“Enero 6–12. 1 Nephi 1–7: ‘Mapanak ket Aramidek,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Enero 6–12. 1 Nephi 1–7,” Umaykayo, Sumurot Kaniak—Para kadagiti Indibidual ken Pamilia: 2020
Ni Lehi nga Agdaldaliasat iti Asideg ti Nalabaga a Baybay, ni Gary Smith
Enero 6–12
1 Nephi 1–7
“Mapanak ket Aramidek”
Inrekord ni Nephi “dagiti banag maipapan iti Dios” (1 Nephi 6:3). Bayat ti panagadalmo iti kasuratan ni Nephi, imdengam dagiti banag ti Dios a masarakam, nangnangruna kadagiti impresion manipud iti Espiritu.
Isuratmo dagiti Impresionmo
Irugi ti Libro ni Mormon iti pakaammuan maipapan iti pudno a kaamaan a makapadpadas kadagiti pudno a panagkarigatan. Napasamak idi 600 SC, ngem adda dagiti banag maipapan iti daytoy a pakaammuan a mabalin a kasla pamiliar kadagiti pamilia iti agdama. Nagnaed daytoy a pamilia iti maysa a lubong nga agraira iti kinadakes, ngem inkari ti Apo kadakuada a no sumurotda Kenkuana, idalanna ida iti kinatalged. Iti panagtultuloyda addaanda kadagiti naimbag a kanito ken dakes a kanito; napadasanda dagiti naindaklan a bendision ken milagro, ngem adda met dagiti panagsisinnupiat ken panagsisinnupanget. Manmano nga adda iti nasantuan a kasuratan ti atiddog a pakasaritaan ti maysa a pamilia nga a mangikarkarigatan nga agbiag iti ebanghelio: maysa nga ama nga agkagkagumaan a mangparegta iti pammati iti pamiliana, dagiti annak a lallaki a mangikedkeddeng no mamatida met laeng kenkuana, maysa nga ina a madandanagan para iti panagtalgeddagiti annakna, ken agkakabsat a lallaki nga agiinnapal ken agsisinnupanget—ket no dadduma agpipinnakawanda iti maysa ken maysa. Iti labes ti amin, adda pudno a bileg iti panangsurot kadagiti pagarigan ti pammati nga impakita—iti baetdagiti pagkurkuranganda—daytoy a pamilia.
Dagiti Kapanunotan para iti Bukod a Panagadal iti Nasantuan a Kasuratan
Dakkel ti pateg dagiti nasantuan a kasuratan.
Naglaon dagiti umuna nga innem a kapitulo ti Libro ni Mormon iti adu a reperensia kadagiti sagrado a libro, sagrado a kasuratan, ken ti balikas ti Apo. Bayat ti panangbasam iti 1 Nephi 1–6, ania ti masursurom maipapan iti no apay a ti balikas ti Dios ket “naindaklan ti kinapategna”? (1 Nephi 5:21). Ania ti isuro dagitoy a binatog kenka maipapan kadagiti nasantuan a kasuratan? Ania ti masarakam a mangparegta kenka tapno ad-adda nga agkumit nga agsukisok kadagiti nasantuan a kasuratan?
Kitaen met iti “Scriptures Legacy” (video, ChurchofJesusChrist.org.)
Paneknekan ti Libro ni Mormon maipapan ken ni Jesucristo.
Napudno iti panggep a nailanad iti paulo a panidna—mangguyugoy iti amin a ni Jesus isu ti Cristo—nangrugi ti Libro ni Mormon iti naisangsangayan a parmata ni Lehi maipapan iti Mangisalakan. Ania ti masursurom maipanggep ken Jesucristo manipud iti no ania ti nakita ni Lehi? Ania dagiti sumagmamano a “dagiti naindaklan ken nakaskasdaaw” nga aramid ti Mangisalakan iti biagmo? (1 Nephi 1:14).
No sapulek ket agtalekak iti Apo, mapaluknengna ti pusok.
Nupay dimmakkel amin da Laman, Lemuel, ken Nephi iti maymaysa a pamilia ken addaanda kadagiti agpapada a kapadasan, adda latta panagsusupadi ti wagas a panagrespondeda iti nadiosan a panangiturong nga inawat ti amada iti daytoy a kapitulo. Bayat ti panangbasam iti 1 Nephi 2, kitaem no apay a nalukneng ti panagpuspuso ni Nephi idinto a saan kadagiti kakabsatna. Mabalinmo pay a panunoten maipapan kadagiti bukodmo a panagresponde iti pangiturong manipud iti Apo, daytoy man ket babaen ti Espiritu Santo wenno ti Propetana. Kaano a nariknam a pinalukneng ti Apo ti panagpuspusom tapno ad-adda a natallugodka a mangawat iti pangiturong ken pammagbagana?
Isagananto ti Dios ti maysa a wagas para kaniak a mangaramid iti pagayatanna.
