“Enero 17–23. Genesis 5; Moises 6: ‘Itudlo Kini nga mga Butang sa Gawasnon nga Paagi ngadto sa Imong mga Anak,’” Dali, Sunod Kanako—Alang sa Primary: Daang Tugon 2022 (2021)
“Enero 17–23. Genesis 5; Moises 6,” Itudlo Kini nga mga Butang sa Gawasnon nga Paagi ngadto sa Imong mga Anak: 2022
Mas Labaw pa kay sa Paraiso, ni Kendal Ray Johnson
Enero 17–23
Genesis 5; Moises 6
“Itudlo Kini nga mga Butang sa Gawasnon nga Paagi ngadto sa Imong mga Anak”
Ang imong pagpangandam sa pagtudlo magsugod samtang magtuon ka sa Genesis 5 ug Moises 6. Samtang maghimo ka niini, paminaw sa mga impresyon gikan sa Espiritu Santo mahitungod sa unsay gikinahanglan nga makat-unan sa mga bata.
Irekord ang Imong mga Impresyon
Dapita ang Pagpaambit
Diha sa mga pinirasong papel, pagsulat og pipila ka mahinungdanong mga pulong nga makatabang sa mga bata nga makahinumdom sa butang nga ilang nakat-unan sa panimalay karong semanaha o sa miaging leksyon sa Primary. Papuli-puliha ang mga bata sa pinasulagma nga pagpili og usa ka pulong. Human mapili ang usa ka pulong, dapita bisan kinsa nga bata sa pagpaambit og butang nga ilang nakat-unan nga may kalabutan niana nga pulong.
Itudlo ang Doktrina: Mas Gagmay nga mga Bata
Ang Dios makatabang kanako sa paghimo og mga butang nga lisud.
Dihang si Enoch gitawag nga magsangyaw sa ebanghelyo, nabalaka siya nga basin mapakyas siya. Apan ang Dios mitabang kaniya sa paghimo og talagsaong mga butang.
Posible nga mga Kalihokan
-
Hangyoa ang mga bata sa pagpaambit og usa ka panahon sa dihang gihangyo sila sa pagbuhat og butang nga lisud o makahadlok para nila. Ipaambit ang istorya mahitungod sa tawag ni Enoch nga mahimong propeta, nga makita sa Moises 6:27, 31–34 (tan-awa usab sa “Enoch,” sa Mga Istorya sa Daang Tugon). Ipasabut pag-ayo nga bisan og si Enoch wala mobati nga andam nga mahimong propeta, ang Dios misaad nga motabang kaniya. Tabangi ang mga bata nga makasabut sa ubang mga paagi nga ang Dios motabang kanato kon hangyoon kita sa paghimo og lisud nga mga butang.
-
Pagpaambit og pipila ka mga ehemplo gikan sa kasulatan sa dihang ang Dios mitabang sa mga tawo arons makahimo og lisud nga mga butang—sama pananglit, ni Noe nga nagtukod og arka, ni David nga nakig-away ni Goliath, ni Ammon nga nanalipud sa mga panon sa hari, o ni Samuel nga Lamanite nga nagsangyaw. (Alang sa mga litrato ug mga pakisayran sa kasulatan, tan-awa sa Libro sa mga Hulagway sa Ebanghelyo, mga nu. 7, 19, 78, 81.) Pagpaambit og usa ka kasinatian sa dihang ang Ginoo mitabang nimo sa paghimo og butang nga lisud.
Ang ebanghleyo nagtudlo kanako unsaon sa pagbalik ngadto sa Langitnong Amahan.
Ang Dios mitudlo kang Adan unsay angay natong buhaton aron makabalik Kaniya—magbaton og pagtuo, maghinulsol, magpabunyag, ug modawat sa gasa sa Espiritu Santo. Unsaon nimo sa pagtabang ang mga bata sa pagkat-on og dugang mahitungod niining mga butanga?
Posible nga mga Kalihokan
-
Pangita o pagdrowing og mga litrato nga nagrepresentar og pagtuo, paghinulsol, bunyag, ug sa gasa sa Espiritu Santo (tan-awa kini nga pahina sa kalihokan karong semanaha). Ilinya sa pagbutang ang mga litrato padulong sa litrato ni Jesukristo. Basaha ang Moises 6:52 ngadto sa mga bata, ug hangyoa sila sa pagbarug tupad sa eksakto nga litrato kon madungog nila ang mga pulong nga nagrepresentar sa litrato (niini nga bersikulo, ang pulong nga “motuo” gigamit alang sa “pagtuo”).
