Ol baj blong Ol Man blong Jared oli stap long solwota

Bae Mi Tekemaot Yu Aot long Ol Dip Ples, i kam long Jonathan Arthur Clarke

16–22 Novemba

Ita 6–11

“Blong Mekem se Nogud Fasin I Save Lus”

Tingbaot se, Buk blong Momon, oli bin raetem blong yusum long taem blong yumi. Taem yu stap rere blong tij, lukluk tru long ol stori long skripja blong faenem olgeta prinsipol we i save mekem ol memba blong klas oli kam strong moa blong fesem ol jalenj long laef blong olgeta.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Blong helpem ol memba blong klas blong oli serem wan samting we oli ting se i gat mining long olgeta, we i stap insaed long Ita 6–11, yu save invaetem olgeta blong traem tingting se olgeta japta ia, oli tanem oli kam wan muvi; ?Wanem sentens nao we i stap long Ita 6–11 bae oli yusum olsem wan taetol? Givim smol taem long olgeta blong oli tingting long hemia, mo invaetem olgeta blong serem ol taetol we oli gat mo oli eksplenem from wanem oli jusum ol sentens ia.

tijing pikja bokis

Stap Tijim Doktrin

Ita 6:1–12

Bae Lod i lidim yumi tru long wokbaot blong yumi long wol ia

• Aotlaen blong wik ia, insaed long Kam Folem Mi—Blong Wanwan Man, Woman mo Famli i talem blong komperem wokbaot blong Ol Man blong Jared, we oli krosem bigfala solwota, wetem wokbaot blong yumi i go tru long laef ia long wol. Askem ol memba blong klas, we oli bin traem aktiviti ia long hom blong oli serem ful niu tingting we oli kasem aot long wei ia blong tingting. Blong helpem ol memba blong klas blong oli komperem moa samting long taem blong klas, invaetem olgeta blong lukluk long Ita 6:1–12 blong luk ol ditel blong wokabaot ia we i gat ol saen we oli gat mining (olsem blong mekem ol ston oli saen, ol baj, mo win); raetemdaon olgeta antap long bod. Afta ol memba blong klas oli save spendem samfala minit blong oli wok tutu o long smol grup, blong oli stadi long ol ves, mo toktok raon long wanem nao, ol simbol ia, oli save ripresentem long laef blong yumi. Eksampol: ?Wanem nao i “promes graon” blong yumi? (Vesves 8). ?Olsem wanem nao God i stap gaedem yumi long wokabaot ia blong laef blong yumi?

• Yu save yusum Ita 6:1–12 blong givim insperesen long toktok insaed long klas abaot wei blong tanem yumi i go long God blong helpem yumi gro tru long ol tes blong yumi. Eksampol: kwot we i stap long “Sam Moa Risos,” i save helpem ol memba blong klas blong komperem “strong win” we oli tokbaot long ol ves 5–8 wetem ol hadtaem blong laef. ?Wanem nao Ol Man blong Jared oli mekem taem we “plante wota i raonem olgeta”? (ves 7). Maet ol memba blong klas oli save serem ol eksperiens we oli bin gat abaot ol taem we ol hadtaem blong olgeta i bin helpem olgeta blong muv fored i go. ?Olsem wanem nao we, wei we oli bin fesem ol tes blong olgeta, i bin helpem olgeta blong progres i go fored, i go from “promes graon” blong olgeta? ?Olsem wanem nao Lod i bin helpem olgeta tru long ol traehad blong olgeta? Leftemap tingting blong olgeta blong talembak ol toktok mo ol sentens we oli stap long Ita 6 taem oli stap serem ol eksperiens ia mo ol tingting blong olgeta.

  Ol Man blong Jared oli travel wetem ol animol.

  Wokbaot blong Ol Man blong Jared we oli krosem Esia, i kam long Minerva Teichert

Ita 6:7–18, 30; 9:28–35; 10:1–2

Lod i blesem yumi taem yumi gat tingting i stap daon.

