27 Epril–3 Mei. Mosaea 7-10: ‘Wetem Paoa blong Lod,’” Kam Folem Mi—Blong Sandei Skul: Buk blong Momon 2020 (2020)
27 Epril–3 Mei. Mosaea 7-10,” Kam Folem Mi—Blong Sandei Skul: 2020
Minerva Teichert (1888-1976), Amon long Fored blong King Limhae, 1949-1951, oel long mesonaet, 35 15/16 x 48 inj. Brigham Yang Yunivesiti Miusiom blong Art, 1969.
27 Epril–3 Mei
Mosaea 7–10
“Wetem Paoa blong Lod”
Aotlaen ia i save stap olsem wan gudgudfala risos, be hem i sapos blong kam sapotem, i no riplesem, insperesen we yu kasem taem yu stap stadi long Mosaea 7–10.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Wanwan taem, bae i save help blong toktok raon long klas abaot ol blesing we ol memba blong klas oli stap kasem taem oli stap traehad blong mekem hom blong olgeta i kam senta blong lanem gospel. ?Wanem ves nao long Mosaea 7–10 we ol memba blong klas oli bin tingting hevi mo toktok raon long hem insaed long ol hom blong olgeta long wik ia? ?Olsem wanem hemia i bin tajem laef blong olgeta?
Stap Tijim Doktrin
Sapos yumi tanem yumi i go long Lod, trastem Hem, mo givim seves long Hem, bambae Hem i mekem yumi kam fri.
-
Taem ol memba blong klas oli stap stadi long Mosaea 7:14–33, ol eksperiens blong ol pipol blong Limhae oli save givim insperesen long olgeta blong oli sakem sin mo tanem olgeta i go long Lod blong oli kam fri. Blong givim insperesen long toktok insaed long klas, yu save invaetem wan memba blong klas blong kam long klas we hem i rere blong talem sot olsem wanem nao ol pipol blong Limhae oli bin foldaon long fasin blong stap slef. Sam narawan oli save serem wanem we oli bin lanem long Limhae long saed blong gat fet mo hop long Sevya. ?Wanem nao yumi save lanem aot long ol rimaenda blong Limhae long wei we God i bin mekem ol pipol blong Hem oli bin kam fri? (luk long ol ves 19–20). Yu save invaetem ol memba blong klas blong serem ol stori long skripja, o ol eksperiens blong olgetawan we i bin givim insperesen long olgeta blong trastem God.
-
Ol memba blong klas blong yu oli gat ol janis blong givim insperesen long ol narawan blong oli tanem olgeta i go long God taem oli stap slef long sin, o taem oli stap safa long ol hadtaem. Maet bae i helpem olgeta blong stadi long wei we Limhae i bin givim insperesen long ol pipol blong hem. Faswan, oli save ridim wanem skripja i tokbaot gud long Mosaea 7:20–25 abaot fasin we ol pipol blong Limhae oli bin stap prisena, mo tingting long wan we oli save long hem we i stap fesem fasin blong stap prisena blong sin. Afta, oli save faenem ol trutok we Limhae i bin tijim insaed long Mosaea 7:18–20, 33 blong helpem ol pipol blong hem. ?Olsem wanem yumi save folem eksampol blong Limhae taem yumi stap leftemap tingting blong olgeta we yumi lavem blong oli trastem God?
-
Blong helpem ol memba blong klas blong oli andastanem gud moa help ia we God i stap givim long yumi taem yumi fesem agens, yu save singsing tugeta mo toktok raon long hym ia “Ridima blong Isrel” (STSP, pej 51) o wan nara singsing we i tokbaot olsem wanem Sevya i stap mekem yumi kam fri. ?Wanem nao Mosaea 7:17–20; Ita 12:27; mo 2 Korin 12:7–10 i ademap long andastaning blong yumi? Maet ol memba blong klas oli save serem ol eksperiens blong ol taem we Lod i bin mekem olgeta oli kam fri, iven long ol smol wei, from se oli bin soem se oli gat fet long Hem.
