“Mayo 30–Hunyo 5. Mga Maghuhukom 2–4; 6–8; 13–16: “Ang Ginoo Nagpatindog og usa ka Manluluwas”,’” Dali, Sunod Kanako—Alang sa Primary: Daang Tugon 2022 (2021)
“Mayo 30–Hunyo 5. Mga Maghuhukom 2–4; 6–8; 13–16,” Dali, Sunod Kanako—Alang sa Primary: 2022
Paghulagway ni Debora nga nangulo sa mga kasundalohan sa Israel, © Lifeway Collection/pagtugot gikan sa goodsalt.com
Mayo 30–Hunyo 5
Mga Maghuhukom 2–4; 6–8; 13–16
“Ang Ginoo Nagpatindog og usa ka Manluluwas”
Adunay daghang makadasig nga mga istorya nga makaplagan diha sa Mga Maghuhukom 2–4; 6–8; 13–16. Pamalandonga sa unsa nga paagi ikaw makagamit niini nga mga istorya sa pagtabang sa mga kabataan nga mas magpaduol ngadto sa Manluluwas ug magtinguha sa pagsunod Kaniya.
I-rekord ang Imong mga Panghunahuna
Dapita ang Pagpaambit
Dapita ang matag kabataan sa pagpakigbahin og istorya gikan sa mga kasulatan nga bag-ohay nilang nakat-unan. Dayon hangyoa sila sa pagpakigbahin unsay ilang nakat-unan gikan niini nga mga istorya.
Itudlo ang Doktrina: Mas Gagmay nga mga Bata
Si Jesukristo mao ang akong Manluluwas.
Sa dihang nag-ampo ang mga Israelite ngadto sa Ginoo, mipatindog Siya og usa ka manluluwas alang kanila. Tabangi ang mga kabataan sa pagkakita nga si Jesukristo mao ang Manluluwas kinsa gipatindog sa Dios alang kanato.
Posible nga mga Kalihokan
-
Ipasabut ngadto sa mga kabataan nga sa dihang ang mga Israelite mihunong sa pagsunod sa mga sugo sa Dios, nawad-an sila sa Iyang pagpanalipod ug nabuntog sa ilang mga kaaway. Basaha gikan sa Mga Maghuhukom 3:9 ang hugpong sa mga pulong “ang mga anak sa Israel mingtuaw ngadto sa Ginoo.” Unsay gibuhat sa mga Israelite sa dihang sila nagkinahanglan og tabang? Pakigbahin og kasinatian sa dihang ikaw nag-ampo alang sa panabang ug ang Dios mitubag sa imong pag-ampo.
-
Basaha gikan sa Mga Maghuhukom 3:9 ang hugpong sa mga pulong “ang Ginoo mipatindog og usa ka manluluwas,” ug dapita ang mga kabataan sa pagsulti og balik niini uban kanimo sa pipila ka higayon. Ipasabut nga ang usa ka manluluwas mao ang usa ka tawo kinsa magluwas kanato. Ipakita sa mga kabataan ang daghang mga hulagway sa mga tawo, lakip ang usa ka hulagway ni Jesukristo, ug ibutang ang mga hulagway nga gikulob diha sa salog. Papuli-puliha ang mga kabataan sa pagbali sa mga hulagway, pagpangita sa hulagway ni Jesus, ug sa pagpataas niini. Ipamatuod nga si Jesukristo mao ang Manluluwas kinsa ang Dios mipatindog sa pagluwas kanato gikan sa sala ug kamatayon.
Misalig si Gideon diha sa Ginoo. © Lifeway Collection/pagtugot gikan sa goodsalt.com
Ang Ginoo makagamit og gagmay nga mga butang sa pagpahinabo sa dako nga buluhaton.
Gihunahuna ni Gideon ang iyang kaugalingon nga kabus ug dili importante, apan ang Dios nagtan-aw kaniya isip usa ka “makusganong tawo sa kaisug” (Mga Maghuhukom 6:12). Tabangi ang mga kabataan sa pagtan-aw nga bisan kon sila mibati nga gamay, ang Dios makabuhat pinaagi kanila sa pagbuhat og importanting mga butang (tan-awa sa Alma 37:6–7).
