Rijared ro rej etetal ilo āne jam̧dān

Rijared ro rej Etal jān Babel, jān Albin Veselka

Nobōm̧ba 9–15

Ether 1–5

“Kekōle Rōn̄el in Nuknuk in Jab Tōmak eo”

Ta m̧ool ko kwar ekkatak kaki ilo iien ekkatak eo am̧ make kōn Ether 1–5 me komaron̄ in kwaļo̧ke ippān ro kwoj katakin? Ta iien ko rem̧m̧an komaron̄ in leļo̧k n̄an er bwe ren kwaļo̧k ta eo rekar ekkatak?

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Ļōmņake wāween in em̧m̧an n̄an kajjitōk n̄an kwaļo̧k: Ajije dōkā ko n̄an 16 ro uwaan kūlaaj eo, im kajjitōk ippān jet iaer n̄an kwaļo̧k juon m̧ool rej keememeje jān ekkatak eo aer make ak an baam̧le eo kōn Ether 1–5. Ta eo rej itōn kōm̧m̧ane kōnke kōn ta eo rekar ekkatak?

pija ej bōk jikin katakin

Katakin Katak ko

Ether 1–3; 4:8–19

Ilo ad wōnm̧aanļo̧k im kūr Irooj, E enaaj kwaļo̧k Ankilaan.

• Kōjwōj kajjojo jekar kakkōt n̄an pukot juon uwaak in juon jorrāān ak kajjitōk. Ewi wāween an en̄jake eo ļeo jein Jared jipan̄ ro kwoj katakin ekkatak wāween eo n̄an pukot jipan̄ eo jān Irooj? Bōlen komaron̄ jin̄aiki juon tebōļ ioon boot eo im ļābōļe kalōm̧ ko Kajjitōk eo an Ļeo Jein Jared, M̧akūtkūt eo an Ļeo Jein Jared, im Uwaak eo an Irooj. Innām komaron̄ ajije kūlaaj eo n̄an jilu kūrub ko im leļo̧k juon kalōm̧ n̄an kajjojo kūrub. Kajjojo kūrub remaron̄ jerbal ippān doon n̄an etale Ether 1:33–43 im 2:16–3:6 im je ta eo rej loe ilo kalōm̧ eo kar leļo̧k n̄an er. Ālkin wōt kūlaaj eo emaron̄ ekōnono kōn kajjitōk ko āinwōt kein: Ta eo jej ekkatak kōn elōn̄ wāween ko Irooj emaron̄ kāālet n̄an jipan̄ kōj? Ta eo jemaron̄ ekkatak kōn eddo eo ad ilo jerbal in ebbōk revelesōn eo? Bōlen ro uwaan kūlaaj eo remaron̄ kwaļo̧k waanjon̄ak ko an ro jet jān jeje ko rekwojarjar me rej katakin ejja kain pedped in katak ko wōt. Ennaan ko jān Elder Richard G. Scott ilo “Kein Jipan̄ ko Jet” rej letok eļapļo̧k ļōmņak ko kōn wāween an Irooj uwaake jar ko.

• Jar eo an ļeo jein Jared ilo Ether 3:1–5 emaron̄ im̧we ro uwaan kūlaaj eo n̄an etale jar ko aer make. Bōlen ro uwaan kūlaaj eo remaron̄ in pijaiki ilo kōļmenļo̧kjeņ bwe rekar leļo̧k ko̧o̧njeļ n̄an juon eo ej kab ekkatak jar. Ta naan in rōjan̄ eo renaaj leļo̧k? Remaron̄ etale Ether 3:1–5 im kwaļo̧k ilo tukaduin kajjojo eoon ippān juon ak ruo tip ko ak pedped in katak ko kōn wāween jar eo ewābdik. Ļōmņak in leļo̧ n̄an ro uwaan kūlaaj eo jejjo minit ko n̄an ļōmņak kōn jar ko aer make im wāween aer maron̄ ļoor waanjon̄ak eo an ļeo jein Jared kōm̧m̧ane jar ko aer make ļapļo̧k tokjāer.

