Alma i stap prij

Stap Tijim Tru Doktrin, i kam long Michael T. Malm

8–14 Jun

Alma 8–12

Bae Jisas Kraes I Kam blong Pemaot Ol Pipol blong Hem

Stat blong rere blong tij taem yu stadi long Alma 8–12. Afta, luklukbak long aotlaen ia blong gat sam moa aedia we bae i leftemap tingting blong klas blong serem wanem oli bin lanem long stadi blong olgeta.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Givim taem long ol memba blong klas blong oli luklukbak long skripja stadi blong olgetawan mo wetem famli, long wik ia. ?Olsem wanem nao stadi blong olgeta i lidim joes we oli bin mekem long taem blong wik? Invaetem sam memba blong klas blong serem ol tingting blong olgeta.

tijing pikja bokis

Stap Tijim Doktrin

Alma 8

Traehad blong yumi blong serem gospel bae i nidim blong yumi gat fasin blong stap gohed mo fasin blong gat longfala tingting.

• Plante pipol oli faenem i had blong serem gospel—speseli taem oli filim se man i stap sakemaot olgeta, semmak olsem Alma. Eksampol blong Alma i save helpem olgeta blong trastem God mo faenem strong paoa long tingting blong gohed blong serem testemoni blong olgeta wetem ol narawan. Tingting long ol kwestin ia blong toktok raon long olgeta: ?Wanem nao yumi lanem aot long mesej blong enjel i go long Alma long Alma 8:15? ?Weswe long wanem Alma i mekem taem i harem mesej ia, we yumi save faenem long Alma 8:14–32; hemia i givim insperesen long yumi blong gohed blong serem gospel taem oli sakemaot yumi o nogat? ?Wanem advaes nao bae yu givim long wan we i bin traem blong serem gospel, be oli sakemaot hem? Advaes blong Elda Jeffrey R. Holland we i stap long “Sam Moa Risos” i save helpem storian ia.

• Stori blong Alma mo Amulek i soemaot olsem wanem traehad blong ol memba i impoten long misinari wok. ?Wanem nao ol memba blong klas oli lanem aot long Alma 8:19–30 abaot rilesensip bitwin ol lokol memba mo ol fultaem misinari?(luk tu long Alma 10:1–12).

  tufala famli i stap mit

  Blong serem gospel wetem olgeta we yumi lavem olgeta, i save kam wan glad eksperiens.

Alma 9:18–30

God i jajem ol pikinini blong Hem folem laet mo save we oli gat.

• I gat wan bigfala woning long ol ves ia we i go long evri memba blong Jos—taem yumi kasem laet mo save, God i wantem luk se yumi holemtaet gud, yumi fidim, yumi laef folem mo yumi yusum blong blesem ol narawan. Blong helpem ol memba blong klas blong lukluk moa long ol samting ia we God i wantem luk yumi mekem, yu save askem olgeta blong ridim ol tijing blong Alma long Alma 9:18–30 mo serem ol mesej we oli bin faenem abaot responsabiliti we oli gat from ol samting we oli save. ?From wanem bae i gat bigfala moa panismen taem yumi stap sin agensem laet we i moa bigwan? Givim taem long ol memba blong klas blong oli tingting hevi long wanem oli save mekem blong oli tru moa long laet mo save we oli bin kasem. Yu save givim tingting blong oli ridim Doktrin mo Ol Kavenan 50:24 mo semtaem oli tingting hevi long wanem oli stap ridim.

Alma 11–12

Plan blong God i wan plan blong pemaot man.

• Bae yu save statem toktok long klas abaot doktrin ia taem yu stap invaetem ol memba blong klas blong droem antap long bod wan daegram blong plan blong pemaot man. Afta yu save serem ol seksen blong Alma 11–12 long ol memba blong klas mo invaetem olgeta blong lukaotem ol trutok we bae oli ademap long daegram ia. Eksampol, ?Plan blong God ia, i stap pemaot yumi long wanem? (luk long Alma 11:38–45). ?Olsem wanem nao, we taem yumi save abaot plan blong pemaot man, i blesem laef blong yumi?

• Blong helpem ol memba blong klas blong serem wanem we Alma 11–12 i stap tijim olgeta abaot plan blong fasin blong pemaot man, yu save raetem ol heding ia long bod: Foldaon, Ridima, Fasin blong Sakem Sin, Ded, Laef Bakegen long Ded, mo Jajmen. Ol memba blong klas oli save jusum wan long ol topik ia mo luklukgud long Alma 11–12 blong faenem ol trutok we oli bin lanem. Invaetem ol memba blong klas blong raetem ol trutok ia we oli bin faenem, wetem wan skripja refrens anda long stret heding antap long bod. Olsem wan klas, toktok raon long olsem wanem nao ol trutok ia oli lidim ol laef blong yumi mo ol desisen we yumi mekem.

• Ol memba blong klas blong yu oli save lanem samting sapos oli toktok raon long Alma 12:31–32, long ples we Alma i tijim se afta long Foldaon, God i bin givim ol komanmen long Adam mo Iv—be afta nomo we Hem i bin tijim plan blong Hem long tufala. ?Olsem wanem we taem yu save plan, i jenisim wei we yu luk o fil abaot ol komanmen? Mebi yu save tokbaot sam long ol stret komanmen; eksampol, ?olsem wanem nao we taem yu save abaot plan blong God i stap helpem yumi blong kipim Sabat dei i tabu, o i helpem yumi blong obei long loa blong jastiti?

