bukid

Usa ka bukid sa Ehipto gituohan sa kinaraan nga mao ang Bukid sa Sinai.

Abril 18–24

Exodo 18–20

“Ang Tanan nga Giingon sa Ginoo Among Pagabuhaton”

Samtang magbasa ka sa Exodo 18–20, hunahunaa ang mga baruganan nga mas makahuluganon sa mga bata. Tingali madasig ka sa paghatag og gibug-aton sa usa ka baruganan gawas niadtong mga gisugyot diha sa ubos.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga bata sa pagpaambit og usa sa Napulo ka mga Sugo (o ribyuha ang pipila ka mga sugo ngadto kanila) ug kon nganong mibati sila nga importante ang pagsunod sa sugo.

pagtudlo nga icon

Itudlo ang Doktrina: Mas Gagmay nga mga Bata

Exodo 18:8–12

Ang pagpaambit sa akong pagpamatuod makapanalangin sa uban.

Si Jetro nagmaya sa dihang si Moises mipaambit sa unsay nahimo sa Ginoo alang sa mga anak sa Israel. Kini nga istorya makadasig sa mga bata nga imong gitudloan sa pagpaambit ngadto sa uban nga ang ilang nahibaloan tinuod.

Posible nga mga Kalihokan

• Basaha ngadto sa mga bata ang mosunod nga mga pulong gikan sa Exodo 18:8: “Ug gisugilon ni Moises sa iyang ugangan nga lalaki ang tanan nga mga butang nga gibuhat sa Ginoo.” Pangutan-a ang mga bata kon nakahinumdom ba sila unsay gibuhat sa Ginoo sa pagtabang sa mga anak sa Israel aron makalayas gikan sa Ehipto. (Aron matabangan sila sa paghinumdom, pagpakita og mga litrato o mga pahina sa kalihokan gikan sa mga miagi nga leksyon). Unsa nga mga butang ang nahimo sa Ginoo sa pagtabang kanato? Tabangi ang mga bata nga mahibalo nga sama kang Moises, kita makasulti sa ubang tawo mahitungod sa talagsaong mga butang nga gihimo sa Ginoo alang kanato.

• Ang klase sa Primary mamahimo nga usa ka maayong dapit para sa mga bata aron mapraktis ang pagpaambit og yano nga pagpamatuod. Ipaambit ang imong pagpamatuod ngadto kanila, ug tabangi sila nga makapaambit ngadto sa usag usa og mga kamatuoran sa ebanghelyo nga ilang gituohan.

Exodo 20:3–17

Ang Dios mihatag og mga sugo tungod kay gusto Siya nga ako magmalipayon.

Ang mga sugo mao ang mga instruksyon sa Langitnong Amahan alang sa pagpangita og kalinaw niining kinabuhia ug kalipay sa kahangturan. Unsaon nimo pagdasig ang mga bata sa pagsunod sa mga sugo sa Dios?

Posible nga mga Kalihokan

• Ipakita ang mga litrato gikan sa “Ang Napulo ka mga Sugo” (diha sa Mga Istorya sa Daang Tugon), ug dapita ang mga bata sa pagpaambit unsay ilang nahibaloan mahitungod sa istorya. Tabangi sila nga makasabut sa bisan unsang bahin sa istorya nga dili nila pamilyar.

• Samtang magbasa ka sa pipila ka sugo gikan sa Exodo 20:3–17 ngadto sa mga bata (o sa pagpasayon sa mga pulong nga sila makasabut), dapita sila sa pagpataas sa ilang kumagko [thumbs up] kon ang mga sugo mahitungod sa butang nga angay natong buhaton ug padulong sa ubos ang kumagko [thumbs down] kon mahitungod kini sa butang nga dili nato angayang buhaton. Ipaambit ang imong pagpamatuod mahitungod sa kalipay nga moabut gikan sa pagsunod sa mga sugo sa Dios (tan-awa sa Mosiah 2:41).

