Antai-Nipai-Liai

Antai-Nipai-Liai ro rej Kalbwin Kein Tariņae ko Aer, jān Jody Livingston

Juun 29–Juļae 5

Alma 23–29

Raar “Jāmin Raar Bun̄”

Ilo am̧ riiti Alma 23–29, keememej bwe n̄an maron̄ jipan̄ ro jet ekkatak m̧ool ko ilo jebta kein, ej aikuj in wōr am̧ en̄jake ko raorōk kōn m̧ool kein kwe make.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Komaron̄ kajjitōk ippān ro uwaan kūlaaj eo n̄an je ioon boot eo eoon ko me rej alikkar n̄an er ilo ekkatak ko aer make ak ekkatak ko an baam̧le. Joļo̧k jejjo minit ko im kajjitōk ippān jejjo armej ro bwe ren kōnono kōn juon m̧ool rekar ekkatak kake jān eoon kein rekar jei.

pija ej bōk jikin katakin

Katakin Katak ko

Alma 23–25; 27

Oktaktok eo ad n̄an Jisōs Kraist im gospel eo An ej ukōt mour ko ad.

• Āinwōt rikaļoor ro an Jisōs Kraist, kōj aolep jej kajjieon̄ kam̧wilaļļo̧k oktaktok eo ad. Bōlen bwebwenato in Antai-Nipai-Liai eo emaron̄ kōketak ro kwoj katakin ilo kijejeto ko aer n̄an kōm̧m̧ane menin. Komaron̄ jino ilo am̧ je ioon boot eo juon kajjitōk āinwōt in: Ta meļeļein n̄an maron̄ oktaktok? ak Ta kain oktaktok ko rej waļo̧k ilo mour ko an armej n̄e rej oktaktok? Ro uwaan kūlaaj eo remaron̄ pukot uwaak ko ilo eoon kein: Alma 23:6–7, 17–18; 24:17–19; 25:15–16; im 27:26–30. Remaron̄ kwaļo̧k ļōmņak ko jān eoon ko jet rekar riiti ilo Alma 23–25 im 27. Ro uwaan kūlaaj eo remaron̄ barāinwōt pukot uwaak ko rejipan̄ n̄an kajjitōk kein ilo ennaan eo an Elder David A. Bednar “Oktaktok n̄an Irooj” (Ensign ak Kweilo̧k eo Eļap, Nob. 2012, 106–9; barāinwōt lale “Kein Jipan̄ ko Jet”). Ta oktak ko Antai-Nipai-Liai ro rekar kōm̧m̧ane im ej kwaļo̧k āinwōt juon tōprak in oktaktok eo aer? Ewi wāween an waanjon̄ak eo aer im̧we kōj n̄an kam̧wilaļļo̧k oktaktok eo ad n̄an Jisōs Kraist im gospel eo An?

• Ewi wāween am̧ maron̄ im̧we ro uwaan kūlaaj eo joļo̧k jabdewōt imminene ko rebōd im kalbwin kein tariņae in jum̧ae eo aer, āinwōt Antai-Nipai-Liai rekar kōm̧m̧ane? Ļōmņak in etale Alma 23:5–7 ippān doon. Ta jet iaan imminene ko rem̧m̧an me gospel eo ej jipan̄ kōj ejaaki? Ta eo me emaron̄ in’ “kein tariņae ko in … jum̧ae” an Rileman ro rej bōk jikin ilo raan kein ad? Ewi wāween ad maron̄ “kalbwini ilo bwidej em̧wilaļ’? (Alma 24:17). Kajjitōk ippān ro uwaan kūlaaj eo n̄an kejōkļo̧kjeņ kōn imminene ko rebōd ak kein tariņae in jum̧ae ko rej aikuj doori itulik bwe ren maron̄ mour kōn gospel eo ilo dipio in.

Alma 24:7–16

Kōn Pinmuur eo an Jisōs Kraist, jemaron̄ bōk jeorļo̧k bōd n̄e jej ukweļo̧k.