• Nomata we plante long ol stori blong Ol Man blong Jared oli soem ol nogud saed blong fasin blong gat hae tingting mo fasin nogud, i gat tu ol taem we oli bin gat tingting i stap daon, mo ol taem we oli bin kam antap long laef blong olgeta, we yumi save lanem samting aot long hem. Blong helpem ol memba blong klas blong oli lan aot long ol gud eksampol ia, yu save serem klas long tu grup, mo givim wok long wan blong i ridim Ita 6:7–18 mo 30, mo nara grup i ridim Ita 9:28–35 mo 10:1–2. Askem olgeta blong lukluk gud insaed long ol ves ia blong faenem ol pruf se Ol Man blong Jared oli bin putum tingting blong olgeta i stap daon—o, situesen blong olgeta i bin mekem se oli bin putum tingting blong olgeta i stap daon—mo wei we Lod i bin blesem olgeta, from hemia. Sapos ol memba blong klas oli gat inaf taem, invaetem ol memba blong wanwan grup blong oli serem wanem nao oli bin lanem. ?Olsem wanem nao we, taem yumi gat tingting i stap daon, i helpem yumi blong kam kolosap moa long God? Singsing o lisin long wan hym abaot fasin blong putum tingting i stap daon, olsem “Mi Nidim Yu Oltaem” (STSP, pej 12); hemia i save mekem aktiviti i kam gud moa.

Ita 7–11

Ol stret mo gud lida oli soem rod we i go long God long ol pipol.

• Iven olgeta we oli neva holem wan lidasip posisen insaed long Jos, oli save lanem samting aot long ol eksampol blong ol stret mo gud lida, mo aot long ol nogud king blong Ol Man blong Jared; olgeta stori ia oli save helpem yumi kam ol moa gudfala lida insaed long ol hom blong yumi, insaed long ol komuniti blong yumi, mo insaed long Jos. Bae yu save statem toktok long klas abaot topik ia taem yu askem ol memba blong tingting long wan we oli tekem se hem i wan gudfala lida. Invaetem olgeta blong serem smol ol kwaliti blong man o woman ia, mo raetem wan lis antap long bod. Afta, yu save givim wok long wanwan memba blong klas blong lanem samting abaot wan long ol king blong Ol Man blong Jared, we i stap long Ita 7–11. (I gat wan lis blong ol king ia, wetem skripja refrens blong olgeta abaot rul blong olgeta, we i stap long aotlaen blong wik ia long Kam Folem Mi—Blong Wanwan Man, Woman mo Famli.) Ol memba blong klas oli save serem wanem we oli bin lanem aot long ol king ia long saed blong lidasip, mo ademap ol nara kwaliti we oli faenem i go long lis antap long bod. Ol nara gudfala kwaliti, oli listim olgeta insaed long “Sam Moa Risos.” ?Olsem wanem nao yumi save developem olgeta kwaliti ia mo stap ol lida, iven sapos yumi no holem wan lidasip wok?

lanem samting pikja bokis

Stap Leftemap Tingting blong Lanem Samting long Hom

Blong pusum intres blong ol memba blong klas blong ridim Ita 12–15, yu save talem se, long ol japta ia, Moronae i talemaot long Lod wanem we hem i no save stret long saed long ol histri we hem i bin stap raetem. Ansa blong Lod i save helpem yumi taem yumi gat ol semmak filing ia, se yumi no naf blong mekem samting.

risos pikja bokis

Sam Moa Risos

Ol tes blong yumi oli mekem yumi rere blong kasem laef we i no save finis.

