“Abril 13–19. Mosiah 1–3: ‘Napno iti Ayat iti Dios ken Amin a Tao,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Abril 13–19. Mosiah 1–3,” Umaykayo, Sumurot Kaniak—Para iti Sunday School: 2019
Minerva K. Teichert (1888–1976), Pangpakada a Bitla ni Ari Benjamin, 1935, oil on masonite, 36 x 48 inches. Brigham Young University of Art
Abril 13–19
Mosiah 1–3
“Napno iti Ayat iti Dios ken Amin a Tao”
Adu dagiti pagbatayan iti Mosiah 1–3 a mabalinmo nga ilawlawag iti klasem. Agkararagka para iti pannarabay tapno maammuan no ania kadagiti pagbatayan ti kapatgan kadagiti sursuruam.
Isuratmo Dagiti Impresionmo
Yawis ti Panagbibinninglay
Tapno maikkan iti gundaway dagiti miembro ti klase a pagsasaritaan ti maipapan iti bukod wenno sangapamiliaan a panagadalda iti Mosiah 1–3, awisem ida a mangibinglay iti sabali a tao iti maysa a bersikulo a nakitada a makaparegta.
Isuro ti Doktrina
Ti panangawat iti balikas ti Dios ket agkasapulan iti panagsagana.
-
Maysa a wagas a pangirugi iti panaglilinnawag maipapan iti panagsagana nga umawat iti balikas ti Dios ket mabalin a pagsasaritaan ti maipapan kadagiti bunga ti panagsagana— wenno saan a panagsagana—para iti dadduma pay a banag. Kas pagarigan, mabalin dagiti miembro ti klase ti mangibinglay kadagiti padas maipapan iti no kasano nga inapektuan ti panagsaganada wenno kinakurang ti panagsaganada ti maysa a padasda iti pagadalan wenno pagtrabahuan wenno iti sabali pay nga aktibidad. Kalpasan ti panangibinglayda, mabalinmo nga awisen ti kagudua iti klase a mangbasa iti Mosiah 2:1–9, a mangsapsapul kadagiti banag nga inaramid dagiti tao ni Ari Benjamin tapno agsagana nga umawat iti balikas ti Dios. Makapagsukisok ti sabali pay a kagudua ti klase kadagiti isu met la a bersikulo, a mangsapsapul kadagiti banag nga inaramid ni Ari Benjamin a mangipakita no kasano ti panagriknana maipapan iti balikas ti Dios ken ti panagkasapulan nga ibinglay daytoy. Kalpasanna kiddawem iti tunggal grupo a mangibinglay kadagiti kapanunotanda. Ania ti masursurotayo manipud kadagitoy a bersikulo a makatulong kadatayo a mangawat iti balikas ti Dios?
No agserbitayo kadagiti dadduma, agserserbitayo pay iti Dios.
-
Ni Ari Benjamin ti maysa a pagulidanan a katulongan ti Dios ken kadagiti adda iti aglawlawna. Ania ti masursuro dagiti miembro ti klasem manipud kenkuana tapno matulongan ida kadagiti panagkagumaanda nga agserbi kadagiti dadduma? Ibilangmo ti panangirugi iti panaglilinnawag babaen ti panangidawat kadagiti miembro ti klase a mangilista kadagiti tubeng a mapaspasaran dagiti tao iti panagserbida kadagiti dadduma—kas kadagiti gapu ti saantayo panagserbi wenno dagiti gapu a saan a makatulong ti panagserbitayo a kas koma. Kalpasanna mabalinda nga adalen ti Mosiah 2:10–26 ken ilista dagiti kinapudno nga insuro ni Ari Benjamin maipapan iti panagserbi kadagiti dadduma a makatulong kadakuada a mangparmek kadagiti tubeng nga inlistada. Ania dagiti aramiden dagiti indibidual ken pamilia a mangipamaysa iti serbisio iti inaldaw a panagbiagda? Ibilang ti panangibinglay iti estoria ni Presidente Thomas S. Monson iti “Dagiti Nainayon a Resources” kas maysa a singasing.
