“Enero 6–12. 1 Nephi 1–7: ‘Mapanak ket Aramidek,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Enero 6–12. 1 Nephi 1–7,” Umaykayo, Sumurot Kaniak—Para iti Sunday School: 2020
Ni Lehi nga Agdaldaliasat iti Asideg ti Nalabaga a Baybay, ni Gary Smith
Enero 6–12
1 Nephi 1–7
“Mapanak ket Aramidek”
Ti panagsaganam kas maysa a mannursuro iti Sunday School ket mangrugi iti bukodmo a panagadal kadagiti nasantuan a kasuratan. Ikasom ken isuratmo dagiti naespirituan a parikna a maawatmo. UUmaykayo, Sumurot Kaniak—Para kadagiti Indibidual ken Pamilia ket mabalin a mangsuplemento iti panagadalmo.
Isuratmo Dagiti Impresionmo
Yawis ti Panagbibinninglay
Adu kadagiti miembro ti klase ti nalabit a pamiliar iti 1 Nephi 1–7, ngem tunggal kanito a mabasatayo dagiti nasantuan a kasuratan, masursurotayo dagiti kinapudno a mayaplikar kadagiti agdama a kasasaadtayo. Tapno mangirugi iti panaglilinnawag, nalabit a mabalinmo a saludsoden kadagiti miembro ti klase no ania ti nasursuro wenno naipalagip kadakuada bayat ti panagadalda itoy a lawas.
Isuro ti Doktrina
Dakkel ti pateg dagiti nasantuan a kasuratan.
-
Maysa a napateg a mensahe iti Libro ni Mormon ket ti dakkel a pateg ti balikas ti Dios. Daytoy ket mabalin a nasayaat a mensahe nga ibinglay bayat ti panangrugi ti klasem iti panagadal ti Libro ni Mormon. Mairugim babaen ti panangidawatmo iti tunggal miembro ti klase a mangpili iti maysa a kapitulo manipud iti 1 Nephi 1; 3–6 ket basaen biit daytoy, a mangsapsapul kadagiti wagas a direkta wenno saan a direkta a nakabendisionan ti balikas ti Dios dagiti miembro ti pamilia ni Lehi. (Mabalin a pagimbagan dagiti miembro ti klase iti panangaramid iti daytoy nga aktibidad iti babassit a grupo.) Paibinglay kadagiti indibidual no ania ti nasarakanda. Ania ti isuro kadatayo dagitoy a pakaammuan maipapan iti pateg dagiti nasantuan a kasuratan?
-
Maysa kadagiti panggepmo a tun-oyen kas maysa a mannursuro ket mangparegta kadagiti indibidual ken pamilia nga adalenda ti ebanghelio iti ruar ti klase. Nalabit mabalinmo nga awisen dagiti miembro ti klase a mangamiris no kasano a nagadal kadagiti pinanid a gambang ni Lehi (kitaen iti 1 Nephi 5:10–19), ket kalpasanna mabalinmo a saludsoden kas iti sumaganad: Ania ti galad ni Lehi maipapan kadagiti nasantuan a kasuratan? Ania ti nasarakanna a pategna kadagitoy? Mabalin pay a sukisoken dagiti miembro ti klase ti mensahe ni Elder Richard G. Scott “The Power of Scripture” (Ensign wenno Liahona, Nob. 2011, 6–8) wenno basaenda ti maysa nga adaw manipud iti daytoy a mensahe iti “Dagiti Nainayon a Resources.” Kasano a yaplikartayo dagiti pannursuro ni Elder Scott bayat ti panagadaltayo iti Libro ni Mormon iti daytoy a tawen?
-
Kas maysa a klase, mabalinyo ti agkanta iti himno maipapan kadagiti nasantuan a kasuratan, kas iti “As I Search the Holy Scriptures” (Hymns, no. 277). Mabalinmo kalpasanna nga awisen dagiti miembro ti klase a mangibinglay iti no kasano a binendisionan ti bukod a panagadalda iti nasantuan a kasuratan ti biagda. Mabalinda pay nga iburay no kasano a pinaregta ida dagiti nasantuan a kasuratan nga “umasideg iti … Dios … ket maisalakan” (1 Nephi 6:4).
