Jisōs ej pukotļo̧k juon kōrā

Enaaj Tōl Eok kōn Pein, jān Sandra Rast

Pāpode 24–Maaj 1

2 Nipai 26–30

“Juon Jerbal Ekōppaļpaļ im juon Kabwilōn̄lōn̄”

Keememej bwe m̧weo ej aikuj in jikin eo jinointata ilo ekkatak kōn gospel eo. Am̧ make ekkatak im an baam̧le eo am̧ ekkatak kōn 2 Nipai 26–30 ej aikuj in pedped in am̧ m̧aanjabpopo n̄an katakin. Karōk wāween ko n̄an kalōk ioon, kapenļo̧k, im kōketak ekkatak an juon make im an baam̧le ippān armej ro ilo kūlaaj eo am̧.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Ilo jinoin katak eo, leļo̧k n̄an ro uwaan kūlaaj eo juon iien aer kwaļo̧k jabdewōt men jān 2 Nipai 26–30 ko me rekar loi im eļap meļeļeir ilo aer ekkatak ilo m̧weo. N̄an waanjon̄ak, komaron̄ kajjitōk ippāer bwe ren kwaļo̧k juon eoon me ekar jipan̄ er meļeļe raan eo ad im apan̄ ko jej jelm̧ai.

pija ej bōk jikin katakin

Katakin Katak ko

2 Nipai 26:24–28, 33

Men otemjej Irooj ej kōm̧m̧ane ej kōkajoorļo̧k kōn iakwe eo An n̄an kōj.

• Eļan̄n̄e kwoj en̄jake bwe ekōnono kōn katak ko an Nipai kōn iakwe eo an Irooj, komaron̄ kajjieon̄ menin: Ālkin riiti 2 Nipai 26:24 ippān doon, kajjitōk ippān ro uwaan kūlaaj eo n̄an kōm̧m̧ane jet laajrak in men ko me Jisōs Kraist ekar kōm̧m̧ani n̄an er ko me rekar kōkajoorļo̧k e kōn iakwe. Ewi wāween An “kar bōktok aolep armej n̄an e”? Ta eo jej en̄jake n̄an kōm̧m̧ane n̄an uwaake kōm̧anm̧an in iakwe kein An?

• Kajjitōk eo an Irooj ilo 2 Nipai 26:24–28, 33 rej kam̧ool ko rekajoor an iakwe eo An. Juon wāween eo me komaron̄ jipan̄ ro uwaan kūlaaj eo am̧ loe kajjitōk kein ej n̄e kwoj kajjitōk ippāer n̄an uwaake kajjitōk eo an Irooj ilo jet naan ko rekadu ilo eoon kein n̄an tukadu in juon jentej. Bōlen jejjo ro uwaan kūlaaj eo renaaj m̧ōņōņō in kwaļo̧k tukadu in naan ko aer. Ewi wāween an eoon kein kareel wāween eo jej kajjitōk ippān ro jet n̄an itok n̄an Kraist? Rōjan̄ ro uwaan kūlaaj eo bwe ren je jet iaan ļōmņak im en̄jake ko aer. N̄an jipan̄ karuwaineneik Jetōb eo, ļōmņak im kōjo̧ juon al em̧ōj kar kanne kōn iakwe eo an Rilo̧mo̧o̧r eo āinwōt “Come unto Jesus” (Hymns, no. 117), iien eo me ro uwaan kūlaaj eo rej kejōkļo̧kjeņ kake.

2 Nipai 27; 29; 30:3–8

Bok in Mormon eo eaorōk n̄an jerbal eo an Anij ilo raan kein āliktata.

• Armej ro ilo kūlaaj eo am̧ remaron̄ aikuji jidik jipan̄ n̄an meļeļe kanaan in ilo 2 Nipai 27 kōn juon bok em̧ōj sili im juon em̧m̧aan emāletlet. Bwebwenato in ebun̄bun̄ ilo “Kein Jipan̄ ko jet” emaron̄ jipan̄. Enaaj ke jerbal n̄an kūlaaj eo am̧ eļan̄n̄e jejjo ro uwaan kūlaaj eo rej kalimoiki m̧akūtkūtk ko ilo bwebwenato in ilo 2 Nipai 27:15–22? Etke Nipai ekar maron̄ kwaļo̧k m̧akūtkūt kein elōn̄ iiō m̧okta jān aer waļo̧k? Ta eo kanaan eo an Nipai ej katakin kōn kōn aorōk in Bok in Mormon eo? Rōjan̄ ro uwaan kūlaaj eo n̄an kwaļo̧k ippān ro jet ewi wāween aer maron̄ bōk naan in kam̧ool eo aer make kōn Bok in Mormon eo.

