“Marso 23–29. Enos–Dagiti Balikas ni Mormon: Agtrabaho Kaniak a Mangaramid iti Pagayatanna,” Umaykayo, Sumurot Kaniak—Para iti Sunday School: Libro ni Mormon 2020 (2020)
“Marso 23–29. Enos–Dagiti Balikas ni Mormon,” Umaykayo, Sumurot Kaniak—Para iti Sunday School: 2020
Da Jacob ken Enos, ni Scott Snow
Marso 23–29
Enos–Dagiti Balikas ni Mormon
Agtrabaho Kaniak a Mangaramid Iti Pagayatanna
Agsagana a mangisuro babaen ti panangbasa iti Enos–Dagiti Balikas ni Mormon ken panangaramid iti maysa a plano iti panangisuro (kitaen iti Panangisuro iti Wagas ti Mangisalakan, 19). Makatulong pay dagiti singasing ken doktrina iti daytoy a balabala a mangted kenka kadagiti kapanunotan.
Isuratmo Dagiti Impresionmo
Yawis ti Panagbibinninglay
Mangted dagiti miembro ti klase kadagiti gundaway a mangibinglay no ania ti nasursuroda iti pagtaengan, mabalinmo a bingaybingayen iti grupo ket dutokam ti tunggal grupo a mangbasa iti maysa kadagiti kapitulo manipud iti Enos–Dagiti Balikas ni Mormon. Idawatmo kadakuada a mangisingasing kadagiti bersikulo manipud iti dayta a kapitulo a mariknada a nasken nga ilawlawag ti klase. Ilistam dagitoy a bersikulo iti pisarra, ket pumilika iti sumagmamano a paglilinnawagan.
Isuro ti Doktrina
Maawattayo ti pannakapakawan dagiti basoltayo no usarentayo ti pammatitayo ken ni Jesucristo.
-
Dagitoy ti sumagmamano a saludsod a mabalinmo a yawis kadagiti miembro ti klase nga utoben ken paglilinnawaganda ti bayat ti panangadalyo iti Enos 1:1–17: Ania ti masursurotayo manipud kadagiti padas ni Enos maipapan iti panangawat iti pannakaugas dagiti basoltayo? Kasano nga impakita ni Enos ti pammatina ken ni Jesucristo? Kasano nga inaringan daytoy a padas ni Enos ken no kasano ti panangkitana iti bagina ken dagiti dadduma?
Masungbatanto dagiti naimpusuan a kararagtayo.
-
Tapno matulongan dagiti miembro ti klase a mangpauneg iti pannakaawatda maipapan iti kararag, mabalinmo a bingayen ida iti babassit a grupo ket awisem ti tunggal grupo a mangadal iti maysa kadagiti sumaganad a binatog manipud iti Enos 1: dagiti bersikulo 2–8, 9–11, wenno 12–17. Kalpasanna kiddawem iti tunggal grupo a mangisuro kadagiti dadduma pay iti klase iti maysa a banag a nasursuroda maipapan iti kararag manipud iti naidutok kadakuada a bersikulo. Kas pagarigan, mabalinmo nga awisen ida a mangibinglay kadagiti balikas ken ragup dagiti balikas a mangiladawan no kasano a nagkararag ni Enos.
-
Mainayon iti panagsursuro maipapan iti no kasano a nagkararag ni Enos, adu ti masursurotayo pay manipud iti no ania ti inkararagan ni Enos. Nalabit a mabalin nga ilasin dagiti miembro ti klase no asino wenno ania ti inkararagan ni Enos iti Enos 1:4–17. Segun kadagitoy a bersikulo, apay a tinarigagayan ni Enos nga inkararagan dagiti dadduma? Ania dagiti dadduma pay a kinapudno maipapan iti kararag a masursurotayo manipud ken ni Enos?
No tungpalentayo dagiti bilin, rumang-aytayonto.