Man, oli bin krietem i folem fasin mo pikja blong God.
-
Long ol ves ia, Limhae i stap eksplenem sam long ol trutok we Abinadae i bin tijim, we i bin had blong ol pipol oli akseptem. ?Wanem trutok nao ol memba blong klas oli save faenem insaed long ol ves ia? ?Olsem wanem ol trutok ia oli jenisim wei we yumi luk God mo yumiwan bakegen?
Lod i stap givim ol profet, ol sia, mo ol reveleta blong gud blong ol man long wol ia.
-
Amon i bin gat wan janis blong eksplenem long Limhae rol blong wan sia, mo blong testifae abaot hamas nao i impoten blong gat ol profet, ol sia mo ol reveleta. Yu save kliarem se, long taem blong yumi tedei, Fas Presidensi mo Kworom blong Olgeta Twelef Aposol, yumi stap sastenem olgeta olsem ol profet, ol sia mo ol reveleta. ?Olsem wanem nao we, olsem Amon, yumi save tok stret abaot nid blong gat ol profet, ol sia mo ol reveleta? (luk long Mosaea 8:13–18). Maet ol memba blong klas oli save mekem plan blong putum wan post long sosol media we bae i save helpem ol narawan blong oli andastanem rol blong wan profet, sia mo reveleta long taem blong yumi tedei. ?Wanem nao yumi bin harem long las jeneral konfrens we yumi save serem wetem ol fren, ol memba blong famli, mo ol neiba blong tijim olgeta abaot nid blong gat ol profet?
-
Afta we yufala i ridim Mosaea 8:12–19, yu mo ol nara memba blong klas i save talem testemoni blong yufala abaot ol profet, olsem we Amon i bin mekem, o i save talem tangkyu blong hem from revelesen tru long ol profet, olsem we Limhae i bin mekem (luk long Mosaea 8:19).
-
Profet Josef Smit i sia ia we i stanap long hed blong dispensesen ia (luk long D&K 21:1). Yu save askem ol memba blong klas blong serem wanem we oli lanem aot long wanem Amon i tokbaot abaot wan sia (luk long Mosaea 8:13–18 Oli save toktok raon long ol wei we Josef Smit i bin wan sia. (D&K 135:3 mo Moses 6:36 oli save help long toktok insaed long klas.)
Yumi save fesem ol jalenj blong yumi “wetem paoa blong Lod.”
-
Sentens ia “wetem paoa blong Lod” i kamaot tu taem long histri blong Senif abaot pipol blong hem, mo ol faet blong olgeta wetem Ol Man blong Leman—olsem we i stap long Mosaea 9:14–19 mo 10:6–10. Maet ol memba blong klas oli save luklukgud long ol ves ia mo serem wanem we oli filim se sentens ia i minim long olgeta. ?Olsem wanem nao yumi kasem “paoa blong Lod”? Leftemap tingting blong ol memba blong klas blong serem ol eksperiens blong olgeta taem we oli bin gat sakses blong winim ol jalenj blong olgeta wetem paoa blong Lod.
Joes blong yumi i save lidim ol jeneresen.
-
Yu save invaetem ol memba blong klas blong ridim kwaet Mosaea 10:11–17 mo lukaotem ol wei we joes mo bilif blong ol bubu blong Ol Man blong Leman i bin lidim tingting blong olgeta. ?Hemia i stap talem wanem abaot paoa we joes blong yumi i gat long ol narawan? ?Olsem wanem yumi wantem se oli tokbaot yumi mo ol famli blong yumi afta long wan o tu jeneresen olsem? Mebi ol memba blong klas oli save raetemdaon sam long ol samting we oli wantem se bae oli talem long ol histri ia.
