“Abril 4–10. Exodo 14–17: ‘Dili Kamo Maglihok, ug Tan-awa Ninyo ang Kaluwasan sa Ginoo,’” Dali, Sunod Kanako—Alang sa Primary: Daang Tugon 2022 (2021)
“Abril 4–10. Exodo 14–17,” Dali, Sunod Kanako—Alang sa Primary: 2022
Ang Pulang Dagat
Abril 4–10
Exodo 14–17
“Dili Kamo Maglihok, ug Tan-awa Ninyo ang Kaluwasan sa Ginoo”
Samtang magbasa ka sa Exodo 14–17, irekord ang espiritwal nga mga impresyon nga imong nadawat. Kini nga mga impresyon makatabang nga imong maplano ang pagtudlo sa mga kasulatan ug ang mga kamatuoran nga imong nakat-unan ngadto sa mga bata.
Irekord ang Imong mga Impresyon
Dapita ang Pagpaambit
Ang Exodo 14–17 puno sa halandumong mga istorya. Dapita ang pipila ka mga bata sa pagpaambit og usa ka istorya nga ilang nahibaloan gikan niini nga mga kapitulo, kauban sa butang nga ilang nakat-unan gikan niini.
Itudlo ang Doktrina: Mas Gagmay nga mga Bata
Ang Ginoo miluwas ni Moises ug sa iyang katawhan.
Ang pagbahin sa Pulang Dagat usa ka milagro nga nagpakita kang Moises ug sa mga Israelite kon unsa ka gamhanan ang Ginoo. Ang kahibalo mahitungod sa Iyang gahum makatabang sa mga bata sa pagsalig Kaniya.
Posible nga mga Kalihokan
-
Paghunahuna og mga paagi sa pagpaambit sa istorya mahitungod sa mga Israelite nga mitabok sa Pulang Dagat sa usa ka makaikag ug halandumon nga paagi. Sama pananglit, ikaw o laing miyembro sa ward pweding magsinina og sama kang Moises aron mosugilon sa istorya gikan sa Exodo 14:5, 9–10, 13–16, 19–22. Ang mga bata magpakaaron-ingnon nga ang mga lingkuranan nga maoy Pulang Dagat, ug pwede silang mosunod sa tawo nga nagdala isip si Moises samtang mohimo siya og dalan taliwala niini. O ang mga bata pweding magpakaaron-ingnon nga maoy tubig ug mobalhin ngadto sa managlahi nga kilid sa kwarto samtang bahinon sila ni Moises. Ipasabut pag-ayo nga ang Ginoo mihatag kang Moises og gahum sa pagbahin sa dagat aron ang mga Israelite maluwas gikan sa pagkaulipon.
-
Dapita ang mga bata sa pagkolor sa pahina sa kalihokan samtang imong ribyuhon uban nila ang istorya gikan sa Exodo 14:5–22. Dayon pwede silang magtinabangay sa pagsugilon sa istorya gamit ang pahina sa kalihokan.
Exodo 15:23–25; 16:14–15; 17:1–6
Ang Ginoo mohatag sa akong panginahanglan.
Ang mga asoy bahin sa Ginoo nga naghatag og pagkaon ug tubig alang sa mga Israelite didto sa kamingawan nagtudlo kanato nga Siya makahatag sa atong panginahanglan. Pamalandunga unsay imong mabuhat aron mapaapil ang mga bata sa pagkat-on niini nga mga istorya.
Ang mana nga gikan sa Dios mibusog sa Israel sa pisikal nga paagi, kita usab nagkinahanglan og inadlaw nga espirituhanong pag-alima. Fresco ni Leopold Bruckner
Posible nga mga Kalihokan
-
Tabangi ang mga bata sa pag-aksyon sa mga hitabo diha sa Exodo 15:23–25; 16:14–15; 17:1–6, nga magpakaaron-ingnon nga si Moises o mga Israelite. Kon mahimo, pagdala og usa ka butang sa pagtabang nga masugilon ang matag istorya, sama sa usa ka sanga (aron tambalan ang tubig sa Mara), usa ka garapon o banga (nga pun-on og mana), ug usa ka tuod ug bato (alang sa tubig sa Horeb). Giunsa sa Dios sa pag-atiman ang mga Israelite? Giunsa Niya kita sa pag-atiman matag adlaw?