-
Insurat ni Jarom ken dagiti mannurat ti Omni maipapan iti pagilian dagiti Nephite, ngem mayaplikar pay dagiti mensaheda kadagiti tao. Ania ti masursurotayo manipud kadagiti libro da Jarom ken Omni maipapan iti no kasano nga maiturong ti kinalinteg iti panagrang-ay? (kas pagarigan, kitaen iti Jarom 1:7–12 ken Omni 1:5–7, 12–18). Mabalin a makatulong kadagiti miembro ti klase a mangilawlawag iti panagrang-ay nga usaren ti maysa a diksionario ken dagiti nasantuan a kasuratan (kas pagarigan, kitaen iti Alma 37:13; 48:15). Kasano a maipada ti panangilawlawag ti lubong iti panangilawlawag ti Apo? Kasano a matulongan ti Apo dagiti taona a rumang-ay?
-
Kasta iti sipapasnek a panagtrabaho dagiti propeta a Nephite a nangisuro iti bilbilin kadagiti tao, suruandatayo pay dagiti propetatayo iti ud-udina nga aldaw maipapan kadagiti bilin. Kalpasan ti panangbasa iti Jarom 1:9–12, mabalin nga ilawlawag dagiti miembro ti klase dagiti kallabes a pannursuro dagiti lider ti Simbaan a mangparegta kadakuada nga agtungpal kadagiti bilin. Mabalin a makatulong kadagiti miembro ti klase a mangrebyu kadagiti kallabes a mensahe iti komperensia kadagiti magasin ti Simbaan wenno iti Gospel Library app. Wenno mabalinda nga irebyu dagiti pagrukodan a nailawlawag iti Para iti Pigsa dagiti Agtutubo. No kasapulan, mabalinmo ti agibasar iti listaan dagiti mensahe iti “Dagiti Nainayon a Resources.” Kasano a matulongannatayo ti panagtungpal a “rumang-ay” iti panagbiagtayo?
Nangisangbay ti Apo iti adu a tao iti naikari a daga.
-
Naglaon ti Libro ni Mormon iti pakasaritaan a narigat a maawatan, ken mabalin a narigat ti panangsubaybayiti nadumaduma a grupo dagiti tattao a mangiladawan iti daytoy. Maysa a wagas tapno masursuro maipapan iti tunggal maysa kadagiti tao iti Libro ni Mormon ket mabalin a mangaramid iti maysa a tsart iti pisarra ken mangawis iti klase a mangsurat iti daytoy iti impormasion maipapan iti tunggal grupo dagiti tao (kas kadagiti Nephite, Lamanite, ken dagiti tao iti Zarahemla). Kas pagarigan, mabalin nga isurat iti tsart dagiti sumaganad a paulo: Nagan ti grupo, Kaano ken kasano a nakasangpetda, ken Ania ti napasamak kadakuada. Paglinnawagan a sangkamaysa no apay a makatulong a maawatan dagiti banag a nasursuroyo maipapan iti tunggal grupo. Makatulong dagitoy a serrek [entry] iti Pangiwanwan iti Nasantuan a Kasuratan (ChurchofJesusChrist.org): “Coriantumr,” “Jaredite,” “Lamanite,” “Mulek,” “Nephite,” ken “Zarahemla.”
Dagiti Balikas ni Mormon Mormon 1:1–8
Agtrabaho ti Apo babaen kadatayo no surotentayo ti pannarabayna.
-
Kas paset ti maysa a panaglilinnawag iti Dagiti Balikas ni Mormon, mabalinmo nga awisen dagiti miembro ti klase nga umay a nakasagana a mangibinglay iti no apay a naparegta ni Mormon a mangiraman iti babassit a pinanid (1 Nephi–Omni) iti Libro ni Mormon. Mabalin nga agsagana daytoy a miembro ti klase babaen ti panangbasa iti Dagiti Balikas ni Mormon ken dadduma pay a resources, kas iti Doktrina ken Katulagan 10:8–19, 39–45; iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia; ken kapitulo 5 ti Saints, volume 1. Allukoyem dagiti miembro ti klase a mangiraman kadagiti napapateg a detalye maipapan iti pannakapukaw ti 116 a panid ti manuskrito ti Libro ni Mormon ken no apay a kasapulan dagiti babassit a pinanid a mangsukat kadagiti napukaw a panid. Ania dagiti kinapudno a masursuro dagiti miembro ti klase manipud iti daytoy maipapan iti no kasano nga agtrabaho ti Apo babaen ti tao? Ania ti masarakan dagiti miembro ti klase iti Dagiti Balikas ni Mormon 1:1–8 a mangparegta kadakuada a mangsurot iti panangiturong manipud iti Dios no awan ti naan-anay a pannakaawatda kadagiti gapu?
