jun sumal sa’ xsutam li santil ochoch

7–13 noviembre

Oseas 1–6; 10–14; Joel

“Q’axal tinra chi anchal inch’ool”

Naq yooqat chixtzolb’aleb’ li loq’laj hu ut chixkawresinkil aawib’ re k’utuk, sik’ lix musiq’ahom li Santil Musiq’ej. K’a’ru nakaweek’a naq taajayali wi’ aawib’ sa’ li tzolok a’in?

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut jun xjalam-uuch li Kolonel ut patz’ reheb’ li kok’al naq te’xwotz k’a’ru neke’xnaw malaj xe’xtzol chirix a’an chiru li xamaan. Ye reheb’ naq sa’ junjunqal te’ruuq chixchapb’al li jalam-uuch naq yooqeb’ chixwotzb’al xna’leb’eb’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Oseas 10:12

Naru ninsik’ li Qaawa’.

Sa’ Oseas 10:12 neke’oksiman li na’leb’ re awk, q’olok, li hoonal, ut li hab’ re qab’oqb’al chixsik’b’al li Qaawa’. Naq nakawil ru li raqal a’an, k’a’ru li na’leb’ nachal sa’ laa k’a’uxl li naru naxmusiq’aheb’ li kok’al chixsik’b’al li Qaawa’?

Kok’ k’anjel naru chi b’aanumank

• Yaab’asi Oseas 10:12 reheb’ li kok’al ut patz’ reheb’ naq te’reek’asi wib’ re xtenq’ankileb’ chixtawb’al ru li raqal, maare te’xpak’ rawb’al junaq iyaj, te’xq’ol li ki’il q’een, malaj te’xk’oxla naq xaqxookeb’ rub’el li hab’. Malaj ut, k’uteb’ xjalam-uuch li iyaj, li pim, ut li hab’. Tenq’aheb’ li kok’al chixjuntaq’eetankil rawb’al jun iyaj ut xq’olb’al chaab’il tzakemq rik’in wank sa’ tiikilal ut xk’ulb’aleb’ li rosob’tesihom li Qaawa’. Ch’olob’ xyaalal naq aak’ulum rosob’tesihom li Qaawa’ naq nakayal aaq’e chixsik’b’al a’an.

• Yiib’ jun reloj chiru li pizarron ut patz’ reheb’ li kok’al naq te’xwotz chan ru naru naqasik’ li Qaawa’ a’ yaal jarub’ hoor re li kutan. Patz’ reheb’ naq te’xk’iilasuti li ch’ol aatin “Ak xq’ehil anajwan xsik’b’al li Qaawa’ ” (Oseas 10:12). Tenq’aheb’ chixtawb’al ru naq junelik wan qahoonal re xsik’b’al li Qaawa’. Wotz k’a’ru nakab’aanu laa’at re xjultikankil junelik.

li Jesus chunchu rik’ineb’ li kok’al

Li Jesukristo a’an laj Kolol qe ut laj Tojol qix.

Oseas 13:4, 14

Li Jesukristo a’an lin Kolonel.

Naq nakatk’utuk chirix li Kolonel ut lix tojb’al rix li maak xb’aan, ch’olob’ xyaalal lix rahom choq’ reheb’ chixjunileb’ li kok’al.

Kok’ k’anjel naru chi b’aanumank

• K’uteb’ xjalam-uuch naab’al li kristiaan, sa’ xyanqeb’ a’an jun li re li Jesus, ut patz’ reheb’ li kok’al naq te’xsik’ b’ar wan reheb’ li kristiaan a’an laj Kolol qe. Yaab’asi Oseas 13:4, ut jultika naq maa’ani chik junaq aj Kolonel, ka’ajwi’ li Jesukristo. Ch’olob’ xyaalal naq sa’ xk’ab’a’ lix tojb’al rix li maak xb’aan li Jesukristo naru nokoq’aj chi wank rik’in li qaChoxahil Yuwa’.