Posible nga mga Kalihokan
-
Sultihi ang mga kabataan nga ang Ginoo nagkinahanglan og usa ka tawo nga motabang Kaniya sa pagluwas sa Israel gikan sa ilang mga kaaway, ang mga Madianhon, ug gipili Niya si Gideon. Basaha ang Mga Maghuhukom 6:15 ngadto sa mga kabataan, ug pangutan-a sila nganong si Gideon wala mobati nga siya makabuhat sa unsay gusto sa Ginoo. Basaha ang bersikulo 16, ug pangutan-a sila kinsa ang giingon sa Ginoo ang motabang ni Gideon. Sultihi ang mga kabataan mahitungod sa usa ka panahon sa dihang ang Ginoo misugo kanimo sa pagbuhat og usa ka butang nga malisud sa pagserbisyo Kaniya ug gibati nimo nga Siya uban kanimo.
-
Pagpakita og mga hulagway sa mga kabataan o mga kabatan-onan nga nagbuhat og dagkong mga butang sa pagserbisyo sa Dios (tan-awa sa Libro sa mga Hulagway sa Ebanghelyo, nus. 19, 23, 90, 102), o pagsulti mahitungod sa mga ehemplo nga imong nakita. Tabangi ang mga kabataan sa paghunahuna og mga paagi nga sila makaapil sa buluhaton sa Dios, ug dapita sila sa pagdrowing og mga hulagway sa ilang mga kaugalingon nga nagbuhat niining mga butanga.
-
Gamita ang pahina sa kalihokan niini nga semana sa pagtudlo sa mga kabataan mahitungod sa giunsa sa Ginoo paghimo sa kasundalohan sa Israel nga mas gamay aron ang mga Israelite mahibalo nga ang Iyang gahum miluwas kanila gikan sa ilang mga kaaway. Pakigbahin og mga ehemplo sa gagmay nga mga butang nga naghimong usa ka dako nga buluhaton, sama sa mga putyukan nga nagpundok og matam-is nga mga duga nga himoon og dugos. Pagpamatuod nga ang Dios makatabang kanato sa pagbuhat og dako nga buluhaton, bisan og gibati nato ang pagkagamay.
Itudlo ang Doktrina: Mas Dagko nga mga Bata
Si Jesukristo mao ang akong Manluluwas.
Ang Mga Maghuhukom 3 naghulagway og liyok sa panahon nga imong magamit sa pagtudlo sa mga kabataan nga ang Dios nagluwas kanato gikan sa sala pinaagi sa Manluluwas nga si Jesukristo.
Posible nga mga Kalihokan
-
Isulat ang mosunod diha sa pisara: “nanaghimo og dautan,” “mingtuaw ngadto sa Ginoo,” ug “nagpatindog og usa ka manluluwas.” Dapita ang pipila ka mga kabataan sa pagpangita niini nga mga hugpong sa mga pulong diha sa Mga Maghuhukom 3:7–9, ug dapita ang uban sa pagpangita niini diha sa Mga Maghuhukom 3:12–15. Ipasabut ngadto sa mga kabataan nga gibalik-balik diha sa basahon sa Mga Maghuhukom ang mga Israelite “nanaghimo og dautan.” Dayon, sa dihang ang ilang mga kaaway miatake, sila “mituaw ngadto sa Ginoo,” ug ang Ginoo “nagpatindog og usa ka manluluwas” sa pagtabang kanila. Unsay atong nakat-unan mahitungod sa Ginoo gikan niining liyok sa panahon?
-
Pagdungan og kanta sa usa ka awit nga motabang sa mga kabataan sa pagsabut nga si Jesukristo mao ang ilang Manunubos ug Manluluwas, sama sa “Mipadala sa Bugtong Anak” (Songbook sa mga Bata, 20–21). Dapita ang mga kabataan sa pagpakigbahin sa ilang mga pagbati mahitungod sa unsay nabuhat sa Manluluwas sa pagluwas kanato gikan sa sala, mga pagsulay, kasubo, ug kamatayon.
Ako makahimo sa pagmatinud-anon ngadto sa Ginoo bisan og ang uban dili makahimo.
Bisan og daghan sa mga Israelite wala mosunod sa Ginoo, ang pipila mipabilin nga matinud-anon ngadto Kaniya ug nakahimo sa pagtabang og daghan pang uban nga mobalik ngadto sa pagkamatarung. Unsaon nimo sa pag-awhag ang mga kabataan sa pagpabilin nga matinuoron ngadto sa Ginoo nga dili magsapayan kon unsay gibuhat sa uban?