LadawanNi Mormon a mangum-ummong kadagiti pinanid a balitokNi Mormon a Mangum-ummong kadagiti Pinanid, ni Jorge Cocco
-
Pinaraburan ni Mormon ti riniwriw a biag gapu ta sinurotna dagiti parikna ti Espiritu maipapan kadagiti babassit a pinanid (kitaen iti Dagiti Balikas ni Mormon 1:7). Mangpanunot kadagiti wagas a pakatulongam kadagiti miembro ti klasem a makaawat a mabalinda pay ti mangbendision kadagiti dadduma bayat ti panagkalikagumda nga agbalin a ramit kadagiti ima ti Dios ken mangsurot kadagiti parikna ti Espiritu Santo. Kasano nga agtrabaho ti Dios babaen ken ni Mormon? Ania ti nakita dagiti miembro ti klase nga aramiden ti Apo babaen kadakuada wenno dagiti dadduma bayat ti panagtulnogda iti Espiritu ken panagkalikagumda nga agaramid iti pagayatan ti Dios? Ti estoria maipapan ken ni Presidente Thomas S. Monson iti “Dagiti Nainayon a Resources” ket mangipaay iti maysa a pagarigan a mabalin a makatulong kadagiti miembro ti klase a mangpanunot kadagiti pagarigan manipud iti bukodda a biag.
Yallukoy ti Panagsursuro iti Pagtaengan
Gapu ta agpada nga umay ti sapasap a komperensia ken ti Paskua ti Panagungar iti sumaruno a sumagmamano a lawas, allukoyem dagiti miembro ti klase a dumngeg kadagiti mensahe a pangibinglayan dagiti miembro ti Umuna a Panguluen ken Korum dagiti Sangapulo-ket-dua nga Apostol ti naisangsangayan a pammaneknekda ken ni Jesucristo.
Dagiti Nainayon a Resources
Dagiti video iti Libro ni Mormon maipapan ken ni Enos.
Sapulem dagiti video a mangipakita kadagiti pakaammuan iti libro ti Enos iti Book of Mormon Videos collection itii ChurchofJesusChrist.org wenno iti Gospel Library app.
Dagiti mensahe iti sapasap a komperensia maipapan iti panagtungpal kadagiti bilin.
-
Thomas S. Monson, “Keep the Commandments,” Ensign wenno Liahona, Nob. 2015, 83–85
-
Dieter F. Uchtdorf, “Living the Gospel Joyful,” Ensign wenno Liahona, Nob. 2014, 120–23
-
Dallin H. Oaks, “No Other Gods,” Ensign wenno Liahona, Nob. 2013, 72–75
“Alamanuen ti ima ti tunggal ubing.”
Kabayatan ti panagserbi ni Presidente Thomas S. Monson kas maysa a miembro ti Korum dagiti Sangapulo-ket-dua nga Apostol, nagsarita isuna iti maysa a panagtitipon dagiti ubbing iti Primary iti maysa a purok iti Samoa. Kalpasanna, naawis ti riknana a personal a kumablaaw iti tunggal maysa kadagiti 247 nga ubbing a dimmar-ay. Nupay kasta, naamirisna nga awan ti panawenna; pinadasna nga ikkaten iti panunotna ti panangpanunot iti panangkablaaw kadagiti ubbing ngem dina kabaelan.
Kamaudiananna inasitganna ti mannursuro ti ubing ket kinunana, “Kayatko unay nga alamanuen ti tunggal ubing a lalaki ken tunggal ubing a babai. Mabalin kadi?”
Immisem ti mannursuro ket kinasaritana dagiti ubbing iti Samoan. Sigagagar a nagtung-edda kas sungbatda. Kalpasanna imbaga ti mannursuro ken ni Elder Monson nga idi naammuanna a maysa kadagiti Sangapulo-ket-dua nga Apostol ti sumarungkar iti Samoa, inkarina kadagiti ubbing a no agkararagda a sipupudno ken sipapammati, sarungkaranto ni Elder Monson iti purokda ken tignayento ti Espiritu Santo isuna a mangalamano iti tunggal ubing (kitaen iti Thomas S. Monson, “Friend to Friend: Talofa Lava,” Friend, Mayo 1972, 12–13).