-
Kantaha ang mga awit nga nagtudlo sa mga baruganan diha sa Moises 6:52, sama sa “Hugot nga Pagtuo,” “Tabangi Ko, Mahal nga Amahan” (bersikulo 2), “Kon Ako Bunyagan,” ug “Ang Espiritu Santo” (Songbook sa mga Bata, 50–51, 52, 53, 56). Tabangi ang mga bata nga makasabut nga ang paghimo sa mga butang nga gitudlo diha sa mga kanta makatabang nato nga makabalik sa Langitnong Amahan.
Ang Langitnong Amahan gusto nga ang mga ginikanan motudlo sa ilang mga anak.
Sukad sa kapanahunan ni Adan ug ni Eva, ang mga ginikanan gisugo na sa pagtudlo sa ilang mga anak sa ebanghelyo. Unsaon nimo sa pag-awhag ang mga bata aron maminaw ug mosunod sa matarung nga mga pagtulun-an sa ilang mga ginikanan?
Posible nga mga Kalihokan
-
Basaha ang Moises 6:58 ngadto sa mga bata, ug ipakita ang litrato sa pamilya ni Adan ug ni Eva nga anaa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya. Tabangi ang mga bata sa pagsubli og sulti sa mga pulong nga “itudlo kini nga mga butang sa gawasnong paagi ngadto sa imong mga anak.” Ipasabut nga gusto sa Dios nga ang tanang mga ginikanan mosunod sa ehemplo ni Adan ug ni Eva pinaagi sa pagtudlo sa ilang mga anak mahitungod ni Jesukristo ug sa Iyang ebanghelyo. Pangutan-a ang mga bata unsay ilang mahimo kon ang ilang mga ginikanan o ang uban motudlo kanila sa ebanghelyo.
-
Tabangi ang mga bata sa pagtugma sa kaugalingon nilang mga litrato ngadto sa litrato sa ilang mga ginikanan o sa mga litrato sa gagmay nga mga hayop ngadto sa dagko nga mga hayop. Sa unsang paagi ang mga ginikanan motabang sa ilang mga anak? Unsa ang ilang gitudlo kanila? Hangyoa ang mga bata sa pagdrowing og mga litrato sa ilang mga pamilya sa mga panahon nga ang ilang mga ginikanan nagtudlo sa mga bata, sama sa dungan nga pagbasa sa mga kasulatan, dungan nga pag-ampo, o dungan nga pagpangaon.
Imahepamilya nga nagtuon sa mga kasulatanAng mga ginikanan kinahanglan nga motudlo sa ebanghelyo ngadto sa ilang mga anak.
Itudlo ang Doktrina: Mas Dagko nga mga Bata
Ang Dios makatabang kanako sa paghimo og lisud nga mga butang.
Bisan og si Enoch mibati og kakulangan, ang Dios mitabang kaniya nga matuman ang iyang tawag isip propeta. Ang Dios makatabang usab sa mga bata nga imong gitudloan sa paghimo og lisud nga mga butang.
Posible nga mga Kalihokan
-
Basaha ang Moises 6:26–34 kauban sa mga bata. Nganong mibati man si Enos nga dili siya makasangyaw sa ebanghelyo? (tan-awa sa Moises 6:31). Giunsa sa Dios sa pagtabang si Enoch? (tan-awa sa Moises 6:32–34; 7:13).
-
Dapita ang mga bata sa pagngalan og pipila ka lisud nga mga butang nga usahay buhaton sa mga bata nga sama nila og edad (sama sa pagkompleto og usa ka assignment sa eskwelahan, pagmabination ngadto sa tawo nga dili mabination, o pagsulti sa tinuod kon makahimo sila og sayop). Tabangi ang mga bata sa pagpangita og mga pulong diha sa Moises 6:32–34 nga makatabang nila. Hangyoa ang mga bata sa pagpaambit og usa ka higayon sa dihang gitabangan sila sa Dios sa paghimo og butang nga lisud. Pagpaambit usab og kaugalingon nimong mga kasinatian.