Taem hem i bin toktok long wan jeneral konfrens long ol had taem blong Wol Wo 2, Elda Charles A. Callis blong Kworom blong Olgeta Twelef Aposol i bin talem: “Oli talem long yumi se, taem Ol Man blong Jared oli bin stap long ol sip blong olgeta, mo oli bin stap go from graon ia blong promes, ol strong mo nogud win oli bin girap. Ol win ia oli blo strong, mo oli bin stap long bigfala denja long ful taem ia we oli bin stap long wokbaot ia. God i bin sapotem olgeta. Mo yumi stap rid abaot ol strong win ia we oli blo strong, we i mekem se oli ting se bae oli lus, mo win ia i stap blo i stap pusum olgeta i go from Graon blong Promes. Mo ol hadtaem ia, o samting we i kam agensem olgeta, we oli pas kam i go, ol nogud wo ia mo ol nogud samting we oli fulap, oli bin stap long paoa blong God. Hem i save stopem olgeta taem Hem i jusum blong mekem, taem ol hae stamba tingting blong Hem oli kamtru. Be yumi no mas fogetem se tru long solwota ia blong trabol, ol samting we oli kam agensem yumi, ol eksperiens we yumi stap pas i go tru long hem we God bae i mekem oli wok tugeta blong gud blong yumi, sapos bae yumi obei long Hem—mo evri samting ia oli blo i kam long yumi, oli pusum yumi i go blong sef ples ia blong spel, i go long wan fiuja blong glori, i go long laef we i no save finis” (insaed long Konfrens Ripot, Epril 1943, 62).

Ol Kwaliti blong ol stret mo gud lida.

“Insaed long kingdom blong God, fasin blong gat gud fasin mo lidasip, i minim blong luk ol narawan olsem we oli rili stap—olsem we God i stap luk olgeta—mo afta, blong go long olgeta mo givhan long olgeta. Hem i minim blong stap glad wetem olgeta we oli stap hapi, blong stap krae wetem olgeta we oli stap harem nogud, blong stap leftemap olgeta we oli lus tingting, mo blong stap lavem neiba blong yumi olsem we Kraes i stap lavem yumi. …

“… Lidasip insaed long Jos, i no abaot fasin blong lidim ol nara man, be i moa abaot fasin blong yumi blong wantem blong God i lidim yumi, “The Greatest among You,” Ensign o Liahona, May 2017, 79–80).

“Olgeta we oli stap gud mo gat gud fasin nomo oli gat paoa ia blong leftemap man, mo blong leftemap tingting blong wanwan blong mekem gudfala seves moa, blong mekem ol samting we oli moa hae, blong kasem moa hae paoa” (Teachings of Presidents of the Church: Ezra Taft Benson [2014], 244).

“Wol i tijim se ol lida oli mas strong mo hae olgeta; Lod i stap tijim yumi se yumi no mas stap flas. Ol lida blong wol oli kasem paoa mo oli lidim ol tingting tru long talen, skil mo mane blong olgeta. Ol lida we oli olsem Kraes, oli kasem paoa mo oli stap lidim man ‘wetem fasin blong winim tingting blong man, wetem fasin blong gat longfala tingting long hadtaem, wetem fasin we i kaen mo fasin blong no stap flas, mo wetem fasin blong gat tru lav’ [D&K 121:41]” (Stephen W. Owen, “The Greatest Leaders Are the Greatest Followers,” Ensign o Liahona, May 2016, 75).

Stap Kam Antap long Fasin blong Yumi blong Stap Tij

Leftemap tingting blong gat wan ples we i gat respek long hem. ?Yu yu filim se evriwan long klas i filim gud inaf blong stap talemaot ol tingting mo ol filing blong olgeta? “Helpem ol memba blong klas blong oli andastanem se wanwan long olgeta i tekpat long spirit insaed long klas. Leftemap tingting blong olgeta blong helpem yu blong stanemap wan ples we man i filim fri blong serem tingting, blong man i filim lav mo respek, blong evriwan i fri mo i filim sef blong serem ol eksperiens, blong askem ol kwestin mo serem ol testemoni” (Teaching in the Savior’s Way, 15).