• Ewōr ke juon ilo kūlaaj eo am̧ ewōr juon an en̄jake ilo an kar karuwaineneik armej ro n̄an riiti Bok in Mormon eo me remaron̄ kwaļo̧k kake? Ta jet iaan un ko juon armej emaron̄ jab bōk juon kajjitōk n̄an riiti Bok in Mormon eo? Uwaak eo an Irooj n̄an kain un rot in maron̄ loe ilo 2 Nipai 29:6–11. Komaron̄ kajjitōk ippān ro uwaan kūlaaj eo n̄an riiti eoon kein im ikkure ak role play kōn wāween aer maron̄ uwaake juon armej eo ej ba bwe Bok in Mormon eo ejjab menin aikuj. Ta meļeļe ko jet ro uwaan kūlaaj eo ewōr ippāer kōn wāween aer maron̄ jipan̄ ro jet “jeļā bwe e [Bok in Mormon eo] ej juon jeraam̧m̧an n̄an er jān Pein Anij”? (2 Nipai 30:6).

2 Nipai 28

Setan ej kappukot n̄an m̧oņe.

• Unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko rej ļōm̧akitok elmakot ko n̄an pukot riab ko an Setan rej kōmeļeļeiki 2 Nipai 28. Bōlen ro uwaan kūlaaj eo remaron̄ kwaļo̧k ta ko rekar loi, ak ta ko remaron̄ lale 2 Nipai 28 ilo kūlaaj im laajrak in riab ko an Setan me rej kalikkari. Emaron̄ barāinwōt jipan̄ n̄an kōtļo̧k aer jerbal ilo kūrub ko reddik n̄an pukot eoon ko me rej kam̧ool m̧oņ kein (eļan̄n̄e rej aikuj jipan̄, komaron̄ kwaļo̧k elmakot ko ilo “Kein Jipan̄ ko jet”). Innām kūrub ko remaron̄ kwaļo̧k ippāer kajjojo ta eo remaron̄ loe im ekōnono kōn wāween aer kile rikapo eo “katak ko rebōd im pata im rebwebwe” (2 Nipai 28:9).

pija ej bōk jikin ekkatak

Kōketak Ekkatak ilo M̧weo

Ro uwaan kūlaaj eo remaron̄ in im̧we n̄an riiti 2 Nipai 31–33 eļan̄n̄e rejeļā eo jebta kein ewōr ie naan ko āliktata an Nipai kar ļo̧o̧ki, ekoba juon iaan meļeļe ko reļam waan im pen meļeļeiki kōn katak ko an Kraist.

pija ej bōk jikin kein jipan̄ ko

Kein Jipan̄ ko jet

“Innām eo emālōtlōt enaaj ba: Ij jab maron̄ kōnono ie” (2 Nipai 27:18).

Ilo Pāpode 1828, Martin Harris, eo m̧ōttan Josep Smith, ekar etal ilo juon “iaļ tūrōk n̄an bukwōn in New York kōn juon kōmeļeļe kōn jet iaan armej ro ilo pileej [gold] eo n̄an kwaļo̧k er n̄an rimāletlet ro. Bōlen ekar kōņaan bar jet kam̧ool ko bwe pileij ko rekar m̧ool, ak ekar bōlen ļōmņak juon naan in kam̧ool enaaj kar jipan̄ er būdikaiki jet jāān ko n̄an būriini ukook eo. Ilo jabdewōt m̧akūtkūt, ekar kwaļo̧k bwe Irooj ekar im̧we e bwe kōm̧m̧ane tūreep eo.

