“Juļae 13–19. Alma 32–35: ‘Kalbwini Naan eo ilo Būruōmi,’” Itok, Ļoor Eō—N̄an Jabōt Jikuuļ: Bok in Mormon 2020 (2020)
“Juļae 13–19. Alma 32–35,” Itok, Ļoor Eō—N̄an Jabōt Jikuuļ: 2020
Juļae 13–19
Alma 32–35
“Kalbwini Naan eo ilo Būruōmi”
Jekdo̧o̧n jete kōttan am̧ kar riiti Alma 32–35, bar riiti ilo am̧ m̧aanjabpopo n̄an katakin. Kwōn kōpeļļo̧k kōļmenļo̧kjeņ eo am̧ n̄an en̄jake ko jān Jetōb eo.
Je En̄jake ko Rej Im̧we Eok
Kajjitōk bwe ren Kwaļo̧k
N̄an jipan̄ ro uwaan kūlaaj eo am̧ ekkatak jān aer riiti Alma 32–35 ilo m̧weo, komaron̄ leļo̧k n̄an er jejjo minit ko n̄an aer etale jebta kein im je ilo ioon boot eo jabdewōt unin tōl ak unin kōnono rekar loi. Āinwōt juon kūlaaj, kōnono etke unin tōl kein ak unin kōnono kein raorōk.
Katakin Katak ko
Jemaron̄ kālet n̄an ettā bōro.
-
N̄an tōle juon ekōnono kōn ettā bōro āinwōt an katakin ilo Alma 32:1–16, komaron̄ jino karuwaineneik ro uwaan kūlaaj eo am̧ bwe ren kwaļo̧k etan en̄jake ko me remaron̄ kōttāik būruwōn juon armej (Alma 32:2–5 letok juon waanjon̄ak). Jet uwaan kūlaaj eo remaron̄ m̧ōņōņō in kwaļo̧k en̄jake ko aer make kōn aer ekkatak ettā bōro. Ewi wāween an maron̄ “aikuj in ettā” (Alma 32:12) erom̧ juon kōjeraam̧m̧an? Ennaan ko kōn ettā bōro ilo “Kein Jipan̄ ko Jet” remaron̄ jipan̄ ejaake juon ekōnono. Komaron̄ barāinwōt riiti Katak im Bujen ko 112:10 ak al juon al in jar kōn ettā bōro, āinwōt “Be Thou Humble” (Hymns, no. 130), āinwōt juon kūlaaj.
Jej kōjerbal tōmak ilo Jisōs Kraist jān katōk im naajdiki naan eo An ilo būruwōd.
-
Jet iien kōj jej ļōmņak kōn kabun̄jar wōt ej men ko jej kōm̧m̧an ilo būrokraam̧ ko karōki ilo juon im̧ōnjar (lale Alma 32:5, 9, 11), ak meļeļe eo an Alma kōn kabun̄jar eļapļo̧k an debakbakļo̧k. N̄an waanjon̄ak, ekar katakin bwe ejaake im kōjerbal tōmak ilo Jisōs Kraist ej juon jekjek in kabun̄jar eaorōk me emaron̄ bōk jikin itulikin būrokraam̧ ko karōki. N̄an jipan̄ ro uwaan kūlaaj eo am̧ meļeļe menin, komaron̄ in jin̄aiki juon pija in juon ine im juon wōjke ioon boot eo im ekōnono kōn kajjitōk kein āinwōt: Ta eo ine eo ej bōk jikin? (lale Alma 32:28; 33:22–23). Ewi wāween ad maron̄ kalbwin ine eo—ak naan in kam̧ool eo kōn Jisōs Kraist im Pinmuur eo An—ilo būruwōd im naajdiki? (lale Alma 32:36–43; 33). Ta en̄jake ko jemaron̄ in kwaļo̧ki ilo kijejeto ko ad n̄an ļoor Rilo̧mo̧o̧r eo bōk m̧aantak leen eo eaiboojoj? Ewi wāween an katak ko an Alma kareel wāween ad kabun̄jar n̄an Jemedwōj Ilan̄ im Jisōs Kraist?
