“Pebrero 21–27. Genesis 24–27: Ang Pakigsaad Gibag-o,” Dali, Sunod Kanako—Alang sa Primary: Daang Tugon 2022 (2021)
“Pebrero 21–27. Genesis 24–27,” Dali, Sunod Kanako—Alang sa Primary: 2022
Paghulagway kang Rebeca, pinaagi ni Dilleen Marsh
Pebrero 21–27
Genesis 24–27
Ang Pakigsaad Gibag-o
Samtang magbasa ka sa Genesis 24-27 ug mag-andam sa pagtudlo, hunahunaa ang mga bata sa imong klase. Unsay gikinahanglan nilang madungog? Hain niini nga mga kalihokan ang makahuluganon kanila? Basi sa ilang panginahanglan, pwede nimong ipahiangay ang bisan unsang kalihokan nga gilakip dinhi o niadtong anaa sa Dali, Sunod Kanako—Alang sa mga Indibidwal ug mga Pamilya.
Irekord ang Imong mga Impresyon
Dapita ang Pagpaambit
Sa ilawom sa matag lingkuranan sa bata, pagbutang og pangutana mahitungod sa hitabo o baruganan nga naa sa Genesis 24–27. Patubaga ang mga bata sa mga pangutana kon mahimo nila, o dapita sila sa pagpaminaw alang sa mga tubag panahon sa leksyon.
Itudlo ang Doktrina: Mas Gagmay nga mga Bata
Mahimo akong magmabination sa uban.
Ang sulugoon ni Abraham nakadayeg sa talagsaong kamabination nga gipakita ni Rebeca kaniya pinaagi sa pagtanyag og tubig dili lang ngadto niya apan sa iyang 10 ka kamelo usab. Ang iyang ehemplo mahimo nga usa ka pahinumdom aron ang mga bata kanunayng magmabination sa uban.
Usa ka atabay sa karaang Beer-sheba, diin si Abraham ug Isaac mikalot og mga atabay.
Posible nga mga Kalihokan
-
Ipakita ang litrato ni Rebeca nga ania niini nga pahina sa kalihokan karong semanaha. Ipasabut pag-ayo ang mga detalye diha sa litrato samtang i-summarize nimo ang istorya sa Genesis 24:10–21, diin mipakita si Rebeca og kamabination ngadto sa sulugoon ni Abraham. Ipasabut pag-ayo nga ang iyang mga pulong ug buhat sa pagkamabination mga timailhan nga si Rebeca mao ang gusto sa Dios nga minyoan sa anak ni Abraham nga si Isaac. Dapita ang mga bata nga magpakaaron-ingnon nga sulugoon nga miabut kauban sa iyang mga kamelyo o si Rebeca nga nagkalos og tubig para kanila. Hatagi sila og mga pulong nga isulti gikan sa mga kasulatan, sama sa “Paimna ako … og diyutay nga tubig” (bersikulo 17) ug “alang sa imong mga kamelyo usab magakalos ako og tubig” (bersikulo 19). Nganong importante nga kita magmabination sa uban?
-
Isugilon ang usa ka istorya kon sa unsang paagi ang Manluluwas mipakita og kamabination ngadto sa usa ka tawo. Dapita ang pipila ka mga bata sa pagpaambit sa kaugalingon nilang mga kasinatian sa pagpakita og kamabination.
-
Pagsugyot og pipila ka mga sitwasyon diin ang usa ka bata makapakita og kamabination, sama sa pakigdula sa mga higala o pakigtagbo og usa nga bag-o sa eskwelahan. Pangutan-a ang mga bata kon unsa ang ilang buhaton aron magmabination dinhi niini nga sitwasyon.
-
Kantaha uban sa mga bata ang usa ka awit mahitungod sa pagbinuotan, sama sa “Pagkamabination Magagikan Kanako” o “Maninguha Kong Mahimong Mahisama Kang Jesus” (Songbook sa mga Bata, 83, 40–41). Dapita ang mga bata sa pagpaminaw sa pulong nga “kamabination” (o sa susamang pulong) ug mobarug kon madungog nila kini. Unsaon nato sa pagpakita og kamabination ngadto sa uban? Kini nga pahina sa kalihokan karong semanaha makatabang niini nga diskusyon.
