“Mayo 23–29. Josue 1–8; 23–24: ‘Magmakusganon Ka ug Magmaisug,’” Dali, Sunod Kanako—Alang sa Primary: Daang Tugon 2022 (2021)
“Mayo 23–29. Josue 1–8; 23–24,” Dali, Sunod Kanako—Alang sa Primary: 2022
Paghulagway ni Moises nag-orden ni Josue, ni Darrell Thomas
Mayo 23–29
Josue 1–8; 23–24
“Magmakusganon Ka ug Magmaisug”
Samtang nagbasa ka sa Josue 1–8 ug 23–24, i-rekord ang espirituhanong mga panghunahuna nga imong nadawat. Unsa ang imong buhaton sa pagdiskubre kon unsa ang gikinahanglan sa mga kabataan nga imong gitudloan aron makakat-on gikan niini nga mga kapitulo?
I-rekord ang Imong mga Panghunahuna
Dapita ang Pagpaambit
Pagdrowing og usa ka hulagway diha sa pisara sa usa ka butang nga gikan sa usa sa mga istorya diha sa Josue 1–8; 23–24, ug tan-awa kon ang mga kabataan makatagna ba diin nga istorya kini gikan. Sama pananglit, makadrowing ka og usa ka sapa o paril sa siyudad.
Itudlo ang Doktrina: Mas Gagmay nga mga Bata
Ako makahunahuna mahitungod sa mga kasulatan adlaw ug gabii.
Ang Ginoo misulti ni Josue nga kon siya mamalandong sa mga kasulatan ug mosunod sa tambag niini, siya makabaton og kalampusan sa paggiya sa mga Israelite ngadto sa gisaad nga yuta. Unsa ang imong mabuhat sa pagtudlo sa mga kabataan sa mahinungdanong mga panalangin nga miabut tungod sa mga kasulatan?
Posible nga mga Kalihokan
-
Hatagi ang matag bata og usa ka hulagway sa adlaw ug sa bulan. Basahi sila gikan sa Josue 1:8: “Magpalandong [diha sa mga kasulatan] sa adlaw ug sa gabii.” Ipasabut nga ang magpalandong nagpasabut sa paghunahuna og maayo mahitungod sa usa ka butang. Balika pagsulti ang hugpong sa mga pulong sa makadaghan, ug dapita ang mga kabataan sa pagpataas sa adlaw kon ikaw moingon og “adlaw” ug ang bulan kon ikaw moingon og “gabii.” Ipabalik og sulti sa mga kabataan ang hugpong sa mga pulong uban kanimo.
-
Hangyoa ang mga kabataan sa paghingalan og mga butang nga ilang buhaton sa adlaw ug mga butang nga ilang buhaton sa gabii. Sultihi sila nga si Josue gisugo sa paghunahuna mahitungod sa mga kasulatan sa adlaw ug sa gabii. Tabangi sila sa paghunahuna sa mga istorya o mga pagtulun-an gikan sa mga kasulatan nga ilang mahunahuna mahitungod sa adlaw ug sa gabii. Dapita sila sa pagdrowing og usa ka hulagway sa ilang mga kaugalingon o sa ilang pamilya nga nagtuon sa mga kasulatan. Nganong gusto sila nga magtuon sa mga kasulatan? Sa unsa nga paagi sila mapanalanginan kon buhaton nila kini?
Ako kinahanglan gayud nga bunyagan aron makasulod sa gingharian sa langit.
Ang istorya ni Josue nga naggiya sa mga Israelite pinaagi sa Suba sa Jordan ngadto sa gisaad nga yuta naghatag og oportunidad sa pagtudlo sa mga kabataan nga kita kinahanglan gayud nga magpabunyag aron makasulod sa gingharian sa langit.
Posible nga mga Kalihokan
-
Ribyuha ang pipila ka mga detalye sa istorya sa mga anak sa Israel nga nagtabok sa Suba sa Jordan aron sa pagsulod sa gisaad nga yuta (tan-awa ang “Josue” diha sa Mga Istorya sa Daang Tugon). Dayon ipakita ang usa ka hulagway ni Jesus nga gibunyagan, ug sultihi ang mga kabataan nga si Jesus gibunyagan diha sa sama nga suba. Dapita ang mga kabataan sa pagpakigbahin og ubang mga butang nga ilang nahibaloan mahitungod sa bunyag ni Jesus.