• Maet sam memba blong klas oli gat kwestin abaot Alma 11:26–39, long ples we Amulek i talem se i gat wan God ia nomo. Olgeta skripja ia oli mekem i klia olsem wanem ol memba blong Godhed oli “wan God” be oli ol seperet man: Jon 17:20–23; 2 Nifae 31:21; mo 3 Nifae 19:29. Toktok ia we i kam long Elda Jeffrey R. Holland i save help tu: “Mifala i biliv se Oli wan long evri impoten poen we i impoten mo i no save finis, we yumi save tingting long olgeta be mifala i biliv se oli trifala defren pipol we oli joen wan” (“The Only True God and Jesus Christ Whom Thou Hast Sent,” Ensign o Liahona, Nov. 2007, 40).

Alma 12:9–14

Sapos yumi no stap mekem hat blong yumi i strong tumas, bae yumi save kasem moa aot long toktok blong God.

• Wan long ol mesej we Alma mo Amulek i bin tijim plante taem, hem i olsem wanem we situesen blong hat blong yumi i lidim hamas trutok yumi save kasem long Lod. Blong helpem ol memba blong klas blong faenemaot trutok blong prinsipol ia, yu save invaetem olgeta blong oli grup tutu mo ridim Alma 12:9–14 o, oli save rid long ol smol grup mo oli toktok raon long ol risal blong gat wan hat we i strong. (Yu save askem tu long olgeta blong ridim Alma 8:9–11; 9:5, 30–31; mo 10:6, 25.) ?Hem i minim wanem blong gat wan hat we sofsof? (luk long Jeremaea 24:7; Alma 16:16; Hileman 3:35). ?Olsem wanem nao wan sofsof hat i helpem yumi blong andastanem gud moa toktok blong God?

• Alma i tijim se taem yumi mekem hat blong yumi i had tumas, yumi kasem “pat ia we i moa smol” blong toktok blong God (Alma 12:10). Maet ol memba blong klas oli save serem ol eksperiens we oli bin gat wetem ol skripja se i soemaot prinsipol ia. ?Olsem wanem nao Lod i mekem hat blong yumi i sofsof blong mekem se yumi save gohed blong lanem moa aot long Hem? ?Wanem eksperiens blong yumiwan nao yumi save serem?

• Blong helpem ol memba blong klas blong andastanem se i minim wanem blong gat wan sofsof hat, yu save serem sam long ol eksampol we oli stap long “Sam Moa Risos.”

stap lanem samting pikja bokis

Stap Leftemap Tingting blong Lanem Samting long Hom

Blong givim insperesen long ol memba blong klas blong ridim Alma 13–16 long wik ia, talem long olgeta se bae oli faenem se ol toktok blong Alma oli bin kamtru insaed long laef blong Sisrom mo ol pipol blong Amonaeha.

risos pikja bokis

Sam Moa Risos

Stanap strong wetem strong paoa long tingting.

Elda Jeffrey R. Holland i bin givim toktok ia blong leftemap tingting long olgeta we oli no stap mekem gud olgeta from se oli stap serem o difendem gospel:

“Sapos yu mekem finis, wan dei, bae yu luk se oli singaotem yu blong difendem bilif blong yu, o maet bae yu gotru sam abius yuwan from nomo yu yu wan memba blong Jos Ia blong Jisas Kraes blong Ol Lata-dei Sent. Ol taem olsem i nidim strong paoa long tingting mo kaen fasin we i kam long yu.

“ … Maet yu stap askem yuwan sapos i gud inaf blong gat strong paoa long tingting blong stanap from ol gud fasin long saed blong seks long ol hae skul, o blong go long wan misin nomo blong gat harem se oli tokbaot nogud ol bilif blong yu, o blong traehad agensem plante samting long sosaeti, we samtaem, i daonem fasin blong gat wan laef we i stanap long relijin. Yes. Hem i gud inaf blong mekem hemia. …

“Ol fren, speseli ol yang fren blong mi, gat strong paoa long tingting. Klin lav olsem hemia blong Kraes, we i ronaot long tru fasin blong stap stret mo gud, i save jenisim wol. …

“Stap strong. Stap fetful blong laef folem gospel, iven sapos ol narawan raon long yu oli no laef folem gospel nating. Difendem bilif blong yu wetem fasin we i kaen mo wetem lav mo sore, be yu difendem olgeta bilif blong yu” (“The Cost—and Blessings—of Discipleship,” Ensign o Liahona, May 2014, 6–9).

Hat blong olgeta i kam sofsof.

Jeneral konfrens toktok ia i givim sam eksampol blong ol pipol we Lod i mekem hat blong olgeta i kam sofsof:

• Stori blong Hatfield famli insaed long mesej blong Presiden Russell M. Nelson, “The Price of Priesthood Power” (Ensign o Liahona, May 2016, 66–67).

• Stori blong Harold Gallacher insaed long mesej blong Presiden Thomas S. Monson, “The Sacred Call of Service” (Ensign o Liahona, May 2005, 55).

• Stori blong David insaed long mesej blong President Dieter F. Uchtdorf, “Learn from Alma and Amulek” (Ensign o Liahona, Nov. 2016, 73–74).

Stap Kam Antap long Fasin blong Yumi blong Stap Tij

Luk tru long ae blong God. Traehad blong luk ol memba blong klas blong yu olsem we God i stap luk olgeta, mo Spirit bae i soem long yu sapos oli klin inaf mo oli gat rum blong mekem moa. Taem yu stap mekem hemia, bae oli lidim yu long ol wok blong helpem olgeta (luk long Teaching in the Savior’s Way, 6).