• Kantaha uban sa mga bata ang awit mahitungod kon sa unsang paagi ang Langitnong Amahan mopanalangin kanato kon kita motuman sa mga sugo, sama sa “Sunda ang Kasugoan” (Songbook sa mga Bata, 68–69). Dapita ang mga bata sa pagpaminaw sa mga pulong aron mahibalo kon unsa nga mga panalangin ang atong madawat kon kita mosunod.

Exodo 20:12

Ako makatahud sa akong mga ginikanan.

Ang pagtahud sa mga ginikanan naglakip og labaw pa kay sa pagsunod lang kanila. Tabangi ang mga bata nga makasabut sa ubang mga paagi nga sila makatahud sa ilang mga ginikanan.

Posible nga mga Kalihokan

• Tabangi ang mga bata nga makakat-on sa mga pulong nga “Tahuron mo ang imong amahan ug ang imong inahan” (Exodo 20:12). Kon gikinahanglan, ipasabut nga ang “pagtahud” og usa ka tawo pweding magpasabut sa pagpakita og respeto kanila o sa paghatag kanila og kalipay. Unsay gihimo ni Jesus sa pagtahud sa Iyang Langitnong Amahan? Giunsa Niya sa pagtahud ang Iyang inahan? (tan-awa sa Lucas 2:48–51; Juan 19:26–27). Tabangi ang mga bata sa paghunahuna og mga butang nga ilang mabuhat aron sa pagtahud sa ilang mga ginikanan, ug dapita sila sa pag-aksyon sa ilang mga ideya.

• Dapita ang mga bata sa paghimo og usa ka kard sa pasalamat alang sa ilang mga ginikanan. Pwede nilang sulatan o drowingan ang sulod sa kard og butang nga ilang mabuhat sa pagtahud sa ilang mga ginikanan.

pagtudlo nga icon

Itudlo ang Doktrina: Mas Dagko nga mga Bata

Exodo 18:13–26

Makatabang ako sa “pagpas-an sa palas-anon” sa pagbuhat sa buluhaton sa Ginoo.

Si Moises nakakat-on nga ang pagpaningkamot sa pagpangulo sa Israel nga siya ra “dili maayo” (Exodo 18:17). Ang paghigugma ug pagserbisyo sa usag usa makatabang nga mogaan ang palas-anon sa atong mga lider.

Posible nga mga Kalihokan

• Dapita ang mga bata sa pagdrowing og daghang mga lingin diha sa pisara sa pagrepresentar og mga sakop sa ward. Pagdrowing og lingin nga sulatan og bishop. Ngano kaha nga problema man kon ang bishop mag-inusara lang sa pagtabang sa tanan? Magdungan sa pagbasa sa Exodo 18:13–26 aron makita kon unsa nga tambag ang gihatag ni Jetro dihang si Moises misulay sa paghimo sa tanan nga siya ra. Hangyoa ang mga bata sa pagbutang og ngalan sa ubang mga lingin sa pagrepresentar sa ubang mga lider sa ward ug mga miyembro kinsa mitabang sa bishop sa pagserbisyo sa uban. Sa unsang paagi kining uban nga mga lider ug mga miyembro mihimo sa palas-anon sa bishop nga mas gaan? Sa unsang paagi kita makahimo sa samang butang alang sa atong mga lider sa ward? alang sa atong mga ginikanan diha sa panimalay?

• Tabangi ang mga bata nga mohimo og lista sa mga lider sa inyong ward. Isip usa ka klase, pagpili og usa ug hisguti unsay gihimo niining tawhana sa pagtuman sa mga sugo sa Ginoo ug unsay mahimo sa mga bata sa pagtabang.

  lalaki nga nakiglamano sa usa ka babaye

  Ang pagserbisyo sa ubang tawo usa ka paagi nga kita makatabang sa buluhaton sa Ginoo.

Exodo 20:1–7

Importante ang pagbutang og una sa Ginoo sa akong kinabuhi.

Kitang tanan aduna sa tanang butang nga tingali kita matintal nga maoy atong unahon sa atong kinabuhi kay sa Dios. Unsaon nimo sa pagtabang ang mga bata nga makasabut unsay buot ipasabut sa pag-una sa Langitnong Amahan?

