm̧m̧ane n̄an bōk kōjeraam̧m̧an ko an priesthood eo. Komaron̄ jipan̄ ro uwaan kūlaaj eo ļōmņak kōn ta eo emaron̄ koba ilo “aolep men ko an Jema” (eoon 38), āinwōt M̧wilin im kain mour rōt eo An me Ekar m̧ōņōņō kake. Ta ko jet rej im̧we kōj kōn eoon kein im ennaan kein?

  

  Kain̄i ko an priesthood ej kōjeraam̧m̧an aolep ajri ro nejin Anij.

Katak im Bujen Ko 84:61–88

Irooj enaaj rejtake ro rej jerbal n̄an E.

• Ilo an eoon kein kajju n̄an ro rej “naaj ilo̧k im kwaļo̧k naan kōn gospel in aelōn̄ in Anij” (eoon 80), elōn̄ iaan pedped ko repād ie remaron̄ jerbal n̄an jabdewōt eo ej jerbal n̄an Anij. Komaron̄ leļo̧k n̄an kajjojo ro membōr in kūlaaj eo juon m̧ōttan in Katak im Bujen Ko 84:61–88 n̄an riiti im kajjitōk ippāer n̄an kwaļo̧k ippān bar juon uwaan kūlaaj eo ta eo rekar ekkatak me emaron̄ iookļo̧k n̄an jabdewōt eo ej jerbal n̄an Irooj. Ro uwaan kūlaaj eo remaron̄ kālet juon eoon em̧m̧an ippāer ak kurup in eoon ko n̄an kakilōklōk ak likūt ijo renaaj loi aolep raan. Kallim̧ur ta ko reitoklimoier kake? Ta eo jemaron̄ kwaļo̧k jān eoon kein n̄an im̧we mijinede rein rekāāl me rej jerbal aolep raan ak ro me rej kōppopo n̄an jerbale juon mijen?

Kein Jipan̄ ko jet

Aolep remaron̄ bōk ta eo epād ippān Jemed.

Būreejtōn M. Russell Ballard ekar katakin: “Aolep ro me rekar kōm̧m̧ani bujen ko rekwojarjar ippān Irooj im ro rej kautiej bujen ko rej karbōb n̄an bōk revelesōn ko an juon make, n̄an jeraam̧m̧an jān enjeļ ro rej karejar, n̄an kōnono ippān Anij, n̄an bōk tarlep in gospel eo, im, āliktata, n̄an erom̧ rijolet ippān Jisōs Kraist kōn aolep men ko ewōr ippān Jemen” (“Men and Women and Priesthood Power,” Ensign, Jept. 2014, 32).

Būreejtōnji eo Eutiej jiniontata an Doulul eo an Kōrā ilo Salt Lake Stake rekar je ilo 1878: “Jej lukkuun kam̧m̧oolol bwe kōn kōjeraam̧m̧an ko an Jemedwōj Ilan̄, jej, Rikarejaran kōrā ro me kar kūr n̄an rijipan̄ ilo jerbal ippān em̧m̧aan ro n̄an kalōk aelōn̄ in kiin̄ an Anij ioon laļ in, ilo ad jipan̄ kalōk Tampeļ ko, ijo jemaron̄ bōk kōjeram̧m̧an ko ilo iien im n̄an indeeo. Ilo aolep kain̄i ko jekar bōki ilo Im̧ōn Irooj, kōrā ro rej jutak iturin em̧m̧aan ro, jim̧or n̄an ro remour im ro remej, kwaļo̧k bwe kōrā ejjab anemkwōj jān m̧aan, ak m̧aan anemkwōj jān kōrā, ilo Irooj” (Mary Isabella Horne, Elmina S. Taylor, im Serepta M. Heywood, “N̄an Būreejtōn ro im Membōr ro ilo Doulul eo an Kōrā ro ilo Salt Lake Stake Ziaon eo, Kile im Karuwainene!” Woman’s Exponent, Jan. 15, 1878, 123).

Kōkkōm̧anm̧anļo̧k Ad Katakin

Mije wōt katakin ko am̧ ikkijeen katak eo. Lukkuun lale bwe kōmeļeļe ko an kūlaaj eo am̧ en mije pedped in katak ko ilo jeje ko rekwojarjar. Komaron̄ kōm̧m̧ane menin ilo am̧ kajjitōk ippān kūlaaj eo n̄an riit jeje ko rekwojarjar innem kwaļo̧k m̧ool ko rej loi, barāinwōt en̄jake ko aer ilo aer mour kōn m̧ool ko. (Lale Teaching in the Savior’s Way, 20–21