M̧aaj 15–21

Katak im Bujen ko 27–28

“Aolep Men Aikuj in Kōm̧m̧an ilo Koņ”

Men̄e m̧akūtkūt ko me kar kwaļo̧k revelesōn ko ilo Katak im Bujen ko 27–28 rekar waļo̧k ilo iien im jikin ko reoktak, ak pedped in katak ko kwaļo̧ki ilo jekjōn in rekkar n̄an rainin. Ta pedped in katak ko remaron̄ kōjeraam̧m̧an ro uwaan kūlaaj eo am̧ ilo jekjek ko rej jelm̧ai?

Je En̄jake ko Rej Im̧we Eok

Kajjitōk n̄an Kwaļo̧k

Leļo̧k n̄an ro uwaan kūlaaj eo jet minit n̄an etale Katak im Bujen ko 27–28 im pukot juon eoon ak juon naan rej loe ewōr meļeļein. N̄an leļo̧k n̄an aolep iien em̧m̧an n̄an kwaļo̧k, komaron̄ kōjeno̧ļo̧k ro uwaan kūlaaj eo ilo kurup n̄an kwaļo̧k ta eo raar loe.

Katakin Katak ko

Katak im Bujen ko 27:1–2

Jej aikuj bōk kwojkwoj eo kōn juon wōt errem̧aanļo̧k n̄an aiboojoj eo an Anij.

• N̄an kōketak ekōnono kōn Katak im Bujen ko 27:1–2, ļōmņak in je juon kajjitōk āinwōt in ilo boot eo: Ta eo Rilo̧mo̧o̧r eo eaar katakin kōj kake kōn aorōk eo in kwojkwoj eo? Ro uwaan kūlaaj eo remaron̄ kappukōt naan ko ilo eoon kein me ejipan̄ er uwaake kajjitōk in. Remaron̄ kōņaan kwaļo̧k im̧we ko raar būki kōn wāween bōk juon en̄jake ekwojarjar n̄e jej bōk m̧ōttan kwojkwoj eo.

  Ro uwaan kūlaaj eo remaron̄ lo kakkobaba in en̄jake ko jān riiti ta eo Rilo̧mo̧o̧r eo eaar ba ke Eaar ruje kwojkwoj eo (lale Luk 22:19–20; 3 Nipai 18: 1–11; lale barāinwōt pija in alooj eo “The Last Supper ” ilo Churchof JesusChrist.org). Eļan̄n̄e Rilo̧mo̧o̧r eo en kar pād ilo kweilo̧k in kwojkwoj eo ad, ta eo emaron̄ kar oktakļo̧k ad kōm̧m̧ane?

  

  Kwojkwoj eo epād ie kōkkaļe ko kōn en̄taan eo an Rilo̧mo̧o̧r.

Katak im Bujen ko 27:15–18

Kein tariņae an Anij enaaj jipan̄ kōj jutak ņae nana.

• Elmen am̧ maron̄ jipan̄ ro uwaan kūlaaj meļeļe kilen kōjerbal kein tariņae eo an Anij n̄an jutak ņae nana ilo tōre in ad? Ļōmņak in kajjitōk ippān ro jet n̄an jin̄aik ioon boot kein tariņae eo kar kōmeļeļeiki ilo eoon 15–18. Innām ro uwaan kūlaaj eo remaron̄ kwaļo̧k jabddwōt ļōmņak ko raar iooni ilo aer make ekkatak kōn m̧ōttan kein tariņae ko. Ak kūlaaj eo remaron̄ riiti Katak im Bujen ko 27:15–18 im ļābōļe m̧ōttan ko an kein tariņae eo ioon boot eo im m̧ōttan ko an ānbwin eo rej kōjparoki. Ta meļeļein n̄an kōņak kein tariņae eo an Anij? Bōlen ro uwaan kūlaaj eo remaron̄ kōnono elmen an Irooj kōjparok kōj jān nana n̄e jej kōņak kein tariņae eo an Anij.