• Ālkin kwaļo̧k en̄jake in revelesōn eo an ļeo jein Jared ilo Ether 3, Moronai ekar leļo̧k ko̧o̧njeļ ilo Ether 4 kōn wāween ad maron̄ bōk revelesōn jān Irooj. N̄an jipan̄ ro uwaan kūlaaj eo ekkatak ko̧o̧njeļ in, komaron̄ kwaļo̧k juon pija in Jisōs Kraist im kajjitōk ippān ro uwaan kūlaaj eo n̄an etale Ether 4:8–10 kōn men ko me remaron̄ bōbraeik kōj jān bōk revelesōn ak m̧ool jān Irooj. Ilo an ro uwaan kūlaaj eo kwaļo̧k ta eo rej loe, komaron̄ jidik kake kalibubuik pija eo an Kraist kōn juon m̧ōttan nuknuk ak m̧ōttan peba. Ewi wāween ad maron̄ bōbrae mennin bōbrae ko ilo mour ko ad? Eo juon, ro uwaan kūlaaj eo remaron̄ in etale Ether 4:7, 11–15, pukot ewi wāween ad maron̄ karbab n̄an bōk m̧ool ko jān Irooj. Ilo an ro uwaan kūlaaj eo kwaļo̧k ta eo rekar loe, kōm̧akūt nuknuk eo ak peba jidikdik eo. Ta meļeļein n̄an “kōjerbal tōmak ilo … Irooj, āinwōt ļeo jein Jared ekar kōm̧m̧ane”? (Ether 4:7; barāinwōt lale Ether 3:1–9). Ta meļeļein n̄an “kekōļ [rōn̄el] nuknuk in jab tōmak eo” ilo mour ko ad? (Ether 4:15). Ewi wāween ad jipan̄ ro jet kōm̧m̧ane ejja menin wōt? Ro uwaan kūlaaj eo remaron̄ barāinwōt pukot m̧ool ko kōn revelesōn ko ad make ilo ennaan eo an Būreejtōn Russell M. Nelson “Revelesōn n̄an Kabun̄ in, Revelesōn n̄an Mour ko Ad” (Ensign ak Liaona, Māe 2018, 93–96).

Ether 2:14–15

Jān kauwe eo An, Irooj ej karuwaineneik kōj n̄an ukweļo̧k im itok n̄an E.

• Aaet juon rikanaan eo em̧m̧an āinwōt ļeo jein Jared ekar bōk naan in kauwe jān Irooj. Ilo m̧ool, ekar m̧ōttan eo im ekar kōm̧m̧an an ļap ekar wāween an kar uwaake naan in kauwe eo. N̄an jipan̄ ro uwaan kūlaaj eo ekkatak jān waanjon̄ak eo an ļeo jein Jared, komaron̄ kajjitōk ippāer n̄an riiti Ether 2:14–15 ippān doon ruo iaan ruo. Innām kajjitōk ippāer n̄an kōtanke juon iaer ej ļeo jein Jared im eo juon ej bar juon armej eo ej kab bōk naan in kauwe eo jān juon ritōl an Kabun̄ in ak juon m̧am̧a im baba. Kōm̧m̧an bwe ren ekōnono ak kōm̧m̧an kōl kōn ta eo ļeo jein Jared emaron̄ ba kōn en̄jake eo an make n̄an jipan̄ armej in. Ta ko̧o̧njeļ eo emaron̄ leļo̧k? Ta katak ko jemaron̄ ekkatak me renaaj jipan̄ kōj epaakeļo̧k Jemedwōj Ilan̄? Komaron̄ barāinwōt ekōnono kōn wāween an Irooj kauwe im uwaak eo an ļeo jein Jared an maron̄ jipan̄ kōpooje n̄an en̄jake eo ippān ilo Ether 3:1–20. Erkein jet iaan kein jipan̄ ko me remaron̄ jipan̄: Ennaan eo an Elder D. Todd Christofferson “As Many as I Love, I Rebuke and Chasten” (Ensign ak Liahona, May 2011, 97–100) or the section titled “Discipline” ilo ennaan eo an Elder Lynn G. Robbins “The Righteous Judge” (Ensign ak Kweilo̧k eo Eļap, Nob. 2016, 96–97).

Ether 5

Rikam̧ool ro jilu rej kam̧ool kōn m̧ool eo an Bok in Mormon eo.