• Eļan̄n̄e kwoj en̄jake juon im̧we n̄an kōm̧m̧ane juon iien ekōnono kōn ukweļo̧k, bwebwenatok eo an Antai-Nipai-Liai ilo Alma 24 ej juon waanjon̄ak em̧m̧an n̄an kōjerbale. Komaron̄ in leļo̧k n̄an kajjojo ro uwaan kūlaaj eo juon eoon n̄an riit jān Alma 24:7–16 im kajjitōk ippāer n̄an je ioon boot eo jet men ko rej ekkatak jān eoon eo aer kōn ukweļo̧k. Innām remaron̄ etale eoon kein rej ellaajrak n̄an pukot ļōmņak ko jet kōn ukweļo̧k: Aiseia 53:5–6; 2 Nipai 2:6–8; im Mosaia 5:2.

Alma 24:13–15; 26; 29

Gospel eo ej bōktok lan̄lōn̄.

• Ilo Alma 23–29, naan eo “lan̄lōn̄” ej waļo̧k 24 kōttan, kōm̧m̧an an jebta kein erom juon jikin ekkatak wāween mour kōn gospel eo—im kwaļo̧ke—ej bōktok lan̄lōn̄. Komaron̄ ajeje ro uwaan kūlaaj eo n̄an kūrub ko im kajjitōk ippān kajjojo kūrub ko n̄an etale jet iaan eoon kein rej ellaajrak, pukot un ko etke Ammōn, ļaddik ro nejin Mosaia, im Alma rekar m̧ōņōņō: Alma 24:13–15; 26:12–22; im 29:1–17. Ro uwaan kūlaaj eo remaron̄ kōllaajraki ta ko rekar loe ioon boot eo. Ta eo jemaron̄ katak jān eoon kein kōn wāween an gospel eo bōktok n̄an kōj lan̄lōn̄?

• Būreejtōn Russelll M. Nelson ekar katakin: “N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad. Lan̄lōn̄ ej itok jān im kōn E. E ej unin lan̄lōn̄ otemjeļo̧k” (“Lan̄lōn̄ im Mour ilo Jetōb,” Ensign ak Liaona, Nob. 2016, 82). Bōlen ro uwaan kūlaaj eo remaron̄ in kwaļo̧k en̄jake ko me rekar jipan̄ er meļeļe kōn m̧ool eo jān naan ko an Būreejtōn Nelson.

• Alma im Ammōn rekar loe lan̄lōn̄ eo eļap ilo kwaļo̧k gospel eo. Komaron̄ kajjitōk ippān ro uwaan kūlaaj eo n̄an pukot eoon ko ilo Alma 26 im 29 me remaron̄ im̧we juon jodikdik n̄an jerbale juon mijen—ak im̧we jabdewōt n̄an kwaļo̧k gospel eo ippān ro jet. Ļōmņak im leļo̧k jejjo minit ko n̄an ro uwaan kūlaaj eo n̄an aer karōk juon men eo me remaron̄ kōm̧m̧ane n̄an kwaļo̧k gospel eo. Kajjitōk ippāer n̄an m̧akūtkūt kōn karōk ko aer, im ilo juon kūlaaj tokālik komaron̄ rōjan̄ er n̄an aer kōnono kōn kijejeto ko aer.

• Ke Alma ekar jipan̄ ro jet ukweļo̧k, ekar keememej em̧m̧an eo an Anij (lale Alma 29:10–13). Bōlen komaron̄ in leļo̧k n̄an ro uwaan kūlaaj eo jejjo iien ko n̄an ekkatak eoon kein im kōllaajraki ta ko Alma ekar keememeji. Ta eo ej kakeememej kōn em̧m̧an eo an Anij? Ewi wāween ad kar loe em̧m̧an eo an Anij ilo mour ko ad?

Alma 26–27

Jemaron̄ in erom kein jerbal ko ilo pein Anij.

• N̄an jipan̄ ro uwaan kūlaaj eo pukote ta meļeļein n̄an erom “kein jerbal ko ilo pein Anij” (Alma 26:3), komaron̄ in kwaļo̧k elōn̄ kain kein kōjan̄jan̄ ko ak kein jerbal ko. Komaron̄ barāinwōt kajjitōk ippān ro uwaan kūlaaj eo bwe ren bōktok jet kein jerbal ko me rej kōjerbali. Ewi wāween an kein jerbal kein wōr tokjāer? Ewi wāween ad āinwōt kein jerbal ko ilo jerbal in an Anij? Komaron̄ kajjitōk ippān ro uwaan kūlaaj eo n̄an kalikkari wāween ko Ammōn im mijenede ro m̧ōttan rekar kein jerbal ko ilo pein Anij (lale, n̄an waanjon̄ak, Alma 26:1–5, 11–12). Ta ļōmņak ko jej būki jān Katak im Bujen ko 4 kōn kein jerbal ilo Pein? Ro uwaan kūlaaj eo remaron̄ barāinwōt kwaļo̧k en̄jake ko ke rekar en̄jake lan̄lōn̄ eo me ej itok jān erom juon kein jerbal ilo pein Anij.