• Patz’ reheb’ li kok’al naq chi junjunqal te’xchap jun xjalam-uuch li Jesus chiru li krus malaj sa’ li muqleb’aal, jo’ ajwi’ jun xjalam-uuch li Jesus chirix li muqleb’aal chi yamyo. Patz’ reheb’ naq te’aatinaq chirix li nak’utun sa’eb’ li jalam-uuch. Sa’ Oseas 13:14 il li ch’ol aatin “Ma tinkol ta b’i’ chiru li muqleb’aal kamenaq?; Ma twisi ta b’i’ sa’ ruq’ li kamk?” Ch’olob’ xyaalal naq li Jesukristo kixkol qix chiru li kamk ut naq naru nokowakli chi yo’yo. B’ichahomaq jun li b’ich na’aatinak chirix li wakliik chi yo’yo, maare “Ma yaal naq li Jesus xwakli?” (B’ichleb’aal choq’ reheb’ li Kok’al, 45). Tenq’aheb’ li kok’al chixk’eeb’al reetal li Musiq’ej naq yooqeb’ chi b’ichank.

Joel 2:28

Li Santil Musiq’ej naru nikinixb’eresi.

Naq tat-aatinaq chirix lix profeetil aatin laj Joel li natawman sa’ Joel 2:28, k’oxla chan ru taatenq’aheb’ li kok’al chixkawresinkileb’ rib’ chixk’ulb’al li maatan re li Santil Musiq’ej chirix naq te’kub’eeq xha’.

Kok’ k’anjel naru chi b’aanumank

• Yaab’asi Joel 2:28 reheb’ li kok’al ut ch’olob’ naq eb’ li aatin “sa’ xb’eeneb’ chixjunil” naraj naxye chixjunil, eb’ ajwi’ li “alalb’ej” ut “rab’inb’ej” jo’eb’ a’an. Patz’ reheb’ li kok’al naq te’xyiib’ xjalam-uucheb’ li kristiaan neke’aatinak wi’ li raqal a’an (alalb’ej, rab’inb’ej, cheek, ut saaj) ut eb’ ajwi’ a’an. Ch’olob’ naq li qaChoxahil Yuwa’ naxhoy chaq lix Musiq’ sa’ qab’een naq naxk’e qe li maatan re li Santil Musiq’ej chirix naq nakub’e qaha’.

• Patz’ reheb’ li kok’al naq te’xwotz k’a’ru neke’xnaw chirix li Santil Musiq’ej. Tenq’aheb’ chixtawb’al ru naq li Santil Musiq’ej naru nokoxtzol chirix li qaChoxahil Yuwa’ ut li Jesukristo ut naru nokoxtenq’a chixnawb’al k’a’ru li tz’aqal yaal (chi’ilmanq Jwan 14:26; Tzol’leb’ ut Sumwank 42:17). Wotzeb’ numsihom li tixtenq’aheb’ li kok’al chixtawb’al ru chan ru naq li Musiq’ej naru nokoxtenq’a.

reetalil li k’utuk

Xk’utb’al li tzol’leb’: Kok’al ak ninqeb’

Oseas 2:19–20

Naru nawoxloq’iheb’ lin sumwank chi tiik.

Sa’ lix hu laj Oseas, li Qaawa’ kixjuntaq’eeta lix sumwank rik’ineb’ laj Israelita rik’in jun sumlaak. Us ta ink’a’ tiikeb’ chi paab’ank laj Israelita, toj kixraheb’ ut kiraj naq te’sutq’iiq. Li juntaq’eetank a’an naru natenq’an chixk’utb’al chiruheb’ li kok’al naq aajel ru roxloq’inkileb’ li qasumwank rik’in li Qaawa’.

Kok’ k’anjel naru chi b’aanumank

• Ye reheb’ li kok’al naq sa’ xhu laj Oseas, li Qaawa’ kixjuntaq’eeta lix sumwank rik’ineb’ laj Israelita rik’in jun sumlaak. K’ut chiruheb’ li kok’al xjalam-uuch jun b’eelomej ut jun ixaqilb’ej. Chan ru naraj li qaChoxahil Yuwa’ naq te’wanq li b’eelomej ut li ixaqilb’ej? Chan ru taqak’ut chiru li Qaawa’ naq naqara ut naq tiikaqo chi paab’ank chiru?

• Tenq’aheb’ li kok’al chixtawb’al ru naq li sumwank noko’ok wi’ rik’in li Qaawa’ a’an re naq te’kanaaq chi junelik. Patz’ re jun reheb’ li kok’al naq taaril Oseas 2:19–20 ut naq tixsik’ aatin li naxch’olob’ k’a’ru nareek’a li Qaawa’ chirix lix sumwank qik’in laa’o. K’a’ru naqayeechi’i xb’aanunkil, rub’el sumwank, naq nakub’e qaha’? Chan ru taqoxloq’i li sumwank okenaqo wi’ rik’in li Qaawa’?