• Ekkatak eļapļo̧k kōn kanaan eo an Moronai kōn an Rikam̧ool ro Jilu maron̄ jipan̄ kōkajoorļo̧k naan in kam̧ool ko an ro uwaan kūlaaj eo kōn Bok in Mormon eo. Bōlen jim̧ettan in kūlaaj eo emaron̄ riiti Ether 5 im jimettan eo juon emaron̄ riiti “Naan in Kam̧ool eo an Rikam̧ool ro Jilu” (ej pād ilo jinoin Bok in Mormon eo) im kwaļo̧k ippān doon ta eo rej en̄jake kōn ta jibadbad eo an Irooj ilo an kōtļo̧k an Rikam̧ool ro Jilu loe juon enjeļ im pileej ko. Remaron̄ barāinwōt ekōnono kōn jekjek ko ilo an ruo ro kapen m̧ool eo (lale, n̄an waanjon̄ak, Matu 3:13–17; 18:15–16; Jon 5:31–47; KB 128:3). Ta kam̧ool ko ilo mour ko ad im em̧ōj aer im̧we kōj n̄an tōmak? Ewi wāween an kar “kajoor eo an Anij im barāinwōt An innaan” kar “kwaļo̧k tok” n̄an kōj ilo Bok in Mormon eo? (Ether 5:4).

pija ej bōk jikin ekkatak

Kōketak Ekkatak ilo Mweo

Kajjitōk ippān ro uwaan kūlaaj eo n̄an pijaik ilo kōļmenļo̧kjeņ bwe ritōl ro ilo kien rekar wōnm̧aanļo̧k likwarkwar im m̧an doon. Ilo Ether 6–11, renaaj riiti kōn wāween an menin kar waļo̧k n̄an armej ro ineen Jared im ļeo jein. Renaaj barāinwōt pukot jet kōkkaļļe ko me renaaj jipan̄ er kattoļo̧k jorrāān ko RiJared ro rekar jelm̧ai.

pija ej bōk jikin kein jipan̄ ko

Kakobaba in Kein Jipan̄ ko jet

Kile uwaak ko n̄an jar.

Elder Richard G. Scott ekar katakin:

“N̄e jej kōmeļeļeiki juon jorrāān im juon uwaak kar kwaļo̧ke, jet iien uwaak eo An ej aaet, jet iien ej jaab. Emakijkij An dāpij juon uwaak, jab kōn an ejjeļo̧k kea, ak kōnke E ej iakwe kōn—ewāppen. Ekōņaan bwe jen kōjerbale m̧ool ko Ekar litok n̄an kōj. N̄an ad eddōkļo̧k, jej aikuj in lōke ad maron̄ kōm̧m̧ane jokāālet ko rejim̧we. Jej aikuj in kōm̧m̧ane ta eo jej en̄jake ej jim̧we. Ilo iien, Enaaj uwaak. Ej jāmin likjab jān kōj. …

“… Ekōņaan bwe jen m̧akūtkūt n̄an bōk en̄jake eo jej aikuji:

“N̄e uwaak eo An ej aaet, ej letok n̄an kōj lōke.

“N̄e uwaak eo An ej jaab, ej n̄an bōbrae bōd.

“N̄e Ej dāpij uwaak eo, ej bwe jen eddōkļo̧k kōn tōmak ilo E, pokake kien ko An, im m̧ōņōņō in m̧akūtkūt ekkar n̄an tōmak eo. Jej kōtmāne im ļōmņak bōk eddo kōn m̧akūtkūt eo ilo juon jokāālet eo jejjet ippān katak ko An ilo an ejjeļo̧k kapen ko m̧oktaļo̧k. Jejjab aikuj jijet wōt im kōttar ak iakwelel kōnke Irooj ejjab kōnono. Jej aikuj in m̧akūtkūt” (“Learning to Recognize Answers to Prayer,” Ensign, Nov. 1989, 31–32).

Kōkōm̧anm̧anļo̧k Ad Katakin

Etal n̄an jeje ko rekwojarjar m̧okta. Jeje ko rekwojarjar rej aikuj in jipan̄ eo eļaptata n̄an ekkatak im m̧aanjabpop eo am̧. Jab meļo̧kļo̧k bwe naan ko an rikanaan ro raan kein rej nōbar bok ko jilu im barāinwōt jeje ko rekwojarjar (lale Teaching in the Savior’s Way, 17–18).