“Ilo iien eo, ejjab Josep ak Martin rekar jeļā eļap kōn kajin eo ioon pileij ko. Rej jeļā wōt jon̄an wōt āinwōt enjeļ Moronai ekar jiron̄ Josep: bwe ekar juon ļo̧o̧k in Riamedka ro etto. Men̄e, ijjelo̧kin kappukot juon rimāletlet kōn juon jeļāļo̧kjeņ kōn kajin RiEgypt (Josep tokālik ekar ekkatak bwe kajin eo ioon piliej ko kar ņaetaer ‘reformed Egyptian) ak ekar ejaak jān kajin Egypt, Martin ekar loļo̧k jet rimāletlet ro ewōr juon aer ikdeleel kōn bwebwenato ko etto, eļaptata bwebwenato ko etto an Riamedka.

“… [Ilubwilijin rimāletlet ro Martin ekar loļo̧k] Charles Anthon, juon rūkaki in kaļōj eo em̧m̧an dettan ikijāān grammer im linguistics ilo Columbia College. Anthon ekar aiini bwebwenato in Riindian im Riamedka ro im kōnono ko n̄an kadiwōjļo̧k ilo jeje im ekar kōņaan in etale jeje ko Martin ekar būkitok n̄an ippān.

“Martin ekar ba bwe Anthon ekar kwaļo̧k leta im jeje ko rem̧ool m̧ae iien ekar ekkatak ewi wāween an Josep Smith kar būki. Ekar kajjitōk bwe Martin en bōktok n̄an ippān piliej ko. Martin ekar m̧akoko, im Anthon ekar uwaak, dibdiki ilo naan juon eoon ilo Aiseia, “Ijjab maron̄ riiti juon bōk em̧ōj sili.’ Tokālik Anthon ekar kariabe meļeļe ko jān bwebwenato eo an Martin jān kweilo̧k eo aer, jej jeļā menin: Martin ekar rooltok jān loļo̧k ko an ippān rimāletlet ro jān turōk im ļapļo̧k an jeļā jān kar m̧okta bwe Josep Smith kar kūri jān Anij im bwe piliej ko im lōta im jeje ko rekar jān etto. E im Josep rekar kalimjōk loļo̧k eo an Anthon āinwōt juon kūrm̧ool in kanaan eo an Aiseia (barāinwōt ej kwaļo̧k ilo Bok in Mormon eo make) kōn juon bok eo em̧ōj sili, eo m̧aan ro rekar bōkļo̧k n̄an juon eo ekar ekkatak, ba, Kwōn kōnono bok in, ij kajjitōk ippam̧: im eba, ijjab maron̄ kōnono ie, bwe emōj sili’ [Aiseia 29:11; see also 2 Nipai 27:15–18]” (“The Contributions of Martin Harris,” Revelations in Context [2016], 3–4, history.ChurchofJesusChrist.org).

Jeje ko rekwojarjar me rej kam̧ool mo̧ņ ko an Setan.

Katak ko rebōd	Katak ko rem̧ool
“Bwe rainin E ej jab Anij in mennin bwilōn̄ ko; em̧ōj An kōm̧m̧ane jerbal eo An” (2 Nipai 28:6).	Moronai 7:35–37
“Anij … E naaj kōtļo̧k ad kōm̧m̧ane jidik jero̧wiwi” (2 Nipai 28:8).	Katak im Bujen ko 1:31
“Men otemjej ej em̧m̧an ilo Zaion” (2 Nipai 28:21).	Katak im Bujen ko 68:31; 82:14
“Ej jab n̄a devil, bwe ejjeļo̧k juon” (2 Nipai 28:22).	2 Nipai 2:17; Katak im Bejen ko 76:25–27
“Kōmij jab bar aikuji naan in Anij, bwe ebwe ijo ippām” (2 Nipai 28:29).	2 Nipai 28:30; Laajrak in Tōmak 1:9

Kōkōm̧anm̧anļo̧k Ad Katakin

Jab mijak in ikōn̄. “Kajjitōk ko rem̧m̧an rebōk iien n̄an uwaaki. Rej aikuj kejōkļo̧kjeņ, kappukot, im im̧we. Iien eo kwoj joļo̧k im kōttar uwaak ko n̄an juon kajjitōk ippān emaron̄ erom̧ juon iien ekwojarjar n̄an kejōkļo̧kjeņ. Jab elļo̧k n̄an mālijjon̄ ko n̄an kōjem̧ļo̧ke iien in im uwaake kajjitōk ko am̧ make ak etal wōt im kōm̧m̧ane bar juon men” (Teaching in the Savior’s Way, 31).