• Eļan̄n̄e kwoj katakin jodikdik ro, komaron̄ in kōņaan kobaik Katak im Bujen ko 27:15–18 ippān jon̄ok ko ilo N̄an Kōkajoor Jodikdik ro. N̄an waanjon̄ok, ro uwaan kūlaaj eo remaron̄ riiti eoon ko im ekōnono kōn etke jej aikuji kein tariņae eo an Anij. Innām remaron̄ jerbali ilo kurup im etale juon iaan jon̄ok ko ilo N̄an Kōkajoor Jodikdik ro. TTa eo jej ekkatak jān kein jipan̄ kein kōn jodik ko an Setan ņae kōj? Elmen an kein tariņae eo an Anij maron̄ jipan̄ kōj jutak ņae jodik kein? Elmen ad kōņak kein tariņae eo an An?

Katak im Bujen ko 28

Rikanaan ro rōmour rej bōk revelesōn n̄an Kabun̄ eo an Irooj.

• N̄an jipan̄ ro uwaan kūlaaj eo ekkatak kōn jerbal eo an rikanaan eo, komaron̄ etale en̄jake eo me eaar tōlļo̧k Josep Smith n̄an jar im bōk jekjōn 28 (lale kōmeļeļein jekjōn eo), innām komaron̄ riiti eoon 2–3, 6–7, 11–13. Elmen an Setan kajjieon̄ kareel kōj n̄an ļoor ro me Irooj eaar jab jitōn̄ er? Komaron̄ kajjitōk ippān ro uwaan kūlaaj eo n̄an kwaļo̧k en̄jake ko me rekar kōkajoorļok naan in kam̧ool ko aer bwe rikanaan eo ej bōk revelesōn ko n̄an Kabun̄ in.

• Juon wāween n̄an an ro uwaan kūlaaj eo ren etale Katak im Bujen ko 28 ej n̄an pijaikļo̧k bwe rejeļā kajjien juon eo me kiiō epaak eaar bōk juon kūr kāāl ilo Kabun̄ in. Ta eo jemaron̄ kwaļo̧ke jān Katak im Bujen ko 28:1–6, 13–16 n̄an jipan̄ armej eo ilo kūr eo an? Kout eo ilo “Kein Jipan̄ ko jet” emaron̄ kobaiktok en̄jake ko n̄an kōnono eo.

Kein Jipan̄ ko jet

Kapilōk eo kōn revelesōn an juon make.

Būreejtōn Joseph F. Smith im rikakpilōklōk ro an ilo Būreejtōnji eo Kein Kajuon raar katakin:

“N̄e visōn ko, ettōņak ko, lo ko, naan in kanaan, en̄jake ko ak jabdewōt menin letok ejej uwaer ak im̧we ko, rej kwaļo̧k juon men eo me ejjab errā im ej jum̧ae revelesōn ko an Kabun̄ in ak ejum̧ae jokāālet ko an riutiej ro kapit er, Armej ro Rekwojarjar remaron̄ jeļā bwe ejjab jān Anij, jekdo̧o̧n ewi jon̄an an pidodo tōmake. … Ilo an jab ejetōbtōb barāinwōt men ko an jetōb, Armej ro Rekwojarjar remaron̄ bōk tōl eo Ekwojarjar im revlesōn eo ejelet er make, bōtaab menin ejjab kwaļo̧k mālim eo n̄an tōl ro jet. …

“Bwebwenato eo an Kabun̄ in ej je elōn̄ revelesōn ko rejjab m̧ool kōnono kaki jān rijeļā moņ ro ak ribanban ro me raar tōmak ilo kwaļo̧kļo̧k ko raar pukōti n̄an tōl armej ro jet n̄an bōk, im ilo aolep jekjek, kaenepata, būrom̧ōj im jorrāān ļapļap kar tōprak ko jāņi” (Joseph F. Smith, Anthon H. Lund, Charles W. Penrose, “A Warning Voice,” Improvement Era, Jept. 1913, 1148–49).

Kōkōm̧anm̧anļo̧k Ad Katakin

Kalimjōk wōt katak eo em̧ool. Būreejtōn Boyd K. Packer eaar kwaļo̧k, “Katak eo em̧ool, emeļeļe, ej oktak in m̧wiļ ko im piktokin” (“Do Not Fear,” Ensign ak Liaona, Māe 2004, 79). Ilo ad katakin, jej aikuj kalimjōk wōt katak ko an Jisōs Kraist eļan̄n̄e jej kōņaan n̄an jipan̄ bōktok jetōb ko n̄an E.