-
Sa daklit ipaambit ang mga istorya nga naa sa Exodo 15:23–25; 16:14–15; 17:1–6 (tan-awa usab sa “Ang mga Israelite sa Kamingawan,” sa Mga Istorya sa Daang Tugon). Samtang magpaambit ka, dapita ang mga bata sa pagdrowing og mga litrato sa matag istorya. Unsay atong nakat-unan mahitungod sa Dios gikan niini nga mga istorya?
Ako makapaluyo [sustain] sa atong propeta.
Ang istorya bahin ni Aaron ug ni Hur nga mipataas sa mga kamot sa propeta nga si Moises ikakumpara sa atong mga paningkamot sa pagpaluyo sa atong buhi nga propeta.
Posible nga mga Kalihokan
-
Pagdapit og tulo ka bata nga mobarug atubangan sa kwarto ug magrepresentar kang Moises, Aaron, ug Hur samtang isugilon nimo ang istorya gikan sa Exodo 17:8–16. Unsay atong mabuhat karon sa pagtabang sa atong propeta, sama nga si Aaron ug si Hur mitabang sa propeta nga si Moises?
-
Ipakita ang usa ka litrato sa buhi nga propeta, ug pangutan-a ang mga bata kon kinsa siya. Tabangi ang mga bata sa paghinumdom og pipila ka butang nga gitudlo sa propeta bag-ohay lang. Hangyoa ang mga bata sa pagpaambit og pipila ka mga paagi nga sila nagsunod sa propeta. Kantaha og dungan ang pipila ka bersikulo sa “Sunda ang Propeta,” lakip ang katapusang bersikulo (Songbook sa mga Bata, 58–59).
Itudlo ang Doktrina: Mas Dagko nga mga Bata
Ako makakat-on sa kanunay sa pagsunod sa Espiritu.
Si Moises nahibalo pinaagi sa pagpadayag unsaon sa pagpangulo ang mga Israelite tabok sa Pulang Dagat (tan-awa sa Doktrina ug mga Pakigsaad 8:2–3). Sa unsang paagi kini nga istorya makatabang sa mga bata nga imong gitudloan aron sundon ang personal nga pagpadayag?
Posible nga mga Kalihokan
-
Ipakita ang litrato ni Moises nga mibahin sa Pulang Dagat diha sa outline karong semanaha sa Dali, Sunod Kanako—Alang sa mga Indibidwal ug mga Pamilya. Hangyoa ang mga bata sa pagribyu sa Exodo 14:5–22 ug sa pagpaambit og butang nga ilang nahibaloan mahitungod sa istorya. Unsa ang gikadugang sa Doktrina ug mga Pakigsaad 8:2–3 diha sa atong panabut bahin sa istorya? Isugilon ang mahitungod sa usa ka kasinatian dihang ang Espiritu Santo misulti kanimo og butang diha sa imong hunahuna o kasingkasing, ug dapita ang mga bata sa paghisgot mahitungod sa ilang mga kasinatian.
-
Pahinumdumi ang mga bata bahin sa istorya ni Nephi nga misunod sa Espiritu sa dihang miadto siya sa pagkuha sa mga palid nga tumbaga (tan-awa sa 1 Nephi 4:1–6). Tabangi ang mga bata aron makakita nga si Moises usab kinahanglan nga mosunod sa Espiritu sa dihang nangulo siya sa iyang katawhan tabok sa Pulang Dagat. Tabangi ang mga bata sa pagsulat og bag-ong bersikulo sa “Ang Kaisug ni Nephi” (Songbook sa mga Bata, 64–65) mahitungod kon sa unsang paagi ang Ginoo mihatag og paagi kang Moises sa dihang mipakita siya og kaisug ug misunod sa Espiritu. Kantaha og dungan ang bag-ong bersikulo.