-
Ti maysa a himno kas iti “A Poor Wayfaring Man of Grief” (Dagiti Himno, blng. 29) wenno video kas iti “The Old Shoemaker” (ChurchofJesusChrist.org) ket mabalin a mangpapigsa iti mensahe a masarakan iti Mosiah 2:17—no agserbitayo kadagiti dadduma, agserserbitayo laeng iti Dios. Kasano a mausarmo dagiti kasta a resources a mangpatibker iti mensahe ni Ari Benjamin? Nalabit a mabalin nga ibinglay dagiti miembro ti klase dagiti padas a napasaranda iti panagserbi kadagiti dadduma wenno panangawat iti serbisio ti maysa a tao a kas ken ni Cristo. Kas paset ti panangilawlawagmo, ilawlawag ti panangibinglay iti adaw ni Presidente Henry B. Eyring: “No mangidiayatayo iti tulong iti asino man, marikna ti Mangisalakan daytoy a kasla dumandanuntayo a mangtulong Kenkuana” (“Is Not This the Fast That I Have Chosen?” Ensign wenno Liahona, Mayo 2015, 22). Apay iti panagkunam nga agserserbitayo iti Dios no agserbitayo kadagiti dadduma a tao?
Ti panagserbi kadagiti dadduma ket makatulong kadatayo a mangrikna iti ayat ti Dios.
Umay ti ragsak manipud iti panagtungpal kadagiti bilin ti Dios.
-
Tapno matulongan dagiti miembro ti klase a “mangusig iti nabendisionan ken naragsak a kasasaad dagiti agtungtungpal kadagiti bilin ti Dios,” mabalin a makatulong daytoy a mangirugi iti panangilawlawag iti kaipapanan ti ragsak. Kasano nga iladawan dagiti miembro ti klase ti ragsak a sumangbay manipud iti panagtungpal iti Dios? Nalabit a mabalinda nga ipapan nga adda maysa a gayyemda nga agkuna nga isu ket naragsak a saan nga agtungtungpal kadagiti bilin. Awisem ida a mangbasa iti Mosiah 2:38–41 ket paglinnawagan no kasano a makatulongda iti gayyemda a makaawat iti paggidiatan ti nailubongan a ragsak ken ti agnanayon a ragsak. Ania dagiti padas wenno pagarigan manipud iti biag dagiti tao a maibinglay dagiti miembro ti klase a mangipagwadan iti agnanayon a ragsak?
Umay laeng ti pannakaisalakan “babaen ti nagan ni Cristo, ti Apo.”
-
Mairaman iti mensahe ni Ari Benjamin dagiti nabileg ken pangiladawan a padto maipapan iti pannakayanak, panagministro, ken pangsubbot a sakripisio ni Jesucristo. Mabalinmo nga idawat kadagiti miembro ti klase a mangibinglay kadagiti bersikulo manipud iti Mosiah 3:1–20 a nangnangruna a nakaawis unay iti imatangda ken makatulong a maawatanda ti Mangisalakan ken ti misionna. Idawatmo kadakuada a mangibinglay no apay a maawis ti imatangda kadagitoy a bersikulo.
-
Isuro ti pakauna iti Libro ni Mormon a ti libro ket “ipalawagna ti plano ti pannakaisalakan.” Tapno matulongan dagiti miembro ti klase a mangkita no kasano a makatulong ti sermon ni Ari Benjamin iti pannakaipatungpal daytoy a panggep ti Libro ni Mormon, mabalinmo nga isurat iti pisarra ti Aramiden ni Jesucristo a Posible ti Pannakaisalakan. Mabalin nga irebyu dagiti miembro ti klase ti Mosiah 3:1–20, ket kalpasanna mabalinmo wenno mabalinda nga ilista iti pisarra dagiti kinapudno a masursuroda maipapan iti plano ti pannakaisalakan. Saludsodem kadagiti miembro ti klase no ania ti masursuroda maipapan iti no kasano nga aramiden a posible ni Jesucristo ti plano ti pannakaisalakan. Kalpasanna mangted kadagiti miembro ti klase iti gundaway a mangrebyu iti Mosiah 3:18–19 ken mangibinglay no ania ti nasken nga aramidentayo tapno agbalin a santo ken umawat iti pannakaisalakan. Kasano a tulongannatayo ti Pannubbot ni Jesucristo a mangipatungpal iti daytoy? Idawatmo kadagiti miembro ti klase a mangibinglay kadagiti riknada maipapan iti akem ti Mangisalakan iti plano ti pannakaisalakan.
