Moronai ej jeje ioon pileij kooļ ko

Moronai ej Jeje ioon Pileij Kooļ ko, jān Dale Kilborn

Nobōm̧ba 2–8

Mormon 7–9

“Ij Kōnono n̄an Kom̧ Āinwōt N̄e Kom̧ Ar Pād”

Etale im̧we ko am̧ im rekooti ilo iien am̧ ekkatak ippem make jān Mormon 7–9 wiik in. Eoon ta ko jān jebta kein kwoj en̄jake ke renaaj lukkuun aorōk n̄an etali ippān kūlaaj eo am̧?

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

N̄an leļo̧k n̄an ro uwaan kūlaaj eo juon iien aer kwaļo̧k men ko jān ekkatak eo aer make ak ekkatak an baam̧le, komaron̄ rōjan̄ er n̄an etale Mormon 7–9 im kwaļo̧k juon sentence (ak eoon) me rej kam̧m̧oolol kake im Mormon ak Moronai ekar kāālet n̄an likūti ilo pileij ko.

pija ej bōk jikin katakin

Katakin Katak ko

Mormon 7:8–10; 8:12–22; 9:31–37

Bok in Mormon eo elukkuun ļap tokjān.

• Juon wāween n̄an jino juon ekōnono kōn aorōk eo an Bok in Mormon ej n̄an ekōnono kake wāween ad ļōmņak aorōk eo an juon itōm̧. Ewi wāween an jeļā aorōk eo an juon men eo ej ukote wāween ad kōjerbale? Ro uwaan kūlaaj eo remaron̄ etale Mormon 8:12–22 im kwaļo̧ke ta eo Moronai ekar ba kōn aorōk eo an Bok in Mormon (“rekoot in”). Remaron̄ barāinwōt kwaļo̧k en̄jake eo aer make ej kwaļo̧k n̄an er aorōk eo an Bok in Mormon eo. Ewi wāween ad maron̄ kwaļo̧k bwe jej kaorōk Bok in Mormon eo?

  kape ko an Bok in Mormon ilo kajin ko kajjojo

  Bok in Mormon eo ej kalikkarļo̧k katak ko kar katakin ilo Baibōļ eo.

• N̄an jipan̄ ro uwaan kūlaaj eo kile wāween an Bok in Mormon eo im Baibōļ eo rie doon, komaron̄ kajjitōk ippāer n̄an riiti Mormon 7:8–10 im kwaļo̧k ilo tukaduin kōmeļeļe ko an Mormon jān ruo rekoot ko ilo naan ko aer make (“rekoot ko renaaj itok n̄an Riaelōn̄ ko jān Rijew ro” kōnono kōn baibōļ eo). Ļōmņak in jin̄aiki ruo doulul ko ettōr ioon doon im je juon Baibōļ eo im eo juon Bok in Mormon eo. Ro uwaan kūlaaj eo remaron̄ in kōllaajrake jekjek ko rein wōt juon an bok kein ruo an jeje ko rekwojarjar ilo jākjen ko rej ettōr ioon doon im oktak ko ilo jākjen ko jet. (Pija in alooj eo “Bible and Book of Mormon” on ChurchofJesusChrist.org ej letok kōļmenļo̧kjeņ ko.) Wāween eo juon, ļōmņak in je jejjo m̧ool ko an gospel eo ioon boot eo im kajjitōk ippān ro uwaan kūlaaj eo lale Unin Tōl n̄an Jeje Ko Rekwojarjar n̄an pukot eoon ko jān Bok in Mormon eo im Baibōļ eo ko rej jipan̄ er meļeļe m̧ool ko.

Mormon 8:1–11

Jemaron̄ tiljek men̄e jej make iaad.

• Jet iaan armej ro ilo kūlaaj eo am̧ remaron̄ en̄jake aer make iaer ilo kijejeto ko aer n̄an mour kōn gospel eo. Ta eo emaron̄ jipan̄ er ekkatak jān waanjon̄ak eo an Moronai im emaron̄ jipan̄ er? Ļōmņak in kajjitōk ippān ro uwaan kūlaaj eo n̄an riiti Mormon 8:1–11 im ļōmņak kōn kajjitōk ko renej kōņaan kajjitōk ippān Moronai n̄an ekkatak kōn wāween an dābdep wōt ilo tiljek men̄e jekjek ko an reppen. Ta eo ej im̧we er kōn waanjon̄ak eo an? Ilo aer kwaļo̧k ļōmņak ko aer, rōjan̄ ro uwaan kūlaaj eo n̄an kwaļo̧k en̄jake ko aer make ke er ak ro jet rejeļā kajjier rekar tiljek wōt, men̄e rekar en̄jake aer make iaer . Ewi wāween an kar Irooj jipan̄ er?