Makapili ako sa mga butang nga pinakaimportante.
Kay si Esau man ang kinamagulangang anak sa iyang pamilya, unta siya ang makakuha sa espesyal nga mga responsibilidad ug mga pribilehiyo, nga gitawag og katungod sa pagkamagulang [birthright]. Usa ka adlaw sa dihang si Esau gigutom, iyang gibaylo ang iyang katungod sa pagkamagulang ngadto sa iyang igsoon, si Jacob, alang sa pipila ka pagkaon. Kini nga istorya makatudlo sa mga bata nga pilion gayud nato ang mohangtud nga mga butang labaw sa temporaryong katagbawan.
Posible nga mga Kalihokan
-
Pagdala sa klase og pipila ka butang nga makatabang sa pagsugilon sa istorya bahin ni Esau nga nagbaligya sa iyang katungod sa pagkamagulang, sama sa usa ka panaksan ug litrato sa tawo nga nagdawat og panalangin sa pagkapari. Dapita ang mga bata sa paggamit sa maong mga butang samtang mosulti sila nimo unsay ilang nahibaloan mahitungod sa istorya. Ang “Jacob ug Esau” (sa Mga Istorya sa Daang Tugon) makatabang. Magdungan sa pagbasa sa Genesis 25:34, ug ipasabut nga kinsa man ang aduna sa katungod sa pagkamagulang adunay espesyal nga mga pribilehiyo ug mga responsibilidad sa pag-atiman sa uban pa diha sa pamilya.
-
Pagpakita sa mga bata og duha ka litrato: ang usa butang nga may dakong espiritwal nga bili (sama sa templo) ug ang usa butang nga magdala og temporaryong kalipay (sama sa dula, dulaanan, o mga pagkaon). Hangyoa sila sa pagpili asa nga butang ang mas makatabang kanatong makabalik sa atong Langitnong Amahan. Balika sa lain na usab nga litrato.
-
Kantaha ang usa ka awit mahitungod sa paghimo og maayong mga pagpili, sama sa “Pilia ang Matarung nga Paagi” (Songbook sa mga Bata, 82–83) uban sa mga bata. Ipamatuod nga mabulahan kita ug magmalipayon kon mopili kita sa matarung.
Itudlo ang Doktrina: Mas Dagko nga mga Bata
Mapanalanginan ako kon ako molihok inubanan sa pagtuo ug magpakita og kamabination ngadto sa uban.
Ang sulugoon ni Abraham mipakita og pagtuo pinaagi sa pagsalig sa giya sa Dios sa pagpangita og asawa para ni Isaac. Si Rebeca mipakita og kamabination sa paagi sa iyang pagtagad sa sulugoon ni Abraham. Unsaon nimo sa pagtabang ang mga bata nga imong gitudloan nga makasunod sa mga ehemplo sa sulugoon ni Abraham ug ni Rebeca?
Posible nga mga Kalihokan
-
Basaha og dungan ang Genesis 24:1–28, ug tabangi ang mga bata sa pagpangita sa mga ehemplo bahin sa pagtuo ug kamabination (tan-awa sa, sama pananglit diha sa, mga bersikulo 12–14 ug 17–20). Sa unsang paagi ang sulugoon ni Abraham ug si Rebeca napanalanginan pinaagi sa pagpakita og pagtuo ug kamabination? Isulat diha sa pisara ang Makapakita kita og pagtuo pinaagi sa … ug Makapakita kita og kamabination pinaagi sa … , ug dapita ang mga bata sa pagsugyot og mga paagi sa pagkompleto niini nga mga kapahayag [sentence].