-
Wan simpol tul lesen—olsem wan laen blong ol domino—i save helpem yumi blong soem wanem risal nao joes blong ol pipol i gat long laen blong olgeta we i kam afta long olgeta. Yu save invaetem ol memba blong klas blong ridim Mosaea 10:11–17 mo toktok raon long wei we ol bilif mo fasin blong Ol Man blong Leman oli go olsem wanem, from nomo, joes blong ol bubu blong olgeta we oli bin mekem plante handred yia bifo. Stori blong Elda Donald L. Hallstrom, we yu save faenem long “Sam Moa Risos,” i wan nara eksampol we yu save serem. Maet ol memba blong klas oli save tingting long sam stori blong laef blong olgeta, o famli histri blong olgeta abaot wan stret mo gud man o woman we i bin lidim plante jeneresen blong oli mekem gud samting.
Stap Leftemap Tingting blong Lanem Samting long Hom
Long wik ia, ol memba blong klas oli bin lanem abaot ol nogud risal we joes blong Ol Man blong Leman i bin mekem long ol pikinini blong olgeta. Letem ol memba blong klas oli save se, long Mosaea 11–17, bae oli rid abaot wan man we stret mo gud fasin blong hem i bin jenisim laef blong plante pipol.
Sam Moa Risos
Ol desisen blong yumi i save jenisim laef blong ol jeneresen.
Elda Donald L. Hallstrom i bin serem olsem wanem fasin we ol bubu blong hem oli bin stap fetful i bin blesem ol fiuja jeneresen:
“Ol bubu blong mi long saed blong papa, tufala i gat tu pikinini, wan boe (papa blong mi) mo wan gel. … Gel blong tufala i bin mared long 1946 mo fo yia afta, hem i gat bel. I gat wan samting we i spesel blong ol papa mo mama, blong stap wet long wan gel (long kes ia, wan gel ia nomo blong tufala), blong i bonem wan bebi i kam long wol, blong fas taem. I no gat wan i save se hem i gat bel long twin bebi. Be sore tumas, hem mo tufala twin, evriwan i ded long taem we mama i bonem ol bebi.
“Ol bubu blong mi, hat blong tufala i brok wantaem. Be harem nogud blong tufala i mekem se tufala i tanem tufala i go long Lod mo Atonmen blong hem. Tufala i no stap mo tingting se from wanem hemia i save hapen olsem, o huia nao rong blong hem, be tufala i lukluk nomo blong laef long wan laef we i stret mo i gud. Tufala bubu blong mi i neva gat bigfala mane; tufala i neva stap long ol topman blong sosaeti; tufala i neva holem wan hae posisen insaed long Jos—tufala i ol simpol Lata-dei Sent, we tufala i stap givim ful tingting mo taem blong tufala. …
“Fetfulnes blong Bubuman Art mo Bubuwoman Lou, speseli taem tufala i fesem hadtaem, naoia, i stap lidim tingting blong fo jeneresen we oli kam afta. Hem i lidim tingting blong boe blong tufala (papa blong mi) long wan wei we i tok stret mo i go dip insaed long hat blong hem taem stret gel blong papa mo mama blong mi, we i hem we i moa yang, i bin ded from sam samting i no bin go gud taem hem i bonem bebi i kam long wol ia. Hem i gat 34 yia, mo hem i ded 10 dei afta we hem i bonem bebi, i livim 4 pikinini, we oli gat 10 dei kasem 8 yia. Wetem eksampol we oli bin luk long jeneresen bifo olgeta, papa mo mama blong mi—tufala i no wet—tufala i tanem tufala i go long Lod blong faenem pis” (“Turn to the Lord,” Ensign o Liahona, May 2010, 78–79).
Stap Kam Antap long Fasin blong Yumi blong Stap Tij
Lisin “Blong stap lisin, hem i wan aksen blong lav. … Askem Papa long Heven blong helpem yu blong andastanem wanem nao ol memba blong klas oli gat blong talem. Taem yu lisin gud long ol mesej blong olgeta we oli talem mo hemia we oli no talem, bambae yu kam blong andastanem gud moa nid, wari, mo wanem oli wantem” (Teaching in the Savior’s Way, 34).