Mormon 8:26–41; 9:1–30

Bok in Mormon eo kar je n̄an tōre in ad.

• Ilo am̧ epaakeļo̧k jem̧ļo̧kin iiō in ilo katak kōn Bok in Mormon eo, bōlen ro uwaan kūlaaj eo remaron̄ kejōkļo̧kjeņ kōn etke rej en̄jake bwe bok in ekar jeje n̄an raan kein ad. Komaron̄ jino ekōnono eo jān am̧ riiti ennaan eo jān Būreejtōn Ezra Taft Benson ilo “Kein Jipan̄ ko Jet.” Ro uwaan kūlaaj eo remaron̄ in kōjerbale kajjitōk ko an Būreejtōn Benson n̄an Mormon 8:26–41. Etke Irooj ekar im̧we Moronai bwe en kobaik naan kein ilo rekoot eo? Ewi wāween aer jipan̄ kōj ilo raan eo ad?

• Āinwōt katakin ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko, Mormon 9:1–30 ej kitbuuj ennaan eo an Moronai ilo uwaak eo n̄an ejjeļo̧k tōmak ilo Jisōs Kraist ilo raan kein ad. Bōlen komaron̄ ajije kūlaaj eo n̄an jilu kūrub ko im kajjitōk ippān kajjojo kūrub ko n̄an pukote naan in kapilōk eo me ej jipan̄ er ilo laajrak in eoon kein: 1–6 (kaje ko kōn jab tōmak ilo Kraist), 7–20 (aorōk eo an tōmak ilo juon Anij an revelesōn im kabwilōn̄lōn̄ ko), im 21–30 (naan in kapilōk eo an Moronai n̄an kōj).

• Mekarta Mormon 9:1–6 ekar jeje n̄an “ro otemjej rejjab tōmak ilo Kraist,” menin ejipan̄ kōj aolep n̄an pijaik ad jutak im̧aan mejān Anij juon raan n̄an ekajet. Kajjitōk ippān ro uwaan kūlaaj eo n̄an etale eoon kein, pukot naan ko ak meļeļe ko me rej kōmeļeļeiki wāween an eo enana naaj en̄jake ilo raan ņe. Ta eo jemaron̄ kōm̧m̧ane n̄an kattoļo̧k en̄jake kein? Ro uwaan kūlaaj eo remaron̄ loe ļōmņak ko rejipan̄ ilo bwebwenato Būreejtōn Boyd K. Packer ekar kwaļo̧ke ilo “Kein Jipan̄ ko Jet.”

• Elōn̄ armej rainin rej tōmak bwe kabwilōn̄lōn̄ ko em̧ōj aer bōjrak. Ewi wāween ad kōjerbale katak ko an Moronai n̄an jipan̄ ro uwaan kūlaaj eo tōmak ilo juon “Anij in kabwilōn̄lōn̄”? Komaron̄ jino kajjitōk ippān ro uwaan kūlaaj eo etale Mormon 9:7–26 im pukote kabwilōn̄lōn̄ ko me Moronai ej rōjan̄ kōj n̄an tōmaki. Ta eo jej ekkatak jān eoon kein kōn Anij im jerbal eo An ilo raan kein ad? Ta eo jej aikuj in kōm̧m̧ane bwe Anij en maron̄ kwaļo̧k kabwilōn̄lōn̄? (lale Mormon 9:20–21). Ta kabwilōn̄lōn̄ ko jekar loi?

pija ej bōk jikin ekkatak

Kōketak Ekkatak ilo Mweo

Ro uwaan kūlaaj eo am̧ renan̄in ke ļōmņak wāween aer maron̄ kōļapļo̧k aer tōmak ilo Jemedwōj Ilan̄ im Jisōs Kraist? Eļan̄n̄e aaet, kajjitōk ippāer n̄an etale Ether 1–5 kōn wāween ko n̄an jipan̄ tōmak eo aer eddōkļo̧k.

pija ej bōk jikin kein jipan̄ ko

Kein Jipan̄ ko jet

Bok in Mormon eo kar je n̄an tōre in ad.

