“Juon Jon̄ak n̄an Katakin,” Itok, Ļoor Eō—N̄an Jabōt Jikuuļ: Bok in Mormon 2020 (2020)
“Juon Jon̄ak n̄an Katakin,” Itok, Ļoor Eō—N̄an Jabōt Jikuuļ: 2020
Juon Jon̄ak n̄an Katakin
Ilo bok in jipan̄ in, kwonaaj loe laajrak in jon̄ak eo ilo jilu bun̄tōn ko rej āliji ilo kajjojo laajrak: kajjitōk n̄an kwaļo̧k, katakin katak ko, im kōketak ekkatak ilo m̧weo. Ilo am̧ katakin, jekjek ko an jon̄ak in emaron̄ ettōr ioon doon ak maron̄ waļo̧k ilo juon laajrak eoktak. N̄an waanjon̄ak, ļōmņak bwe kwaļo̧k ej juon iien em̧m̧an n̄an katakin katak ko, im katakin katak ko ej aikuj kitbuuj am̧ kajjitōk ippān ro jet n̄an aer kwaļo̧k ļōmņak ko aer. Āinwōt, kōketak ekkatak ilo m̧weo emaron̄ waļo̧k ilo aolepān juon iien ekōnono an kūlaaj eo. Kōm̧m̧ani oktak ko ilo jon̄ak in bwe en make waļo̧k, ļoor im̧we ko an Jetōb eo n̄an tōpar aikuj ko an armej ro kwoj katakin.
Kajjitōk bwe ren Kwaļo̧k
Āinwōt m̧ōttan wōt aolep kūlaaj, kajjitōk ippān ro uwaan kūlaaj eo n̄an kwaļo̧k ļōmņak ko im en̄jake ko raar būki ilo wiik eo m̧oktaļo̧k ke rekar katak eoon ko āinwōt kajjojo armej im baam̧le ko im mour kaki ta eo rekar ekkatak. Jipan̄ ro uwaan kūlaaj eo loe bwe ekkatak eo aer make itulikin kūlaaj eo ej aorōk. Oktaktok eo aer kajjojo enaaj itok ejjab wōt jān aer ekkatak ilo Jabōt ak barāinwōt jān en̄jake ko aer aolep raan. N̄e ro uwaan kūlaaj eo ej ron̄ kajjojo en̄jake ko an doon, renej kōņaan loe ejja kain en̄jake ko wōt n̄an er make.
Ejjab aolep armej renaaj aikuj riiti jebta ko ilo kajjojo katak, im bōlen jet armej remaron̄ jab kōņaan kwaļo̧k ļōmņak ko aer. Kōm̧m̧an bwe aolep ro uwaan kūlaaj eo ren en̄jake bwe rej juon m̧ōttan eo eaorōk ilo kūlaaj eo, men̄e rej ak ejjeļo̧k juon men rej kōņaan kwaļo̧k.
Katakin Katak ko
Kwe im ro uwaan kūlaaj eo am̧ aikuj in pedped wōt ioon katak ko—m̧ool ko an indeeo an gospel eo—loi ilo eoon ko kar liļo̧k. Ilo am̧ ekōnono kōn katak ko jān jeje ko rekwojarjar, ta eoon ko, kout ko, en̄jake ko, kajjitōk ko, im kein jipan̄ ko jet komaron̄ in kwaļo̧ki? Ewi wāween am̧ maron̄ kōjerbale kein jipan̄ kein n̄an jipan̄ ro uwaan kūlaaj eo loe im meļeļe pedped ko an gospel eo? Ewi wāween am̧ maron̄ kōketak ro uwaan kūlaaj eo n̄an je im m̧akūtkūt ekkar n̄an ļōmņak ko im im̧we ko rej būki?
Kōketak Ekkatak ilo Mweo
Ilo jem̧ļo̧kin juon katak, bōk jidik iien n̄an etale laajrak in katak eo an wiik eo tok juon. Ļōmņak kōn wāween am̧ im̧we ro uwaan kūlaaj eo n̄an wōnm̧aanļo̧k wōt im ekkatak jān Bok in Mormon eo ilo m̧weo, jim̧or kajjojo armej im ippān baam̧le ko.