Makagun-odtayo iti bukodtayo a pammaneknek no paluknengentayo dagiti puspusotayo.
-
Maam-ammo ni Nephi gapu iti nabileg a pammatina iti Apo, ngem mabalin a makatulong kadagiti miembro ti klase a mangamiris a nasken nga agtrabaho isuna a manggun-od iti pammaneknekna—kas met laeng iti aramidentayo amin. Nalabit a mabalin nga ilasin dagiti miembro ti klase iti 1 Nephi 2:16–19 no ania ti namagbalintapno magun-od ni Nephi ti pammaneknekna. Mabalinda met nga irebyu dagiti bersikulo 11–14 tapno paliiwen no apay a saan a nakagun-od iti pammaneknek da Laman ken Lemuel. Mabalin a daytoy ti nasayaat a panawen a mangawis kadagiti miembro ti klase a mangiburay no kasano a nagun-odda dagiti pammaneknekda.
-
No dadduma mabalin a kayattayo a maaddaan iti namilagruan a padas tapno magun-od wenno mapapigsa dagiti pammaneknektayo. Ngem naipasango da Laman ken Lemuel iti maysa nga anghel, ngem kasla di unay naaringan ti pammatida. Ania ti masursuro dagiti miembro ti klase manipud iti daytoy a padas, a nailadawan iti 1 Nephi 3:28–31, maipapan iti no ania ti mangpapigsa iti bukodtayo a pammaneknek? (kitaen met iti 1 Nephi 2:16). Ibilang ti panangiburay iti adaw ni Presidente Harold B. Lee iti “Dagiti Nainayon a Resources.” Ania ti mabalin nga aramidentayo tapno mapagtalinaedtayo a napigsa dagiti pammaneknektayo?
Isagananto ti Dios ti wagas tapno aramidentayo ti pagayatanna.
-
Ti padas dagiti annak ni Lehi iti 1 Nephi 3–4 ket mabalin a kasla eksepsional ngem adu kadatayo ti addaan kadagiti padas a nangsurotantayo iti pagayatan ti Dios uray no kasla narigat. Bayat ti panangbasa dagiti miembro ti klase iti 1 Nephi 3–4 itoy a lawas, ania dagiti kinapudno a nasarakanda a nangipalagip kadakuada iti maysa a bukod a padas? Nalabit a mabalinmo a kiddawen kadagiti miembro ti klase nga ibinglayda dagiti bersikulo a mangisuro kadagitoy a kinapudno, ket awisem ida a mangiburay kadagiti padasda. Kasano a makatulong kadatayo dagitoy a kinapudno no namnamaen kadatayo ti Dios a mangaramid iti maysa a banag a kasla narigat?
-
Mabalinmo a bingayen ti klase iti tallo a grupo ket dutokam ti tunggal grupo a mangadal iti maysa kadagiti panggep a mangala kadagiti pinanid a gambang manipud ken ni Laban (kitaen iti 1 Nephi 3:9–21; 1 Nephi 3:22–31; 4:1–4; ken 1 Nephi 4:5–38). Kalpasanna mabalinmo nga awisen ti tunggal grupo a mangibinglay no ania ti panggep nga isuro kadatayo ti tunggal maysa kadagitoy a panggep maipapan iti panangipatungpal iti pagayatan ti Apo. Kasano a mayaplikar dagitoy a pagarigan kadagiti bukodtayo a panagkagumaan a mangaramid iti pagayatan ti Dios?