-
Diha sa mga ginunting nga papel, pagsulat og mga butang nga gisulti o gibuhat sa sulugoon ni Abraham ug sa mga butang nga gisulti ni Rebeca o gibuhat diha sa Genesis 24:1–28. Dapita ang mga bata nga ang matag usa mopili og usa ka ginunting nga papel ug magtinabangay sa pagtag-an kon kinsa ang misulti o mibuhat niining mga butanga (mahimo silang mogamit sa mga kasulatan kon nagkinahanglan sila og tabang). Unsay gikatudlo niini nga istorya mahitungod sa kamabination? Unsa may gitudlo niini kanato mahitungod sa pagtuo? Ang ubang mga ehemplo sa kamabination makita sa Genesis 24:29–33, 58–61.
-
Dapita ang mga bata sa paghunahuna sa usa ka buhat sa kamabination nga ilang nakita. Dapita sila sa pagsulat niini ug sa pagpaambit niini diha sa klase o sa ilang mga pamilya diha sa panimalay. Unsay atong bation kon dunay tawo nga nagmabination kanato?
Akong hatagan og bili ang mahangturong mga butang imbis ang temporal nga mga butang.
Si Esau mipili nga ibaylo ang butang nga may dakong bili, ang iyang katungod sa pagkamagulang, alang sa butang nga gamay ra og bili, sa pipila ka pan ug usa ka panaksan nga sabaw. Samtang magbasa ka niini nga mga bersikulo, pamalandungi unsaon nimo sa pagtabang ang mga bata aron palabihon ang mga butang nga importante sa kahangturan.
Posible nga mga Kalihokan
-
Magdungan sa pagbasa sa istorya bahin ni Jacob ug ni Esau diha sa Genesis 25:21–34. Samtang magbasa kamo, dapita ang mga bata sa pagpili og butang nga drowingon gikan sa istorya. Dayon dapita sila sa paggamit sa ilang mga gidrowing sa pagsugilon sa istorya sa kaugalingon nilang mga pulong. Kon nagkinahanglan sila og tabang sa pagsabut kon unsa ang katungod sa pagkamagulang, awhaga sila sa pagbasa sa “Katungod sa Pagkatawo” diha sa Ang Giya ngadto sa mga Kasulatan (ChurchofJesusChrist.org). Dapita ang mga bata sa paghunahuna nga si Esau nangayo sa atong tambag mahitungod kon iya bang ibaylo ang iyang katungod sa pagkamagulang ngadto sa linuto; unsay atong isulti kaniya?
-
Isulti ang mahitungod sa usa ka higayon dihang kinahanglan nimong isakripisyo ang usa ka butang nga maayo alang sa laing butang nga mas dako og bili. Sa unsang paagi ang imong istorya may kalabutan sa pagpili nga gihimo ni Esau diha sa Genesis 25:29–34? Tabangi ang mga bata sa paghunahuna og mga panalangin nga gustong ihatag sa Langitnong Amahan kanila (sama sa mas lig-ong pagpamatuod, mga panalangin sa templo, o mahangturong kinabuhi uban Kaniya). Awhaga sila sa paghunahuna og mga butang nga andam nilang isakripisyo aron makadawat niining mga panalangin nga bililhon.
Awhaga ang Pagkat-on diha sa Panimalay
Dapita ang mga bata sa paghunahuna og usa ka tumong nga pwede nilang itakda alang sa ilang kaugalingon mahitungod sa baruganan nga ilang nakat-unan sa Primary karon. Sama pananglit, pwede silang magtakda og tumong nga magmabination ngadto sa uban diha sa panimalay.
Pagpalambo sa Atong Pagtudlo
Ang mga bata ganahan nga mopaambit sa unsay ilang nakat-unan. Bisan og gagmay pa sila, ang mga bata makapalig-on sa mga sakop sa ilang pamilya. Awhaga sila sa pagpaambit ngadto sa mga sakop sa ilang pamilya sa usa ka butang nga ilang nakat-unan sa Primary. (Tan-awa sa Pagtudlo sumala sa Pamaagi sa Manluluwas, 30.)