pija ej bōk jikin ekkatak

Kōketak Ekkatak ilo Mweo

Elōn̄ iaan ejja ļōmņak ko rebōd rej tōl ajri ro nejin Anij jōbwābwe rainin rekar ekkā aer barāinwōt waļo̧k ilo raan ko an Alma. Ba n̄an ro uwaan kūlaaj eo bwe ilo Alma 30–31 renaaj loe wāween an Alma im ro jet kar uwaak n̄an katak ko rebōd.

pija ej bōk jikin kein jipan̄ ko

Kein Jipan̄ ko Jet

Oktak tok n̄an Irooj.

Elder David A. Bednar ekar katakin:

“Okwar in gospel eo an Jisōs Kraist ej kitbuuj juon oktak epen im ejjeļo̧k jem̧ļo̧kin ilo kōj ekapidodoiki kōn Pinmuur eo an Rilo̧mo̧o̧r eo. Oktaktok in em̧ool ej bōktok juon oktak in tōmak an juon make, bōro, im mour n̄an bōk im mour n̄an ankilaan Anij (lale Jerbal 3:19; 3 Nipai 9:20) im ej kitbuuj juon kallim̧ur kautieje n̄an erom juon rikaļoor an Kraist.”

Ālkin kouti Alma 23:6–8, Elder Bednar ekar etal wōt im kōmeļeļeiki:

“Ruo men ko raorōk rej kōmeļeļeik ilo eoon kein: (1) jeļāļo̧kjeņ kōn m̧ool eo, eo emaron̄ ukōte āinwōt naan in kam̧ool, im (2) oktak tok n̄an Irooj, eo Ij meļeļe kake āinwōt oktakļo̧k n̄an Rilo̧mo̧o̧r eo im gospel eo An. Kōn menin, koba eo ekajoor jimo̧r an naan in kam̧ool im oktak n̄an Irooj ej kwaļo̧k pen im dim im letok kōjparok ilo jetōb.

“Raar jab wōtļo̧k im liļo̧k ‘kein tariņae in jum̧ae ko aer, bwe ren jab bar ire ņae Anij ļo̧k wōt n̄an jidik.’ N̄an likūt turejet aorōk an ‘kein tariņae’ ko āinwōt kūbboņ, utiej bōro, im jab pokake emenin ļo̧k aikuj jān jidik tōmak im jeļā. Tōmak edim, ettā bōro, ukweļo̧k, im ajeļo̧k rej itok m̧okta jān kakkure kein tariņae ko ad. Kom̧ im n̄a jej dāpij wōt kein tariņae ko ad me rej dāpij kōj jān erom rioktak n̄an Irooj? Eļan̄n̄e āindein, innām jej aikuj ukweļo̧k kiiō.

“Kememej bwe ri Leman ro raar jab oktak tok n̄an mijenede ro raar katakin er ak n̄an būrookram̧ ko rōm̧m̧an ilo Kabun̄ eo Raar jab oktak n̄an m̧wil ko an ritōl ro aer ak n̄an dāpij m̧anit ak iminene ko an ro jemeer. Raar oktak n̄an Irooj—n̄an E āinwōt Rilo̧mo̧o̧r eo im n̄an kwojarjar eo An im katak eo—im raar jab bar bun̄ lo̧k” (“Oktaktok n̄an Irooj,” Ensign ak Kweilo̧k eo Eļap, Nob. 2012, 107–9).

Kōkōm̧anm̧anļo̧k Ad Katakin

Pukot tōl jān ritōl ro am̧. “Ritōl ro am ilo priesthood im ritōl ro am̧ ilo radik ko rekōņaan in jipan̄ eo wājabdik. Kajjitōk kōn ko̧o̧njeļ eo aer ilo am̧ kajjieon̄ em̧m̧anļo̧k āinwōt juon rūkaki im ilo am̧ kejōkļo̧kjeņ kōn aikuj ko an ro kwoj katakin” (Teaching in the Savior’s Way, 5).