-
“Mālejjon̄i” eo me Alma ekar kōmeļeļeiki n̄an jipan̄ Rizoram ro ejaak tōmak ilo Jisōs Kraist emaron̄ barāinwōt jipan̄ kōj ekkatak eļan̄n̄e pedped ko jet an gospel eo rej m̧ool. N̄an jipan̄ kūlaaj eo meļeļe mālejjon̄i in an Alma, komaron̄ kōnono kōn ewi wāween juon mālejjon̄i. Bōlen emaron̄ wōr juon ilowaan kūlaaj eo em̧ōj an kar kōm̧m̧ane juon mālejjon̄ m̧okta im emaron̄ jipan̄ kōn kōmeļeļe in. Ta unleplep in kwojkwoj eo? Ewi wāween juon mālejjon̄ āinļo̧k wōt ta eo Alma ekar kajjitōk ippān armej ro n̄an kōm̧m̧ane ilo Alma 32:26–36? Bōlen ro uwaan kūlaaj eo remaron̄ kwaļo̧k elōn̄ wāween ko rekar “mālejjon̄i” ilo naan ko an Anij. Ewi wāween aer kar itok im jeļā bwe “naan eo [an Anij] em̧m̧an”? (Alma 32:28).
-
Ta eo Alma emaron̄ kar ba n̄an juon armej eo ekōņaan in bōk ak kajoorļo̧k naan in kam̧ool eo an kōn Jisōs Kraist? N̄an etale kajjitōk in, komaron̄ kajimettane kūlaaj eo n̄an ruo kūrub ko. Juon kūrub emaron̄ riiti Alma 32:26–36 n̄an lale ta eo Alma emaron̄ kar ba n̄an juon armej eo me ej kajjieon̄ bōk juon naan in kam̧ool, im kūrub eo juon emaron̄ riiti Alma 32:36–43 n̄an lale ta eo emaron̄ ba n̄an juon armej eo naan in kam̧ool eo an ekar m̧ōjņo̧. Innām juon armej jān kajjojo kūrub emaron̄ bōk an doon iien im bōk jikin Alma im role-play kōn wāween eo n̄an jipan̄ juon armej bōk ak kajoorļo̧k ilo juon naan in kam̧ool.
Alma 31:13–23; 33:2–11; 34:17–29
Jemaron̄ kabun̄jar n̄an Anij ilo jar, jabdewōt iien im jabdewōt jikin.
-
Komaron̄ jipan̄ kūlaaj eo keidi katak ko an Alma im Amulek kōn jar im kabun̄jar ippān katak ko rebōd an Rizoram ro. Ro uwaan kūlaaj eo remaron̄ in etale Alma 31:13–23 im kōllaajrake ioon boot eo ta ko Rizoram ro rekar tōmak kake kōn jar im kabun̄jar. Innām remaron̄ pukot m̧ool ko ilo Alma 33:2–11 im 34:17–29 ko me keidi n̄an tōmak kein. Ta eo eoon kein rej katakin kōj kōn wāween ad maron̄ kōkōm̧anm̧anļo̧k ad jar im ad kabun̄jar?
-
Komaron̄ kōketak doon n̄an kōm̧m̧ane juon ekōnono kōn jar ilo am̧ je naan ko āinwōt Wōn? Ta? N̄āāt? Ia? Etke? im Ewi wāween? ioon boot eo. Ro uwaan kūlaaj eo remaron̄ in etale Alma 33:2–11 im 34:17–29 n̄an pukot uwaak ko n̄an kajjitōk kein kōn jar. N̄an waanjon̄ak, remaron̄ uwaaki kajjitōk ko āinwōt kein: Ia eo jemaron̄ in jar ie? Ta eo jemaron̄ jar kake? Remaron̄ barāinwōt pukot uwaak ko ilo naan ko an juon al in jar kōn jar, āinwōt “N̄e Kwoj Rujtok jen Ion Kinem?” ak “Sweet Hour of Prayer” (Hymns, nos. 33, 142). Ewi wāween ad maron̄ kōkōm̧anm̧anļo̧k ad jar?
Katok in pinmuur eo an Rilo̧mo̧o̧r eo ad ej “indeeo im ejjeļo̧k jem̧ļo̧kin”.
-
Amulek ekar kōjerbal naan kein “indeeo” im “ejjeļo̧k jem̧ļo̧kin” jet kōttan n̄an kōmeļeļeiki katok eo an Jisōs Kraist kar kōm̧m̧ane n̄an jerawiwi ko ad. Komaron̄ kajjitōk ippān ro uwaan kūlaaj eo n̄an pukot naan kein ilo Alma 34:9–14 innām lali ilo juon tikjenede. Ilo wāween rot katok eo an Rilo̧mo̧o̧r eo eļap im ejjeļo̧k jem̧ļo̧kin? (lale Hibru 10:10; 2 Nipai 9:21; Mosaia 3:13). Ekkar n̄an Alma 34:15–17, ta eo jej aikuj kōm̧m̧ane n̄an bōk kōjeraam̧m̧an ko an katok eo an Rilo̧mo̧o̧r eo? Ta meļeļein n̄an “kwaļo̧k ami tōmak n̄an ukeļo̧k.”? (Alma 34:17).