Posible nga mga Kalihokan
-
Sultihi ang mga kabataan nga atol sa usa ka panahon sa dihang ang mga Israelite nahimong dautan, usa ka matarung nga babaye nga ginganlan og Debora ug ang kumander sa kasundalohan sa mga Israelite, si Barak, miluwas sa Israel gikan sa ilang mga kaaway (tan-awa sa Mga Maghuhukom 4:1–15). Pagbasa og dungan sa Mga Maghuhukom 4:14, ug hangyoa ang mga kabataan sa pagpangita og usa ka butang nga gisulti ni Debora nga mipakita nga ang iyang hugot nga pagtuo diha sa Ginoo lig-on. Dayon hangyoa sila sa pagbasa sa Doktrina ug mga Pakigsaad 84:88 aron mangita og usa ka baruganan nga anaa usab sa Mga Maghuhukom 4:14. Awhaga sila sa pagpakigbahin unsa ang kahulugan sa saad sa Ginoo “Ako molakaw diha sa inyong atubangan” ngadto kanila.
-
Pagkanta og usa ka awit mahitungod sa pagsunod sa mga sugo, sama sa “Pilia ang Matarung” (Mga Himno, nu. 146) o “Pilia ang Matarung nga Paagi” (Songbook sa mga Bata, 82). Sa unsa nga paagi kita makabarug sa pagkamatarung ug mosunod sa mga sugo bisan og ang uban nga naglibut kanato dili?
Ang mga pamaagi sa Dios lahi gikan sa mga pamaagi sa kalibutan.
Ang Ginoo misugo ni Gideon sa pagbuhat og mga butang nga tingali wala niya masabti niana nga panahon. Unsay nakapadasig kanimo mahitungod sa iyang mga istorya? Giunsa nimo sa pagbati nga kini makapanalangin sa mga kabataan nga imong gitudloan?
Posible nga mga Kalihokan
-
Hangyoa ang mga kabataan sa paghanduraw nga sila nagkinahanglan nga mopundok og dungan sa kasundalohan aron moadto sa gubat. Pila ka mga tawo ang ilang gusto diha sa ilang kasundalohan? Gamit ang Mga Maghuhukom 7:4–7, dapita ang mga kabataan sa pag-aksyon kon giunsa sa Ginoo pagtabang si Gideon sa pagpili sa kasundalohan nga moluwas sa Israel gikan sa mga Madianhon. Nganong gusto sa Ginoo nga ang kasundalohan ni Gideon mahimo nga gamay kaayo? (tan-awa sa Mga Maghuhukom 7:2). Ngano kaha nga ang pagsunod sa sugo sa Ginoo nahimong malisud alang ni Gideon ug sa iyang kasundalohan? Dapita ang mga kabataan sa pagpakigbahin og mga kasinatian sa dihang sila nakakat-on sa pagsalig sa Ginoo bisan og ang pagbuhat sa mao malisud.
-
Dapita ang mga kabataan sa pagdrowing og mga hulagway sa usa ka espada, taming, trumpeta, lampara, ug tibod. Pangutan-a ang mga kabataan hain niini nga mga butang ang ilang dad-on ngadto sa gubat. Dapita sila sa pagbasa sa Mga Maghuhukom 7:16 aron mahibaloan kon unsa ang gidala sa kasundalohan ni Gideon uban kanila. Nganong nanginahanglan og kaisug sa pagbuhat niini? Pagbasa og dungan sa Mga Maghuhukom 7:19–21 aron mahibalo kon giunsa sa kasundalohan paggamit ang mga trumpeta ug mga tibod sa pagbuntog sa Madianhon. Unsay atong nakat-unan mahitungod sa Ginoo gikan niini nga istorya?
Awhaga ang Pagkat-on diha sa Panimalay
Dapita ang mga kabataan sa pagpakigbahin ngadto sa usa ka sakop sa pamilya og usa ka butang nga ilang nakat-unan karon nga naghimo kanilang buot mosunod sa mga sugo.
Pagpalambo sa Atong Pagtudlo
Ipahiangay ang mga kalihokan aron matubag ang mga panginahanglan. Ayaw hunahunaa kini nga mga outline isip mga panudlo nga kinahanglan gayud nimong sundon. Hinoon, gamita kini isip tinubdan sa mga ideya aron sa pagdasig sa imong kaugalingong inspirasyon samtang mamalandong ka sa mga panginahanglan sa mga kabataan nga imong gitudloan. Sama pananglit, sa ubang mga sitwasyon, tingali madasig ka sa pagpahiangay sa usa ka kalihokan alang sa mas gagmay nga mga kabataan aron sa pagtudlo sa mas dagkong mga kabataan, o magbinayloay.