-
Pagkanta og usa ka awit mahitungod sa bunyag sa mga kabataan, sama sa “Bunyag” (Songbook sa mga Bata, 54). Tabangi sila sa pag-ila unsay gitudlo niini nga awit kanato mahitungod kon ngano si Jesus gibunyagan ug nganong kita kinahanglan nga mosunod sa Iyang ehemplo. Himoa nga ang mga kabataan mopakigbahin sa ilang mga pagbati mahitungod sa pagpabunyag. Pagsulti mahitungod sa unsay mabuhat sa mga kabataan karon aron sa pag-andam nga mabunyagan kon sila otso anyos na ang panuigon.
Imahebatang babaye nagbarug sa tubigan sa bunyagKita kinahanglan gayud nga magpabunyag aron makasulod sa gingharian sa langit.
Ako makapili sa pagserbisyo ni Jesukristo.
Ang kang Josue nga katapusang mensahe ngadto sa iyang mga katawhan mao nga sila adunay kapilian sa pagpadayon sa pagserbisyo sa Ginoo o sa pagbiya Kaniya. Uban sa sama nga gugma nga si Josue aduna alang sa iyang mga katawhan, ikaw makaawhag sa mga kabataan nga imong gitudloan sa pagpili sa pagserbisyo sa Ginoo “niining adlawa.”
Posible nga mga Kalihokan
-
Hangyoa ang mga kabataan sa pagsulti mahitungod sa mga pagpili nga ilang gihimo karon. Basaha ngadto sa mga kabataan gikan sa Josue 24:15: “Pagpili kamo niining adlawa kon kinsa ang inyong alagaran; … apan alang kanako ug sa akong balay, kami magaalagad sa Ginoo.” Giunsa sa mga kabataan pagpili sa pagserbisyo sa Ginoo karon? Unsa ang pipila ka mga paagi nga kita makapili sa pagserbisyo Kaniya matag adlaw?
-
Pagkanta og usa ka awit mahitungod sa paghimo og maayong mga pagpili, sama sa “Pilia ang Matarung nga Paagi” (Songbook sa mga Bata, 82–83). Unsay atong bation kon kita mopili sa pagserbisyo ni Jesukristo? Dapita ang mga kabataan sa pagdrowing og mga hulagway sa ilang mga kaugalingon nga nagbuhat og usa ka butang sa pagserbisyo sa Ginoo. Pakigbahin og usa ka istorya gikan sa imong kinabuhi o gikan sa usa ka magasin sa Simbahan mahitungod sa pagpili sa pagserbisyo sa Ginoo.
Itudlo ang Doktrina: Mas Dagko nga mga Bata
“Magmakusganon ka ug magmaisug.”
Human si Josue nahimong lider sa mga Israelite, ang Ginoo miawhag kaniya pinaagi sa pag-ingon, “Magmakusganon ka ug magmaisug” (Josue 1:6). Unsa ang makat-unan sa mga kabataan gikan ni Josue mahitungod sa unsa nga paagi mahimong makusganon ug maisug alang ni Kristo?
Posible nga mga Kalihokan
-
Dapita ang mga kabataan sa pagpangita og hugpong sa mga pulong nga gibalik diha sa Josue 1:6, 9, ug 18, ug isulat kini diha sa pisara (tan-awa usab sa bersikulo 7). Tabangi ang mga kabataan sa paghunahuna og mga katarungan nga kita tingali nagkinahanglan niini nga mensahe, ingon lamang ni Josue nga nanginahanglan. Pagribyu isip usa ka klase sa pipila ka mga istorya diha sa Josue 1–4; 6 , ug hangyoa ang mga kabataan sa pag-ila kon giunsa sa mga tawo dinhi niini nga mga istorya pagpakita og kaisug ug kusog.