Ang pagtuo, paghinulsol, bunyag, ug pagdawat sa Espiritu Santo mag-andam kanako aron makabalik sa Dios.
Si Adan ug si Enoch mitudlo sa ilang katawhan sa unang mga baruganan ug mga ordinansa sa ebanghelyo: pagtuo, paghinulsol, bunyag, ug pagdawat sa gasa sa Espiritu Santo (tan-awa usab sa Ang mga Artikulo sa Hugot nga Pagtuo 1:4). Unsay imong mahimo sa pagtabang sa mga bata sa pagsabut sa kaimportante niini nga mga baruganan ug mga ordinansa diha sa ilang kinabuhi?
Posible nga mga Kalihokan
-
Hangyoa ang mga bata sa pagbasa sa Moises 6:52, 57 sa pagpangita sa mga baruganan ug mga ordinansa sa ebanghelyo nga gihisgutan diha sa ikaupat nga artikulo sa hugot nga pagtuo.
-
Isulat ang ikaupat nga artikulo sa hugot nga pagtuo diha sa pisara, ug dapita ang mga bata sa pagbasa niini. Dayon papasa ang usa ka pulong o duha, ug ipabasa kini kanila pag-usab, nga isulti ang mga nawala nga pulong gikan sa ilang panumduman o gikan sa ilang nahinumduman. Balika kini nga proseso hangtud nga makat-unan sa mga bata ang artikulo sa hugot nga pagtuo.
-
Dapita ang mga bata sa pagsulat og mubo nga pakigpulong mahitungod sa pagtuo, paghinulsol, bunyag, o pagdawat sa gasa sa Espiritu Santo—usa ka butang nga pwede nilang ikapaambit sa ilang pamilya. Ang matag pakigpulong maglakip og usa ka kasulatan, usa ka kasinatian, ug usa ka pagpamatuod. Ang pakigpulong maglakip usab og pagpasabut sa unsang paagi ang baruganan makatabang nato nga makabalik sa Langitnong Amahan.
Ang mga ginikanan maoy responsable sa pagtudlo sa ilang mga anak.
Ang Dios mipiyal sa mga ginikanan nga maoy unang mga magtutudlo sa ebanghelyo diha sa ilang mga pamilya. Unsaon nimo sa pag-awhag ang mga bata aron mosuporta sa ilang mga ginikanan niini nga tahas?
Posible nga mga Kalihokan
-
Hangyoa ang usa ka bata nga mobasa sa Moises 6:58. Unsa nga sugo ang gihatag sa Langitnong Amahan ngadto sa mga ginikanan dinhi niini nga bersikulo? Pagpakita og usa ka litrato ni Adan ug ni Eva nga nagtudlo sa ilang mga anak (tan-awa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya), ug paistoryaha ang mga bata unsay ilang nakita diha sa litrato. Awhaga sila sa pag-istorya mahitungod sa kaimportante sa mga kamatuoran sa ebanghelyo nga ilang nakat-unan gikan sa ilang mga pamilya.
-
Tabangi ang mga bata sa paghimo og mga sulat-pasalamat ngadto sa ilang mga ginikanan o pagplano og laing mga paagi nga ilang mapahayag ang ilang pagpasalamat ngadto sa ilang mga ginikanan. Kantaha ang usa ka awit mahitungod sa mga pamilya, sama sa “Ang Gugma Gipamulong Dinhi” (Songbook sa mga Bata, 102–103). Unsaon nato sa pagtabang ang atong mga ginikanan sa paghimo og mahigugmaong palibut sa atong mga panimalay?
Awhaga ang Pagkat-on diha sa Panimalay
Unsaon nimo sa pagtabang ang mga bata nga magpadayon sa pagkat-on sa gawas sa klase? Mahimo nimo silang awhagon sa paghinumdom sa istorya bahin ni Enoch kon mag-atubang sila og butang nga lisud karong semanaha.
Pagpalambo sa Atong Pagtudlo
Gamita ang mga pahina sa kalihokan. Samtang magkolor ang mga bata sa mga koloranan nga pahina, ribyuha ang mga baruganan gikan sa leksyon. Basaha ang mga pulong nga anaa sa pahina ngadto sa mga bata kon gikinahanglan.