Yallukoy ti Panagsursuro iti Pagtaengan
Naaddaan kadin iti padas dagiti miembro ti klasem idi namangbalbaliw kadakuada ti naisuro a doktrina iti maysa a bitla, adalen, wenno nasantuan a kasuratan? Ibagam kadakuada nga iti Mosiah 4–6 basaendanto ti maipapan iti makatukay nga epekto nga adda kadagiti kinapudno nga insuro ni Ari Benjamin kadagiti taona.
Dagiti Mainayon a Resources
Panagserbi kadagiti dadduma.
Kinuna ni Presidente Thomas S. Monson:
“Sumagmamano a tawen ti napalabasen nabasak ti maysa nga artikulo nga insurat ni Jack McConnell, MD. Dimmakkel isuna iti turod ti abagatan a laud ti Virginia iti Estados Unidos kas maysa kadagiti pito nga annak ti ministro a Metodista ken ti agtagibalay nga ina. Nanumo unay ti kasasaadda. Nalagipna nga idi ubing pay, nga iti inaldaw bayat ti panagtugaw ti sangapamiliaan iti panganan a lamisaan, saludsoden nokua ti amana ti tunggal maysa nga agsasaruno, ‘Ket ania ti inaramidmo para iti maysa a tao ita nga aldaw?’ Inkeddeng dagiti ubbing nga agaramid iti nasayaat iti inaldaw tapno maipadamagda iti amada a tinulonganda ti maysa a tao. Awagan ni Dr. McConnell daytoy nga ehersisio iti kapatgan a patawid ti amana, gapu ta dayta a namnamaen ken dagita a balikas ti nangparegta kenkuana ken dagiti kakabsatna a mangtulong kadagiti dadduma iti unos ti panagbiagda. Kabayatan ti panagdakkel ken panagnakemda, nagbalbaliw ti motibasionda iti panangted iti serbisio iti nasnasged a tarigagay a mangtulong kadagiti dadduma.
“Malaksid iti nalatak a karera ni Dr. McConnell iti medisina … nangbukel iti organisasion nga awaganna iti Volunteers in Medicine, a mangted iti nagretiron a medical personnel iti gundaway nga agboluntario kadagiti libre a klinika nga agserserbi kadagiti agtartrabaho a saan a nakaseguro. Kinuna ni Dr. McConnell a ti oras a panaginanana manipud pay idi nagretiro ket nagbalin a 60-nga oras kada lawas ti awan bayadna a trabaho, ngem dimmakkel ti pigsa[na] ken adda pannakapnek iti biag[na] nga awan idi kasakbayanna.’ [Jack McConnell, “And What Did You Do for Someone Today?” Newsweek, Hunio 18, 2001, 13.] …
“Kinapudnona, ditayo kabaelan ti agbalin a Dr. McConnell, a mangipaspasdek kadagiti medical clinic tapno matulongan dagiti nakurapay; nupay kasta, nasken a kanayon nga adda dagiti kasapulan ti dadduma, ket makaaramid ti tunggal maysa kadatayo iti maysa a banag a makatulong iti maysa a tao. …
“Kakabsatko, napalawlawantayo kadagiti agkasapulan iti panangikasotayo, panangparegtatayo, suportatayo, liwliwatayo, panangngaasitayo—miembroda man ti pamilia, gagayyem, kapulapol, wenno ganggannaet. Datayo dagiti ima ti Apo ditoy daga, nga addaan iti bilin nga agserbi ken mangitag-ay kadagiti annakna. Isu ket agpannuray iti tunggal maysa kadatayo. … Mabalin kadi a damagentayo iti bagitayo ti saludsod a nangkablaaw ken ni Dr. Jack McConnell ken dagiti kakabsatna iti tunggal sardam iti oras ti pangrabii: ‘Ania ti inaramidko para iti maysa a tao ita nga aldaw?’” (“What Have I Done for Someone Today?” Ensign wenno Liahona, Nob. 2009, 84–87).
Panangpadur-as iti Panangisurotayo
Agbalinka a maysa a ramit ti Espiritu. Ti panggepmo kas maysa a mannursuro ket saan a mangaramid iti maysa a napintas a panangidatag iti adalen ngem ketdi tapno makatulong iti dadduma nga umawat iti impluensia ti Espiritu Santo—ti pudno a mannursuro. (Kitaen iti Panangisuro iti Wagas ti Mangisalakan, 10.)