Napnoda iti Rag-o, ni Walter Rane
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti 1 Nephi 8–10, mabalinmo nga ibinglay daytoy a palawag manipud ken ni Presidente Dieter F. Uchtdorf: “Addaan iti nakaad-adu a puersa nga aggandat a mangyaw-awan kadatayo iti dalan, kasano a makapagtalinaedtayo a nakatalimudok iti nagloriaan a ragsak a naikari kadagiti napudno? Mamatiak a masarakan ti sungbat iti maysa a tagainep ti maysa a propeta rinibribun a tawen ti napalabas. Lehi ti nagan ti propeta, ket nairekord ti tagtagainepna iti napateg ken nakaskasdaaw a Libro ni Mormon” (“Three Sisters, Ensign wenno Liahona, Nob. 2017, 18–19).
Dagiti Mainayon a Resources
Dagiti video iti Libro ni Mormon.
Agsapul kadagiti video a mangipakita kadagiti pakaammuan manipud iti 1 Nephi 1–7 iti Book of Mormon Videos collection iti ChurchofJesusChrist.org wenno ti Gospel Library app.
Addaan dagiti nasantuan a kasuratan iti napigsa a bileg.
Impaneknek ni Elder Richard G. Scott maipapan iti kinapateg dagiti nasantuan a kasuratan:
“Maitulad dagiti nasantuan a kasuratan kadagiti pakete ti lawag a mangsilnag kadagiti panunottayo ken mangted iti lugar iti pannarabay ken pammaregta manipud iti ngato. Makapagbalinda a tulbek a manglukat iti kanal iti pannakisarita iti Amatayo iti Langit ken ti Patpatgenna nga Anak, ni Jesucristo.
“Dagiti nasantuan a kasuratan … makapagbalinda a pudno a gagayyem a mausar iti sadino man a lugar ken iti ania man nga oras. Kanayon a sidadaaanda a magun-od no kasapulan. Ti pannakaaramatda ti mangipaay iti maysa a pundasion ti kinapudno a mabalin a yawag ti Espiritu Santo. Ti panagsursuro, panagutob, panagsukisok, ken panangyulo kadagiti nasantuan a kasuratan ket maipada iti panangpunno iti maysa a pagsalansanan a kabinet kadagiti gagayyem, ik-ikkan pateg, ken kinapudno a mabalin nga awagan iti ania man nga oras, iti sadino man a lugar iti lubong. …
“Ti panagutob iti maysa a binatog ti nasantuan a kasuratan ket mabalin a maysa a tulbek a manglukat iti paltiing ken ti pannarabay ken pammaregta ti Espiritu Santo. Mabalin a mangpagkalma dagiti nasantuan a kasuratan iti pluginmaup-upay a kararua, a mangmangted iti talna, namnama, ken ti pannakaisubli ti panagtalek iti maysa iti kabaelan a mangparmek kadagiti karit ti biag. Addaanda iti napigsa a bileg a mangagas kadagiti pannubok a mainaig iti rikna no adda pammati iti Mangisalakan. Mapadarasda ti pannakaagas ti bagi” (The Power of Scripture,” Ensign wenno Liahona, Nob. 2011, 6).
Nasken a mapabaro dagiti pammaneknektayo iti inaldaw.
Insuro ni Presidente Harold B. Lee, “Dayta a kukuam ita nga aldaw a pammaneknek ket saanmonto a kukua inton bigat malaksid no adda aramidem a maysa a banag iti daytoy” (Teachings of Presidents of the Church: Harold B. Lee [2000], 43).
Panangpadur-as iti Panangisurotayo
Agusar kadagiti estoria ken pagarigan a mangisuro kadagiti pagbatayan ti ebanghelio. Adu kadagiti agnanayon a kinapudno kadagiti nasantuan a kasuratan a maisursuro babaen kadagiti padas wenno estoria a linaonda. Bayat ti panangisaganam a mangisuro, panunotem dagiti padas a napasaramon a makainayon iti maikadua a saksi kadagiti pakaammuan iti nasantuan a kasuratan ken dagiti pagbatayan nga iladawan dagitoy. (Kitaen iti Panangisuro iti Wagas ti Mangisalakan, 22.)