Posible nga mga Kalihokan

• Magdungan sa pagbasa sa Exodo 20:1–7, ug ipasabut nga ang bisan unsa nga atong unahon kay sa Dios sa atong kinabuhi posibling masusama kini sa “lain nga mga dios” ug “[mga] larawan nga linilok” nga gihisgutan diha sa mga bersikulo 3–4. Pangutan-a ang mga bata ngano nga ang Langitnong Amahan gusto nga Siya ang atong unahon. Unsa nga mga panalangin ang Iyang gisaad kanato kon kita mobuhat niini? Pangutan-a ang mga bata kon unsaon nato sa pagpakita sa Langitnong Amahan nga Siya mas importante kay sa bisan unsang butang sa atong kinabuhi.

• Paghunahuna og usa ka buluhaton nga adunay importante nga unang lakang, sama sa pagpanghunaw sa dili pa mokaon o pagsul-ob og medyas sa dili pa magsapatos. Unsa kahay mahitabo ko dili nato unahon ang importanting mga butang? Sa unsang paagi kini susama sa pagbutang og una sa Langitnong Amahan sa atong kinabuhi? Ipaambit ang imong pagpamatuod kon sa unsang paagi ang pagbutang og una sa Dios mipanalangin kanimo, ug dapita ang mga bata sa pagpaambit sa ilang mga pagpamatuod, usab.

• Kantaha ang usa ka awit mahitungod sa Langitnong Amahan, sama sa “Gihigugma Ako sa Langitnong Amahan” (Songbook sa mga Bata, 16–17). Unsay atong makat-unan gikan sa awit mahitungod kon nganong importante ang pagbutang og una sa Langitnong Amahan sa atong kinabuhi?

Exodo 20:3–17

Ang Dios mihatag og mga sugo tungod kay gusto Siya nga ako magmalipayon.

Ang mga bata mas may kalagmitan nga motuman sa mga sugo kon makita nila kini isip mga pagpahayag sa gugma sa Dios ug isip mga oportunidad sa pagpahayag sa ilang gugma Kaniya.

Posible nga mga Kalihokan

• Pag-andam og mga ginunting nga papel nga nahisulat ang mga sugo sa Exodo 20:3–17 diha niini. Isulat ang mga numero uno hangtud sa napulo diha sa pisara, ug dapita ang mga bata sa pagbutang sa unang ginunting nga papel sa eksaktong pagkahan-ay diha sa pisara. Hisguti kon sa unsang paagi kita makasunod niini nga mga sugo.

• Dapita ang mga bata sa pagdrowing og mga litrato sa mahinungdanong mga pulong [keywords] gikan sa mga sugo sa pagtabang kanila nga mahinumdom niini.

• Isugilon ang istorya mahitungod ni Chloe gikan sa mensahe ni Sister Carole M. Stephens “Kon Nahigugma Kamo Kanako, Inyong Pagatumanon ang Akong mga Sugo” (Liahona, Nob. 2015, 118–20). Sa unsang paagi ang istorya makatabang kanato sa pagsabut nganong ang Ginoo mihatag kanato og mga sugo? Sa unsang paagi ang pagkamasulundon nagpakita sa atong gugma alang sa Dios?

pagkat-on nga icon

Awhaga ang Pagkat-on diha sa Panimalay

Dapita ang mga bata sa paghunahuna og butang nga gusto nilang buhaton tungod kay nakakat-on sila sa klase. Tabangi sila nga makahimo og yanong pahinumdom kon unsay ilang buhaton nga pwede nilang madala uli sa panimalay.

Pagpalambo sa Atong Pagtudlo

Tabangi ang mga bata sa pagmatikod sa Espiritu. Ang mga bata makamatikod sa impluwensya sa Espiritu. Tudloi sila nga ang mga pagbati sa kalinaw, gugma, ug kainit nga ilang gibati kon sila magsulti o magkanta mahitungod ni Jesukristo ug sa Iyang ebanghelyo naggikan sa Espiritu Santo.

pahina sa kalihokan: Makahimo ako sa pagsunod sa mga sugo