Idi binilin ti Apo ni Lehi ken ti kaamaanna a mangala kadagiti gambang a pinanid manipud ken ni Laban, saan a nangted kadagiti masinunuo a pangiturong no kasano a maipatungpalna daytoy a bilin. Masansan a pudno daytoy kadagiti dadduma a bilin wenno bukod a paaltiing ngaawatentayo manipud iti Dios, ket mabalin nga iturongnatayo daytoy a mangrikna a kasla indawatna ti “narigat a banag” (1 Nephi 3:5). Ania ti mangparegta kenka maipapan iti sungbat ni Nephi iti bilin ti Apo a masarakan iti 1 Nephi 3:7, 15–16? Adda kadi ania man a banag a mariknam a matignayka a “mapan ket aramiden”?
Bayat ti panagadalmo iti 1 Nephi 1–7, sapulemm dagiti wagas nga insagana ti Dios ti wagas para ken Lehi ken ti kaamaanna. Kasano nga inaramidna daytoy para kenka?
Kitaen met iti Dagiti Proverbio 3:5–6; 1 Nephi 17:3; “Obedience,” Gospel Topics, topics.ChurchofJesusChrist.org; Book of Mormon Videos collection iti ChurchofJesusChrist.org wenno ti Gospel Library app.
Ti pananglaglagip kadagiti aramid ti Dios ket makaipaay kaniak iti pammati nga agtungpal kadagiti bilinna.
Idi narikna a makadaydayamudom da Laman ken Lemuel, gagangay nga adda da Nephi ken Lehi iti asidegda a nangparegta ken nangbalakad kadakuada. No mariknam akasla makadaydayamudomka, ti panangbasa kadagiti balikas da Nephi ken Lehi ket makaited iti napateg a balakad ken pannirigan. Kasano a pinadas da Nephi ken Lehi a mangtulong kadagiti miembro ti pamiliada tapno maaddaan iti napigsa a pammati iti Dios? (kitaen iti 1 Nephi 4:1–3; 5:1–8; 7:6–21). Ania ti masursurom manipud kadagiti pagwadanda a makatulong kenka iti sumaruno a gundaway a masulisogka nga agtanabutob wenno agrebelde?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
1 Nephi 1–7
Iti unos ti 1 Nephi 1–7, mabalinmo a paregtaen dagiti miembro ti pamilia a mangsapul kadagiti panaglalangen dagiti miembro ti kaamaan da Lehi ken Saria. Ania ti masursurotayo manipud kadagitoy a pannakipulapol a makatulong iti pamiliatayo?
Impateg ni Nephi ken ti kaamaanna dagiti balikas dagiti propeta.
1 Nephi 2:20
Masansan a naulit ti pagbatayan iti 1 Nephi 2:20 iti unos ti Libro ni Mormon. Kasano a mayaplikar daytoy dagiti miembro ti pamiliam iti biagda bayat ti aggigiddan a panagbasayo iti Libro ni Mormon itoy a tawen? Nalabit a makapagtitinnulongkayo nga agaramid iti postera pangisuratan iti kari ti Apo iti daytoy a bersikulo ket i-display daytoy iti pagtaenganyo. Daytoy ti makapagserbi a kas maysa a palagip tapno masansan a pagsasaritaan no kasano a nakitam ti Apo a nangparang-ay iti pamiliam idi nagtungpalka kadagiti bilinna. Ibilangmo ti panangisurat kadagitoy a padas iti poster.
1 Nephi 2:11–13; 3:5–7
Nalabit a mangted pagimbagan iti pamiliam manipud iti panangkitam iti paggiddiatan ti sungbat da Laman ken Lemuel kadagiti bilin ti Apo ken iti sungbat ni Nephi. Ania ti masursurotayo manipud iti 1 Nephi 2:11–13; 3:5–7 maipapan iti panagdayamudom? Ania dagiti bendision a sumangbay no aramatentayo ti pammati?
1 Nephi 3:19–20; 5:10–22; 6
Dagitoy a bersikulo ti mangparegta iti pamiliam a mangpatalinaed iti kasuratan dagiti napapateg a pasamak ken padas iti biagyo. Mabalinmo ti mangirugi iti maysa a journal ti pamilia, a kapada dagiti kasuratan nga indulin da Nephi ken Lehi maipapan kadagiti padas ti pamiliada. Ania ti mabalinmo nga inayon iti kasuratan ti pamiliam?
1 Nephi 7:19–21
Ania ti makaawis iti riknam maipapan iti pagwadan ni Nephi kadagitoy a bersikulo? Kasano a mabendisionan ti pamiliatayo no “napudno a mamakawan[tayo]” iti tunggalmaysa?
Para iti ad-adu pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para itiPrimary.
Panangpadur-as iti Panangisurotayo
Agadal kadagiti nasantuan a kasuratan iti inaldaw. Ti maysa a kangrunaan iti napateg a panagisuro iti pagtaengan ket mangparnuay kadagiti gundaway iti agtultuloy a panagsursuroi iti inaldaw para iti pamilia. Insuro niPresidente Thomas S. Monson, “Saan unay nga epektibo dagiti crash course ngem iti inaldaw a panagbasa ken panangyaplikar kadagiti nasantuan a kasuratan iti biagtayo” (“Be Your Best Self,” Ensign wenno Liahona, Mayo 2009, 68).
Tinungpalko ti Timek ti Espiritu, ni Walter Rane