Oseas 13:4, 14

Li Jesukristo a’an laj Kolol we ut laj Tojol wix.

Chan ru taawoksi li raatin laj Oseas re xkawob’resinkil xnawom xch’ooleb’ li kok’al chirix laj Kolol qe ut laj Tojol qix? Naq tatk’utuq, tenq’aheb’ li kok’al chireek’ankil lix sahilal ut lix rahom lix tojb’al rix li maak xb’aan li Jesukristo.

Kok’ k’anjel naru chi b’aanumank

• Patz’ reheb’ li kok’al naq te’ril Oseas 13:4, 14 ut te’xsik’ aatin malaj ch’ol aatin li neke’aatinak chirix li Jesukristo. K’a’ru neke’xk’ut li aatin a’an chirix li Qaawa’? Patz’ reheb’ li kok’al naq te’roksi li K’utul Raqal reheb’ li Loq’laj Hu re te’xsik’ ut te’xwotz jalan chik raqal li neke’aatinak chirix li Jesukristo jo’ aj Kolonel ut aj Tojol ix. Wotz xnawom aach’ool chirix li Kolonel ut k’e xhoonaleb’ li kok’al re te’xwotz ajwi’ li reheb’.

Joel 2:28–29

Li Santil Musiq’ej naru nikinixb’eresi.

Naab’aleb’ re li kok’al maare maji’ neke’kub’e xha’ ut maji’ neke’xk’ul li maatan re li Santil Musiq’ej. Chan ru taawoksiheb’ li raqal a’in re xtenq’ankileb’ chixtawb’al ru li wankilal ut li osob’tesiik neke’k’ulman xb’aan rab’inkil xyaab’ xkux li Musiq’ej?

Kok’ k’anjel naru chi b’aanumank

• Patz’ reheb’ li kok’al naq te’ril Joel 2:28–29, ut te’xk’e xk’ab’a’eb’ sa’ xna’ajeb’ li aatin “lee ralal” ut “lee rab’in.” Tz’iib’a chiru li pizarron jun ch’ol aatin jo’ Li Santil Musiq’ej naru… ut patz’ reheb’ li kok’al naq te’xtz’aqob’resi ru. Waklesi xch’ooleb’ chiroksinkil li na’leb’ neke’xtzol sa’ Jwan 14:16; Moroni 10:5; Tzol’leb’ ut Sumwank 42:17 ut xkomoneb’ chik li raqal sa’eb’ li loq’laj hu.

• K’e jun k’a’aq re ru sa’ jun li sek’ cham xsa’ ut patz’ reheb’ li kok’al naq chi junjunqal te’xnujob’resi chi ha’. Ch’olob’ naq li k’a’aq re ru nokoreetali laa’o ut naq li ha’ nareetali li Santil Musiq’ej. Naq nakub’e qaha’, naqak’ul li maatan re li Santil Musiq’ej, chi jo’kan naq li Qaawa’ naxtz’aqob’resi ru li naxyeechi’i naq “tixhoy chaq lix Musiq’.” K’a’ru tento taqab’aanu re xk’ulb’al li Santil Musiq’ej? Patz’ reheb’ li kok’al naq te’xwotz hoonal b’ar wi’ xe’reek’a lix wankil li Musiq’ej.

reetalil li tzolok

Xb’oqb’aleb’ chi tzolok sa’ kab’l

Tenq’aheb’ li kok’al chixwotzb’al junaq na’leb’ xe’xtzol chirix li qaChoxahil Yuwa’, li Jesukristo, malaj li Santil Musiq’ej sa’ li tzoleb’aal anajwan. Waklesi xch’ooleb’ chixwotzb’al rik’ineb’ lix junkab’al.

Xkawresinkil qib’ jo’ aj k’utunel

Sik’ li k’utb’esinb’il na’leb’ wulaj wulaj. Naq yooqat chixkawresinkil aawib’ re k’utuk, tijon ut tz’il rixeb’ li loq’laj hu chiru li xamaan. A’ yaal jo’q’e ut a’ yaal b’ar naru nakataw aana’leb’ ut aamusiq’ankil re taanaw chan ru tatk’utuq. (Chi’ilmanq Li k’utuk jo’ li Kolonel, 12.)

perel re kok’ k’anjel: Li Santil Musiq’ej naru nikinixb’eresi