Exodo 15:23–25; 16:14–15; 17:1–6
Ang Ginoo mohatag sa akong panginahanglan.
Kon moduol kita kang Jesukristo, Siya makatabang kanato atol sa lisud nga mga panahon sa atong kinabuhi, sama sa Iyang pagtabang sa mga anak sa Israel.
Posible nga mga Kalihokan
-
Bahina ang klase nga magpares-pares o sa ginagmay nga pundok, ug i-assign ang matag pundok sa pagbasa og usa sa mosunod nga mga tudling: Exodo 15:23–25; 16:14–15; 17:1–6. Hangyoa ang mga bata diha sa matag grupo sa pagdrowing og mga litrato nga nagrepresentar kon unsay ilang nabasa dinhi niini nga mga bersikulo, ug dayon hangyoa ang ubang sakop sa klase sa pagtag-an unsay ilang gidrowing. Tabangi ang mga bata sa pag-ila kon unsay gitudlo niini nga mga istorya mahitungod ni Jesukristo. Unsa nga mga pagsulay ang anaa karon sa mga tawo? Sa unsang paagi ang Langitnong Amahan ug si Jesukristo makatabang kanato sa atong mga pagsulay?
-
Samtang magribyu ka niini nga mga istorya, pangutan-a ang mga bata nganong ang pan ug ang tubig importante kaayo sa mga anak sa Israel. Unsa kaha unta ang nahitabo kon wala pa sila niining mga butanga? Tabangi ang mga bata nga makasabut nga ang pan ug tubig sa sakramento sa espiritwal nga paagi atong gikinahanglan (tan-awa sa Juan 4:13–14; 6:35, 48–51). Tingali mahangyo nimo ang mga bata sa pagpaambit sa ilang mga pagbati mahitungod sa sakramento.
Mapanalanginan kita kon kita mopaluyo sa atong mga lider sa Simbahan.
Ang mga anak sa Israel nagmadaugon lamang sa pakig-away batok ni Amalek sa dihang ang mga kamot ni Moises gipataas sa kahanginan. Unsay atong makat-unan mahitungod sa pagpaluyo sa atong mga lider gikan niini nga istorya?
Posible nga mga Kalihokan
-
Aron matabangan ang mga bata nga maribyu ang istorya sa Exodo 17:8–16, isulat diha sa pisara ang: Kinsa ang mitabang ni Moises panahon sa away? Unsay ilang gibuhat? Unsay resulta? Dapita ang mga bata sa pagpangita og mga tubag diha sa mga bersikulo. Unsa ang gitudlo niini nga istorya mahitungod kon unsaon nato nga makatabang sa gingharian sa Dios nga magmalampuson? Unsay atong mabuhat aron makasuporta, makapaluyo, ug makasunod sa mga lider sa Simbahan?
-
Dapita ang mga bata sa pagbasa sa Exodo 17:8–16 ug sa pagdrowing og usa ka litrato sa unsay ilang nabasa. Awhaga sila sa pagsulat diha sa ilang drowing og usa ka mensahe nga ilang nakat-unan gikan sa istorya. Ngano nga importante kini nga mensahe para kanato karon?
Awhaga ang Pagkat-on diha sa Panimalay
Dapita ang mga bata sa pagpili og usa sa mga istorya gikan sa inyong diskusyon karon. Tabangi sila sa paghunahuna og butang nga ilang mabuhat sa sunod semana aron magamit kon unsay gitudlo niana nga istorya.
Pagpalambo sa Atong Pagtudlo
Ang mga bata ganahan og mga istorya. Ang mga bata mas makasabut sa mga baruganan sa ebanghelyo kon makita nila kini diha gayud sa kinabuhi sa mga tawo. Samtang magpaambit ka og mga istorya sa kasulatan, ikonsiderar ang pagpaambit og mga kasinatian gikan sa imong kinabuhi nga nagtudlo og susama nga mga baruganan. Mahimo usab nimong dapiton ang mga bata sa pagpaambit sa ilang mga kasinatian.