Būreejtōn Ezra Taft Benson ekar ba:

“Rinipai ro ejjan̄in kar wōr aer bok in; barāinwōt Rileman ro ilo iien ko etto. Ekar kōm̧m̧an n̄an kōj. …

“Kajjojo rijeje ro reļļap an Bok in Mormon eo rekar kam̧ool bwe ekar jeje n̄an epepen ko ilju im jekļaj [lale 2 Nipai 25:21; Jekab 1:3; Mormon 7:1; 8:34–35]. …

“Eļan̄n̄e rekar loe raan kein ad, im kar kāālet men ko me renaaj ļap aer aorōk n̄an kōj, ej jab wāween ad aikuj katak kōn Bok in Mormon eo? Jaikuj emmakijkij ad kajjitūkin kōj make, ‘Etke Irooj eaar im̧we Mormon (ak Moronai ak Alma) n̄an kobaik menin ilo ļo̧o̧k eo an? Ta katak eo Imaron̄ kar katak jene n̄an jipan̄ eō mour ilo rainin im iiō in?’” (“The Book of Mormon—Keystone of Our Religion,” Ensign, Nov. 1986, 6).

Jemaron̄ in jab lipijinjin.

Būreejtōn Boyd K. Packer ekar kwaļo̧k kōn ito itak eo jiljino āinwōt juon likao ippān juon jarin tariņae ilo juon tūreen ebwil, im bataat, eo im ejjeļo̧k jikin tutu ak janij nuknuk. Ilo jikin bōjrak eo an tūreen eo, jarin tariņae eo rekwōle rekar etal n̄an juon restaurant.

“Ekar obrak, im kōn menin kōm̧ kar kobaļo̧k ilo juon ļain kōttar n̄an jijet. Ikar im̧aantata, pād iturin juon kōrā emōj an tōrejab. Aaet ilo an jab oktaktok, kōrā eo ej pād im̧aaō ekar jab etto ekar kile bwe kōm kar pād ijo.

“Ekar oktaktok im kalimjeke kōm. Innām ekar oktaktok im kalimjōke eō jān bōra n̄an jāntin neeō. Ikar jutak ijo ilo uniboom̧ eo emenokadu, ettoonon, bwin̄aln̄al, eloktōktōk. Ekar ba ilo juon ainikien ekajoor, ‘Kabwilōn̄lōn̄ wōt, kom̧win kar jab pād ijin!’ Aolep mej rekar oktaktok n̄an kōm̧.

“Ejjeļo̧k pere bwe ekar kōņaan bwe kōmin kar jab pād ijo; ij kwaļo̧k kōņaan in an. Ikar en̄jake aō ettonoon āinwōt aō kar, abbōņōņō, im jook.”

Būreejtōn Packer ekar kouti Mormon 9:4 im keidi en̄jake in an n̄an jab erreo ilo jetōb im̧aan mejān Anij. Kam̧ool bwe Pinmuur eo an Jisōs Kraist ekar wāween eo wōt emaron̄ in erom̧ erreo ilo jetōb, innām ekar ba:

“Imaron̄ ke pijaik ewi jon̄an aō jook n̄e āliktata imaron̄ loe bwe ikar ļoor jabdewōt jekjek ko Rilo̧mo̧o̧r eo ekar kōm̧m̧ane, ikar aikuj in kijenmej e en̄taan kōn jab erreo ilo jetōb? Pijaik kaenōm̧m̧an eo kōtļo̧k, en̄jake eo me enaaj itok n̄an eok n̄e kwoj loe m̧ool eo an Pinmuur eo im mour kōn aorōk eo an aolep raan kom̧ kajjojo” (“Washed Clean,” Ensign, May 1997, 9–10).

Kōkōm̧anm̧anļo̧k Ad Katakin

Jar kōn ro uwaan kūlaaj eo am̧. Ewōr ke juon ilo kūlaaj eo am̧ ej kate? Baj āinwōt an Rilo̧mo̧o̧r eo jar kōn Piter (lale Luk 22:31–32), komaron̄ jar kōn ro otemjej kwoj katakin kajoorļo̧k (lale Teaching in the Savior’s Way, 6).