“Jab aepedped kōn raan in ukeļo̧k eo ami.”
-
Juon waanjon̄ak āinwōt laajrak in emaron̄ jipan̄ ro uwaan kūlaaj eo kejōkļo̧kjeņ kōn kauwōtata ko kōn aepedped kōn ukweļo̧k eo ad: kajjitōk ippāer n̄an ļōmņak eļan̄n̄e rekar bōk juon karuwainene n̄an bōk koņaer ilo juon m̧akūtkūt eo aikuji elōn̄ iiō in kamminenne ko im bōk koņaer, āinwōt juon iien jiāe ilo Olympic ak kōjan̄jan̄ (kālet juon men eo eaorōk n̄an kūlaaj eo), ak m̧akūtkūt in enaaj kōm̧m̧an ilju. Ekōnono ippān kūlaaj eo etke rekar jab maron̄ wōnm̧aanļo̧k ilo m̧akūtkūt eo mekarta rekar joļo̧k jimettan in raan eo im m̧aanjabpopo. Ewi wāween an waanjon̄ak in iookļo̧k kakkōļ ko an Amulek ilo Alma 34:32–35? Ta eo emaron̄ in kauwōtata n̄an karum̧wijļo̧k kijejeto ko ad n̄an ukweļo̧k im oktak? Kajjitōk ippān ro uwaan kūlaaj eo n̄an kejōkļo̧kjeņ kōn ta eo remaron̄ kōm̧m̧ane n̄an “m̧aanjabpopo n̄an indeeo” (eoon 33) im kōm̧m̧an karōk ko n̄an kōm̧m̧ani im jab karuwm̧ijļo̧k.
Kōketak Ekkatak ilo Mweo
N̄an im̧we ro uwaan kūlaaj eo n̄an riiti Alma 36–38 wiik in tok, komaron̄ kwaļo̧k bwe Alma ekar “būrom̧ōj kōn nana eo an armej ro an,” kōn menin ekar aiintok ļaddik ro nejin im katakin er “kōn men ko rej an weeppān” (Alma 35:15–16). Jabta ko tok jet ilo Alma rej letok juon bwebwenato in ta eo ekar im̧we Alma n̄an katakin ļaddik ro nejin.
Kein Jipan̄ ko jet
Ta meļeļe in n̄an erom ettā bōro?
“N̄an erom ettā bōro ej n̄an kile kam̧m̧oolol eo am̧ kōn am̧ pedped wōt ioon Irooj—n̄an meļeļe bwe ewōr am̧ aikuj n̄an jipan̄ eo An. … Ejjab juon kōkkaļļein in m̧ōjņo̧, mera ainikiem̧, ak mijak; ej juon kōkkaļļe bwe kwojeļā ijo im kajoor eo am̧ em̧ool ej pād ie” (True to the Faith [2004], 86).
Elder Quentin L. Cook ekar kōmeļeļeiki: “N̄e jej joļo̧k ad iien im ļōmņak kōn Anij Jemād im Kraist Nejin, wōn Er, im Ta eo Er rekar tokje ilo etad, ej kobrak kōj kōn kautiej, bwilōn̄, kam̧oolol, im ettā bōro. … Ettā bōro rej barāinwōt kam̧m̧oolol kōn kōjeraam̧m̧an ko aer rellōn̄ im jipan̄ eo ekwojarjar rej bōke. Ettā bōro ejjab jet tōprak eļap maron̄ kile ak em̧ool jet idajon̄jon̄ ko reļlap anjo̧ ioer. Ej juon kōkkaļļe in kajoor ilo jetōb. Ej wōr juon lōke bwe raan n̄an raan im awa n̄an awa jemaron̄ in pedped wōt ioon Irooj, jerbal n̄an E, im tōpar jibadbad eo An” (“Men ko an Indeeo rej Waļo̧k Aolep Raan,” Ensign ak Liaona, Nov. 2017, 52, 54).
Eoon ko kōn Tōmak
Kōkōm̧anm̧anļo̧k Ad Katakin
Pedped wōt ioon jeje ko rekwojarjar Ilo iien in me ebooļ jipan̄ ko me remaron̄ kōkōm̧anm̧anļo̧k juon ekōnono, keememej bwe eoon ko rej unjān jipan̄ ko an katak ko. Jipan̄ ro uwaan kūlaaj eo loe m̧ool ko ilo jeje ko rekwojarjar. (Lale Teaching in the Savior’s Way, 21.)