-
Dapita ang mga kabataan sa pagsulti mahitungod sa usa ka tawo nga ilang kaila kinsa lig-on ug isug alang ni Jesukristo. Awhaga sila sa pagsulat og usa ka butang nga ilang gusto nga buhaton nga mahimong lig-on ug mas isug alang ni Kristo.
Ako makapamalandong diha sa mga kasulatan adlaw ug gabii.
Usa ka paagi nga mitabang ang Ginoo ni Josue sa pagpangandam alang sa mga hagit nga iyang giatubang mao ang pag-awhag kaniya sa “pagpamalandong” diha sa mga kasulatan “adlaw ug gabii.” Sa unsa nga paagi kaha kini nga tambag makapanalangin sa mga bata nga imong gitudloan?
Posible nga mga Kalihokan
-
Dapita ang mga kabataan sa pagsulat pila ka oras sa kasagaran nga adlaw ang ilang igahin sa nagkalain-laing mga kalihokan. Dayon dapita sila sa pagbasa diha sa Josue 1:8, mangita og usa ka butang nga kinahanglan nga buhaton natong tanan sa matag adlaw ug gabii. Dapita sila sa pagpangita og mga pulong ug mga hugpong sa mga pulong dinhi niini nga bersikulo nga nagtudlo kanato mahitungod sa mga panalangin sa pagtuon sa mga kasulatan. Sa unsa nga paagi ang pagpamalandong diha sa mga kasulatan nagtabang kanato sa pagbaton og kalampusan sa ubang mga butang nga kita nagbuhat sa matag adlaw?
-
Dapita ang mga kabataan sa pagbasa og dungan sa mosunod nga mga kasulatan: Josue 1:8; 1 Nephi 15:23–24; 2 Nephi 31:20; 32:3; Jacob 4:6; Helaman 3:29–30. Hangyoa ang mga kabataan sa pagpangita og usa ka pulong o hugpong sa mga pulong diha sa matag tudling nga nagtudlo kanila mahitungod sa gahum sa pagtuon sa mga kasulatan. Unsa nga mga tumong ang ilang himoon alang sa ilang personal nga pagtuon sa kasulatan?
Ako makapili sa pagserbisyo ni Jesukristo.
Uban sa katapusan nga mga pulong ni Joshue ngadto sa mga Israelite mao ang usa ka pangamuyo sa “pagpili … niining adlawa kon kinsa ang inyong alagaran.” Pamalandonga kon sa unsa nga paagi nga kini nga tambag makapanalangin usab sa mga bata nga imong gitudloan.
Posible nga mga Kalihokan
-
Dapita ang mga kabataan sa paghimo og usa ka poster gamit ang pipila sa mga importanting mga pulong ug mga hugpong sa mga pulong diha sa Josue 24:15. Ipakigbahin nila ang ilang mga poster ug ipasabut nganong ilang gipili kadto nga mga pulong. Sa unsa nga paagi kita makapakita sa Dios nga kita mipili sa pag-alagad Kaniya?
-
Dapita ang mga kabataan sa pagsugyot og mga sitwasyon diin sila mahimong kinahanglan nga mohukom sa pagpili sa Dios labaw sa ubang mga butang. Hangyoa sila sa paghunahuna kon unsa ang ilang pagabuhaton. Nganong importante ang “pagpili … niining adlawa” kay sa maghulat alang sa sitwasyon nga moabut? Sa unsa nga paagi kita mapanalanginan kon kita maghimo og tarung nga pagpili?
Awhaga ang Pagkat-on diha sa Panimalay
Dapita ang mga kabataan sa pagpili og usa ka butang nga inyong giistoryahan nga ilang gusto nga ipakigbahin ngadto sa ilang pamilya. Awhaga sila sa paghunahuna og paagi nga sila mahimong makigbahin niini sa umaabut nga semana.
Pagpalambo sa Atong Pagtudlo
Tabangi ang mga bata nga mahimong mas maayo nga mga tigkat-on. Ang imong katuyoan sa pagtudlo sa mga bata dili lamang ang pagpaambit sa kamatuoran ngadto kanila. Ikaw kinahanglan usab nga motabang kanila nga molambo ngadto sa pagbarug sa kaugalingong paningkamot nga mga tigpangita sa kamatuoran.